To The Word – Day 109

₁“Ngokuba umbuso wezulu ufana nomuntu ongumninindlu owaphuma ekuseni ukuqasha izisebenzi ziye esivinini sakhe. ₂Esevumelene nezisebenzi ngodenariyu* ngosuku, wazithumela esivinini sakhe.

₃“Waphuma futhi ngehora lesithathu, wabona abanye bemi esigcawini, bengenzi lutho; ₄nakubo wathi: ‘Yanini nani esivinini; ngiyakuninika okufaneleyo.’ ₅Baya-ke.

“Waphuma futhi ngehora lesithupha nangelesishiyagalolunye, wenze njalo. ₆Esephuma ngehora leshumi nanye wafumana abanye bemi, wathi kubo: ‘Nimeleni lapha usuku lonke ningenzi lutho na?’

₇“Bathi kuye: ‘Ngokuba akakho osiqashileyo.’

“Wathi kubo: ‘Hambani nani, niye esivinini.’

₈“Kepha selishonile, umninisivini wathi enduneni yakhe: ‘Biza izisebenzi, uzikhokhele imali yazo, uqale ngezokugcina, ugcine ngezokuqala.’

₉“Kuthe befika abehora leshumi nanye, kwaba yilowo nalowo wamukela udenariyu.* ₁₀Sekuza abokuqala, bathi bazakwamukela okukhulu; kepha nabo bamukela udenariyu* ngabanye. ₁₁Kepha sebamukela bakhonona ngomninindlu, ₁₂bathi: ‘Laba abokugcina basebenze ihora linye nje, ubalinganise nathi esithwalile ubunzima nesifudumezi semini.’

₁₃“Waphendula, wathi komunye wabo: ‘Mngane, angikoni; kanti asivumelananga ngodenariyu* na? ₁₄Thatha okwakho, uhambe; kepha ngiyathanda ukunika lo wokugcina njengawe. ₁₅Angivunyelwe ukwenza engikuthandayo ngokungokwami na? Kumbe iso lakho libi, ngokuba mina ngimuhle na?’

₁₆“Kanjalo abokugcina bayakuba ngabokuqala, nabokuqala babe ngabokugcina.”

₁₇Kwathi uJesu esezakwenyukela eJerusalema, wathatha abafundi abayishumi nambili, wagudluka nabo; besesendleleni, wathi kubo: ₁₈“Bhekani, sikhuphukela eJerusalema; iNdodana yomuntu izakukhashelwa kubapristi abakhulu nababhali; bazakuyinqumela ukuba ife, ₁₉bayikhaphele kwabezizwe ukuba iklolodelwe, ishaywe, ibethelwe esiphambanweni; kepha ngosuku lwesithathu izakuvuswa.”

₂₀Khona kwafika kuye unina wamadodana kaZebedewu kanye namadodana akhe; wakhuleka, wacela into kuye.

₂₁Yena wathi kuye: “Ufunani na?”

Wathi kuye: “Yisho ukuba lawa madodana ami amabili ahlale, enye ngakwesokunene sakho, enye ngakwesokhohlo sakho embusweni wakho.”

₂₂UJesu waphendula wathi: “Anikwazi enikucelayo. Ningasiphuza yini isitsha engizakusiphuza na?”

Bathi kuye: “Singakwenza.”

₂₃Wathi kubo: “Yebo, nizakusiphuza isitsha sami, kepha ukuhlala ngakwesokunene sami nangakwesokhohlo akusikho okwami ukuphana ngakho, kodwa kungokwalabo abakulungiselwe nguBaba.”

₂₄Bathi ukuzwa lokho abayishumi, bazithukuthelela izelamani ezimbili. ₂₅Kepha uJesu wababiza, wathi: “Niyazi ukuthi ababusi bezizwe bazenza amakhosi phezu kwazo, nezikhulu zazo ziphethe amandla phezu kwazo. ₂₆Akunjalo phakathi kwenu, kodwa yilowo nalowo ofuna ukuba mkhulu phakathi kwenu makabe yisikhonzi senu; ₂₇nalowo ofuna ukuba ngowokuqala phakathi kwenu makabe yinceku yenu, ₂₈njengalokho iNdodana yomuntu ingezelanga ukukhonzwa kepha ukukhonza nokunikela ukuphila kwayo, kube yisihlengo sabaningi.”

₂₉Sebephuma eJeriko, isixuku esikhulu samlandela. ₃₀Bheka, kwakuhlezi izimpumputhe ezimbili ngasendleleni; kuthe zizwa ukuthi uJesu uyadlula, zamemeza zathi: “Nkosi, Ndodana kaDavide, sihawukele!”

₃₁Kepha isixuku sazikhuza ukuba zithule, kodwa kwayikhona zimemeza kakhulu, zithi: “Nkosi, Ndodana kaDavide, sihawukele!”

