To The Word – Day 217

₁Isisekelo asibekileyo sisezintabeni ezingcwele.

₂UJehova uyawathanda amasango aseSiyoni

kunazo zonke izindlu zikaJakobe.

₃Okudumisekayo kukhulunywa ngawe, muzi kaNkulunkulu. Sela*

₄Ngiyakubala uRahabi neBabele kulabo abangaziyo;

yebo, iFilistiya neThire kanye neKushe azalelwa khona.

₅Kuyakuthiwa ngeSiyoni:

“Yilo nalo wazalelwa khona;

oPhezukonke uyaliqinisa.”

₆Mhla uJehova eloba izizwe uyakubala ukuthi

lo wazalelwa khona. Sela*

₇Abahubayo nabasinayo bathi:

“Imithombo yami yonke ikuwe.”

₁Jehova Nkulunkulu wensindiso yami,

ngikhala imini nobusuku phambi kwakho.

₂Umkhuleko wami mawufike ebusweni bakho,

indlebe yakho uyibeke ekunxuseni kwami.

₃Ngokuba umphefumulo wami ugcwele izinsizi,

ukuphila kwami kusondele endaweni yabafileyo.

₄Ngibalwa kanye nabashona emgodini,

nginjengomuntu ofileyo.

₅Icansi lami liphakathi kwabafileyo;

nginjengababuleweyo abalele ethuneni,

ongasabakhumbuli,

benqunyiwe esandleni sakho.

₆Ungibekile emgodini ojulile kunayo yonke,

ebumnyameni, otweni.

₇Kuyangisinda ukuthukuthela kwakho;

amadlambi akho onke ayangicindezela phansi. Sela*

₈Engikade ngazana nabo ubaxoshele kude,

wangenza ngibe yisinengiso kubo;

ngivalelwe, ngingephume.

₉Iso lami liyafa ngosizi;

ngikhala kuwe Jehova imihla yonke,

ngizelulela izandla zami kuwe.

₁₀Abafileyo uyakubenzela isimangaliso na?

Ziyakuvuka yini izithunzi, zikubonge, na? Sela*

₁₁Kuyalandiswa yini ethuneni ngomusa wakho,

nangokuthembeka kwakho endaweni yokubhujiswa na?

₁₂Izimangaliso zakho ziyaziwa yini ebumnyameni,

nokulunga kwakho ezweni lokukhohlwa na?

₁₃Kepha mina, Jehova, ngikhala kuwe;

ekuseni umkhuleko wami uyenyuka

phambi kwakho.

₁₄Jehova, ulahlelani umphefumulo wami,

ungifihlelelani ubuso bakho na?

₁₅Ngihluphekile, ngingofayo kusukela ebusheni bami;

ngithwele ukwesabeka kwakho, ngiphelile.

₁₆Ulaka lwakho olushisayo lungehlele;

ukwesabisa kwakho kungiqedile.

₁₇Kungizungeza njengamanzi imihla yonke,

kungikaka kanyekanye.

₁₈Isihlobo nomngane ubaxoshele kude;

ubumnyama bungumhlobo wami.

₁Ngiyakuhlabelela ngomusa kaJehova kuze kube phakade,

ngomlomo wami ngazise izizukulwane

ngezizukulwane ukuthembeka kwakho.

₂Ngokuba ngithe: “Umusa uyakwakhiwa kuze kube phakade;

ezulwini uyaqinisa ukuthembeka kwakho.”

₃Ngenzile isivumelwano nokhethiweyo wami,

ngifungile kuye uDavide inceku yami ukuthi:

₄“Ngiyakuqinisa inzalo yakho kuze kube phakade,

ngisakhe isihlalo sobukhosi ezizukulwaneni ngezizukulwane.” Sela*

₅Izimangaliso zakho, Jehova, ziyadunyiswa ngamazulu,

ukuthembeka kwakho ebandleni labangcwele.

₆Ngokuba ngubani osemafwini ongalinganiswa noJehova na?

Ngubani phakathi kwamadodana kaNkulunkulu ongafaniswa noJehova na?

₇UNkulunkulu uyesabeka kakhulu emhlanganweni wabangcwele;

umelwe ukuhlonishwa yibo bonke abangakuye.

₈Jehova Nkulunkulu Sebawoti, ngubani onjengawe na?

Unamandla, Jehova,

nokuthembeka kwakho kuyakuhaqa.

₉Wena uyabusa ukukhukhumala kolwandle;

uma kuphakama amadlambi alo, uyawathulisa.

