Bible Reading Plan – Day 169

₂“Phikisanani nonyoko, niphikisane,

ngokuba akasiye umkami,

nami angisiyo indoda yakhe;

makasuse ubufebe bakhe ebusweni bakhe,

nokuphinga kwakhe phakathi kwamabele akhe,

₃funa ngimhlubule abe nqunu,

ngimenze njengasosukwini lokuzalwa kwakhe,

ngimenze ihlane,

ngimbeke abe njengezwe elomileyo,

ngimbulale ngokoma.

₄Angiyikuhawukela abantwana bakhe,

ngokuba bangabantwana bobufebe.

₅Ngokuba unina ufebile,

ngokuba wathi: ‘Ngiyakulandela izithandwa zami

ezinginika isinkwa sami namanzi ami,

uboya bami bezimvu nefilakisi* lami,

amafutha ami nokuphuza kwami.’

₆Ngalokho bhekani, ngiyakuvimbela indlela yakho ngameva,

ngakhe ugange ngakuye,

ukuze angafumani imikhondo yakhe.

₇Uyakulandela izithandwa zakhe,

kepha akayikuzifica;

uyakuzifuna, kepha akayikuzifumana;

abesethi: ‘Ngiyakuhamba ngibuyele endodeni yami yokuqala,

ngokuba kwakukuhle kimi lapho kunamanje.’

₈Kepha akazanga ukuthi yimina

engamnika amabele, newayini elisha, namafutha,

ngamandisela isiliva

negolide abenza ngakho uBali.

₉“Ngalokho ngiyakubuye ngithabathe amabele ami ngesikhathi sawo,

newayini lami elisha ngenkathi yalo,

ngisuse uboya bami bezimvu nefilakisi* lami

lokusibekela ubunqunu bakhe.

₁₀Sengiyakwambula ihlazo lakhe

emehlweni ezithandwa zakhe;

akuyikubakho omophula esandleni sami.

₁₁Ngiyakwenza ukuba iphele yonke intokozo yakhe,

imikhosi yakhe,

nokwethwasa kwenyanga,

namasabatha akhe,

nayo yonke imikhosi yakhe emisiweyo.

₁₂Ngiyakuchitha imivini yakhe nemikhiwane yakhe

ashilo ngakho, wathi:

‘Kuyinkokhelo yami ezinginikile yona izithandwa zami;’

ngiyakukwenza kube yihlathi,

izilwane zasendle zikudle.

₁₃Ngiyakumhambela ngenxa yezinsuku zawoBali

owabashisela ngazo impepho,

wahloba ngamacici akhe nangezinto zakhe ezinhle,

wazilandela izithandwa zakhe,

wangikhohlwa, usho uJehova.

₁₄“Ngalokho bhekani, ngiyakumyenga,

ngimyise ehlane, ngimqunge isibindi.

₁₅Lapho ngiyakumnika izivini zakhe,

nesigodi sase-Akori* sibe ngumnyango wethemba;

uyakuphendula lapho njengasezinsukwini zobusha bakhe

nasosukwini lokukhuphuka kwakhe ezweni laseGibithe.

₁₆“Kuyakuthi ngalolo suku,” usho uJehova,

“ungibize ngokuthi: ‘YiNdoda yami,’

ungasangibizi ngokuthi:

‘NguBali wami.’

₁₇Ngiyakususa amagama awoBali emlonyeni wakhe,

bangabe besakhunjulwa ngamagama abo.

₁₈Ngalolo suku ngiyakubenzela isivumelwano nezilwane zasendle,

nezinyoni zezulu nezilwanyana ezinwabuzelayo emhlabeni,

ngaphule umnsalo nenkemba nokulwa ukuba kusuke ezweni,

ngibalalise belondekile.

₁₉Ngiyakuzimisela wena ube ngumkami kuze kube phakade,

ngizimisele wena ngokulunga,

nangokwahlulela, nangomusa,

nangobubele.

