Bible Reading Plan – Day 238

₁Olungileyo uyabhubha,

akakho okubeka enhliziyweni;

abantu abanomusa bayasuswa,

kungaqondi muntu.

Olungileyo uyasuswa ebubini,

₂angene ekuthuleni;

abahambe ngobuqotho bayakuphumula emibhedeni yabo.

₃“Kepha sondelani

nina madodana abahlola imihlola,

inzalo yomphingi neyesifebe.

₄Nidlala nobani,

nikhamisela bani umlomo,

ninyalizela bani, na?

Anisibo abantwana beziphambeko,

inzalo yamanga yini,

₅nina enisha phakathi kwama-oki*

phansi kwayo yonke imithi eluhlaza,

enibulala abantwana ezigodini

phansi emifantwini yamadwala, na?

₆Isabelo sakho siphakathi kwamatshe abushelezi asesigodini;

wona yiwo angawenkatho yakho;

nakuwona uthululele umnikelo wokuphuzwa,

wenza umnikelo wempuphu.

Ngiyakwaneliswa ngalokhu na?

₇Entabeni ende nephakemeyo

uwubekile umbhede wakho;

futhi wakhuphukela khona

ukunikela ngomhlatshelo.

₈Wabeka isithombe sakho emva kwezicabha nezinsika,

wazambulela omunye kunami,

wakhwela embhedeni, wawandisa,

wavumelana nabo,

wayithanda imibhede yabo,

wazibonelela indawo.

₉Waya kuMoloki uphethe amafutha,

wawandisa amakha akho;

wathumela kude izithunywa

zakho, wazehlisela nasendaweni yabafileyo.

₁₀Wakhathala ngobude bendlela,

kepha awushongo ukuthi: ‘Kuyize.’

Wathola amandla aneleyo,

ngalokho awuphelanga amandla.

₁₁“Washaywa luvalo ngobani, wamesaba,

waze waqamba amanga,

awangikhumbula,

futhi ungakubekanga enhliziyweni yakho, na?

Angithi njengokuba ngithulile kwasendulo,

awungesabi, na?

₁₂Mina ngiyakumemezela ukulunga

kwakho nemisebenzi yakho;

kepha akuyikukusiza.

₁₃Ekukhaleni kwakho izixuku zezithombe zakho mazikophule,

kepha umoya uzakuzisusa zonke,

ukuphefumula kuzithathe;

kodwa othemba kimi uzakudla ifa lezwe,

adle nefa lentaba yami engcwele.”

₁₄Kuyakuthiwa:

“Hlelani, hlelani, nilungise indlela,

nisisuse isikhubekiso endleleni yabantu bami.”

₁₅Ngokuba usho kanje ophakamileyo nophezulu,

ohlala kuze kube phakade,

ogama lakhe lingoNgcwele, uthi:

“Ngihlala endaweni ephakemeyo nengcwele,

kepha nakuye onomoya ochotshoziweyo nothobekileyo,

ukuvuselela umoya wabathobekileyo

nokuphilisa izinhliziyo zabachotshoziweyo.

₁₆Ngokuba angiyikulwa kuze kube phakade,

angiyikuthukuthela njalonjalo,

ngokuba umoya ubuyakuphela phambi kwami,

leyo miphefumulo engiyenzileyo.

₁₇Ngenxa yobubi bokuhaha kwakhe ngathukuthela,

ngamshaya, ngazisitheza ngisathukuthele,

kepha waqhubeka wahlubuka ngendlela yenhliziyo yakhe.

₁₈Ngizibonile izindlela zakhe, ngiyakumphilisa;

ngiyakumhola, ngimduduze yena nabamlilelayo,

₁₉ngidala izithelo zezindebe zomlomo ngokuthi:

Ukuthula, ukuthula kuye okude nakuye oseduze,” usho uJehova;

“ngiyakumphilisa.”

₂₀Ababi banjengolwandle olunyakazisiweyo,

ngokuba alunakuphumula,

namanzi alo akhipha udaka nobishi.

