To The Word – Day 221

₁Haleluya!

Bongani uJehova, ngokuba muhle,

ngokuba umusa wakhe umi phakade.

₂Ngubani ongalanda izenzo zamandla zikaJehova,

azwakalise lonke udumo lwakhe, na?

₃Babusisiwe abaqaphela ukwahlulela kwakhe,

owenza ukulunga ngezikhathi zonke.

₄Ngikhumbule, Jehova,

ngomusa onawo kubantu bakho,

ungihambele ngensindiso yakho,

₅ukuze ngibone inhlanhla yabakhethiweyo bakho,

ngithokoze ngentokozo yesizwe sakho,

ngizibonge kanye nefa lakho.

₆Sonile kanye nawobaba;

senzile okubi, sonakala.

₇Obaba abaqondanga izibonakaliso zakho eGibithe,

abakhumbulanga ubuningi bezenzo zakho zomusa;

bahlubuka ngaselwandle, uLwandle Olubomvu.

₈Nokho wabasindisa ngenxa yegama lakhe,

ukuze abonakalise amandla akhe.

₉Wakhuza uLwandle Olubomvu, lwasha;

wabaholela ekujuleni njengasehlane.

₁₀Wabasindisa esandleni sababazondayo,

wabakhulula esandleni sesitha.

₁₁Amanzi asibekela izitha zabo;

akwasala noyedwa kubo.

₁₂Khona bakholwa ngamazwi akhe,

bahlabelela udumo lwakhe.

₁₃Bashesha bakhohlwa imisebenzi yakhe,

abalindelanga isiluleko sakhe.

₁₄Bahaha nokuhaha ehlane,

bamlinga uNkulunkulu kwahlongasibi.

₁₅Wabanika abakufisayo,

kepha wathuma ukonda emiphefumulweni yabo.

₁₆Baba nomhawu ngoMose ekamu,*

nango-Aroni ongcwele kaJehova.

₁₇Umhlaba wavuleka,

wamgwinya uDathani,

wagqiba iviyo lika-Abiramu.

₁₈Kokheleka umlilo eviyweni labo;

ilangabi lashisa laqeda ababi.

₁₉Benza ithole eHorebe;

bakhuleka kuso isithombe esibunjiweyo.

₂₀Baguqula kanjalo inkazimulo yabo,

yaba njengenkabi edla utshani.

₂₁Bakhohlwa uNkulunkulu umsindisi wabo

owayezenzile izinto ezinkulu eGibithe,

₂₂izimangaliso ezweni likaHamu

nokwesabekayo ngaseLwandle Olubomvu.

₂₃Wathi ubezakubabhubhisa,

uma uMose okhethiweyo wakhe ebengemanga ebusweni bakhe ukubakhulumela,

ukuze amyekise intukuthelo yakhe, funa ababhubhise.

₂₄Badelela izwe elihle,

babengakholwa yizwi lakhe.

₂₅Bakhonona besematendeni abo;

babengalaleli izwi likaJehova.

₂₆Ngalokho waphakamisa isandla sakhe ngakubo

ukuba abawise ehlane,

₂₇awise nenzalo yabo phakathi kwabezizwe,

abahlakaze emazweni.

₂₈Bazihlanganisa noBali Peyori,

badla okuhlatshelwe abafileyo.

₂₉Bamcunula ngezenzo zabo;

kwabhoboka isifo phakathi kwabo.

₃₀Wayesesuka uFinehasi, wahlulela;

saphela isifo;

₃₁lokhu wakubalelwa njengokulunga

ezizukulwaneni ngezizukulwane kuze kube phakade.

₃₂Bamcunula ngasemanzini aseMeriba;

kwaba kubi kuMose ngenxa yabo.

₃₃Ngokuba baphambana noMoya wakhe;

wakhuluma ngamawala ngomlomo wakhe.

₃₄Abababhubhisanga abantu

uJehova abayaleza ngabo,

₃₅kepha bahlangana nabezizwe,

bafunda imisebenzi yabo.

₃₆Bakhonza izithombe zabo,

zaba lugibe kubo.

₃₇Amadodana namadodakazi abo

bawahlabela amademoni.

₃₈Bachitha igazi elingenacala,

igazi lamadodana abo namadodakazi abo

abawahlabela izithombe zaseKhanani;

izwe langcoliswa yigazi.

₃₉Bangcola kanjalo ngemisebenzi yabo,

baphinga ezenzweni zabo.

₄₀Intukuthelo kaJehova yokheleka ngakubantu bakhe;

ifa lakhe laba yisinengiso kuye.