₃₂UJesu wema, wazibiza wathi: “Nifuna ukuba nginenzeleni na?”

₃₃Zathi kuye: “Nkosi, ukuba amehlo ethu avuleke.”

₃₄UJesu waba nesihe, waphatha amehlo azo; zase zibona masinyane, zamlandela.

₁Kwathi ukuba basondele eJerusalema, sebefikile eBetfage ngaseNtabeni Yeminqumo, uJesu wathuma abafundi ababili, ₂wathi kubo: “Hambani niye emzaneni obhekene nani, nizakufumana masinyane imbongolo ikhulekiwe nethole linayo; zithukululeni, nizilethe kimi. ₃Uma umuntu esho utho kini, anothi: ‘INkosi iyazidinga;’ uyakuzithumela masinyane.”

₄Kepha lokho kwenzeka ukuba kugcwaliseke okwashiwo ngumprofethi othi:

₆Abafundi bahamba, benza njengokuba uJesu ebatshelile, ₇baletha imbongolo nethole, babeka izingubo zabo phezu kwazo, wahlala phezu kwazo. ₈Iningi lesixuku lendlala izingubo zalo endleleni, kepha abanye bagawula amahlamvu emithini, bawendlala endleleni. ₉Izixuku ezazihamba phambili nezazimlandela zamemeza zathi:

₁₀Kwathi esangena eJerusalema, umuzi wonke wanyakaza, wathi: “Ngubani lo?”

₁₁Izixuku zathi: “Lo ungumprofethi, uJesu waseNazaretha laseGalile.”

₁₂UJesu wayesengena ethempelini, waxosha bonke abathengisayo nabathengayo ethempelini, wagumbuqela amatafula abashintshelana imali nezihlalo zabathengisa ngamajuba. ₁₃Wathi kubo: “Kulotshiwe ukuthi: ‘Indlu yami iyakubizwa ngokuthi indlu yokukhuleka,’ kepha nina niyenza ‘umhume wabaphangi.’ ”

₁₄Kwase kufika kuye izimpumputhe nezinyonga ethempelini, waziphulukisa. ₁₅Kepha abapristi abakhulu nababhali, bebona izimangaliso azenzayo nabantwana bememeza ethempelini, bethi: “Hosiyana kuyo iNdodana kaDavide,” bacasuka, ₁₆bathi kuye: “Uyakuzwa lokhu abakushoyo laba na?”

UJesu wathi kubo: “Yebo, anizange nifunde yini ukuthi: ‘Emlonyeni wezingane nowabancelayo uzilungisele indumiso,’ na?”

₁₇Wayesebashiya, waphuma emzini, waya eBethaniya, walala khona.

₁₈Kepha ekuseni esebuyela emzini walamba. ₁₉Wabona umkhiwane owodwa ngasendleleni, weza kuwo; akafumananga lutho kuwo, amaqabunga odwa. Wayesethi kuwo: “Akungabe kusavela sithelo kuwe naphakade.” Umkhiwane wabuna khona lapho.

₂₀Bekubona lokho abafundi bamangala bathi: “Umkhiwane ubune kanjani masinyane na?” ₂₁UJesu wayesephendula, ethi kubo: “Ngiqinisile ngithi kini: Uma ninokukholwa, ningangabazi, aniyikwenza okomkhiwane kuphela, kodwa noma nithi kule ntaba: ‘Nqukuleka, uphonseke elwandle,’ kuyakwenzeka; ₂₂nakho konke eningakucela ngokukhuleka nikholwa niyakukwamukeliswa.”

₂₃Kuthe engena ethempelini, kweza kuye abapristi abakhulu namalunga esizwe, esafundisa, bathi: “Ukwenza lokhu ngagunya lini na? Futhi ngubani okunike leli gunya na?”

₂₄UJesu waphendula, wathi kubo: “Nami ngizakunibuza izwi libe linye; uma ningitshela lona, nami ngizakunitshela ukuthi ngenza lokhu ngagunya lini. ₂₅Ukubhapathiza kukaJohane kwavelaphi, ezulwini nokuba kubantu, na?”

Bakhulumisana bodwa, bathi: “Uma sithi: ‘Ezulwini,’ uzakuthi kuthi: ‘Pho, anikholwanga nguye ngani na?’ ₂₆Kepha uma sithi: ‘Kubantu,’ siyasesaba isixuku; ngokuba bonke bathi uJohane ungumprofethi.”

₂₇Base bemphendula uJesu, bethi: “Asazi.”

Wayesethi kubo naye: “Nami anginitsheli ukuthi ngenza lokhu ngagunya lini.”

₂₈“Kepha nithini na? Umuntu wayenamadodana amabili; waya kweyokuqala, wathi: ‘Mntanami, hamba, uyosebenza namuhla esivinini.’

