Bible Reading Plan – Day 182

Klewulani nina,

Mikhumbi yaseTharishishi,

ngokuba lichithekile;

indlu ayisekho,

nokungena akusenakwenzeka;

kwambulelwe kubo kuvela ezweni laseKitimi.

₂Thulani nina enakhileyo ngasogwini,

nina abathengisi baseSidoni abanigcwalisile

bedabula elwandle.

₃Emanzini amaningi imbewu yaseSihori

nokuvuna kweNayile

kwakuyinzuzo yalo;

laliyindawo yokuthenga kuzo izizwe.

₄Yiba namahloni wena Sidoni,

ngokuba lukhulumile ulwandle,

inqaba yolwandle, ngokuthi:

“Angibanga namihelo, angizalanga,

angikhulisanga izinsizwa,

angondlanga izintombi.”

₅Lapho kubikwa eGibithe,

bayakuthuthumela ngokuzwa ngeTire.

₆Welani niye eTharishishi;

klewulani nina enakhileyo ngasogwini.

₇Yilowo ongumuzi wenu ojabulayo,

ubudala bawo busukela ezinsukwini zasendulo,

owayiswa kude yizinyawo zawo

ukuba uhlale khona, na?

₈Ngubani ocebe lokhu ngeTire eliqhelisayo,

elibathengi balo bayizikhulu,

nabahwebi balo bangabadumileyo bomhlaba, na?

₉NguJehova Sebawoti okucebileyo

ukuba konakaliswe ukuziphakamisa kwabo bonke ubukhosi,

badeleleke bonke abadumileyo bomhlaba.

₁₀Dabula izwe lakho njengeNayile,

ndodakazi yaseTharishishi;

akusekho bhande.*

₁₁Welulile isandla sakhe phezu kolwandle,

wazamazamisa imibuso;

uJehova uyalezile ngeKhanani

ukuba kuchithwe izinqaba zalo.

₁₂Wathi: “Awusayikujabula

wena ntombi ehlazisiweyo,

ndodakazi yaseSidoni;

vuka, uwelele eKitimi;

nalapho awuyikuthola ukuphumula.”

₁₃Bheka, izwe lamaKaledi,

leso sizwe esingasekho,

esanqunyelwa yi-Asiriya izilwane zasehlane,

limisa imibhoshongo,

lizenza ize izindlu zaso zamakhosi,

lenza laba yincithakalo.

₁₄Klewulani nina mikhumbi yaseTharishishi,

ngokuba inqaba yenu ichithekile.

₁₆“Thatha ihabhu,* uhambahambe emzini

wena sifebe esikhohlakeleyo,

ubethe kamnandi,

uhlabelele izihlabelelo eziningi,

ukuze ukhunjulwe.”

₁Bheka, uJehova wenza ize umhlaba, awuchithe,

agumbuqele ubuso bawo,

ahlakaze abakhileyo kuwo.

₂Kuyakuthi njengakubantu kube njalo kumpristi,

nanjengasencekwini kube njalo enkosini yayo,

nanjengasencekukazini kube njalo enkosikazini yayo,

nanjengakumthengi kube njalo kumthengisi,

nanjengakotshelekayo kube njalo kobolekayo,

nanjengakobiza inzalo kube njalo kokhokha inzalo.

₃Umhlaba uyakuba yize leze,

uphangwe nokuphangwa,

ngokuba uJehova ukhulumile izwi lakhe.

₄Umhlaba uyalila, ubune;

izwe liyaphela amandla, linyamalale,

abaphakemeyo bomhlaba badangale.

₅Umhlaba wonakalisiwe phansi kwabakhileyo kuwo,

ngokuba beqile imithetho,

badlulile ezimisweni,

baphulile isivumelwano esiphakade.

₆Ngalokho isiqalekiso sidlile umhlaba,

nabakhileyo kuwo batholiswa icala;

ngalokho abakhileyo emhlabeni bayashiswa,

kusale abantu abayingcosana nje.

₇Iwayini elisha liyalila,

umvini uyahhuma,

bonke ababethokoza ngenhliziyo bayabubula.

₈Ukujabula kwezigubhu kunqamukile,

ukuxokozela kwabajabulayo kuphelile,

nenjabulo yehabhu* ikhawukile.

₉Abasayikuphuza iwayini ngesihlabelelo;

uphuzo olunamandla luyakubaba kubo abaluphuzayo.