₄₁Wabanikela esandleni sabezizwe;

ababazondayo bababusa.

₄₂Izitha zabo zabacindezela,

bathotshiswa phansi kwesandla sazo.

₄₃Kaningi wabakhulula;

kepha bahlubuka ngecebo labo,

bawiswa phansi ngobubi babo.

₄₄Nokho wanaka ukuhlupheka kwabo,

esezwile ukukhala kwabo.

₄₅Wabakhumbulela isivumelwano sakhe;

waphenduka ngokobuningi bomusa wakhe.

₄₆Wabatholisa ububele ebusweni babo bonke ababebathumbile.

₄₇Sisindise, Jehova Nkulunkulu wethu,

sibuthe kwabezizwe

ukuba sidumise igama lakho elingcwele,

sethabe ekukudumiseni.

₄₈Makabongwe uJehova uNkulunkulu ka-Israyeli

kusukela phakade kuze kube phakade.

Abantu bonke mabathi: “Amen.”

Haleluya!

₁Bongani uJehova, ngokuba muhle,

ngokuba umusa wakhe umi phakade.

₂Mabasho njalo abahlengiweyo bakaJehova,

abahlengileyo esandleni sesitha;

₃wababutha emazweni,

empumalanga nasentshonalanga,

enyakatho naselwandle.

₄Bazulazula ehlane ngendlela yakwahlongasibi,

abafumananga umuzi wokuhlala.

₅Belambile, bomile,

umphefumulo wabo waphela amandla phakathi kwabo.

₆Base bekhala kuJehova ekuhluphekeni kwabo;

wabakhulula ezinsizini zabo.

₇Wabahola ngendlela elungileyo

ukuba baye emzini wokuhlala.

₈Mababonge uJehova ngomusa wakhe

nezimangaliso zakhe kubo abantwana babantu.

₉Ngokuba usuthisa umphefumulo olangazelayo;

umphefumulo olambayo uyawugcwalisa ngokuhle.

₁₀Babehlezi ebumnyameni nasethunzini lokufa

beboshiwe osizini nasensimbini,

₁₁ngokuba babephambene namazwi kaNkulunkulu,

babesidelele isiluleko soPhezukonke.

₁₂Wathobisa inhliziyo yabo ngokuhlupheka;

bawa kungekho osizayo.

₁₃Base bekhala kuJehova ekuhluphekeni kwabo,

wabakhulula ezinsizini zabo.

₁₄Wabakhipha ebumnyameni nasethunzini lokufa,

wagqabula izibopho zabo.

₁₅Mababonge uJehova ngomusa wakhe

nangezimangaliso zakhe kubo abantwana babantu.

₁₆Ngokuba waphulile amasango ethusi,

wanquma imigoqo yensimbi.

₁₇Babe yizithutha ngenxa yeziphambeko zabo;

ngenxa yobubi babo babehlushwa.

₁₈Umphefumulo wabo wenyanya konke ukudla;

basondela emasangweni okufa.

₁₉Base bekhala kuJehova ekuhluphekeni kwabo;

wabakhulula ezinsizini zabo.

₂₀Wathuma izwi lakhe, wabaphilisa,

wabakhulula emathuneni abo.

₂₁Mababonge uJehova ngomusa wakhe,

nezimangaliso zakhe kubo abantwana babantu.

₂₂Mabanikele iminikelo yokubonga,

balande imisebenzi yakhe ngokwethaba.

₂₃Behlela elwandle ngemikhumbi,

bathengiselana emanzini amakhulu.

₂₄Laba babona imisebenzi kaJehova

nezimangaliso zakhe ekujuleni.

₂₅Ngokuba wakhuluma, wavusa umoya wesiphepho

owaphakamisa amadlambi olwandle.

₂₆Bakhuphukela ezulwini,

babuye behlela kuzo izintwa;

umphefumulo wancibilika ngosizi.

₂₇Bayendayenda,

bantengezela njengodakiweyo;

konke ukuhlakanipha kwabo kwagwinywa.

₂₈Base bekhala kuJehova ekuhluphekeni kwabo,

wabakhulula ezinsizini zabo.

₂₉Wathulisa isiphepho,

kwaze kwaba ngukuthula,

kwathula namadlambi olwandle.

₃₀Base bethokoza, ngokuba kwaba ngukuthula;

wabaholela ethekwini lokufisa kwabo.

₃₁Mababonge uJehova ngomusa wakhe

nangezimangaliso zakhe kubo abantwana babantu.

