To The Word – Day 132

₂“Ngiyakuqothula nokuqothula konke,

kusuke ebusweni bomhlaba,” usho uJehova.

₃“Ngiyakuqothula abantu nezilwane,

ngiqothule izinyoni zezulu nezinhlanzi zaselwandle,

ngikhubekise ababi,

nginqume abantu ebusweni bomhlaba,” usho uJehova.

₄“Ngiyakwelula isandla sami phezu kukaJuda

naphezu kwabo bonke abakhileyo eJerusalema,

nginqume insali kaBali kule ndawo,

negama labapristi bezithixo kanye nabapristi,

₅nabakhuleka kulo ibandla lasezulwini phezu kwezindlu,

nabakhuleka kuJehova bemfunga,

befunga futhi uMilkomu,

₆nababuyile ekumlandeleni uJehova,

nabangamfunanga uJehova bengabuzanga ngaye.

₇Thula phambi kobuso beNkosi uJehova,

ngokuba usuku lukaJehova luseduze;

uJehova ulungisile umhlatshelo,

ungcwelisile abamenyiweyo bakhe.

₈Kuyakuthi ngosuku lomhlatshelo kaJehova,

ngihambele izikhulu,

namadodana enkosi,

nabo bonke abembethe isambatho sabezizwe.

₉Ngalolo suku ngiyakuhambela bonke abeqa umbundu,

begcwalisa indlu yamakhosi abo ngobudlova nangenkohliso.

₁₀“Ngalolo suku,” usho uJehova,

“kuyakuba khona izwi lokukhala,

livela eSangweni Lezinhlanzi,

nokuhhewula,

kuvela eNxenyeni Yesibili,

nokufahlazeka okukhulu,

kuvela emagqumeni.

₁₁Hhewulani nina enakhe esiGqulweni,

ngokuba bonke abantu abathengisayo bachithekile,

bonke abathweswe isiliva banqunyiwe.

₁₂Kuyakuthi ngaleso sikhathi ngicwaninge iJerusalema ngezibani,

ngihambele abantu abajiyile enhleseni yabo,

abathi ezinhliziyweni zabo:

UJehova akenzi okuhle,

akenzi nokubi.

₁₃Ingcebo yabo iyakuba yimpango,

nezindlu zabo incithakalo;

bayakwakha izindlu,

kepha abayikuhlala kuzo,

batshale izivini,

bangaliphuzi kodwa iwayini lazo.

₁₄“Usuku olukhulu lukaJehova luseduze;

luseduze, lushesha kakhulu;

umsindo wosuku lukaJehova uyababa,

neqhawe liyahhewula khona.

₁₅Lolo suku lungusuku lolaka,

usuku lokuhlupheka nolosizi,

usuku lwencithakalo nolokuyize,

usuku lobumnyama nolwesigayegaye,

usuku lwamafu nolobumnyama obukhulu,

₁₆usuku lwecilongo nolokuhlaba umkhosi

ngasemizini ebiyelweyo

nasemibhoshongweni yasezingosini.

₁₇Ngiyakucindezela abantu,

bahambe njengezimpumputhe,

ngokuba bonile kuJehova;

igazi labo liyakuthululwa njengothuli,

nenyama yabo njengomquba.

₁₈Nasiliva labo nagolide labo akuyikuba namandla okubophula

ngosuku lwentukuthelo lukaJehova,

kepha umhlaba wonke uyakudliwa ngumlilo womhawu wakhe,

ngokuba uyakuqeda,

yebo, aqede ngokuzumayo bonke abakhileyo ezweni.”

₁Buthanani, yebo, buthana,

sizwe esingenamahloni,

₂isimiso singakazali lolo suku ludlula njengamakhoba

lungakanehleli ulaka oluvuthayo lukaJehova,

lungakafiki phezu kwenu usuku lolaka lukaJehova.

₃Funani uJehova nina nonke bathobekileyo bomhlaba

enisebenzile ukwahlulela kwakhe;

funani ukulunga; funani ukuthobeka;

mhlawumbe niyakusitshekelwa ngosuku lolaka lukaJehova.

₄Ngokuba iGaza liyakushiywa,

i-Ashikeloni libe yincithakalo;

bayakulixosha i-Ashidodi emini,

i-Ekroni lisishulwe.

₅Wo kwabakhileyo ngasogwini lolwandle,

isizwe samaKhereti!

Izwi likaJehova liphezu kwakho, Khanani,

lizwe lamaFilisiti.

“Ngiyakukuchitha ukuze kungabikho ohlala khona.”

₆Ugu lolwandle luyakuba ngamadlelo,

lube nemigodi yabelusi nezibaya zezimvu.