₂₉“Yaphendula yathi: ‘Angithandi;’ kodwa ngasemuva yaguquka, yaya.

₃₀“Wayeseya kwenye, washo kanjalo. Yona yaphendula yathi: ‘Ngiyaya, nkosi;’ kepha kayiyanga.

₃₁“Yiyiphi kulawa amabili eyenza intando kayise na?”

Bathi kuye: “Eyokuqala.”

UJesu wathi kubo: “Ngiqinisile ngithi kini: Abathelisi nezifebe bangena phambi kwenu embusweni kaNkulunkulu. ₃₂Ngokuba uJohane weza kini ngendlela yokulunga, anikholwanga nguye; kepha abathelisi nezifebe bakholwa nguye; kodwa nina, khona nikubona, aniguqukanga nakamuva, nize nikholwe nguye.”

₃₃“Yizwani omunye umfanekiso. Kwakukhona umuntu, umninindlu, owatshala isivini, wasibiyela ngothango, wemba khona isikhamo, wakha isiqongo sokulinda, wasiqashisa kubalimi, waya kwelinye izwe. ₃₄Kwathi sekusondele isikhathi sezithelo, wathuma izinceku zakhe kubalimi ukuba zithathe izithelo zakhe.

₃₅“Abalimi bazibamba izinceku zakhe, enye bayishaya, enye bayibulala, enye bayikhanda ngamatshe. ₃₆Waphinda wathuma ezinye izinceku eziningi kunezokuqala; benze njalo nakulezo. ₃₇Ekugcineni wathuma kubo indodana yakhe, ethi: ‘Bayakuyazisa indodana yami.’

₃₈“Kepha kwathi abalimi bebona indodana, bakhuluma bodwa, bathi: ‘Lo uyindlalifa; wozani siyibulale, sidle ifa layo.’ ₃₉Base beyibamba, bayiphonsa ngaphandle kwesivini, bayibulala.

₄₀“Pho-ke, mhla kufika umninisivini, uzakubenze njani labo balimi na?”

₄₁Bathi kuye: “Uzakubabhubhisa kabi labo ababi, isivini sakhe sinikwe abanye abalimi abayakumnika izithelo ngezikhathi zazo.”

₄₂UJesu wathi kubo: “Anizange nifunde yini emibhalweni ukuthi:

₄₃“Ngalokho ngithi kini: Niyakwamukwa umbuso kaNkulunkulu, uphiwe isizwe esiyakuveza izithelo zawo. ₄₄Owayo phezu kwaleli tshe uyakuphohlozwa; kepha yilowo nalowo eliyakuwela phezu kwakhe liyakumcolisa.”

₄₅Abapristi abakhulu nabaFarisi beyizwa imifanekiso yakhe bazi ukuthi ukhuluma ngabo. ₄₆Base befuna ukumbamba; kepha bazesaba izixuku, ngokuba zazithi ungumprofethi.

₁UJesu wathatha wakhuluma futhi kubo ngemifanekiso, wathi: ₂“Umbuso wezulu ufaniswa nomuntu oyinkosi, owenzela indodana yakhe umshado. ₃Wathuma izinceku zakhe ukubiza abamenyiweyo emshadweni; kepha abavumanga ukuza.

₄“Waphinda wathuma ezinye izinceku, wathi: ‘Shonini kwabamenyiweyo ukuthi: Bhekani, sengilungisile ukudla kwami; izinkabi zami nokunonileyo sekuhlatshiwe; konke sekulungile, wozani emshadweni.’

₅“Kepha badelela, bahamba; omunye waya ensimini yakhe, omunye waya entengweni yakhe. ₆Abaseleyo babamba izinceku zakhe, baziphatha kabi, bazibulala. ₇Kepha inkosi yathukuthela, yathuma amabutho ayo, yabulala labo babulali, yashisa umuzi wabo.

₈“Khona yathi ezincekwini zayo: ‘Umshado usulungiselwe, kepha abamenyiweyo bebengafanele; ₉ngakho-ke hambani niye ezinhlanganweni zezindlela, nibizele emshadweni bonke eningabafumana.’ ₁₀Lezo zinceku zaphuma, zaya ezindleleni, zabutha bonke ezabafumanayo, ababi nabahle; indlu yomshado yagcwala abahleziyo ekudleni.

₁₁“Kuthe inkosi ingena ukubona abahleziyo ekudleni, yabona khona umuntu obengayembethe ingubo yomshado; ₁₂yathi kuye: ‘Mngane, ungene kanjani lapha ungayembethe ingubo yomshado na?’ Kepha wathula.

₁₃“Khona inkosi yathi ezincekwini: ‘Mbopheni izinyawo nezandla, nimphonse ebumnyameni obungaphandle; lapho kuyakuba khona ukukhala nokugedla amazinyo.’

₁₄“Ngokuba baningi ababiziweyo, kepha bayingcosana abakhethiweyo.”

