To The Word – Day 125

₂Ngiyakukuncenga kuze kube nini,

Jehova, ungezwa,

ngikhala ngendluzula, ungasindisi, na?

₃Ungiboniselani ububi,

ungibhekise ukukhathazeka na?

Ngokuba ukuchitheka nendluzula kuphambi kwami;

kukhona ukulwa,

ukuxabana kuyaqhamuka.

₄Ngalokho umthetho uba buthakathaka,

nokwahlulela akuphumi kuze kube nini,

ngokuba omubi uhaqa olungileyo;

ngalokho ukwahlulela kuphuma kuhlanekezelwe.

₅“Bonani phakathi kwabezizwe,

nibheke,

nimangale nokumangala,

ngokuba wenza isenzo ezinsukwini zenu

eningayikukholwa yiso,

lapho silandwa.

₆Ngokuba bhekani,

ngiyavusa amaKaledi,

isizwe esibabayo nesiphulukundlelayo,

esidabula ebubanzini bomhlaba

ukuyokudla izindawo zokuhlala ezingeyizo ezaso.

₇Siyethusa, siyesabeka;

kuphuma kuso ukwahlulela kwaso nesithunzi saso.

₈Amahhashi aso anejubane kunezingwe,

anonya kunezimpisi zakusihlwa;

abamahhashi baso bayaqinisela;

yebo, bavela kude abamahhashi baso,

bandiza njengokhozi oluphuthuma ukudla.

₉Zonke zifikela indluzula,

ubuso bazo bujonga phambili;

zibutha abathunjwa njengesihlabathi.

₁₀Yebo, sibhinqa amakhosi,

nababusi balusulu kuso;

sihleka zonke izinqaba,

sinqwabela uthuli, sizithathe.

₁₁Bese sikhukhula njengomoya, sidlule,

sizitholele icala,

sona esimandla aso angunkulunkulu waso.”

₁₂Wena Jehova Nkulunkulu wami, oNgcwele,

awungowasendulo na?

Asiyikufa;

Jehova, usinqumele ukwahlulelwa;

wena Dwala, usimisele ukujeziswa.

₁₃Wena omehlo akho ahlambulukile ukuba ungaboni okubi,

ungenakubheka ukuhlanekezela,

ubhekelani abakhohlisayo,

uthulelani lapho omubi egwinya olungileyo kunaye,

₁₄wenze abantu babe njengezinhlanzi zaselwandle,

njengezilwanyana ezinwabuzelayo ezingenambusi phezu kwazo na?

₁₅Uyabakhipha bonke ngodobo,

abadonse ngenetha,

ababuthe ngenetha lakhe elihudulwayo;

ngalokho uyathokoza, uyajabula.

₁₆Ngalokho uyahlabela inetha lakhe,

ashisele inetha lakhe elihudulwayo impepho,

ngokuba isabelo sakhe siyanona ngakho,

kube mnandi ukudla kwakhe.

₁₇Ngalokho uyakuthulula inetha lakhe,

abulale njalo izizwe ngokunganqamukiyo, na?

₁Ngiyakuma endaweni yami yokulinda,

ngigcule enqabeni,

ngikhangele ukubona ukuthi uyakukhulumani kimi

nokuthi ngiyakuphendulani ngokusola kwami.

₂UJehova wangiphendula wathi:

“Wulobe umbono,

uwuqophe ezibhebheni ukuba kufundwe kalula.

₃Ngokuba umbono usengowesikhathi esimisiweyo;

uphuthuma ekupheleni, awuyikukhohlisa;

noma ulibala, wulindele,

ngokuba uyakufika nokufika,

awuyikwephuza.

₄“Bheka, umphefumulo wakhe uziphakamisile,

awuqotho phakathi kwakhe,

kepha olungileyo uzakuphila ngokukholwa kwakhe.

₅Yebo, iwayini liyakhohlisa,

lingumuntu okhukhumeleyo ongayikuma,

owandisa ukufisa kwakhe njengendawo yabafileyo;

unjengokufa: akasuthi;

uyazibuthela zonke izizwe,

uziqoqela bonke abantu.

“ ‘Wo kuyena owandisa okungesikho okwakhe

koze kube nini na? –

nozisindisa ngezibambiso!’

₇Abayikuvuka ngokuzumayo abakulumayo,

bavuke abakuthuthumelisayo,

ube yimpango yabo, na?

₈Ngokuba wena uphangile izizwe eziningi,

bonke abanye abantu bayakuphanga wena,

ngenxa yezingazi zabantu nendluzula eyenziwe ezweni,

nasemzini, nakubo bonke abakhe kuwo.

₉“Wo kozuzela indlu yakhe inzuzo embi

ukuba abeke isidleke sakhe phezulu ukuyophulwa esandleni sobubi!