₇Ugu luyakuba ngolwensali yendlu yakwaJuda,

yaluse kulo;

ezindlini zase-Ashikeloni bayakubuthisa kusihlwa,

ngokuba uJehova uNkulunkulu wabo uyakubahambela,

abuyise ukuthunjwa kwabo.

₈“Ngiyizwile inhlamba yakwaMowabi

nezithuko zabantwana bakwa-Amoni abathuke ngazo abantu bami,

bazikhulisela imikhawulo yabo.

₉Ngalokho, kuphila kwami,” usho uJehova Sebawoti,

uNkulunkulu ka-Israyeli, uthi:

“Impela uMowabi uyakuba njengeSodoma,

nabantwana bakwa-Amoni njengeGomora,

izwe lezimbabazane nelemigodi kasawoti

nencithakalo yaphakade;

insali yabantu bami iyakubaphanga,

nabaseleyo besizwe sami bayakudla ifa labo.”

₁₀Lokhu kuyakuba sesikhundleni sokuziphakamisa kwabo,

ngokuba bathukile,

bazikhulisela abantu bakaJehova Sebawoti.

₁₁UJehova uyakwesabeka phezu kwabo,

ngokuba uyakuzacisa bonke onkulunkulu bomhlaba,

bakhuleke kuye,

kube yilowo nalowo endaweni yakhe,

zonke iziqhingi zezizwe.

₁₂“Nani maKushe

niyakubulawa ngenkemba yami.”

₁₃Uyakwelulela isandla sakhe ngasenyakatho,

achithe i-Asiriya,

alenze iNineve libe yincithakalo,

lome njengehlane.

₁₄Imihlambi iyakubuthisa phakathi kwalo,

zonke izilwane zesizwe,

ivuba nonondwebu kuhlale ebusuku ezihlokweni zezinsika zalo,

isikhova sikhale emafasiteleni,

kube khona incithakalo emigulugulwini,

ngokuba wambulile okwemisedari.*

₁₅Yiwo umuzi owajabula wahlala ulondekile,

owathi enhliziyweni yawo:

Mina ngikhona, akakho omunye;

yeka ukuphenduka kwawo incithakalo nendawo yokubuthisa kwezilwane!

Bonke abadlula kuwo bayakuncimfa,

banikine isandla sabo.

₁Wo kohlubukileyo nongcolileyo,

muzi ocindezelayo!

₂Awuzwa zwi,

awamukeli ukulaywa,

awumethembi uJehova,

awusondelanga kuNkulunkulu wawo.

₃Izikhulu zawo phakathi kwawo ziyizingonyama ezibhongayo;

abahluleli bawo bayizimpisi zokuhlwa;

abashiyeli lutho ingomuso.

₄Abaprofethi bawo bangamayiyane nabakhohlisi;

abapristi bawo bayingcolisile indlu engcwele,

bawudlovulile umthetho.

₅UJehova ulungile phakathi kwawo,

akenzi okubi;

ekuseni njalo uveza ukwahlulela kwakhe ekukhanyeni,

akuphuthi;

kepha abangalungile abazi amahloni.

₆“Nginqumile izizwe,

imibhoshongo yazo yasezingosini ichithekile;

ngichithile izitaladi zazo ukuze kungadluli muntu;

imizi yazo iqothuliwe ukuze kungabikho muntu,

kungabikho ohlala kuyo.

₇Ngathi: ‘Nokho uyakungesaba,

wamukele ukulaywa.’

Indawo yawo yokuhlala ayiyikunqunywa,

kungenzeki konke engiwumisele khona;

kepha bavuka ekuseni, benza okubi.

₈Ngalokho, ngilindeleni,” usho uJehova,

“kuze kube lusuku engivuka ngalo ukuba ngiphange,

ngokuba kuyisinqumo sami ukubutha izizwe ukuba ngiqoqe imibuso,

ukuze ngithulule phezu kwabo intukuthelo yami,

lonke ulaka lwami oluvuthayo,

ngokuba wonke umhlaba uyakudliwa ngumlilo womhawu wami.

₉“Ngokuba lapho ngiyakunika abantu izindebe ezihlanzekileyo,

ukuze bonke babize igama likaJehova,

bamkhonze nganhliziyonye.

₁₀Kusukela phesheya kwemifula yaseKushe

abanxusa kimi, indodakazi yabahlakazekileyo bami,

bayakuletha umnikelo wami.

₁₁Ngalolo suku awusayikuba namahloni ngazo zonke izenzo zakho

ophambuke ngazo kimi,

ngokuba khona ngiyakususa phakathi kwakho

abazidla ngokujabula,

awusayikuziphakamisa entabeni yami engcwele.

₁₂Kepha ngiyakushiya phakathi kwakho abantu abahluphekayo nabampofu;

bayakwethemba igama likaJehova.