₂₁“Akukho ukuthula kwababi,” usho uNkulunkulu wami.

₁“Memeza ngezwi elikhulu, ungazibambi,

uliphakamise izwi njengecilongo,

utshele abantu bami iziphambeko zabo,

indlu kaJakobe izono zayo.

₂Nokho bangifuna izinsuku zonke,

bathanda ukwazi izindlela zami;

njengesizwe esenza ukulunga,

singashiyi ukwahlulela kukaNkulunkulu waso,

babuza kimi izahlulelo zokulunga,

bathanda ukusondela kuNkulunkulu.

₃Bathi: ‘Sizileleni ukudla,

ungaboni, na?’

‘Sizihlupheleni izinhliziyo zethu,

ungakwazi, na?’

“Bhekani, ngosuku lokuzila kwenu

niyaqhuba umsebenzi,

nicindezele zonke izisebenzi zenu.

₄Bhekani, nizilela ukulwa nokuphikisana

nokushaya ngenqindi yobubi.

Anisazili namuhla

ukuze nilizwakalise izwi lenu phezulu.

₅Yikhona lokhu kuzila engikukhethileyo yini

nosuku lokuba umuntu awuhluphe umphefumulo wakhe;

ukuthi umuntu ugoba ikhanda lakhe njengomhlanga,

endlale indwangu yamasaka nomlotha phansi kwakhe, na?

Lokhu kambe ungakubiza ngokuthi ukuzila

nosuku olwamukelekayo kuJehova na?

₆“Akusikho lokhu kuzila engikukhethileyo yini:

ukuthukulula izibopho zobubi

nokuxegisa imichilo yejoka;

ukukhulula abacindezelwayo

nokwaphula onke amajoka na?

₇Akusikho ukwabela abalambileyo isinkwa sakho,

nokuyisa abampofu nemihambima ekhaya lakho,

nokwembesa ohamba ze,

lapho umbonayo,

nokungazisithezi kwaba yinyama yakho, na?

₈Khona ukukhanya kwakho kuyakuqhamuka njengokusa,

nokuphuluka kwakho kuyakuvela masinyane,

ukulunga kwakho kuhambe phambi kwakho,

inkazimulo kaJehova ibe semva kwakho.

₉Khona wena uyakubiza,

kusabele uJehova;

uyakukhala, abesethi:

Bheka, ngilapha.

“Uma ususa phakathi kwakho ijoka,

nokukhomba ngomunwe, nokukhuluma okubi,

₁₀umnike olambileyo isinkwa sakho,

usuthise othotshisiweyo,

khona ukukhanya kwakho kuyakuphuma ebumnyameni,

ukuhlwa kwakho kube njengemini.

₁₁UJehova uyakukuhola njalo,

asuthise umphefumulo wakho ezindaweni ezomileyo,

aqinise amathambo akho;

uyakuba njengensimu eniselweyo

nanjengomthombo wamanzi,

omanzi awo angaphuthi.

₁₂Abavela kuwe bayakwakha izincithakalo ezindala,

ubuye wakhe izisekelo zezizukulwane ezidlulileyo,

ubizwe ngokuthi uMvalisikhala

noMlungisi wemikhondo ukuba kuhlalwe khona.

₁₃“Uma ulubuyisa unyawo lwakho kulo isabatha,

ukuze ungenzi umsebenzi wakho ngosuku lwami olungcwele,

ulibize isabatha ngokuthi intokozo,

nolungcwele lukaJehova ngokuthi lunodumo,

uludumise, ungahambi ngezindlela zakho,

ungawuqhubi umsebenzi wakho, ukhulume ize,

₁₄khona uyakuzijabulisa kuJehova,

ngikukhweze ezindaweni eziphakemeyo zomhlaba,

ngikuphe ukuba ulidle ifa likaJakobe uyihlo,”

ngokuba umlomo kaJehova ukukhulumile.

