Amram

Amram is die vader van Moses, Aäron en Mirjam. Soos sy vrou Jogebed, behoort hy tot die stam van Levi.

Die naam Amram beteken “verhewe volk” en verwys na die volk Israel wat in Egipte gebly het. Amram behoort tot die stam van Levi soos sy vrou Jogebed, wat ook sy tante is (Eksodus 6:19). Saam het hulle drie kinders: Mirjam, Aäron en Moses.

Toe hulle jongste seun gebore is, steek Amram en Jogebed hom vir drie maande weg. Dit doen hulle omdat die farao opdrag gegee het dat al die seuntjies van die volk Israel in die Nyl gegooi moet word. Ná drie maande plaas Jogebed haar babaseuntjie in ʼn biesiemandjie Eksodus 2:3 en plaas hom tussen die riete op die oewer van die Nyl. Daar vind ʼn Egiptiese prinses hom en neem hom aan as haar seun en noem hom Moses. 

Daar bestaan nie ander verhale oor Amram in die Bybel nie, maar sy naam verskyn tog in geslagregisters om aan te dui wie aan watter familie behoort. In hierdie lyste word Amram as die vader van Aäron, Moses en Mirjam genoem (Numeri 26:59).