₁₀Umuzi oyihlane ubhidliziwe;

zonke izindlu zivaliwe

ukuba kungangeni muntu.

₁₁Kukhalwa ngewayini ezitaladini;

yonke intokozo inyamalele;

injabulo yezwe idlulile.

₁₂Emzini kusele incithakalo;

isango livithiziwe, lachithwa.

₁₃Ngokuba kuyakuba njalo emhlabeni phakathi kwabantu,

njengokushaywa kweminqumo

nanjengokukhothoza,

lapho sekuvuniwe.

₁₄Laba bayaphakamisa izwi labo, bamemeze;

bajabula ngobukhosi bukaJehova entshonalanga.

₁₅Ngalokho mdumiseni uJehova empumalanga,

nasogwini lolwandle

igama likaJehova uNkulunkulu ka-Israyeli.

₁₆Siyezwa amahubo avela emikhawulweni yomhlaba, athi:

“Udumo malube koLungileyo!”

Kepha mina ngithi: “Ngifile, ngifile!

Maye kimi!”

Abakhohlisi bakhohlisile,

yebo, abakhohlisi bakhohlisile nokukhohlisa.

₁₇Ukwesaba, nomgodi, nogibe kuphezu kwakho

wena owakhileyo emhlabeni.

₁₈Kuyakuthi obalekela umsindo wokwesaba

awele emgodini;

okhuphuka emgodini uyakubanjwa lugibe,

ngokuba amafasitele aphezulu avuliwe,

nezisekelo zomhlaba ziyazamazama.

₁₉Umhlaba uyaphuka nokwaphuka,

umhlaba uyavithizwa nokuvithizwa,

umhlaba uyazanyazanyiswa nokuzanyazanyiswa.

₂₀Umhlaba uyatengezela nokutengezela njengesidakwa,

uyantengantenga njengexhiba;

isiphambeko siyakuba nzima phezu kwawo,

uwe, ungabe usavuka futhi.

₂₁Kuyakuthi ngalolo suku uJehova ahambele

ibandla lasezulwini phezulu,

namakhosi omhlaba emhlabeni.

₂₂Bayakubuthelwa ndawonye

njengeziboshwa zibuthelwa emgodini,

bavalelwe etilongweni,

bajeziswe emva kwezinsuku eziningi.

₂₃Inyanga ekhazimulayo isiyakuyangaza,

nelanga elinkemuzelayo liyakujabha,

ngokuba uJehova Sebawoti uyakuba yinkosi

entabeni yaseSiyoni naseJerusalema,

abe yinkazimulo phambi kwamalunga akhe.

₁Jehova, unguNkulunkulu wami;

ngiyakukuphakamisa,

ngidumise igama lakho,

ngokuba wenzile izimangaliso,

namasu asendulo, nokuthembeka, neqiniso.

₂Ngokuba wenzile umuzi waba yinqwaba,

nomuzi obiyelweyo waba yincithakalo;

indlu yamakhosi abafokazi ayiseyiwo umuzi,

ayisayikwakhiwa futhi kuze kube phakade.

₃Ngalokho abantu abanamandla bayakukudumisa,

imizi yezizwe ezinonya zikwesabe.

₄Ngokuba ubuyinqaba kwabampofu,

inqaba kwabaswelayo ekucindezelweni kwabo,

isiphephelo esivunguvungwini,

umthunzi ekubaleleni,

ngokuba umoya waba nonya,

unjengesivunguvungu odongeni,

₅nanjengokushisa endaweni eyomileyo.

Uyathobisa umsindo wabafokazi;

njengokubalela ngomthunzi wefu,

kanjalo ihubo labanonya liyakudanjiswa.

₆UJehova Sebawoti uyakwenzela abantu bonke

idili lokukhulupheleyo kule ntaba,

idili lewayini elinenhlese,

okukhulupheleyo okunomnkantsha,

iwayini elinenhlese elicwengekileyo.

₇Uyakuchitha kule ntaba ingaphandle

lesimbozo esimboza abantu bonke,

nomgubuzelo ogubuzela zonke izizwe.

₈Uyakugwinya ukufa kuze kube phakade;

iNkosi uJehova iyakwesula izinyembezi ebusweni bonke,

isuse amahloni abantu bakhe emhlabeni wonke,

ngokuba uJehova ukhulumile.

