To The Word – Day 178

₅“Ngingakakubumbi esiswini ngakwazi;

ungakaphumi esizalweni ngakungcwelisa,

ngakubeka umprofethi ezizweni.”

“Iyakufika, yilowo nalowo

ubeke isihlalo sawo sobukhosi

ezikhaleni zamasango aseJerusalema,

nakuzo zonke izingange zalo nxazonke,

nakuyo yonke imizi yakwaJuda.

₁₆Ngiyakukhipha ukwahlulela kwami

phezu kwabo ngenxa yabo bonke ububi babo,

ngokuba bangihlubukile,

bashisela abanye onkulunkulu impepho,

bakhuleka kuyo imisebenzi yezandla zabo.

₂“ ‘Ngikukhumbulela umusa wobusha bakho,

nothando lwakho, usengumakoti,

nokungilandela kwakho ehlane,

izwe elingatshalwanga.

₃U-Israyeli ungcwele kuJehova,

ululibo lwezithelo zakhe;

bonke abazidlayo bayathola icala,

okubi kuyakubehlela,’ ” usho uJehova.

₄Zwanini izwi likaJehova

nina ndlu kaJakobe,

nani mindeni yonke yendlu ka-Israyeli.

₅Usho kanje uJehova, uthi:

“Ububi buni oyihlo ababufumene kimi,

baze badeda kude nami,

balandela okuyize, baba yize, na?

₆Abashongo ukuthi:

‘Uphi uJehova owasikhuphula ezweni laseGibithe,

wasihola ehlane

ezweni lezingwadule nelemigodi,

ezweni elomileyo nelethunzi lokufa,

ezweni elingadatshulwa muntu,

nalapho kungahlali muntu khona, na?’

₇Nganingenisa ezweni elivundileyo

ukuba nidle izithelo zalo nokuhle kwalo,

kepha lapho seningenile,

nalingcolisa izwe lami,

nenza ifa lami laba yisinengiso.

₈Abapristi abashongo ukuthi:

‘Uphi uJehova?’

Abaphethe umthetho babengazi,

ababusi baphambuka kimi,

abaprofethi baprofetha ngoBali,

balandela okungenakusiza.

₉“Ngalokho ngiyakuphikisana nani,” usho uJehova,

“ngiphikisane nabantwana babantwana benu.

₁₀Dlulani eziqhingini zaseKitimi, nibone,

nithume eKedari, niqonde kahle,

nibone uma yake yaba khona into enjengalena na?

₁₁Isizwe sike senana ngawonkulunkulu

abangesibo onkulunkulu na?

Kepha abantu bami benanile udumo lwabo

ngokungenakusiza.

₁₂Mangalani ngalokho, mazulu,

nithuthumele, nichitheke impela,” usho uJehova.

₁₃“Ngokuba abantu bami benzile okubi okubili:

bangishiyile, umthombo wamanzi aphilileyo,

bazigubhele imithombo,

imithombo evuzayo,

amanzi angenakuhlala kuyo.

₁₄U-Israyeli uyisigqila yini,

uyisigqila esazalelwa ekhaya na?

Waba kanjani impango na?

₁₅Amabhongo ezingonyama abhongile phezu kwakhe, akhonya,

alenza izwe lakhe laba yincithakalo;

imizi yakhe ishisiwe,

kungekho owakhe kuyo.

₁₆Nabantwana baseNofi naseThahipanesi

baphuca ukhakhayi lwakho.

₁₇Awuzenzeli lokhu wena

ngokushiya kwakho uJehova uNkulunkulu wakho,

lapho ekuhola endleleni, na?

₁₈Manje unani endleleni eya eGibithe

ukuba uphuze amanzi aseSihori, na?

Unani endleleni eya e-Asiriya

ukuba uwaphuze amanzi omfula na?

₁₉Ububi bakho buyakukulaya,

nokuhlehla kwakho kuyakukusola;

yazi, ubone ukuthi kuyinto embi nebabayo

yokuthi umhlubukile uJehova uNkulunkulu wakho

nokuthi ukungesaba akukho kuwe,” isho iNkosi uJehova Sebawoti.

