Bible Reading Plan – Day 133

₁Nazi izaga zika Solomoni indodana kaDavide, inkosi yakwa-Israyeli,

₂zokwazi ukuhlakanipha nokulaywa,

nokwahlukanisa amazwi okuqonda,

₃nokwamukela ukulaywa kube ngukuhlakanipha,

nokulunga, nokwahlulela, neqiniso,

₄nokunika abangenalwazi ukuhlakanipha,

nezinsizwa ukwazi namasu,

₅ukuze ohlakaniphileyo ezwe,

aqhubeke ekufundeni,

noqondileyo athole iziluleko ezinhle

₆ukuba aqonde izaga nezimfihlakalo,

namazwi abahlakaniphileyo nezimfumbe zabo.

₇Ukumesaba uJehova kungukuqala kokuhlakanipha;

iziwula ziyadelela ukuhlakanipha nokulaywa.

₈Ndodana yami,

yizwa ukulaya kukayihlo,

ungawushiyi umthetho kanyoko,

₉ngokuba kuyakuba ngumqhele omuhle wekhanda lakho,

nemigexo entanyeni yakho.

₁₀Ndodana yami,

uma izoni zikuyenga, ungavumi.

₁₁Uma zithi: “Hamba nathi, siqamekele igazi,

sibhacele ngeze ongenacala,

₁₂sibagwinye besezwa njengendawo yabafileyo,

besaphilile njengabehlela egodini;

₁₃yonke impahla eyigugu siyakuyifumana,

sigcwalise izindlu zethu ngempango;

₁₄yenza inkatho yakho phakathi kwethu,

sibe nesikhwama sinye sonke,”

₁₅ndodana yami,

ungahambi nazo endleleni,

unqande unyawo lwakho emikhondweni yazo,

₁₆ngokuba izinyawo zazo zigijimela ebubini,

zishesha ukuchitha igazi.

₁₇Ngokuba inetha lenekelwe ize emehlweni azo zonke izinyoni.

₁₈Kepha laba baqamekela elabo igazi,

babhacela okwabo ukuphila.

₁₉Zinjalo izindlela zabo bonke abaphanga impango;

iyasusa ukuphila komniniyo.

₂₀Ukuhlakanipha kuyamemeza emigwaqweni,

kuyezwakalisa izwi lakho ezigcawini;

₂₁emashashalazini emigwaqo kuyaduma;

ngasezikhaleni zamasango omuzi kuyakhuluma amazwi akho okuthi:

₂₂“Koze kube nini iziwula zithanda ubuwula,

nezideleli zijabula ukudelela,

neziwula zizonda ukwazi, na?

₂₃Buyani ngokusola kwami;

bhekani, ngiyakuthulula umoya wami phezu kwenu,

nginazise amazwi ami.

₂₄Ngokuba ngibizile, nala nina;

ngelula isandla sami,

akubangakho onakayo;

₂₅kepha nichithile konke ukululeka kwami,

anivumanga ukusola kwami;

₂₆nami ngiyakuhleka ingozi yenu,

ngiklolodele ukufika kwenikwesabayo,

₂₇lapho kufika njengesivunguvungu lokho enikwesabayo,

nengozi yenu iza njengesikhwishikhwishi,

lapho nehlelwa ngukuhlupheka nosizi.

₂₈“Khona bayakungibiza,

kepha angiyikuphendula;

bayakungifunisisa, kepha abayikungifumana

₂₉ngenxa yokuba babezonda ukwazi,

kabakhethanga ukwesaba uJehova,

₃₀bengavumanga ukululeka kwami,

bedelela konke ukusola kwami.

₃₁Ngalokho bayakudla izithelo zendlela yabo,

basuthe ngamacebo abo.

₃₂Ngokuba ukuhlehla kwabangenalwazi kuyakubabulala,

nokunganaki kweziwula kuyakubabhubhisa.

₃₃Kepha ongilalelayo uyakuhlala elondekile,

agcineke, angabi naluvalo ngokubi.”

₁Ndodana yami, uma wamukela amazwi ami,

uzibekelele imiyalo yami,

₂ukuze ubeke indlebe yakho ekuhlakanipheni,

uthobisele ekuqondeni inhliziyo yakho,

₃yebo, uma ukhala ngengqondo,

uzwakalisa izwi lakho ngokuqonda,

₄uma ukufuna njengesiliva,

ukuphenya njengamagugu afihliweyo,

₅khona uyakuqonda ukumesaba uJehova,

ufumane ukumazi uNkulunkulu.

₆Ngokuba uJehova uyanika ukuhlakanipha;

emlonyeni wakhe kuphuma ukwazi nokuqonda.

₇Uyabekela abaqotho isibusiso,

uyihawu kwabahamba bengenacala,

₈egcina izindlela zokulunga,

elondoloza imikhondo yabathembekileyo bakhe.

₉Khona uyakuqonda ukulunga nokwahlulela,

neqiniso,

yebo, nezindlela zonke ezinhle.

₁₀Ngokuba ukuhlakanipha

kuyakungena enhliziyweni yakho,

ukwazi kube mnandi emphefumulweni wakho.