₁₅Khona abaFarisi basuka, bacebisana ukuba bamhile ngezwi. ₁₆Bathuma kuye abafundi babo kanye nabakaHerode, bathi: “Mfundisi, siyazi ukuthi uqinisile, ufundisa indlela kaNkulunkulu ngeqiniso; awukhathali ngamuntu, ngokuba awubheki ubuso babantu. ₁₇Ngakho sitshele, uthini wena? Kuvunyelwe ukuthela kuKesari noma qha?”

₁₈Kepha uJesu ebazi ububi babo wathi: “Bazenzisi, ningilingelani na? ₁₉Ngitshengiseni imali yokuthela,” bamtshengisa udenariyu.* ₂₀Wayesethi kubo: “Ngokabani lo mfanekiso nalo mbhalo na?”

₂₁Bathi: “NgokaKesari.”

Khona wathi kubo: “Ngakho-ke nikani uKesari okukaKesari noNkulunkulu okukaNkulunkulu.”

₂₂Sebezwile lokho bamangala, bamshiya, bamuka.

₂₃Ngalolo suku kwafika kuye abaSadusi abathi akukho ukuvuka kwabafileyo, bambuza ₂₄bathi: “Mfundisi, uMose wathi: ‘Uma umuntu efa engenabantwana, umfowabo kamngene umkakhe, amvusele umfowabo inzalo.’ ₂₅Kwakukhona-ke kithi izelamani eziyisikhombisa: owokuqala waganwa, wafa; engenanzalo washiya umkakhe kumfowabo. ₂₆Kanjalo nowesibili nowesithathu, kwaze kwaba kowesikhombisa. ₂₇Emva kwabo bonke wafa umfazi. ₂₈Pho, ekuvukeni kwabafileyo uyakuba ngumkabani kwabayisikhombisa, lokhu bonke babe naye, na?”

₂₉Kepha uJesu waphendula, wathi kubo: “Nidukile ningayazi imibhalo namandla kaNkulunkulu. ₃₀Ngokuba ekuvukeni kwabafileyo abaganwa, abendiswa, kodwa banjengezingelosi ezulwini. ₃₁Kepha maqondana nokuvuka kwabafileyo anifundanga yini okwakhulunywa kini nguNkulunkulu, ethi: ₃₂‘Mina nginguNkulunkulu ka-Abrahama, noNkulunkulu ka-Isaka, noNkulunkulu kaJakobe,’ na? Akasiye uNkulunkulu wabafileyo kodwa owabaphilayo.”

₃₃Kwathi izixuku zikuzwa lokho, zamangala ngokufundisa kwakhe.

₃₄AbaFarisi sebezwile ukuthi uJesu ubathulisile abaSadusi, babuthana ndawonye. ₃₅Omunye wabo, isazimthetho, wamlinga, wathi: ₃₆“Mfundisi, ngumuphi umyalo omkhulu emthethweni na?” ₃₇UJesu wathi kuye: “ ‘Woyithanda iNkosi uNkulunkulu wakho ngayo yonke inhliziyo yakho, nangawo wonke umphefumulo wakho, nangayo yonke ingqondo yakho.’ ₃₈Yilowo umyalo omkhulu nowokuqala. ₃₉Owesibili ofana nawo uthi: ‘Wothanda umakhelwane wakho njengalokhu uzithanda wena.’ ₄₀Kuleyo miyalo emibili kubambelela umthetho wonke nabaprofethi.”

₄₁Besabuthene abaFarisi, uJesu wababuza, ₄₂wathi: “Nithini ngoKristu na? Uyindodana kabani na?”

Bathi kuye: “EkaDavide.”

₄₃Wathi kubo: “Pho, uDavide ngoMoya wambiza kanjani ngokuthi iNkosi, ethi:

₁Khona uJesu wakhuluma ezixukwini nakubafundi bakhe, ₂wathi: “Ababhali nabaFarisi bahlezi esihlalweni sikaMose. ₃Ngakho-ke konke abanitshela khona, kwenzeni, nikugcine, kodwa ningenzi njengemisebenzi yabo; ngokuba bayakhuluma, bangenzi; ₄babopha imithwalo enzima, bayibeke emahlombe abantu; kepha bona abavumi ukuyifukula ngomunwe wabo.

₅“Kepha imisebenzi yonke yabo bayenza ukuba babonwe ngabantu; amafilakteriyu* abo bawenza abe banzi, bawenze abe makhulu amachopho. ₆Bathanda izindawo ezingenhla ekudleni nezihlalo eziphambili emasinagogeni,* ₇nokubingelelwa ezigcawini, nokubizwa ngabantu ngokuthi ‘Rabi’.