₂₀“Ngokuba walaphula ijoka lakho endulo,

wazigqabula izibopho zakho,

wathi: ‘Angiyikukhonza.’

Ngokuba kuwo onke amagquma aphakemeyo

naphansi kwayo yonke imithi eluhlaza

walala njengesifebe.

₂₁Mina ngakutshala ungumvini omuhle,

imbewu elungileyo yodwa;

pho, uphenduke kanjani waba yigatsha elonakeleyo kimi,

elomvini wabezizwe, na?

₂₂Ngokuba noma ugeza ngesoda,*

uzithathele insipho eningi,

ububi bakho bulotshiwe phambi kwami,” isho iNkosi uJehova.

₂₃“Ungasho kanjani ukuthi:

‘Angingcolile,

angilandelanga oBali,’ na?

Bheka indlela yakho esigodini,

wazi ukuthi wenzeni:

uyikamela lensikazi elinejubane,

elizulazula ezindleleni zalo,

₂₄nembongolo yasendle ejwayele ihlane,

esezela umoya ngokukhanuka kwayo;

ngubani ongavimbela inkanuko yayo na?

Bonke abayifunayo abayikukhathala,

bayakuyifumana ngenyanga yayo.

₂₅Nqanda unyawo lwakho lungabi olungenasicathulo,

nomphimbo wakho ukuba ungomi;

kepha wathi: ‘Kuyize;

cha, ngithandile abafokazi,

ngiyakubalandela.’

₂₆“Njengesela linamahloni,

lapho selifunyenwe,

kanjalo indlu yakwa-Israyeli iyakuba namahloni,

bona kanye namakhosi abo,

nezikhulu zabo,

nabapristi babo, nabaprofethi babo

₂₇abathi emthini: ‘Ungubaba,’

nasetsheni: ‘Wena wangizala.’

Ngokuba bangifulathele, abangibheki;

kepha ngesikhathi sokuhlupheka kwabo

bayakusho ukuthi:

‘Vuka, usisindise.’

₂₈Baphi onkulunkulu bakho

ozenzele bona na?

Mabavuke, uma bengakusindisa

ngesikhathi sokuhlupheka kwakho,

ngokuba njengomumo wemizi yakho,

banjalo onkulunkulu bakho, Juda.

₂₉“Niphikisanelani nami na?

Niphambukile kimi nonke,” usho uJehova.

₃₀“Ngibashayele ize abantwana benu,

abakwamukelanga ukulaywa;

inkemba yenu ibadlile abaprofethi benu

njengengonyama echithayo.

“Bengiyihlane ku-Israyeli,

noma izwe lesigayegaye, na?

Basholoni abantu bami ukuthi:

‘Sesidlubulundile,

asisayikubuyela kuwe,’ na?

₃₂Intombi ingakhohlwa yini izivunulo zayo,

nomakoti ixhama lakhe, na?

Nokho abantu bami bangikhohliwe izinsuku ezingenakubalwa.

₃₃Ulungisa kahle kanjani

indlela yakho ukufuna uthando!

Ngalokho nabesifazane ababi

ubafundisile izindlela zakho.

₃₄Nasemiphethweni yakho kufunyenwe igazi

labampofu abangenacala,

kungabi ngukuthi ubafumene befohla.

Kepha kukho konke lokhu

₃₅uthi: ‘Anginacala.’

Nempela intukuthelo yakhe ibuyile kimi.

Bheka, ngiyakwahlulelana nawe,

ngokuba uthi: ‘Angonanga.’

₃₆Usheshelani kangaka

ukuyiguqula indlela yakho na?

Uyakujabha nangeGibithe,

njengalokho wajabhiswa yi-Asiriya.

₃₇Uyakuphuma nalapho,

izandla zakho zisekhanda,

ngokuba uJehova uyabalahla obethembayo,

awuyikuphumelela kubo.

₁“Kuthiwa uma indoda ilahla umkayo,

abesemuka abe ngowenye indoda,

isayakubuyela kuye na?