₁₃Insali yakwa-Israyeli ayisayikwenza okubi,

ingakhulumi amanga,

kungafunyanwa emlonyeni wabo ulimi olukhohlisayo;

yebo, bayakwaluka, babuthise,

kungekho obesabisayo.”

₁₄Hlabelela ngokujabula, ndodakazi yaseSiyoni,

umemeze, Israyeli,

uthokoze, wethabe ngenhliziyo yonke,

ndodakazi yaseJerusalema.

₁₅UJehova ususile ukwahlulelwa kwakho,

uxoshile izitha zakho.

INkosi yakwa-Israyeli, uJehova,

iphakathi kwakho;

awusayikwesaba okubi.

₁₆Ngalolo suku kuyakuthiwa kulo iJerusalema:

“Ungesabi, Siyoni!

Izandla zakho mazingadangali.

₁₇UJehova uNkulunkulu wakho uphakathi kwakho,

iqhawe eliyakukusindisa;

uyakujabula ngawe ngentokozo,

athule othandweni lwakhe,

ethabe ngawe ngokuhlabelela.”

₁₈“Abadabuka ngemikhosi ngiyakubabutha,

ababahlukene nawe,

usathwele ihlazo.

₁₉Bhekani, ngaleso sikhathi ngiyakuphatha bonke abakuhluphayo,

ngisindise abaqhugayo,

ngibuthe abaxoshiweyo,

ngibenze indumiso negama

abahlazo labo lalisemhlabeni wonke.

₂₀Ngaleso sikhathi ngiyakuningenisa,

ngaleso sikhathi ngiyakunibutha,

ngokuba ngiyakunenza igama nendumiso

phakathi kwabantu bonke bomhlaba,

lapho ngibuyisa ukuthunjwa kwenu

phambi kwamehlo enu,” usho uJehova.

₁Ngiyakumbonga uJehova ngayo yonke inhliziyo yami;

ngiyakulanda zonke izimangaliso zakho.

₂Ngiyakujabula, ngethabe kuwe;

ngiyakudumisa igama lakho wena oPhezukonke,

₃ngokuba izitha zami zibuyela emuva,

ziwa, zibhubha ebusweni bakho,

₄ngokuba ulimelele ilungelo lami nendaba yami,

uhlezi esihlalweni sobukhosi, ungumahluleli olungileyo.

₅Ujezisile abezizwe, wabhubhisa ababi;

igama labo ulesulile kuze kube phakade naphakade.

₆Izitha ziphelile, zachitheka kuze kube phakade;

imizi wayisimbula,

ukukhunjulwa kwayo kwaphela nya.

₇UJehova uyabusa kuze kube phakade;

isihlalo sakhe sobukhosi usimisela ukwahlulela;

₈umhlaba uyakuwahlulela ngokulunga,

athethe amacala ezizwe ngobuqotho.

₉UJehova uyinqaba yocindezelweyo,

uyinqaba ezikhathini zokuhlupheka.

₁₀Nabalaziyo igama lakho bayakwethemba wena;

ngokuba wena Jehova awubashiyi abakufunayo.

₁₁Hubani nimdumise uJehova ohlezi eSiyoni;

memezelani ezizweni izenzo zakhe ezinkulu.

₁₂Ngokuba yena ophindisela igazi uyabakhumbula abahluphekayo;

akakhohlwa ukukhala kwabo.

₁₃Yiba nomusa kimi, Jehova;

kubone engihlupheka ngakho ngabangizondayo

wena ongiphakamisa emasangweni okufa,

₁₄ukuze ngilande ngalo lonke udumo lwakho,

ngethabe ngokusindisa kwakho

emasangweni endodakazi yaseSiyoni.

₁₅Abezizwe bashone phansi egebeni abalenzileyo;

unyawo lwabo lubhajwe esihibeni abasifihlileyo.

₁₆UJehova uzazisile, wahlulela;

umcuphile omubi emsebenzini wezandla zakhe. Higayoni.* Sela*

₁₇Ababi bayakubuyela endaweni yabafileyo,

bonke abezizwe abakhohlwa uNkulunkulu.

₁₈Ngokuba ompofu kayikukhohlakala njalo;

ithemba labahluphekayo aliyikunyamalala kuze kube phakade.

₁₉Vuka, Jehova!

Mawungavumi ukuba abantu bahlule;

abezizwe mabahlulelwe ebusweni bakho.

₂₀Mabashaywe luvalo, Jehova;

abezizwe mabazazi ukuthi bangabantu nje. Sela*

₁Ngiyaphephela kuJehova;

nisho kanjani kuwo umphefumulo wami ukuthi:

“Balekela entabeni yenu njengenyoni, na?

₂Ngokuba bhekani,

ababi bawunsala umnsalo wabo,

babeka imicibisholo yabo entanjeni

ukuba bacibishele ebumnyameni abaqotho ngenhliziyo.