₈“Kepha nina maningabizwa ngokuthi ‘Rabi’; ngokuba munye umfundisi wenu, nina nonke ningabazalelwane. ₉Ningabizi muntu emhlabeni ngokuthi uyihlo; ngokuba munye uyihlo, osezulwini. ₁₀Futhi ningabizwa ngokuthi abaholi; ngokuba munye umholi wenu, uKristu. ₁₁Kodwa omkhulu kini akabe yisikhonzi senu. ₁₂Kepha yilowo nalowo oziphakamisayo uzakuthothiswa, nalowo ozithobayo uzakuphakanyiswa.

₁₃“Maye kinina babhali nabaFarisi, bazenzisi, ngokuba nivalela abantu umbuso wezulu! Ngokuba aningeni nina, nabangenayo anibavumeli ukungena. ₁₄Maye kinina babhali nabaFarisi, bazenzisi, ngokuba nidla izindlu zabafelokazi, nangokuzenzisa nenza imikhuleko emide! Ngalokho-ke niyakwamukeliswa ukulahlwa okukhulu.

₁₅“Maye kinina babhali nabaFarisi, bazenzisi, ngokuba nihamba ulwandle nomhlaba ukuba nithole nokuba iproselite* lilinye, lithi selaba njalo nilenze indodana yesihogo ngokuphindiwe kunani!

₁₆“Maye kinina baholi abayizimpumputhe enithi: ‘Ofunga ithempeli akulutho, kodwa ofunga igolide lethempeli uzibophile!’ ₁₇Ziwula, zimpumputhe, ngokuba yikuphi okukhulu kunegolide nethempeli elingcwelisa igolide na? ₁₈Futhi: ‘Yilowo ofunga i-altare akulutho, kodwa ofunga umnikelo ophezu kwalo uzibophile.’ ₁₉Zimpumputhe, yikuphi okukhulu kunomnikelo ne-altare elingcwelisa umnikelo na? ₂₀Ngakho-ke ofunga i-altare ufunga lona nakho konke okuphezu kwalo. ₂₁Nofunga ithempeli ufunga lona nohlezi kulo. ₂₂Nofunga izulu ufunga isihlalo sobukhosi sikaNkulunkulu nohlezi phezu kwaso.

₂₃“Maye kinina babhali nabaFarisi, bazenzisi, ngokuba nithela okweshumi kwesinkuntshane, nokwentshungu, nokodonqa, niyeke okunzima komthetho: ukwahlulela nesihawu nokukholwa! Benimelwe ukwenza lokhu, ningakuyeki nalokho. ₂₄Baholi abayizimpumputhe, nihluza insensane, niginge ikamela.

₂₅“Maye kinina babhali nabaFarisi, bazensizi, ngokuba nihlambulula ingaphandle lenkezo nesitsha, kepha ngaphakathi kugcwele impango nokuhuheka! ₂₆Mfarisi oyimpumputhe, hlanza kuqala ingaphakathi lenkezo, ukuze kuhlanzeke nengaphandle layo.

₂₇“Maye kinina babhali nabaFarisi, bazenzisi, ngokuba nifana namaliba acakiweyo abonakala emahle ngaphandle, kanti ngaphakathi agcwele amathambo abafileyo nokungcola konke! ₂₈Kanjalo nani ngaphandle nibonakala kubantu nilungile, kanti ngaphakathi nigcwele ukuzenzisa nobubi.

₂₉“Maye kinina babhali nabaFarisi, bazenzisi, ngokuba nakha amaliba abaprofethi, nihlobisa amathuna abalungileyo! ₃₀Nithi: ‘Uma sasikhona emihleni yawobaba, sasingayikuhlanganyela nabo egazini labaprofethi.’ ₃₁Kanjalo niyazifakazela nina ukuthi ningamadodana ababulala abaprofethi. ₃₂Nani gcwalisani isilinganiso sawoyihlo.

₃₃“Zinyoka, nzalo yamabululu, niyakukubalekela kanjani ukulahlwa kwasesihogweni na? ₃₄Ngakho-ke, bhekani, mina ngithuma kini abaprofethi, nabahlakaniphileyo, nababhali; abanye kubo niyakubabulala, nibabethele; abanye niyakubashaya emasinagogeni* enu, nibaxoshe imizi ngemizi ₃₅ukuba kufike phezu kwenu igazi lonke elilungileyo elachithwa emhlabeni, kusukela egazini lika-Abela olungileyo kuze kube segazini likaZakariya indodana kaBarakiya enambulala phakathi kwethempeli ne-altare. ₃₆Ngiqinisile ngithi kini: Konke lokhu kuyakufika phezu kwalesi sizukulwane.