Lelo zwe belingayikungcoliswa kakhulu na?

Kepha wena ofebile nezithandwa eziningi

ubuyela kimi,” usho uJehova.

₂“Phakamisela amehlo akho

emadulini angenalutho, ubone;

kuphi lapho ongalalwanga khona na?

Ngasezindleleni ubahlalele

njengomArabiya ehlane,

walingcolisa izwe ngobufebe

nangobubi bakho.

₃Ngalokho izihlambi zinqandiwe,

nemvula yamuva ayibangakho.

Nokho wawunebunzi lesifebe,

wala ukuba namahloni.

₄Awusand' ukukhala kimi ukuthi:

‘Baba, wena ungumngane wobusha bami, na?

₅Uyakuhlala enentukuthelo njalonjalo,

ayigcine kuze kube nini na?’

Bheka, ukhuluma kanjalo;

uyenza okubi, uyaphumelela.”

“ ‘Buya wena Israyeli ohlehlayo,’ usho uJehova;

‘angiyikuninyakamela,

ngokuba nginomusa,’ usho uJehova;

‘angiyakugcina intukuthelo kuze kube phakade.

₁₃Yazi kuphela ububi bakho

ukuthi uphambukile kuJehova uNkulunkulu wakho,

wazihlakaza izindlela zakho kubo abezizwe

phansi kwayo yonke imithi eluhlaza;

anililalelanga izwi lami,’ ” usho uJehova.

“ ‘Ngiyakukubeka kanjani phakathi kwabantwana,

ngikuphe izwe elinxanelekayo,

ifa elihle kakhulu ezizweni!’

Ngathi: Niyakungibiza ngokuthi ‘Baba’,

ningabuyi ekungilandeleni.

₂₀Impela njengomfazi emkhohlisa umyeni,

kanjalo ningikhohlisile

nina ndlu ka-Israyeli,” usho uJehova.

₂₁Izwi liyezwakala emadulini angenalutho,

ukukhala nokukhuleka kwabantwana bakwa-Israyeli,

ngokuba bayihlanekezele indlela yabo,

bakhohlwa uJehova uNkulunkulu wabo.

₂₂“Buyani nina bantwana abahlehlayo,

ngikuphulukise ukuhlehla kwenu.”

“Bheka, sesifikile kuwe,

ngokuba unguJehova uNkulunkulu wethu.

₂₃Impela amagquma ayize

kanye nomsindo wasezintabeni.

Ngokwempela ukusindiswa kuka-Israyeli

kukuJehova uNkulunkulu wethu.

₂₄UBosheti* uqedile umshikashika wawobaba kwasebusheni bethu,

izimvu zabo, nezinkomo zabo,

namadodana abo, namadodakazi abo.

₂₅Masilale phansi namahloni,

ihlazo lethu lisisibekele,

ngokuba sonile kuJehova uNkulunkulu wethu,

thina nawobaba,

kusukela ebusheni bethu kuze kube namuhla,

asililalelanga izwi likaJehova uNkulunkulu wethu.”

₁“Uma uphenduka, Israyeli,” usho uJehova,

“uyakuphendukela kimi;

uma ususa ebusweni bami izinengiso zakho,

awuyikuntengantenga.

₂Uyakufunga ngeqiniso,

nangokwahlulela, nangokulunga, ngokuthi:

‘Kuphila kukaJehova,’

izizwe ziyakuzibusisa kuye,

zizibonge kuye.”

“Qathani umqatho wenu,

ningatshali phakathi kwameva.

₄Zisokeleni kuJehova,

nisuse amajwabu ezinhliziyo zenu

nina bantu bakwaJuda nabakhileyo eJerusalema,

funa ukufutheka kwami kuphume njengomlilo,

kuvuthe, kungabikho ongakucima,

ngenxa yobubi bezenzo zenu.

₅“Khulumani kwaJuda,

nizwakalise eJerusalema, nithi:

‘Bethani amacilongo ezweni,’

nimemeze nithi:

‘Buthanani, singene emizini ebiyelweyo.’