₃₂Mabamphakamise ebandleni labantu,

bamdumise emhlanganweni wamalunga.

₃₃Imifula wayiphendula ihlane,

nemithombo yamanzi isigagadu,

₃₄nomhlabathi ovundileyo waba lugwadule lukasawoti

ngenxa yobubi babahlezi khona.

₃₅Ihlane waliphendula amachibi amanzi,

nomhlabathi owomileyo imithombo yamanzi.

₃₆Wabahlalisa khona abalambileyo,

bakha khona umuzi wokuhlala.

₃₇Balima amasimu, batshala isivini,

kwabathelela izithelo.

₃₈Wababusisa, banda kakhulu,

akanciphisa izinkomo zabo.

₃₉Babuye bancipha,

bathotshiswa ngokucindezelwa, nangobubi, nangosizi.

₄₀Wathela ukudelelwa phezu kwezikhulu,

wabazulazulisa ehlane elingenandlela.

₄₁Nokho waphakamisa ompofu, wamkhipha osizini,

enza imindeni njengomhlambi.

₄₂Olungileyo uyakukubona, ajabule;

ububi bonke bumelwe ukuvala umlomo.

₄₃Ohlakaniphileyo makaqaphele lokhu;

bayakuqonda umusa kaJehova.

₁Inhliziyo yami iduduzekile, Nkulunkulu;

ngizakuhlabelela, ngihube,

ngisho nomphefumulo wami.

₂Vukani, lugubhu nehabhu!*

Ngizakuvusa ukusa.

₃Ngizakukubonga phakathi kwabantu, Jehova,

ngikudumise phakathi kwezizwe.

₄Ngokuba umusa wakho mkhulu phezu kwezulu,

nokuthembeka kwakho kuze kube semafwini.

₅Phakama, Nkulunkulu,

phezu kwezulu,

inkazimulo yakho ibe phezu komhlaba wonke.

₆Ukuze abathandekayo bakho bakhululwe,

sindisa ngesandla sakho sokunene, ungizwele.

₇UNkulunkulu ukhulumile ebungcweleni bakhe, wathi:

“Ngiyakwethaba;

ngiyakulidabula iShekemi,

ngisilinganise isiGodi saseSukoti.

₈Ngowami uGileyadi,

ngowami uManase;

u-Efrayimi uyisivikelo sekhanda lami,

uJuda uyintonga yami yokubusa.

₉UMowabi uyisitsha sami sokuhlambela;

phezu kuka-Edomi ngiphonsa isicathulo sami;

phezu kweFilistiya ngiyethaba.”

₁₀Ngubani oyakungiyisa emzini oyinqaba na?

Ngubani oyakungiholela kwa-Edomi na?

₁₁Akusiwena Nkulunkulu osilahlileyo na?

Nkulunkulu, awusaphumi nezimpi zethu.

₁₂Siphe ukuba sisizakale ekuhluphekeni,

ngokuba ukusiza komuntu kuyize.

₁₃NgoNkulunkulu siyakwenza izenzo zamandla;

yena uyakunyathela phansi izitha zethu.

₁Ungathuli, Nkulunkulu wokubonga kwami.

₂Ngokuba umlomo womubi nomlomo wenkohliso bawuvulile ngakimi;

bakhulumile ngami ngolimi lwamanga.

₃Bangizungeza ngamazwi enzondo;

balwa nami, kungekho sizathu.

₄Ngenxa yothando lwami bayangizonda,

mina ngisemkhulekweni njalo.

₅Bangibuyisele okubi ngokuhle,

nenzondo ngothando lwami.

₆Beka omubi phezu kwakhe;

makume omelene naye ngasesandleni sakhe sokunene.

₇Ekwahlulelweni kwakhe makalahlwe yicala;

umkhuleko wakhe mawube yisono.

₈Izinsuku zakhe mazibe yingcosana,

omunye athathe isikhundla sakhe.

₉Abantwana bakhe mababe yizintandane,

umkakhe abe ngumfelokazi.

₁₀Abantwana bakhe mababe yizintandane, baphanze,

bacele bekude nezindawo zabo ezichithekileyo.

₁₁Umtsheleki makabambe konke anakho,

abafo baphange izithelo zomsebenzi wakhe.

₁₂Makungabikho omenzela umusa,

futhi kungabikho ohawukela izintandane zakhe.

₁₃Inzalo yakhe mayinqunywe;

igama layo malesulwe esizukulwaneni esilandelayo.