₃₇“Jerusalema, Jerusalema, wena obulala abaprofethi nokhanda ngamatshe abathunyelwe kuwe, kukangaki ngithanda ukubuthela ndawonye abantwana bakho njengesikhukukazi sibuthela amazinyane aso phansi kwamaphiko aso, kepha anivumanga. ₃₈Bhekani, indlu yenu isisala nani. ₃₉Ngokuba ngithi kini: Anisayikungibona nize nithi: ‘Ubusisiwe ozayo egameni leNkosi.’ ”

₁Kuthe uJesu ephuma ethempelini, emuka, kwasondela abafundi bakhe ukumtshengisa izakhiwo zethempeli. ₂Waphendula, wathi kubo: “Anikuboni konke lokhu na? Ngiqinisile ngithi kini: Akuyikushiywa lapha itshe phezu kwetshe elingayikudilizelwa phansi.”

₃Esahlezi eNtabeni Yeminqumo, abafundi beza kuye bebodwa, bathi: “Sitshele ukuthi lokhu kuyakuba nini, nesibonakaliso sokuza kwakho nesokuphela kwezwe siyakuba yini na?”

₄UJesu waphendula, wathi kubo: “Qaphelani ningadukiswa muntu. ₅Ngokuba kuyakuza abaningi ngegama lami, bathi: ‘Mina nginguKristu,’ badukise abaningi. ₆Niyakuzwa izimpi namahemuhemu ezimpi. Bhekani ningethuki, ngokuba kumelwe ukuba kwenzeke, kepha ukuphela koba kungakafiki. ₇Ngokuba isizwe siyakuvukela isizwe, nombuso uvukele umbuso, kube khona indlala nokuzamazama komhlaba izindawo ngezindawo. ₈Kepha konke lokho kungukuqala kwemihelo.

₉“Lapho-ke bayakunikhaphela osizini, banibulale; niyakuzondwa yizizwe zonke ngenxa yegama lami. ₁₀Khona-ke abaningi bayakukhubeka, bakhaphelane, bazondane. ₁₁Kuyakuvela abaprofethi bamanga abaningi, badukise abaningi. ₁₂Ngenxa yokwanda kokubi kuzakuphola uthando lwabaningi. ₁₃Kodwa okhuthazelayo kuze kube sekupheleni nguyena oyakusindiswa. ₁₄Leli vangeli lombuso liyakushunyayelwa ezweni lonke, kube ngubufakazi ezizweni zonke, andukuba kufike ukuphela.

₁₅“Ngakho-ke nxa nibona amanyala encithakalo ashiwo nguDaniyeli umprofethi emi endaweni engcwele – ofundayo makaqaphele – ₁₆khona abaseJudiya mababalekele ezintabeni, ₁₇ophezu kwendlu angehli ukuyothatha okusendlini yakhe, ₁₈osensimini angabuyeli emuva ukuyothatha ingubo yakhe. ₁₉Kepha maye kwabakhulelweyo nabancelisayo ngalezo zinsuku! ₂₀Khulekani ukuba ukubaleka kwenu kungabi sebusika nangesabatha. ₂₁Ngokuba lapho kuyakuba khona usizi olukhulu olungazange lube khona kwasekuqaleni kwezwe kuze kube manje nolungasayikuba khona. ₂₂Uma lezo zinsuku zingafinyezwanga, bekungesindiswe muntu; kepha ngenxa yabakhethiweyo lezo zinsuku ziyakufinyezwa. ₂₃Khona uma umuntu ethi kini: ‘Bhekani, nangu uKristu,’ noma: ‘Nanguya,’ ningakholwa. ₂₄Ngokuba kuyakuvela okristu bamanga nabaprofethi bamanga, baveze izibonakaliso ezinkulu nezimangaliso, ukuze kudukiswe nabakhethiweyo, uma kungenzeka. ₂₅Bhekani, senginitshelile ngaphambili.

₂₆“Ngakho-ke uma bethi kini: ‘Bhekani, usehlane,’ ningaphumi; noma bethi: ‘Bhekani, usendlini,’ ningakholwa; ₂₇ngokuba njengonyazi luphuma empumalanga, lubonakale kuze kube sentshonalanga, kuyakuba njalo ukufika kweNdodana yomuntu. ₂₈Nomaphi lapho kukhona isidumbu, kulapho amanqe eyakubuthana khona.

₂₉“Kepha masinyane emva kosizi lwalezo zinsuku

₃₀“Khona kuyakubonakala ezulwini isibonakaliso seNdodana yomuntu, bese zikhala izizwe zonke zomhlaba, zibone iNdodana yomuntu iza emafwini ezulu, inamandla nenkazimulo enkulu. ₃₁Iyakuthuma izingelosi zayo ngokukhala okukhulu kwecilongo, ziqoqe abakhethiweyo bayo emimoyeni yomine, kusukela emkhawulweni omunye wezulu kuze kube komunye.