₆Misani ibhanela* elibheka ngaseSiyoni,

nibaleke ningemi,

ngokuba ngiyakuletha okubi kuvele

ngasenyakatho

nokubhujiswa okukhulu.”

₇Ingonyama ikhuphukile esihlahleni sayo,

umchithi wezizwe uyeza;

uphumile endaweni yakhe

ukuba ulenze izwe lakho libe yincithakalo,

ichithwe imizi yakho,

kungabikho ohlala kuyo.

₈Ngalokho bhincani izindwangu zamasaka,

nikhale, nihewule,

ngokuba ulaka oluvuthayo lukaJehova alubuyanga kithi.

₉“Kuyakuthi ngalolo suku,” usho uJehova,

“inhliziyo yenkosi iphele

kanye nezinhliziyo zezikhulu;

abapristi bayakumangala,

abaprofethi bethuke.”

₁₃Bhekani, uyakhuphuka njengamafu,

izinqola zakhe zinjengesivunguvungu,

amahhashi akhe anejubane kunezinkozi.

Maye kithina, ngokuba sichithiwe!

₁₄Jerusalema, hlanza inhliziyo yakho,

kuphume ububi,

ukuze usindiswe.

Koze kube nini imicabango yakho

emibi ihlala phakathi kwakho na?

₁₅Ngokuba izwi liyamemezela liphuma kwaDani;

lizwakalisa okubi kuvela ezintabeni zakwa-Efrayimi.

₁₆“Khumbuzani izizwe;

bhekani, nizwakalise eJerusalema

ukuthi kufika abavimbezeli abaphuma ezweni elikude;

baliphakamisa izwi labo ngakuyo imizi yakwaJuda.

₁₇Njengabalinda insimu baphezu kwalo nxazonke,

ngokuba lingihlubukile,” usho uJehova.

₁₈“Ukuhamba kwakho nezenzo zakho kukwenzele lokhu;

lokhu kuyingozi yakho ngokuba imunyu;

ifinyelele enhliziyweni yakho.”

₁₉Zibilini zami, zibilini zami,

nginobuhlungu enhliziyweni yami;

inhliziyo yami ikhala phakathi kwami,

anginakuthula,

ngokuba ulizwile, mphefumulo wami,

izwi lecilongo,

ukuhlatshwa komkhosi wempi.

₂₀Kuyamenyezelwa ukubhujiswa phezu kokubhujiswa,

ngokuba izwe lonke liyachithwa.

Amatende ami ayachithwa masinyane,

nezilenge zami ngokuphazima kweso.

₂₁Koze kube nini ngibona ibhandela,*

ngizwe izwi lecilongo, na?

₂₂“Yebo, abantu bami bayiziwula, abangazi;

bangabantwana abayiziphukuphuku, abanakuqonda;

bahlakaniphele ukwenza okubi,

kepha ukwenza okuhle kabakwazi.”

₂₃Ngabuka umhlaba;

bheka, wawuyize, wawungenalutho,

nezulu lalingenakukhanya.

₂₄Ngabuka izintaba; bheka, zazamazama;

onke amagquma anyakaza.

₂₅Ngabuka;

bheka, kwakungekho muntu;

izinyoni zonke zezulu zazibalekile.

₂₆Ngabuka;

bheka, izwe elivundileyo laliyihlane,

nemizi yalo yonke yayidiliziwe ebusweni bukaJehova

naphambi kolaka lwakhe oluvuthayo.

₂₇Ngokuba uJehova usho kanje, uthi:

“Izwe lonke liyakuba yincithakalo,

kepha angiyikuliqeda ngokupheleleyo.

₂₈Umhlaba uyakhala ngalokhu,

izulu phezulu limnyama,

ngokuba ngikukhulumile,

ngikuhlosile, ngingazisolanga;

futhi angiyikubuya kukho.”

₂₉Umuzi wonke uyabaleka

ngenxa yomsindo wabamahhashi

nowabemicibisholo;

bayangena ezihlahleni,

bakhuphukele emadwaleni;

imizi yonke ishiyiwe,

akakho ohlala kuyo.