₁₀Ucebele indlu yakho okubi ngokuchitha abantu abaningi,

wona kuwo umphefumulo wakho.

₁₁Ngokuba amatshe ayakukhala esodongeni,

nomshayo uyakuwaphendula usemithini.

₁₂“Wo kowakha umuzi ngezingazi,

aqinise idolobha ngobubi!

₁₃Bheka, akuveli kuJehova Sebawoti

ukuthi abantu bakhandlekela umlilo,

izizwe zizikhathaze ngokuyize, na?

₁₄Ngokuba umhlaba uyakugcwala ukwazi inkazimulo kaJehova,

njengamanzi asibekela ulwandle.

₁₅“Wo komphuzisa umngane wakhe,

axube nokufutheka, amdakise,

ukuze abuke ubunqunu bakhe!

₁₆Uyakusuthiswa ngehlazo esikhundleni senkazimulo,

uphuze nawe, wambule ijwabu,

indebe yesandla sokunene sikaJehova siphendulelwe kuwe,

kube yihlazo phezu kodumo lwakho.

₁₇Ngokuba indluzula eyenziwe eLebanoni iyakukusibekela,

ukuchithwa kwezilwane kukwesabise,

ngenxa yezingazi zabantu nendluzula eyenziwe ezweni,

nasemzini, nakubo bonke abakhe kuwo.

₁₈“Sisizani isithombe esibaziweyo,

lokhu umbumbi waso esibaza,

nesithombe esibunjiweyo nomfundisi wamanga,

lokhu umbumbi waso ethemba kuso,

ukuze enze izithombe eziyizimungulu, na?

₁₉Wo koshoyo kumuthi ukuthi: ‘Vuka!’

nakulo itshe eliyisimungulu: ‘Phaphama!’

Lokhu kungafundisa na?

Bheka, kunamekwe ngegolide nangesiliva,

kungekho neze umoya phakathi kwakho.

₂₀Kepha uJehova usethempelini lakhe elingcwele;

thula phambi kwakhe,

mhlaba wonke.”

₂Jehova, ngizwile umbiko ngawe,

ngiyesaba izenzo zakho;

zivuselele phakathi kwale minyaka,

wenze ukuba zaziwe kule minyaka,

ukhumbule umusa nasolakeni.

₃UNkulunkulu uvela eThemani,

oNgcwele uphuma entabeni yasePharanu. Sela*

Udumo lwakhe lusibekela amazulu,

nomhlaba ugcwele indumiso yakhe.

₄Kuqhamuka ukubengezela kunjengokukhanya;

imisebe ivela esandleni sakhe,

efihla lapho amandla akhe.

₅Ngaphambi kwakhe kuhamba isifo,

amalangabi aphuma ezinyathelweni zakhe.

₆Uyema, uzamazamisa umhlaba;

ubuka, uthuthumelisa izizwe;

izintaba zaphakade ziyahlakazwa,

namagquma amandulo akhothama yizindlela zakhe zaphakade.

₇Ngibona amatende aseKushani ephansi kosizi,

izilenge zezwe lakwaMidiyani ziyathuthumela.

₈UJehova uyathukuthelela imifula na?

Ulaka lwakho luvuthela imifula,

nentukuthelo yakho ulwandle,

lokhu ukhwele amahhashi akho,

nezinqola zakho zokunqoba, na?

₉Umnsalo wakho uvele obala,

wambuliwe,

usuthile ngemicibisholo yesambo sakho. Sela*

Uqhekeza umhlaba ube yimifula.

₁₀Izintaba ziyakubona, zithuthumele;

isikhukhula samanzi siyadlula;

utwa luzwakalisa izwi lalo,

luphakamisela phezulu izandla zalo.

₁₁Ilanga nenyanga kwema endaweni yakho

ngokukhanya kwemicibisholo yakho egijimayo

nangokubengezela kwemikhonto yakho ecwebezelayo.

₁₂Udabula umhlaba ngokuthukuthela,

ubhula izizwe ngolaka.

₁₃Uphumela ukusindiswa kwabantu bakho,

yebo, ukusindiswa kogcotshiweyo wakho;

uphohloza uphahla endlini yababi,

wambula isisekelo kuze kube sentanyeni. Sela*

₁₄Ugwaza ikhanda lomholi wabo ngeyakhe imicibisholo,

lapho besondela njengesivunguvungu ukungihlakaza,

bejabula njengabayakudla ompofu ngasese.

₁₅Unyathela ulwandle ngamahhashi akho,

inqaba yamanzi amaningi.

₁₆Ngiyezwa, kuyathuthumela okuphakathi kwami,

izindebe zami ziyaqhaqhazela ngenhlokomo;

ukubola kungena emathanjeni ami,

ngithuthumela endaweni lapha ngimi khona,

ngilindela usuku lokuhlupheka ukuze kukhuphuke lokhu

okuyakucindezela abantu.