₃₂“Fundani umfanekiso emkhiwaneni; nxa igatsha lawo selithamba, lihlume amaqabunga, niyazi ukuthi ihlobo seliseduze. ₃₃Kanjalo nani, nxa nibona konke lokhu, yazini ukuthi iseduze ngasemnyango. ₃₄Ngiqinisile ngithi kini: Lesi sizukulwane asiyikudlula kungakenzeki konke lokhu. ₃₅Kuyakudlula izulu nomhlaba, kepha amazwi ami awasoze adlula.

₃₆“Kepha lolo suku nalelo hora akakho owazi lutho ngalo nazingelosi zasezulwini, naNdodana, nguBaba kuphela. ₃₇Ngokuba njengasemihleni kaNowa, kuyakuba njalo ukufika kweNdodana yomuntu. ₃₈Ngokuba njengasezinsukwini lezo ezandulela uzamcolo babedla, bephuza, beganwa, bendiswa, kwaze kwafika usuku uNowa angena ngalo emkhunjini, ₃₉abazanga kwaze kwafika uzamcolo wabakhukhula bonke, kuyakuba njalo ukufika kweNdodana yomuntu. ₄₀Khona-ke kuyakuba khona ababili ensimini, omunye athathwe, omunye ashiywe; ₄₁ababili boba besila etsheni, omunye athathwe, omunye ashiywe.

₄₂“Ngakho-ke lindani, ngokuba anazi ukuthi iNkosi yenu iyakufika ngaluphi usuku. ₄₃Kepha anokwazi lokhu ukuthi, uma umninindlu ebewazi umlindo isela eliyakufika ngawo, ubeyakulinda, angavumi ukuba indlu yakhe ifohlwe. ₄₄Ngalokho nani hlalani nilungele, ngokuba iNdodana yomuntu iyakufika ngesikhathi eningasicabangiyo.

₄₅“Pho, ngubani oyinceku ethembekileyo neqondayo, inkosi yayo eyimisile phezu kwabendlu yayo ukuba ibanike ukudla ngesikhathi sakho na? ₄₆Ibusisiwe leyo nceku, okuyakuthi kufika inkosi yayo, iyifumane yenze njalo. ₄₇Ngiqinisile ngithi kini: Iyakuyimisa phezu kwakho konke enakho. ₄₈Kodwa uma leyo nceku embi ithi enhliziyweni yayo: ‘Inkosi yami ilibele,’ ₄₉iqale ukushaya izinceku ezikanye nayo, idle, iphuze nezidakwa, ₅₀inkosi yaleyo nceku iyakufika ngosuku engayibhekile ngalo nangehora engalaziyo, ₅₁iyinqamule kabili, iyimisele isabelo sayo kanye nabazenzisi; kuyakuba khona lapho ukukhala nokugedla amazinyo.

₁“Khona umbuso wezulu uzakufaniswa nezintombi eziyishumi ezathatha izibani zazo, zaphuma ukuyohlangabeza umyeni. ₂Kepha eziyisihlanu kuzo zaziyiziwula, neziyisihlanu zazihlakaniphile. ₃Ngokuba eziyiziwula zithatha izibani kaziwaphathanga amafutha. ₄Kodwa ezihlakaniphileyo zaphatha amafutha ezitsheni kanye nezibani zazo. ₅Umyeni esalibele, zozela zonke, zalala.

₆“Kepha phakathi kobusuku kwamenyezwa ukuthi: ‘Nangu umyeni; phumani niye kumhlangabeza!’

₇“Khona zavuka lezo zintombi zonke, zalungisa izibani zazo. ₈Eziyiziwula zase zithi kwezihlakaniphileyo: ‘Sipheni amafutha kwawenu, ngokuba izibani zethu ziyacima.’

₉“Kepha ezihlakaniphileyo zaphendula zathi: ‘Qha, funa angasaneli thina nani. Okungcono hambani niye kwabathengisayo, nizithengele.’

₁₀“Zisaya kuthenga, wafika umyeni. Ezazilungele zangena naye emshadweni; kwavalwa emnyango.

₁₁“Ngasemuva zafika nezinye izintombi, zathi: ‘Nkosi, nkosi, sivulele.’

₁₂“Kepha waphendula wathi: ‘Ngiqinisile ngithi kini: Anginazi.’

₁₃“Ngakho lindani, ngokuba anilwazi usuku nehora.

₁₄“Ngokuba kunjengomuntu owathi eyakuhambela kwelinye izwe wabiza izinceku zakhe, wazinika impahla yakhe; ₁₅enye wayinika amatalenta* ayisihlanu, enye aba mabili, enye laba linye, kwaba yileyo naleyo njengamandla ayo; wamuka-ke. ₁₆Lowo obamukele amatalenta ayisihlanu wahamba masinyane, wasebenza ngawo, wazuza amanye ayisihlanu. ₁₇Kanjalo obamukele amabili wazuza amanye amabili. ₁₈Kepha obamukele lalinye waya wemba emhlabathini, wayifihla imali yenkosi yakhe.