₃₀Lapho usuchithiwe, uyakwenzani na?

Noma wembatha okubomvu,

noma uzivunulisa ngezivunulo zegolide,

noma ugqaba amehlo akho ngomuthi,

uzenza muhle ngeze;

izithandwa zakho ziyakudelela,

zifuna ukukubulala.

₃₁Ngizwile izwi njengokungathi elonemihelo,

usizi lozibulayo,

izwi lendodakazi yaseSiyoni

eheheza, ezelula izandla zayo, ithi:

“Maye kimina!

Ngokuba umphefumulo wami

uphele amandla ngababulali.”

₁“Yehlani nenyuke ezitaladini zaseJerusalema,

nibone nazi,

nicinge ezigcawini,

uma ningafumana umuntu,

uma kukhona owenza ukwahlulela,

ofuna iqiniso;

bese ngilithethelela.

₂Noma bethi: ‘Kuphila kukaJehova,’

nokho bafunga amanga.”

₃Jehova, amehlo akho awaseqinisweni na?

Ubashayile, kepha abadabukanga;

ubaqedile, kepha balile ukwamukela ukulaywa;

benza lukhuni ubuso babo kunetshe,

bala ukuphenduka.

₄Ngase ngithi mina:

“Laba bayizimpofana nje,

bayiziwula,

ngokuba abayazi indlela kaJehova,

ukwahlulela kukaNkulunkulu wabo.

₅Sengiyakuya kwabakhulu,

ngikhulume nabo,

ngokuba bona bayayazi indlela kaJehova

nokwahlulela kukaNkulunkulu wabo;”

kepha bona babelaphulile ijoka kanyekanye,

bazigqabulile izibopho.

₆Ngalokho ingonyama yasehlathini iyakubashaya,

babhujiswe yimpisi yasehlane,

ingwe iyiqamekele imizi yabo,

badatshulwe bonke abaphuma kuyo,

ngokuba iziphambeko zabo ziningi,

nokuhlehla kwabo kwandile.

₇“Ngingakuthethelela kanjani na?

Abantwana bakho bangishiyile,

bafunga okungesibo onkulunkulu.

Ngabafungisa, kepha baphinga,

babuthana endlini yezifebe.

₈Banjengamahhashi akhulupheleyo andindayo;

yilowo nalowo uyiyizela umfazi womakhelwane wakhe.

₉Angiyikubahambela ngalokho na?” usho uJehova.

“Umphefumulo wami awuyikuphindisa esizweni esinjengalesi na?

₁₀“Khuphukelani ezingangeni zalo,

nilichithe,

ningaliqedi ngokupheleleyo nokho;

susani amagatsha alo,

ngokuba awasiwo akaNkulunkulu.

₁₁Ngokuba indlu ka-Israyeli nendlu kaJuda

zingikhohlisile nokungikhohlisa,” usho uJehova.

₁₂Zimphikile uJehova, zathi:

“Hhayi yena!

Okubi akuyikusehlela,

asiyikubona inkemba nendlala.

₁₃Abaprofethi bayakuba ngumoya,

akakho okhulumayo kubo;

kuyakwenziwa kanjalo kubo.”

“Ngokuba nikhuluma leli zwi,

bhekani, ngiyakwenza amazwi ami

abe ngumlilo emlonyeni wakho,

nalaba bantu babe yizinkuni, ubadle.

₁₅Bhekani,

ngiyakwehlisela phezu kwenu

isizwe esivela kude

nina ndlu ka-Israyeli,” usho uJehova;

“yisizwe esinamandla, yisizwe esidala,

yisizwe ongazi ulimi lwaso,

nongezwa lokhu abakukhulumayo.

₁₆Isambo sabo sinjengethuna elivulekileyo,

bangamaqhawe bonke.

₁₇Bayakudla okuvuniweyo kwakho nesinkwa sakho,

badle amadodana akho namadodakazi akho,

badle izimvu zakho nezinkomo zakho,

badle imivini yakho nemikhiwane yakho,

bachithe ngenkemba imizi yakho

ebiyelweyo othemba kuyo.