₁₇Noma umkhiwane ungakhahleli,

kungabikho izithelo emvinini,

umsebenzi womnqumo uphuthe,

amasimu angavezi ukudla,

izimvu zinqunywe esibayeni,

kungabikho nkomo ezibayeni,

₁₈nokho mina ngiyakuthokoza ngoJehova,

ngijabulele uNkulunkulu wokusindiswa kwami.

₁₉UJehova, iNkosi yami,

ungamandla ami,

wenza izinyawo zami zibe njengezezindluzelekazi,

angenze ukuba ngihambe ezindaweni zami eziphakemeyo.

Kumholi wokuhlabelela. Ngogubhu.

₂UJehova unguNkulunkulu

oshisekelayo nophindiselayo;

uJehova uyaphindisela,

ugcwele ukufutheka;

uJehova uphindisela kwabamelene naye,

ugcinela izitha zakhe intukuthelo.

₃UJehova wephuza ukuthukuthela,

mkhulu ngamandla,

akenzi onecala abe msulwa;

uJehova unendlela yakhe esivunguvungwini nasesiphephweni,

namafu ayibhuqu lezinyawo zakhe.

₄Uyakhuza ulwandle, alomise,

ashise nemifula yonke;

iBashani liyawuma kanye neKarmeli,

nezimbali zaseLebanoni ziyabuna.

₅Izintaba ziyathuthumela phambi kwakhe,

amagquma ayancibilika;

umhlaba uyaphakama ebusweni bakhe,

yebo, nakho konke okuhlala kuwo.

₆Ngubani ongema ebusweni bentukuthelo yakhe na?

Ngubani ongema ekufuthekeni kolaka lwakhe na?

Ukufutheka kwakhe kuthululiwe njengomlilo,

namadwala ayaqhekezeka phambi kwakhe.

₇UJehova muhle, uyinqaba ngosuku lwenhlupheko,

uyabazi abaphephela kuye.

₈Kepha ngesikhukhula esiphuphumayo

uyakuqeda indawo yakhona,

axoshele izitha zakhe ebumnyameni.

₉Enikucebayo ngoJehova uyakuqeda yena;

ukuhlupheka akuyikuvela ngokwesibili.

₁₀Lapho bethandela njengameva,

benjengabaminzileyo ophuzweni lwabo,

bayakuqedwa nokuqedwa njengamabibi omileyo.

₁₁Kuphume kuwe owamcebela uJehova okubi,

wanika isiluleko esibi.

₁₂Usho kanje uJehova, uthi:

“Noma benamandla, futhi bebaningi,

nokho bayakuqedwa, banyamalale;

noma ngikuhluphile,

angisayikukuhlupha.

₁₃Sengiyakulaphula ijoka eliphezu kwakho,

ngigqabule izibopho zakho.”

₁₄Kepha uJehova uyalezile ngawe

ukuthi akusayikuhlwanyelwa okwegama lakho;

endlini yawonkulunkulu bakho ngiyakunquma

izithombe ezibaziweyo nezibunjiweyo;

ngiyakulungisa ithuna lakho,

ngokuba awuyinto yalutho.

₁₅Bheka ezintabeni izinyawo zoletha izindaba ezinhle,

omemezela ukuthula.

Gubha imikhosi yakho, Juda,

ugcwalise izithembiso zakho,

ngokuba omubi akasayikudabula kuwe;

unqunyiwe ngokupheleleyo.

₁Kukhuphukela umchithi kuwe; gcina inqaba,

ulinde indlela,

uqinise izinkalo zakho,

uwenze amandla akho ukuba aqine.

₂Ngokuba uJehova uyabuyisa ukuphakama kukaJakobe

njengokuphakama kuka-Israyeli,

lokhu abathululayo bebathululile,

bachitha amagatsha emivini yabo.

₃Izihlangu zamaqhawe akhe zibomvu,

amadoda anamandla embethe okubomvu;

izinqola zibengezela umlilo ensimbini ngosuku lokuzilungisela kwakhe;

imikhonto iyaveva.

₄Izinqola ziyahlanya ezitaladini,

ziyaficana ezigcawini;

ukubonakala kwazo kunjengezimbaqa,

zigijima njengemibani.

₅Useyakhumbula izikhulu zakhe,

ziyakhubeka ekuhambeni kwazo;

zisheshela izingange zakhona,

izivikelo ziyalungiswa.

₆Amasango emifula ayavulwa,

indlu yamakhosi iyancibilika.

₇Kunqunyiwe: liyambulwa, lisuswe;

izincekukazi zalo zibubula ngezwi lamajuba,

zibetha phezu kwezinhliziyo zazo.

₈Kepha iNineve linjengechibi lamanzi kwasendulo,

nokho bayabaleka.

“Yimani, yimani!”