₂₀Ngiyakuzimisela wena ngokuthembeka ube ngumkami;

uyakumazi uJehova.

₂₁“Kuyakuthi ngalolo suku ngiphendule,” usho uJehova,

“ngiphendule amazulu,

wona aphendule umhlaba.

₂₂Umhlaba uyakuphendula amabele,

newayini elisha, namafutha,

khona kuphendule uJizreyeli.

₂₃Ngiyakuzitshalela yena ezweni,

ngihawukele ongahawukelwanga,

ngithi kwababengesibo abantu bami:

‘Ningabantu bami,’

bona bathi:

‘UnguNkulunkulu wethu.’ ”

₁Yizwani izwi likaJehova

nina bantwana bakwa-Israyeli,

ngokuba uJehova unokuphikisana nabakhileyo ezweni,

lokhu kungekho qiniso, namusa,

nakumazi uNkulunkulu ezweni.

₂“Kukhona ukufunga nokuqamba amanga,

nokubulala, nokweba, nokuphinga;

bayafohla, izingazi zilandele izingazi.

₃Ngalokho izwe liyakudabuka,

bonke abakhe kulo badangale kanye nezilwane zasendle

nezinyoni zezulu;

yebo, nezinhlanzi zolwandle ziyakususwa.

₄“Makungabikho ophikisana nomunye,

asole omunye;

nokho abantu bakho bayakuphikisana nabapristi.

₅Mpristi, uyakukhubeka emini,

kukhubeke umprofethi kanye nawe ebusuku;

nonyoko ngiyakumbhubhisa.

₆Abantu bami babhujiswa ngokuswela ukwazi;

ngokuba ukulahlile ukwazi nami ngiyakukulahla wena,

ungabi ngumpristi wami;

lokhu ukhohliwe umthetho kaNkulunkulu wakho

nami ngiyakukhohlwa abantwana bakho.

₇Njengokwanda kwabo,

kanjalo bona kimi;

udumo lwabo ngiyakulwenana ngehlazo.

₈Badla izono zabantu bami,

babhekisa umphefumulo wabo ebubini babo.

₉Kuyakuthi njengabantu abe njalo umpristi:

ngiyakubahambela ngenxa yezindlela zabo,

ngibuyisele kubo izenzo zabo.

₁₀“Bayakudla, bangasuthi kodwa;

bayakufeba, bangandi kodwa,

ngokuba bayekile ukumnakekela uJehova.

₁₁Ubufebe newayini newayini elisha kususa umqondo.

₁₂Abantu bami babuza emthini,

induku yabo ibatshele,

ngokuba umoya wobufebe ubadukisile,

basuka phansi kukaNkulunkulu wabo ngokufeba.

₁₃Bayahlabela eziqongweni zezintaba,

bashisa impepho emagqumeni,

phansi kwama-oki* nemipopula* nemitherebinte,*

ngokuba umthunzi wakho muhle;

kungalokho amadodakazi enu ayafeba,

nawomakoti benu bayaphinga.

₁₄“Angiyikuwajezisa amadodakazi enu,

lapho efeba,

nawomakoti benu lapho bephinga,

ngokuba namadoda achezukela iziphingi,

ahlaba kanye nezifebe zethempeli.

Kanjalo abantu abangenangqondo bayakuwiswa.

₁₅“Noma wena Israyeli ufeba,

uJuda makangazitholeli icala;

ningayi eGiligali,

ningenyukeli eBeti Aveni,

ningafungi ngokuthi:

‘Kuphila kukaJehova.’

₁₆Ngokuba u-Israyeli unenkani njengesithole;

uJehova angabelusa njengemvana endaweni ebanzi na?

₁₇U-Efrayimi uhlangene nezithombe;

myeke.

₁₈Ukuphuza kwabo sekuphelile;

bayafeba nokufeba;

izikhulu zabo zithandisisa ihlazo.

₁₉Umoya ubasongile ngamaphiko awo;

bayakujabha ngemihlatshelo yabo.