₃Nxa izisekelo zidilizwa,

olungileyo angenzani na?”

₄UJehova usethempelini lakhe elingcwele,

uJehova, isihlalo sakhe sobukhosi sisezulwini;

amehlo akhe ayabuka,

izinkophe zakhe ziyahlola abantwana babantu.

₅UJehova uyamhlola olungileyo;

kepha omubi nothanda ubudlwangudlwangu

umphefumulo wakhe uyamzonda.

₆Unisa izihibe phezu kwababi;

umlilo nesibabule nomoya oshisayo

kuyisabelo sendebe yabo.

₇Ngokuba uJehova ulungile,

uyathanda ukulunga;

oqotho uyakubheka ubuso bakhe.

₁Isilinganiso esikhohlisayo siyisinengiso kuJehova,

kepha isisindo esiyiso siyintokozo yakhe.

₂Lapho kufika ukuziqhenya,

kufika nehlazo;

kepha kwabathobekileyo kukhona ukuhlakanipha.

₃Ukuphelela kwabaqotho kuyabahola,

kepha ukuphambanisa kwabambuluzayo kuyabachitha.

₄Ingcebo ayisizi ngosuku lolaka,

kepha ukulunga kophula ekufeni.

₅Ukulunga kopheleleyo kuqondisa indlela yakhe,

kepha omubi uyakuwa ngobubi bakhe.

₆Ukulunga kwabaqotho kuyabophula,

kepha abambuluzayo babanjwa ezifisweni zabo.

₇Akwethembayo umuntu omubi kuyaphela ekufeni kwakhe,

nethemba lobubi liyabhubha.

₈Olungileyo uyakhululwa osizini,

kepha omubi ungena esikhundleni sakhe.

₉Ngomlomo umuntu

ongenaNkulunkulu ubulala umakhelwane wakhe,

kepha abalungileyo bayakhululwa ngokwazi.

₁₀Nxa abalungileyo behlezi kahle,

umuzi uyathokoza;

lapho bebhubha,

kukhona ukwenanela.

₁₁Ngesibusiso sabaqotho umuzi uyaphakanyiswa,

kepha ngomlomo wababi uyachithwa.

₁₂Odelela umakhelwane wakhe akanakuhlakanipha,

kepha umuntu onengqondo uyazithulela.

₁₃Ohamba encetheza uyambula izimfihlakalo,

kepha othembekile emoyeni uyayisibekela indaba.

₁₄Lapho kungekho iziluleko,

abantu bayawa,

kepha lapho kukhona abeluleki abaningi,

lapho kukhona ukuphumelela.

₁₅Uyahlupheka nokuhlupheka omela umfokazi,

kepha ozonda ukunika isibambiso ulondekile.

₁₆Owesifazane onomusa uzuza udumo,

nezidlwangudlwangu zizuza ingcebo.

₁₇Umuntu onesihawu wenzela okuhle umphefumulo wakhe,

kepha ononya uhlupha inyama yakhe.

₁₈Omubi uthola inzuzo yenkohliso,

kepha ohlwanyela ukulunga unomvuzo oqinisekileyo.

₁₉Oqinile ekulungeni uyakuphila,

kepha olandela okubi,

kuyakuba ngukufa kwakhe.

₂₀Abanhliziyo ephambeneyo

bayisinengiso kuJehova,

kepha abapheleleyo endleleni yabo bayintokozo kuye.

₂₁Impela omubi akayekwa,

kepha inzalo yabalungileyo iyakhululwa.

₂₂Njengendandatho yegolide empumulweni yengulube,

unjalo owesifazane omuhle ongenangqondo.

₂₃Isifiso sabalungileyo singokuhle kuphela;

ithemba lababi lilulaka.

₂₄Ukhona ohlakazayo;

nokho uyenezelwa kakhulu;

kepha ogodla kunokufaneleyo ubangelwa ukuswela kuphela.

₂₅Umphefumulo ophanayo uyakukhuluphaliswa;

ophuzisayo uyakuphuziswa naye.

₂₆Ogodla amabele,

abantu bayamqalekisa,

kepha isibusiso siyakuba sekhanda lothengisa ngawo.

₂₇Ofuna okuhle ufuna okwamukelekayo,

kepha ofuna okubi, kuyakumehlela.

₂₈Owethemba ingcebo yakhe uyakuwa,

kepha abalungileyo bayakuhluma njengamaqabunga aluhlaza.

₂₉Okhathaza indlu yakhe uyakudla ifa lomoya,

nesiwula siyakuba yinceku yonenhliziyo ehlakaniphileyo.

₃₀Isithelo solungileyo singumuthi wokuphila,

nohlakaniphileyo uyazuza imiphefumulo.

₃₁Bheka, olungileyo uyavuzwa emhlabeni;

kakhulu kangakanani omubi nesoni.