₁₀Wena uchobozile uRahabi njengobuleweyo;

uhlakazile izitha zakho ngengalo yakho enamandla.

₁₁Ngelakho izulu, ngowakho umhlaba;

izwe nokugcwala kwalo,

kukho konke ubeke isisekelo.

₁₂Inyakatho neningizimu wakudala wena;

iThabori neHermoni kuyajabula egameni lakho.

₁₃Ingalo yakho inobuqhawe,

isandla sakho sinamandla,

esokunene sakho siphakeme.

₁₄Ukulunga nokwahlulela kuyisisekelo sesihlalo sakho sobukhosi;

umusa neqiniso kuyahamba phambi kobuso bakho.

₁₅Sibusisiwe isizwe esikwazi ukuhlabelela ngenjabulo;

siyahamba, Jehova,

ekukhanyeni kobuso bakho.

₁₆Egameni lakho siyathokoza usuku lonke;

ngokulunga kwakho siyaphakanyiswa.

₁₇Ngokuba wena uyinkazimulo yamandla abo;

ngomusa wakho uphondo lwethu luyaphakama.

₁₈Ngokuba isihlangu sethu singesikaJehova;

inkosi yethu ingeyoNgcwele ka-Israyeli.

₁₉Ngaleso sikhathi wakhuluma ngombono kubo abakholwayo bakho, wathi:

“Ngibekile usizo eqhaweni,

ngiphakamisile okhethiwe phakathi kwabantu.

₂₀Ngifumene inceku yami uDavide,

ngimgcobile ngamafutha ami angcwele.

₂₁Isandla sami siyakuba naye siqinile,

ingalo yami iyakumqinisa.

₂₂Isitha asiyikumahlula,

nendodana yobubi ayiyikumhlupha.

₂₃Ngiyakuchoboza izitha zakhe ebusweni bakhe,

ngihluphe abamzondayo.

₂₄Ukuthembeka kwami nomusa wami kuyakuba naye;

egameni lami luyakuphakama uphondo lwakhe.

₂₅Ngiyakubeka isandla sakhe phezu kolwandle,

esokunene sakhe phezu kwemifula.

₂₆Uyakungibiza ngokuthi: ‘UnguBaba,

unguNkulunkulu wami nedwala lensindiso yami.’

₂₇Ngiyakumenza abe yizibulo nophakamileyo

kunamakhosi omhlaba.

₂₈Ngiyakumgcinela umusa wami kuze kube phakade;

isivumelwano sami soba siqinile kuye.

₂₉Ngiyakwenza inzalo yakhe ime kuze kube phakade,

isihlalo sakhe sobukhosi sibe njengezinsuku zezulu.

₃₀“Uma abantwana bakhe beshiya umthetho wami

bengahambi ngezahlulelo zami,

₃₁uma bephula izimiso zami

bengagcini imiyalo yami,

₃₂ngiyakuhambela izono zabo ngenduku,

namacala abo ngemivimbo.

₃₃Kepha umusa wami angiyikuwususa kuye,

ngingaphikisi ukuthembeka kwami.

₃₄Angiyikwaphula isivumelwano sami,

nokuphumileyo ezindebeni zami angiyikukuguqula.

₃₅Ngafunga kanye ubungcwele bami,

angiyikuqamba amanga kuDavide.

₃₆Inzalo yakhe iyakuma phakade,

isihlalo sakhe sobukhosi sibe njengelanga phambi kwami.

₃₇Iyakuma phakade njengenyanga

nanjengofakazi othembekileyo osemafwini.” Sela*

₃₈Kepha usumlahlile, wamala,

wamthukuthelela ogcotshiweyo wakho.

₃₉Uchithile isivumelwano senceku yakho,

wadumaza umqhele wayo, wawuphonsa emhlabathini.

₄₀Udilizile zonke izindonga zakhe,

wazenza izinqaba zakhe zaba yincithakalo.

₄₁Bonke abadlula ngendlela bayamphanga;

waba yihlazo kwabakhelene naye.

₄₂Uphakamisile esokunene sabamelene naye,

wajabulisa zonke izitha zakhe.

₄₃Futhi ubuyisele emuva usiko lwenkemba yakhe,

awumvumelanga ukuma ekulweni.

₄₄Ususile inkazimulo yakhe,

wawisa phansi emhlabathini isihlalo sakhe sobukhosi.

₄₅Ufinyezile izinsuku zobusha bakhe,

wamthela ngamahloni. Sela*

₄₆Koze kube nini uyakuzisitha, Jehova,

nentukuthelo yakho ivutha njengomlilo, na?