₁₁Amasu ayakukulinda,

ukuqonda kukugcine,

₁₂ukuze wophulwe endleleni yobubi

nakubantu abakhuluma okuphambeneyo,

₁₃abashiya imikhondo yobuqotho,

ukuze bahambe ngezindlela zobumnyama;

₁₄abathokoza ngokwenza okubi,

bajabulele ukuphambana kobubi;

₁₅abazindlela zabo ziyisigwegwe,

nemikhondo yabo iphambene,

₁₆ukuba wophulwe kowesifazane ondindayo

nakuye owezizwe onamazwi athophayo,

₁₇oshiya umngane wobusha bakhe,

akhohlwe isivumelwano sikaNkulunkulu wakhe,

₁₈ngokuba indlu yakhe ishonela ekufeni,

nasezithunzini izindlela zakhe.

₁₉Bonke abangena kuye ababuyi,

bangafinyeleli ezindleleni zokuphila.

₂₀Kanjalo uyakuhamba ezindleleni zabahle,

ugcine imikhondo yabalungileyo.

₂₁Ngokuba abaqotho bayakuhlala ezweni,

abapheleleyo basale kulo.

₂₂Kepha ababi bayakunqunywa ezweni,

nabambuluzayo bayakusishulwa kulo.

₁Ndodana yami, ungakhohlwa umthetho wami,

kepha inhliziyo yakho mayigcine imiyalo yami,

₂ngokuba iyakwenezela kuwe

ubude bezinsuku,

neminyaka yokuphila, nokuthula.

₃Isihhe neqiniso makungakushiyi;

kubophe entanyeni yakho,

ukulobe esibhebheni senhliziyo yakho,

₄ukuze uthole umusa nodumo oluhle emehlweni kaNkulunkulu nabantu.

₅Themba kuJehova ngayo yonke inhliziyo yakho,

ungenciki kokwakho ukuqonda.

₆Mazise yena ezindleleni zakho zonke,

uyakuqondisa imikhondo yakho.

₇Ungabi ngohlakaniphileyo emehlweni akho;

mesabe uJehova, udede ebubini.

₈Lokho kuyakuba yimpilo emzimbeni wakho

nokuhlunyelelwa kwamathambo akho.

₉Dumisa uJehova ngempahla yakho,

nangolibo lwazo zonke izithelo zakho,

₁₀izinqolobane zakho zigcwale ngobuningi,

nezikhamo zakho zichichime ngewayini elisha.

₁₁Ndodana yami,

ungadeleli ukulaya kukaJehova,

ungakhathazeki ngokusola kwakhe.

₁₂Ngokuba uJehova uyamlaya amthandayo,

njengoyise indodana ayithandayo.

₁₃Ubusisiwe umuntu othola ukuhlakanipha

nomuntu ozuza ingqondo,

₁₄ngokuba inzuzo yakho inhle kunenzuzo yesiliva,

nokutholakalayo kukho kunegolide.

₁₅Kuyigugu kunamarubi,*

nakho konke ongakufisa akunakulinganiswa nakho.

₁₆Ubude bezinsuku busesandleni sakho sokunene,

nakwesokhohlo kukhona ingcebo nodumo.

₁₇Izindlela zakho ziyizindlela zokumnandi;

yonke imikhondo yakho ingukuthula.

₁₈Kungumuthi wokuphila kwabakubambayo,

nababambelela kukho babusisiwe.

₁₉UJehova wasekela umhlaba ngokuhlakanipha;

wamisa amazulu ngokuqonda.

₂₀Ngokwazi kwakhe izintwa zaqhekezwa,

namafu aconsa amazolo.

₂₁Ndodana yami,

lokho makungasuki emehlweni akho,

ugcine ukuhlakanipha namasu,

₂₂kube ngukuphila emphefumulweni wakho

nomusa entanyeni yakho.

₂₃Khona uyakuhamba indlela yakho ngokulondeka,

ungaqhuzuli unyawo lwakho.

₂₄Lapho ulala phansi,

awuyikwesaba lutho;

nanxa usulale phansi,

ubuthongo bakho buyakuba mnandi.

₂₅Ungethuswa luvalo oluzumayo

nokuchithwa kwababi, lapho kufika,

₂₆ngokuba uJehova uyakuba yithemba lakho,

agcine unyawo lwakho ukuba lungabhajwa.

₂₇Ungagodleli abaninikho okuhle,

lapho kusemandleni esandla sakho ukukwenza.

₂₈Ungasho kumakhelwane wakho ukuthi:

“Hamba, ubuye,

ngiyakukunika kusasa,”

lapho kukhona kuwe.

₂₉Ungacebi okubi ngomakhelwane wakho,

lapho ehlezi nawe elondekile.

₃₀Ungaphikisani namuntu ngeze,

uma engakonanga ngalutho.

₃₁Ungabi namhawu ngomuntu oyisidlwangudlwangu,

ungakhethi neyodwa yezindlela zakhe,

₃₂ngokuba ophambeneyo uyisinengiso kuJehova.

kepha abaqotho bayisifuba sakhe.

₃₃Isiqalekiso sikaJehova sisendlini yababi,

kepha uyabusisa ikhaya labalungileyo.

₃₄Izideleli uyazidelela,

kepha abathobekileyo ubapha umusa.

₃₅Abahlakaniphileyo bayakudla ifa lodumo,

kepha iziwula ziyakuphiwa ihlazo.