₁₄Ububi bawoyise mabukhumbuleke kuJehova;

masingesulwa isono sikanina.

₁₅Mabeme phambi kukaJehova njalo,

kunqunywe isikhumbuzo sabo emhlabeni.

₁₆Ngokuba wayengakhumbuli ukwenza umusa,

kepha wazingela umuntu odingayo nompofu

nodabukile ngenhliziyo ukuba ababulale.

₁₇Wathanda ukuthuka,

kweza phezu kwakhe;

wayengathokozi ngesibusiso,

sahlala kude naye.

₁₈Wagqoka ukuthuka njengesambatho,

kwangena ezibilinini zakhe njengamanzi,

nasemathanjeni akhe njengamafutha.

₁₉Makube kuye njengesambatho asembathayo

nebhande* azibopha ngalo isikhathi sonke.

₂₀Lokhu makube ngumvuzo wezitha, uvela kuJehova,

nowabakhuluma kabi ngomphefumulo wami.

₂₁Kepha wena Jehova, Nkosi yami,

ngiphathe ngokwegama lakho;

njengokuba umusa wakho ulungile,

ngisindise.

₂₂Ngokuba ngingodingayo nompofu;

inhliziyo yami ilimele phakathi kwami.

₂₃Njengethunzi eselilide ngiyamuka;

njengesikhonyane ngiyapheshulwa.

₂₄Amadolo ami abuthakathaka ngokuzila ukudla,

nomzimba wami uswele ukukhuluphala.

₂₅Futhi ngaba yisihlamba kubona;

bengibheka banikina amakhanda abo.

₂₆Ngisize, Jehova Nkulunkulu wami,

ngisindise ngokomusa wakho,

₂₇ukuze bazi ukuthi lokhu kuyisandla sakho;

wena Jehova ukwenzile.

₂₈Mabathuke bona, wena ubusise;

nxa bevuka, mabajabhe;

kepha inceku yakho mayithokoze.

₂₉Abamelene nami mabembeswe amahloni,

bagqoke ukujabha njengesambatho.

₃₀Ngiyakumbonga uJehova ngomlomo wami,

ngimdumise esixukwini.

₃₁Ngokuba uyakuma ngakwesokunene sompofu

ukumsindisa kulabo abalahla umphefumulo wakhe.

₁UJehova wathi eNkosini yami:

“Hlala ngakwesokunene sami,

ngize ngenze izitha zakho zibe yisenabelo sezinyawo zakho.”

₂Intonga yamandla akho uJehova uyakuyelula eseSiyoni;

busa wena phakathi kwezitha zakho.

₃Abantu bakho bayazinikela ngenjabulo ngosuku lwempi yakho;

ebuhleni bobungcwele abasha bakho

bavela njengamazolo esizalweni sokusa.

₄UJehova ufungile engayikuguquka, wathi:

“Wena ungumpristi kuze kube phakade

ngendlela kaMelkisedeki.”

₅INkosi ingakwesokunene sakho;

iyakuchoboza amakhosi ngosuku lwentukuthelo yayo.

₆Iyakwahlulela phakathi kwabezizwe,

kugcwale izidumbu,

ichoboze amakhanda ezizweni eziningi.

₇Iyakuphuza emfuleni ngasendleleni;

ngalokho iyakuphakamisa ikhanda.

₁Haleluya!

Ngiyakubonga uJehova ngenhliziyo yami yonke

emhlanganweni nasebandleni labaqotho.

₂Mikhulu imisebenzi kaJehova,

iphenywa yibo bonke abathokoza ngayo.

₃Umsebenzi wakhe ungubukhosi nodumo,

nokulunga kwakhe kumi phakade.

₄Wenzele izimangaliso zakhe isikhumbuzo;

uJehova unomusa nobubele.

₅Abamesabayo ubapha ukudla;

ukhumbula njalo isivumelwano sakhe.

₆Ubonisile abantu bakhe amandla emisebenzi yakhe

ngokubapha ifa labezizwe.

₇Imisebenzi yezandla zakhe iyiqiniso nokwahlulela;

imithetho yonke yakhe iqinile;

₈imisiwe ngeqiniso nangobuqotho.

₉Wabathumela abantu bakhe ukukhululwa;

uyalezile isivumelwano sakhe kuze kube phakade;

lingcwele, liyesabeka igama lakhe.

₁₀Ukumesaba uJehova kungukuqala kokuhlakanipha;

banengqondo enhle bonke abakwenzayo.

Udumo lwakhe lumi kuze kube phakade.