₂₀“Memezani lokhu endlini kaJakobe,

nikuzwakalise kwaJuda ngokuthi:

₂₁Yizwani lokhu nina bantu

eniyiziwula neningenakuqonda,

eninamehlo, ningaboni kodwa,

eninezindlebe, ningezwa kodwa.

₂₂Aningesabi yini,” usho uJehova,

“anithuthumeli phambi kwami,

mina engibeke isihlabathi

sibe ngumkhawulo wolwandle,

umncele ophakade olungenakudlula kuwo, na?

Noma lugubha, alunakuwahlula;

noma luduma, alunakudlula kuwo.

₂₃Kepha laba bantu banenhliziyo

eyambukileyo nehlubukileyo;

bambuka, bahamba.

₂₄Futhi abasho ezinhliziyweni zabo ukuthi:

‘Ake sesabe uJehova uNkulunkulu wethu

onika imvula eyokuqala neyamuva ngesikhathi sayo,

asigcinele amasonto anqunyiweyo akuvuna.’

₂₅Ububi benu buchezukisile lokhu,

nezono zenu zinenqabele okuhle.

₂₆“Ngokuba phakathi kwabantu bami kufunyanwa ababi,

baqamekela njengabacuphayo nabalinda izinyoni,

babeke ugibe,

babambe abantu.

₂₇Njengendlwana yezinyoni igcwele zona,

kanjalo izindlu zabo zigcwele inkohliso;

ngalokho bakhulile, bacebile.

₂₈Bakhuluphele, bayacwebezela;

yebo, bayadlula ezintweni zobubi;

abameli ukulunga,

abameli izintandane ukuba zihlahlamele,

nemfanelo yabampofu abayahluleli.

₂₉Angiyikubahambela ngalokho na?” usho uJehova.

“Umphefumulo wami

awuyikuphindisa esizweni esinjengalesi na?

₃₀“Okumangalisayo nokwesabekayo

kuyenziwa ezweni.

₃₁Abaprofethi baprofetha amanga,

abapristi babusa eceleni kwabo;

abantu bami bayakuthanda kanjalo,

kepha niyakwenze njani ekupheleni na?

₁“Thuthani impahla eJerusalema

nina bantwana bakwaBenjamini,

nibethe amacilongo eThekhowa,

niphakamise insika yomusi eBeti Hakeremi,

ngokuba ububi bulunguza ngasenyakatho

nokuchitha okukhulu.

₂Indodakazi yaseSiyoni etotosiweyo nethambileyo

ngiyakuyinquma.

₃Abelusi bayakufika kuyo benemihlambi yabo,

bamise amatende abo ngakuyo nxazonke,

baluse, kube yilowo nalowo endaweni yakhe.”

₄“Zingcweliseleni ukulwa nayo;

vukani, sikhuphuke emini.

Maye kithina! Ngokuba ilanga liyaphenduka,

namathunzi okuhlwa aselulekile.

₅Vukani, sikhuphuke ebusuku,

sichithe izindlu zayo zamakhosi.”

“Gawulani imithi yayo,

ninqwabele iduli ngakulo iJerusalema.

Yiwo umuzi oyakuhanjelwa,

ungukucindezela kuphela phakathi kwawo.

₇Njengomthombo umpompoza amanzi awo,

kanjalo umpompoza ububi bawo;

ubudlova nokubhubhisa kuzwakele phakathi kwawo;

ukugula namanxeba kukhona phambi kwami njalo.

₈Mawuxwayiswe, Jerusalema,

funa umphefumulo wami wahlukane nawe,

funa ngikwenze incithakalo,

izwe elingahlalwa.”

“Bayakuyikhothoza nokuyikhothoza

insali yakwa-Israyeli njengomvini;

buyisela isandla sakho emaqomeni

njengobutha izithelo zomvini.”

₁₀Ngiyakukhuluma kubani,

ngifakaze ukuba bezwe, na?

Bheka, izindlebe zabo azisokile,

abanakulalela;

bheka, izwi likaNkulunkulu seliyihlazo kubo,

abathokozi ngalo.

