Bible Reading Plan – Day 185

₁Wo kuwena ochithayo,

kungachithwanga wena,

nakuwe okhohlisayo,

kungakhohliswanga wena!

Lapho uqede ukuchitha uyakuchithwa,

nalapho usugcine ukukhohlisa,

uyakukhohliswa nawe.

₂Jehova, yiba nomusa kithi,

sihlalela wena.

Yiba yingalo yethu ekuseni njalo,

nokusindiswa kwethu ngesikhathi sokuhlupheka.

₃Ngezwi lokuhlokoma abantu bayabaleka;

ngokuphakama kwakho izizwe ziyahlakazeka.

₄Impango iyakubuthwa njengokubutha kwecimbi,

nanjengokuhlasela kwezinkumbi iyakuhlaselwa.

₅UJehova uphakeme, ngokuba uhlala phezulu;

uligcwalisile iSiyoni ngokwahlulela nangokulunga.

₆Kuyakuba khona ukuqiniseka ngesikhathi sakho,

ubuningi bokusindiswa nokuhlakanipha nokwazi;

ukumesaba uJehova kuyingcebo yakhe.

₇Bheka, amaqhawe abo akhala ngaphandle;

izithunywa zokuthula zikhala ngomunyu.

₈Imigwaqo iyize, izihambi seziphelile;

isivumelwano saphuliwe;

imizi ideleliwe;

umuntu akanakekelewa.

₉Izwe liyalila, lidangele;

iLebanoni linamahloni, liyabuna;

iSharoni linjengehlane,

iBashani neKarmeli kuyavuthulukisa.

₁₀“Sengiyakuvuka,” usho uJehova;

“sengiyakuphakama;

sengiyakuphakanyiswa.

₁₁Niyakukhulelwa yizikhotha ezomileyo,

nizale amabibi;

ukuphefumula kwenu kungumlilo oniqothulayo.

₁₂Abantu bayakushiswa njengokushiswa komcako,

njengameva anqunyiweyo ashiswa ngomlilo.”

₁₃Yizwani nina enikude engikwenzileyo;

nani eniseduze, vumani amandla ami.

₁₄Izoni zaseSiyoni ziyesaba,

ukuthuthumela kubambile abangenaNkulunkulu.

“Ngubani phakathi kwethu

ongahlala nomlilo oqothulayo;

ngubani phakathi kwethu

ongahlala nokunkewuzela okuphakade na?”

₁₅Yena ohamba ngokulunga,

okhuluma ngobuqotho,

odelela inzuzo yokucindezela,

othintitha izandla zakhe ukuze angamukeli imivuzo,

ovala izindlebe zakhe ukuze angezwa ngegazi,

ocimeza amehlo akhe ukuze angaboni okubi,

₁₆yena uyakuhlala ekuphakameni,

izinqaba zamadwala zibe yisivikelo sakhe,

aphiwe isinkwa sakhe,

amanzi akhe athembeke.

₁₇Amehlo akho ayakuyibona inkosi ebuhleni bayo,

ayakubona izwe elelulekele kude.

₁₈Inhliziyo yakho iyakucabanga ngovalo, ithi:

“Uphi umbhali, uphi olinganisile intela,

uphi obalile imibhoshongo na?”

₁₉Awuyikubona abantu abanobudlova,

abantu abanokukhuluma okujulileyo ongenakukuzwa,

nabalulimi lwabo olukwitizayo kungekho ongaluqonda.

₂₀Kepha bheka iSiyoni,

umuzi wemikhosi yethu;

amehlo akho mawabuke iJerusalema,

indlu yokuthula, itende elingayikususwa,

elizikhonkwane zalo aziyikusishulwa nanini,

nelizintambo zalo aziyikugqashulwa neyodwa.

₂₁Kunalokho uJehova uyakuba nathi khona ebukhosini

esikhundleni semifula nemifudlana ebanzi,

lapho kungayikuhamba khona izikebhe ezinamaphini,

nomkhumbi omkhulu ungadluli kuyo.

₂₂Ngokuba uJehova ungumahluleli wethu,

uJehova ungumenzi wemithetho yethu,

uJehova uyinkosi yethu;

uyakusisindisa.

₂₃Izintambo zakho ziyaxega,

azinakusiqinisa isiqu sensika yabo,

azinakumeneka useyili;*

khona iyakwabelwa impango enkulu ephangiweyo;

nezinyonga ziyakuthatha impango.

₂₄Abakhe khona abayikusho ukuthi:

“Ngiyagula,”

abantu abahlala khona bayakuthethelelwa ububi babo.

₁Sondelani nina zizwe, nizwe,

nilalele nina bantu:

makuzwe umhlaba nokugcwala kwawo,

nezwe nakho konke okuvela kulo.

₂Ngokuba uJehova uthukuthelela izizwe zonke,

ufuthekela yonke impi yazo;

uziqalekisile, uzinikele ekubulaweni.

₃Ababuleweyo bazo balahliwe,

nokunuka kuyenyuka ezidunjini zabo;

izintaba zincibilika ngegazi labo.