Kepha akakho ophendukayo.

₉Phangani isiliva!

Phangani igolide!

Ngokuba akukho ukuphela kokunqwatshelweyo

nokukhazimula kwazo zonke izinto ezinxanelekayo.

₁₀Liyize, alisenalutho, lichithekile;

inhliziyo iyancibilika,

amadolo ayashayana,

imihelo isezinkalweni zonke,

nobuso babo bonke buphaphathekile.

₁₁Uphi umphandu wezingonyama,

nedlelo lamabhongo ezingonyama,

lapho kwahamba ingonyama nengonyamakazi nebhongo lengonyama,

kungekho okwesabisayo na?

₁₂Ingonyama yadwengula okwanele amabhongo ayo,

yabindela izingonyamakazi zayo;

yagcwalisa imiphandu yayo ngempango

nemigede yayo ngengcugco.

₁₃“Bheka, ngimelene nawe,” usho uJehova Sebawoti;

“ngiyakushisa izinqola zakho emsini,

inkemba idle amabhongo akho ezingonyama;

ngiyakunquma impango yakho emhlabeni,

nezwi lezithunywa zakho alisayikuzwakala.”

₁Wo kumuzi wezingazi!

Wonke ugcwele amanga nempango,

ukuphanga akupheli.

₂Ngukuqhuma kwesiswebhu,

nomsindo wokugodlozela kwamasondo,

namahhashi agadulayo,

nezinqola ezixhumayo;

₃ngabamahhashi abasukelayo,

nenkemba enjengelangabi, nomkhonto onyazimayo,

abaningi ababuleweyo nenqwaba yezidumbu,

kungekho ukuphela kwezidikadika;

bakhubeka ngezidikadika zabo,

₄ngenxa yobuningi bobufebe besifebe esibukekayo,

umnikazi wokulumba,

esithengisa izizwe ngobufebe baso,

nemindeni ngamalumbo aso.

₅“Bheka, ngimelene nawe,” usho uJehova Sebawoti;

“ngiyakuphakamisa imiphetho yakho ebusweni bakho,

ngibonise izizwe ubunqunu bakho,

nemibuso ihlazo lakho.

₆Ngiyakuphonsa okunengakayo phezu kwakho,

ngikuhlazise,

ngikubeke ube yinto ebukwayo.

₇Kuyakuthi bonke abakubonayo bakubalekele, bathi:

‘INineve lichithekile,

ngubani oyakulililela na?’

Ngiyakukufunelaphi abaduduzi na?”

₈Umuhle wena kuneNo Amoni elaliphakathi kwemifula,

elalizungezwe ngamanzi,

elilugange lwalo lwalululwandle,

nelidonga lwalo lungamanzi, na?

₉IKushe neGibithe kwakungamandla alo angenakuphela;

uPhuthi namaLubi babe ngabasizi bakho.

₁₀Nalo lamukiswa,

laya ekuthunjweni,

nezingane zalo zachotshozwa ezingosini zazo zonke izitaladi;

benza inkatho ngezikhulu zalo,

nabo bonke abakhulu balo baboshwa ngamaketanga.

₁₁Uyakudakwa nawe, ufihlwe;

futhi uyakufuna inqaba yokubalekela izitha.

₁₂Zonke izinqaba zakho ziyimikhiwane

enamakhiwane ayingqalabutho;

uma inyakaziswa,

awela emlonyeni wodlayo.

₁₃Bheka, abantu bakho phakathi kwakho bangabesifazane nje;

amasango ezwe lakho avulekele impela izitha zakho,

umlilo udlile imigoqo yakho.

₁₄Zikhelele amanzi okuvinjezelwa,

uqinise izinqaba zakho;

ngena odakeni,

uxove ibumba,

uqinise uhonela.

₁₅Lapho umlilo uyakukuqeda,

inkemba ikunqume,

ikudle njengenkasa;

zandise njengenkasa,

zandise njengesikhonyane!

₁₆Wandisile abathengisi bakho kunezinkanyezi zezulu;

inkasa iyakhula, indize imuke.

₁₇Izikhulu zakho zinjengezinkumbi,

nezinduna zakho zinjengamaqulo esikhonyane

esihlezi phakathi kwezingange ngosuku olumakhaza,

kepha lapho liphuma ilanga, sindize simuke,

ingabe isaziwa indawo yaso ukuthi iphi.

₁₈Abelusi bakho balele,

nkosi yase-Asiriya;

abakhulu bakho bayaphumula;

abantu bakho bahlakazekile ezintabeni,

akakho obabuthayo.

₁₉Akukho ukupholiswa kokwaphulwa kwakho;

umvimbo wakho unzima;

bonke abezwa umbiko ngawe bashaya izandla ngawe,

ngokuba ngubani ububi bakho

obungadlulelanga njalo phezu kwakhe na?