₁₁Ngalokho ngigcwele ukufutheka kukaJehova,

ngikhathele ukunyamezela.

“Kuthululele phezu kwabantwana ezitaladini,

nasemihlanganweni yezinsizwa kanyekanye,

ngokuba nendoda iyakuthathwa nomkayo,

ogugileyo kanye nozinsuku zakhe zigcwele.

₁₂Izindlu zabo ziyakunikelwa kwabanye,

amasimu abo nawomkabo kanyekanye,

ngokuba ngiyakwelulela isandla sami

kwabakhileyo ezweni,” usho uJehova.

₁₃“Ngokuba kusukela kwabancane babo

kuya kwabakhulu babo

bayaphanga impango bonke,

nabaprofethi nabapristi bonke baqamba amanga.

₁₄Bapholisa kalula ukulimala kwabantu bami,

bathi: ‘Ngukuthula, ngukuthula,’

kepha akukho ukuthula.

₁₅Bayakuba namahloni,

ngokuba benza izinengiso;

nokho abanamahloni nakanye,

abakhophozi;

ngalokho bayakuwa phakathi kwabawayo;

ngesikhathi sokubahambela kwami

bayakukhubeka,” usho uJehova.

“Yimani ezindleleni, nibone,

nibuze imikhondo yasendulo

ukuthi iphi indlela enhle,

nihambe ngayo,

niyakufumana ukuphumula kwemiphefumulo yenu;

kepha bathi: ‘Asiyikuhamba ngayo.’

₁₇Ngase ngibeka abalindi phezu kwenu,

ngithi: ‘Qaphelani ukukhala kwecilongo,’

kepha bathi: ‘Asiyikukuqaphela.’

₁₈Ngalokho zwanini nina zizwe,

wazi wena bandla

ukuthi yintoni ephakathi kwabo.

₁₉Yizwa wena mhlaba ukuthi: Bheka,

ngiyakwehlisela okubi phezu kwalaba bantu,

izithelo zemicabango yabo,

ngokuba abaqaphelanga amazwi ami,

nomthetho wami bawulahlile.

₂₀Ifikelani kimi inhlaka evela eSheba,

nomhlanga othaphukayo ovela ezweni elikude, na?

Iminikelo yenu yokushiswa ayamukeleki,

nemihlatshelo yenu ayimnandi kimi.”

“Bheka, ngiyakubekela laba bantu izikhubekiso,

oyise namadodana bakhubeke kanyekanye kuzo,

umakhelwane abhubhe kanye nomngane wakhe.”

“Bheka, kuvela abantu ezweni elisenyakatho;

isizwe esikhulu siyakuvuswa ekugcineni komhlaba.

₂₃Babamba umnsalo nomkhonto;

banonya, abanamusa,

izwi labo liduma njengolwandle,

bakhwele amahhashi,

behleliwe njengabantu abayakulwa,

behlelelwe ukulwa nawe ndodakazi yaseSiyoni.”

₂₄Sizwile imibiko yalokho:

izandla zethu ziyadangala;

usizi lusibambile,

imihelo njengeyobelethayo.

₂₅Ningaphumeli endle,

ningahambi endleleni,

ngokuba isitha sinenkemba,

navalo nxazonke.

₂₆Ndodakazi yabantu bami,

bhinca indwangu yamasaka,

uhuquzele emlotheni,

wenze isililo njengesendodana eyodwa,

ukukhala okumunyu,

ngokuba umphangi uyakusehlela masinyane.

₂₇“Ngikubekile ukuba ube ngumhloli

nenqaba phakathi kwabantu bami,

wazi, uhlole indlela yabo.

₂₈Bahlubukile bonke nokuhlubuka,

behamba behleba;

bayithusi nensimbi,

bangabachithi bonke.

₂₉Izifutho ziyafutha,

kepha emlilweni kuphuma umthofu kuphela;

impela bancibilikisela ize nje,

ngokuba ababi abakhishwa.

₃₀Bayakuthiwa isiliva elilahlwayo,

ngokuba uJehova ubalahlile.”