₄₇Khumbula ukuthi isikhathi sami singakanani

nokuthi wadalela ize bonke abantwana babantu.

₄₈Ngubani oyakuphila engayikubona ukufa,

akhulule umphefumulo wakhe emandleni endawo yabafileyo, na? Sela*

₄₉Nkosi, uphi umusa wakho wakuqala

owawufungela kuDavide ngokuthembeka kwakho na?

₅₀Khumbula, Nkosi, ihlazo lezinceku zakho

nokuthi ngithwele esifubeni sami ihlazo lezizwe eziningi kakhulu,

₅₁ezisola ngalo izitha zakho, Jehova,

ezisola ngalo ukuhamba kogcotshiweyo wakho.

₅₂Makabongwe uJehova kuze kube phakade.

Amen, Amen.

₁Yena owakhile ekusithekeni koPhezukonke

nohlezi emthunzini kaSomandla

₂uthi kuJehova: “Uyisiphephelo sami nenqaba yami

noNkulunkulu wami engimethembayo.”

₃Ngokuba yena uyakukhipha ogibeni lomcuphi

nasobhadaneni olubhubhisayo.

₄Ngezimpaphe zakhe uyakukusibekela,

uphephele phansi kwamaphiko akhe;

ukuthembeka kwakhe kuyisihlangu nehawu.

₅Awuyikwesaba ivuso lasebusuku,

nomcibisholo ondizayo emini,

₆nobhadane oluhamba ebumnyameni,

nesifo esibhubhisayo emini enkulu.

₇Bayakuwa abayizinkulungwane ngaseceleni kwakho,

nabayizinkulungwane eziyishumi ngakwesokunene sakho,

kepha akuyikufinyelela kuwe.

₈Uyakubuka nje ngamehlo akho,

ubone ukuphindiselwa kwababi,

₉ngokuba uthi:

Jehova, uyisiphephelo sami;

oPhezukonke umenzile abe yinqaba yakho.

₁₀Awuyikwehlelwa ngokubi,

nesifo asiyikusondela etendeni lakho.

₁₁Ngokuba uyakuyaleza izingelosi zakhe ngawe,

zikulondoloze ezindleleni zakho zonke.

₁₂Ziyakukuthwala ngezandla,

ungaqhuzuki ngonyawo lwakho etsheni.

₁₃Uyakunyathela ingonyama nebululu,

unyathele phansi ibhongo lengonyama nodrako.*

₁₄Ngenxa yokuba enamathele kimi, ngakho ngiyamkhulula;

ngiyamphakamisa ngokuba elazi igama lami.

₁₅Uyakungibiza, ngimphendule;

ngiyakuba naye esosizini,

ngimkhulule, ngimdumise.

₁₆Ngiyakumsuthisa ngobude bezinsuku,

ngimbonise insindiso yami.

₁Kuhle ukumbonga uJehova nokuhubela igama lakho wena oPhezukonke;

₂ukushumayela umusa wakho ekuseni nokuthembeka kwakho ebusuku,

₃ngokubetha ugubhu olunezintambo eziyishumi,

nomqangala, kanye nehabhu* elizwakala kamnandi.

₄Ngokuba ungithokozisile, Jehova, ngezenzo zakho;

ngiyakumemeza ngokujabula.

₅Yeka ubukhulu bezenzo zakho, Jehova.

Imicabango yakho ijulile kakhulu.

₆Umuntu oyisilima angekucabange,

nesiwula asikuboni.

₇Noma ababi behluma njengotshani,

nezigangi noma ziqhakaza zonke,

kuyenzeka ukuba babhujiswe kuze kube phakade.

₈Kepha wena Jehova uphakeme kuze kube phakade.

₉Ngokuba bheka, izitha zakho, Jehova,

bheka, izitha zakho, ziyakubhubha;

bonke abenza okubi bayakuhlakazwa.

₁₀Kepha uphondo lwami uyaluphakamisa njengolwenyathi,

ngigcotshwa ngamafutha amasha.

₁₁Iso lami liyakubona ngokujabula izitha zami,

nezindlebe zami ziyakuzwa ngokuthokoza ngababi abangivukelayo.

₁₂Olungileyo uyahluma njengesundu,

uyakhula njengomsedari* eLebanoni.

₁₃Batshaliwe endlini kaJehova,

bamila emagcekeni kaNkulunkulu wethu.

₁₄Nasebudaleni bayakuthela izithelo,

bahlume babe luhlaza,

₁₅ukuze bashumayele ukuthi uJehova ulungile;

uyidwala lami okungekho kuye ukungalungi.