₁Bheka, isandla sikaJehova asifinyeziwe

ukuba singasindisi,

nendlebe yakhe ayinzima

ukuba ingezwa.

₂Kepha ububi benu

bunahlukanisile noNkulunkulu,

nezono zenu zibusithile ubuso bakhe kini

ukuba angezwa.

₃Ngokuba izandla zenu zingcolile igazi,

neminwe yenu ububi;

izindebe zenu zomlomo zikhuluma amanga,

nezilimi zenu zinyenyeza okubi.

₄Akakho omemeza ngokulunga,

akakho owahlulela ngeqiniso;

bethemba kokuyize, bakhuluma amanga;

bakhulelwe yingozi, bazala ububi.

₅Bachamisela amaqanda ebululu,

baluka ubulembu bolwembu;

odlayo amaqanda abo uyafa,

okuchotshozwayo kuqhamuka kuyibululu.

₆Ubulembu babo abuyikuba yizingubo,

futhi abanakuzimboza ngemisebenzi yabo;

isenzo sendluzula sisezandleni zabo.

₇Izinyawo zabo zigijimela ebubini,

bashesha ukuchitha igazi elingenacala;

imicabango yabo iyimicabango yobubi;

incithakalo nokubhujiswa kusezindleleni zabo.

₈Indlela yokuthula abayazi,

nokwahlulela akukho emikhondweni yabo;

bazenzele izindlela eziyisigwegwe,

bonke abahamba ngazo abazi ukuthula.

₉Ngalokho ukwahlulela kukude nathi,

nokulunga akusifumani;

sihlalela ukukhanya,

kepha bheka, ubumnyama;

silindela imini,

kepha sihamba ekuhlweni.

₁₀Siphuthaza udonga njengempumputhe,

yebo, siphumputha njengabangenamehlo;

sikhubeka emini njengasekuhweleleni;

phakathi kwabaphilayo sinjengabafileyo.

₁₁Siyagwavuma sonke njengamabhere,*

siyalilisela nokulilisela njengamajuba;

silindela ukwahlulela, kepha akukho,

nokusindiswa, kepha kukude nathi.

₁₂Ngokuba iziphambeko zethu

zandile phambi kwakho,

nezono zethu ziyafakaza ngathi;

ngokuba iziphambeko zethu zikithi,

nokona kwethu siyakwazi:

₁₃ukuphambuka nokumphika uJehova,

nokumhlubuka uNkulunkulu wethu,

nokukhuluma ukucindezela nokwambuka,

nokucabanga nokukhuluma amazwi amanga

aphuma enhliziyweni.

₁₄Ukwahlulela kubuyiselwa emuva,

nokulunga kumi kude,

ngokuba iqiniso liyakhubeka esigcawini,

nobuqotho abunakungena.

₁₅Iqiniso lisilele;

osuka ebubini uzenza impango;

uJehova wakubona lokho,

kwaba kubi emehlweni akhe

ukuthi ukwahlulela akukho.

₁₆Wabona ukuthi akukho muntu,

wamangala ukuthi wayengekho omelayo;

yayisimsindisa ingalo yakhe,

nokulunga kwakhe kwamphasa.

₁₇Wafaka ukulunga njengebhantshi lensimbi,

nesigqoko sensindiso ekhanda lakhe;

wagqoka izingubo zokuphindisela zaba ngezokwembatha,

wazembesa ukushisekela njengengubo.

₁₈Njengokwenza kwabo,

kanjalo uyakubaphindisela:

ukufutheka kuzo izitha zakhe,

nokwenza kwabo kwabamelene naye,

abuyisele eziqhingini izenzo zazo.

₁₉Bayakulesaba igama likaJehova entshonalanga,

nenkazimulo yakhe empumalanga,

ngokuba uyakufika njengomfula okhahlamezayo,

oqhutshwa ngumoya kaJehova.

₂₀“Kepha uyakufika eSiyoni engumhlengi,

nakulabo abakwaJakobe ababuya eziphambekweni,”

usho uJehova.