₁₉“Kepha emva kwesikhathi eside yafika inkosi yalezo zinceku, yalandisana nazo. ₂₀Weza obamukele amatalenta ayisihlanu, waletha amanye amatalenta ayisihlanu, wathi: ‘Nkosi, wanginika amatalenta ayisihlanu; bheka, ngizuze amanye amatalenta ayisihlanu.’

₂₁“Inkosi yakhe yathi kuye: ‘Kuhle, nceku enhle nethembekileyo, uthembekile ezintweni eziyingcosana; ngizakukubeka phezu kokuningi; ngena ekuthokozeni kwenkosi yakho.’

₂₂“Weza nobamukele amatalenta amabili, wathi: ‘Nkosi, wanginika amatalenta amabili; bheka, ngizuze amanye amatalenta amabili.’

₂₃“Inkosi yakhe yathi kuye: ‘Kuhle, nceku enhle nethembekileyo, uthembekile ezintweni eziyingcosana; ngizakukubeka phezu kokuningi; ngena ekuthokozeni kwenkosi yakho.’

₂₄“Kepha weza nobamukele italenta lalinye, wathi: ‘Nkosi, bengikwazi ukuthi ungumuntu olukhuni; uvuna lapho ungahlwanyelanga khona, ubutha lapho ungafazanga khona; ₂₅ngesaba, ngaya ngalithukusa emhlabathini italenta lakho; bheka, nakhu okwakho.’

₂₆“Kepha inkosi yakhe yaphendula, yathi kuye: ‘Nceku embi nevilaphayo, ubukwazi ukuthi ngivuna lapha ngingahlwanyelanga khona, ngibutha lapha ngingafazanga khona, na? ₂₇Ngakho wawumelwe ukubeka imali yami kwabebhange,* mina-ke ekufikeni kwami ngabe ngitholile okwami kanye nenzalo.

₂₈“ ‘Ngakho mamukeni italenta, nilinike onamatalenta ayishumi. ₂₉Ngokuba yilowo nalowo onakho uyakuphiwa, avame; kepha ongenakho uyakwamukwa nalokho anakho. ₃₀Leyo nceku engasiziyo yiphonseni ebumnyameni obungaphandle; lapho kuyakuba khona ukukhala ngokugedla amazinyo.’

₃₁“Kepha nxa iNdodana yomuntu iza ngenkazimulo yayo nezingelosi zonke ezingcwele kanye nayo, khona izakuhlala esihlalweni sayo senkazimulo; ₃₂kuzakubuthelwa phambi kwayo izizwe zonke, ibahlukanise abanye kwabanye, njengomalusi ahlukanisa izimvu nezimbuzi, ₃₃imise izimvu ngakwesokunene sayo kepha izimbuzi ngakwesokhohlo.

₃₄“Khona iNkosi izakuthi kwabangakwesokunene sayo: ‘Zanini nina enibusisiwe nguBaba, nidle ifa lombuso eniwulungiselweyo selokhu kwasekelwa umhlaba. ₃₅Ngokuba ngangilambile, nangipha ukudla; ngangomile, nangiphuzisa; ngangingumfokazi, nangingenisa; ₃₆ngihamba ze nangembathisa; ngangigula, nangihamba; ngangisetilongweni, neza kimi.’

₃₇“Khona bayakuyiphendula abalungileyo ngokuthi: ‘Nkosi, sakubona nini ulambile sakupha ukudla, noma womile sakuphuzisa, na? ₃₈Sakubona nini ungumfokazi sakungenisa, noma uhamba ze sakwembathisa, na? ₃₉Sakubona nini ugula, noma usetilongweni, seza kuwe, na?’

₄₀“Isiyakuphendula iNkosi, ithi kubo: ‘Ngiqinisile ngithi kini, njengokuba nikwenzile komunye walaba bafowethu abancane, nikwenzile kimi.’

₄₁“Khona iyakuthi kwabangakwesokhohlo: ‘Dedani kimi nina baqalekisiweyo, niye emlilweni ophakade olungiselwe uSathane nezingelosi zakhe. ₄₂Ngokuba ngangilambile, aningiphanga ukudla; ngangomile, aningiphuzisanga; ₄₃ngangingumfokazi, aningingenisanga; ngihamba ze aningembathisanga; ngigula, ngisetilongweni, aningihambanga.’

₄₄“Khona bayakuphendula nabo, bathi: ‘Nkosi, sakubona nini ulambile, noma womile, noma ungumfokazi, noma uhamba ze, noma ugula, noma usetilongweni, singakukhonzanga, na?’

₄₅“Khona iyakubaphendula ithi: ‘Ngiqinisile ngithi kini: Lokho eningakwenzanga komunye walaba abancinyane anikwenzanga nakimi.’

₄₆“Laba bayakumuka, baye ekujezisweni okuphakade, kodwa abalungileyo baye ekuphileni okuphakade.”