Induduzo evela eZwini – Day 23

₁Umphefumulo wami uzithulele kuNkulunkulu kuphela;

insindiso yami ivela kuye.

₂Nguye kuphela oyidwala lami nensindiso yami, inqaba yami;

angiyikunyakaziswa kakhulu.

₅Mphefumulo wami,

zithulisele kuNkulunkulu kuphela,

ngokuba ithemba lami livela kuye.

₆Nguye kuphela oyidwala lami nensindiso yami,

inqaba yami; angiyikunyakaziswa.

₇Insindiso yami nodumo lwami kukuNkulunkulu;

idwala lami eliqinileyo nesiphephelo sami kukuNkulunkulu.

₈Thembani kuye ngezikhathi zonke nina bantu,

nithulule inhliziyo yenu phambi kwakhe;

uNkulunkulu uyisiphephelo sethu. Sela*

₁Ngiphakamisela amehlo ami ezintabeni;

usizo lwami luvelaphi na?

₂Usizo lwami luvela kuJehova

owenzile izulu nomhlaba.

₃Akayikuvuma ukuba unyawo lwakho lushelele;

okulondolozayo akayikozela.

₄Bheka, olonda u-Israyeli akozeli,

akalali.

₅UJehova ungumlondi wakho;

uJehova ungumthunzi wakho ngasesandleni sakho sokunene.

₆Ilanga aliyikukushaya emini nenyanga ebusuku.

₇UJehova uyakukulondoloza ebubini bonke;

uyakulonda umphefumulo wakho.

₈UJehova uyakulondoloza ukuphuma kwakho nokungena kwakho

kusukela kulesi sikhathi kuze kube phakade.

₁Ngiyaphakamisela kuwe amehlo ami,

wena ohlezi ezulwini.

₂Bheka, njengamehlo ezinceku ekuzo izandla zamakhosi azo,

namehlo encekukazi ekuso isandla senkosikazi yayo,

kanjalo amehlo ethu akuye uJehova uNkulunkulu wethu,

aze abe nomusa kithi.

₃Sihawukele, Jehova sihawukele,

ngokuba sesidiniwe kakhulu ngukudelelwa.

₄Umphefumulo wethu udiniwe kakhulu

ngukweyisa kwabaziqhenyayo nokudelela kwabazidlayo.