₄Ibandla lonke lasezulwini liyaphela,

izulu lisongwe njengomqulu;

ibandla lonke liyawa njengokuwa kweqabunga emvinini

nanjengokubunileyo emkhiwaneni.

₅Ngokuba inkemba yami izanelisile ngegazi ezulwini;

bheka, iyakwehlela phezu kuka-Edomi

naphezu kwabantu besiqalekiso sami ukuba ibahlulele.

₆UJehova unenkemba; igcwele igazi,

inonile ngamanoni nangegazi lamawundlu nelezimbuzi,

nangamanoni ezinso zezinqama,

ngokuba uJehova uyanikela eBosira,

unokuhlaba okukhulu ezweni lakwa-Edomi.

₇Izinyathi ziwa kanye nazo,

nezinkunzana kanye nezinkunzi;

izwe labo liyakugcwala igazi,

nothuli lwabo luyakunona ngamanoni.

₈Ngokuba kulusuku lokuphindisela kukaJehova;

ngumnyaka wokubuyisela ngendaba yaseSiyoni.

₉Imifudlana yakhona iyakuphenduka ikolitayi,*

uthuli lwakhona lube yisibabule,

nezwe langakhona libe yikolitayi elivuthayo.

₁₀Aliyikucinywa ubusuku nemini;

umusi walo uyakukhuphuka kuze kube phakade;

izizukulwane ngezizukulwane liyakuba yize,

akuyikulidabula muntu nanini nanini.

₁₁Liyakuba yifa levuba nelikanondwebu,

kwakhe kulo isikhova negwababa;

uyakwelula phezu kwalo intambo yencithakalo,

nomthofu wokumisa wokuyize.

₁₂Phakathi kwabakhulu balo akakho

oyakumemezela umbuso,

nazo zonke izikhulu zalo ziyakuba yinto engelutho.

₁₃Ameva ayakukhuphukela ezindlini zamakhosi,

izimbabazane namakhakhasi ezinqabeni zalo,

libe yikhaya lamakhanka

negceke lezintshe.

₁₄Izilwane zasehlane ziyakuhlangana nezimpungushe,

nedemoni liyakukhala kumngane walo,

kwakhe khona umkhovu,

uzitholele indawo yokuphumula.

₁₅Lapho umantshingeyana uyakwakha ikhaya lakhe,

azalele, achamisele,

afukame ngomthunzi wakhe,

kubuthane khona nawonhloyile,

kube yilowo nalowo nomngane wakhe.

₁₆Funani encwadini kaJehova, nifunde;

ayiyikusilala nento eyodwa kulokhu,

ayikho eyakuswela umngane wayo,

ngokuba ngumlomo wakhe okuyalezile,

nomoya wakhe okuhlanganisile.

₁₇Nguye okwenzele inkatho;

yisandla sakhe esikwabele ngentambo;

kuyakudla ifa lalo kuze kube phakade,

izizukulwane ngezizukulwane kuyakuhlala kulo.

₁Kuyakujabula ihlane nogwadule,

kuthokoze uqwathule,

lukhahlele njengentebe.

₂Luyakukhahlela kahle, luthokoze,

yebo, luthokoze, luhube;

luyakuphiwa udumo lweLebanoni,

nobukhosi beKarmeli nobeSharoni,

lubone inkazimulo kaJehova,

nobukhosi bukaNkulunkulu wethu.

₃Qinisani izandla ezibuthakathaka,

nimise amadolo axegayo.

₄Yishoni kwabanenhliziyo eyesabayo ukuthi:

“Qinani, ningesabi;

bhekani, uNkulunkulu wenu uyeza ngokuphindisela,

impindiselo ivela kuNkulunkulu;

nguye oza ukunisindisa.”

₅Khona amehlo ezimpumputhe ayakuvulwa,

zivuleke nezindlebe zezithulu.

₆Khona unyonga luyakutshekula njengendluzele,

nolimi lwesimungulu luyakuhuba,

ngokuba ehlane kuyakubhoboka amanzi,

nemifudlana kwahlongasibi.

₇Isihlabathi esibengezelayo siyakuba yichibi,

isigagadu sibe yimithombo yamanzi;

ekhaya lamakhanka lapho ayebuthisa khona

kuyakuba khona igceke lomhlanga nekhwani.

₈Kuyakuba khona umendo

nendlela eyakuthiwa iNdlela Yobungcwele;

ongcolileyo akayikuhamba ngayo,

kepha iyakuba ngeyabantu bakhe;

abahamba ngayo, noma beyiziwula,

abayikuduka kuyo.

₉Akuyikuba khona lapho ingonyama,

nesilwane esihahayo asiyikukhuphukela khona;

lokho akuyikufunyanwa khona,

kepha abakhululiweyo bayakuhamba ngayo.

₁₀Abahlengiweyo bakaJehova bayakubuya

baye eSiyoni ngokwethaba,

intokozo engunaphakade ibe phezu kwamakhanda abo;

bayakuthola ukujabula nokuthokoza,

kubaleke usizi nokububula.