“Bheka, lo unguNkulunkulu wethu;

simhlalele, uyakusisindisa;

lo unguJehova; simhlalele;

siyakujabula, sithokoze ngensindiso yakhe.”

₁₀Ngokuba kule ntaba isandla sikaJehova siyakuphumula,

noMowabi uyakunyathelwa phansi endaweni yakhe

njengotshani bunyathelwa emgodini womquba.

₁₁Noma elula izandla zakhe phakathi kwawo

njengohlambayo elula ukuba ahlambe,

uyakuthobisa ukuziphakamisa kwakhe

kanye nobuhlakani bezandla zakhe.

₁₂Izinqaba eziphakemeyo zezingange zakho

uyakuzibhidliza, azithobise,

azenze ukuba zithintane nomhlabathi nothuli.

Umuzi onamandla sinawo;

uyasimisela insindiso ibe yizingange nezindonga.

₂Vulani amasango ukuba isizwe esilungileyo

esigcina iqiniso singene.

₃Inhliziyo eqinileyo uyayilinda ngokuthula okupheleleyo,

ngokuba yethemba kuwe.

₄Thembani kuJehova kuze kube phakade,

ngokuba uJehova,

yebo, uJehova uyidwala elingunaphakade.

₅Ngokuba uthobisile ababehlezi phezulu,

umuzi ophakemeyo;

uyawubhidliza, uyawubhidliza kuze kube semhlabathini,

awusondeze nasothulini.

₆Unyawo luyakuwunyathela phansi,

izinyawo zabaswelayo,

izinyathelo zabampofu.

₇Indlela yabalungileyo iqondile,

umkhondo wabaqotho ulungile,

uyawenza ukuba ulingane.

₈Yebo, ezindleleni zezahlulelo zakho, Jehova,

sikuhlalele.

Umphefumulo uyalangazelela

igama lakho nesikhumbuzo sakho.

₉Ngomphefumulo wami ngikulangazelela ebusuku,

yebo, ngomoya wami ophakathi kwami ngiyakufunisisa,

ngokuba lapho izahlulelo zakho zisemhlabeni,

abakhileyo bezwe bafunda ukulunga.

₁₀Uma omubi ephiwa umusa,

akafundi ukulunga;

ezweni lobuqotho uyakwenza ukonakala,

angaboni ukuphakama kukaJehova.

₁₁Jehova, isandla sakho siphakeme,

kepha kababoni;

kodwa mababone ukushisekela kwakho abantu,

babe namahloni;

yebo, umlilo uyakuqeda izitha zakho.

₁₂Jehova, uyakusimisela ukuthula;

ngokuba nayo yonke imisebenzi yethu

senzelwe yona nguwe.

₁₃Jehova Nkulunkulu wethu,

amanye amakhosi angaphandle kwakho asibusile,

kepha kuwena wedwa siyadumisa igama lakho.

₁₄Abafileyo ababuyi baphile,

izithunzi azibuyi zivuke;

ngalokho wabahambela, wabachitha,

wenza ukuba konke ukukhunjulwa kwabo kuphele.

₁₅Wandisa isizwe, Jehova,

wandisa isizwe, wadunyiswa,

wavula yonke imikhawulo yezwe.

₁₆Jehova, besekuhluphekeni bakuhambela,

bazethula ngemikhuleko lapho belaywa nguwe.

₁₇Njengokhulelweyo osondela

ukuba abelethe ezwiswa ubuhlungu,

saba njalo phambi kobuso bakho, Jehova.

₁₈Sasikhulelwe, sasinobuhlungu,

sabeletha kungathi umoya nje;

asenzanga insindiso emhlabeni,

nabayakwakha ezweni abasazalwa.

₁₉Kepha abafileyo bakho bayakubuye baphile,

izidumbu zabo zivuke.

Phaphamani, nijabule nina enihlala othulini,

ngokuba amazolo akho angamazolo okukhanya,

nomhlaba uyakubakhipha abafileyo.

₂₀Wozani, bantu bami,

ningene emakamelweni enu,

nizivalele iminyango,

nicashe ngokuphazima kweso,

kuze kudlule ulaka.

₂₁Ngokuba bhekani,

uJehova uyaphuma endaweni yakhe

ukuba ahambele ububi babakhileyo emhlabeni;

umhlaba uyakubonakalisa igazi lawo,

ungabe usabasibekela ababuleweyo babo.