Bible Reading Plan – Day 123

₁Bheka, kuhle, kumnandi kangaka

ukuba abazalwane bahlalisane ndawonye bemunye.

₂Kufana namafutha amahle ekhanda ehlela esilevini,

isilevu sika-Aroni,

ehlela nasemphethweni wezambatho zakhe.

₃Kufana namazolo aseHermoni

ehlela ezintabeni zaseSiyoni.

Ngokuba uJehova wayaleza khona isibusiso,

yebo, ukuphila kuze kube phakade.

₁Bhekani, nibonge uJehova

nina nonke zinceku zikaJehova

enimi endlini kaJehova ebusuku.

₂Phakamiselani izandla zenu endlini engcwele,

nimbonge uJehova.

₃UJehova makakubusise eseSiyoni,

yena owenzile izulu nomhlaba.

₁Haleluya!

Dumisani igama likaJehova;

mdumiseni nina zinceku zikaJehova

₂enimi endlini kaJehova

emagcekeni endlu kaNkulunkulu wethu.

₃Dumisani uJehova,

ngokuba uJehova muhle;

hubelani igama lakhe,

ngokuba limnandi.

₄Ngokuba uJehova uzikhethele uJakobe,

no-Israyeli ukuba abe yimfuyo yakhe.

₅Impela ngiyazi ukuthi uJehova mkhulu

nokuthi iNkosi yethu iphezu kwabo bonke onkulunkulu.

₆Konke uJehova akuthandayo uyakwenza

ezulwini nasemhlabeni,

emanzini nasezinzulwini zonke.

₇Ukhuphula izinkungu emikhawulweni yomhlaba,

wenza imibani kube yimvula;

ukhipha umoya ezingotsheni zakhe.

₈Washaya amazibulo aseGibithe,

awabantu kanye nawezilwane.

₉Wathuma izibonakaliso nezimangaliso

phakathi kwakho, Gibithe,

phezu kukaFaro nezinceku zakhe zonke.

₁₀Washaya izizwe ezinkulu,

wabulala amakhosi anamandla:

₁₁uSihoni inkosi yama-Amori,

no-Ogi inkosi yaseBashani,

nemibuso yonke yaseKhanani.

₁₂Wanika izwe labo laba yifa,

laba yifa lika-Israyeli, isizwe sakhe.

₁₃Jehova, igama lakho limi phakade;

isikhumbuzo sakho, Jehova, sisezizukulwaneni ngezizukulwane.

₁₄Ngokuba uJehova uyakwahlulela abantu bakhe,

ahawukele izinceku zakhe.

₁₅Izithombe zabezizwe ziyisiliva negolide,

umsebenzi wezandla zomuntu.

₁₆Umlomo zinawo, kepha azikhulumi;

amehlo zinawo, kodwa aziboni.

₁₇Izindlebe zinazo, kepha azizwa,

nomoya awukho emlonyeni wazo.

₁₈Abazenzayo bayafana nazo,

bonke abazethembayo.

₁₉Wena ndlu ka-Israyeli,

mbonge uJehova;

wena ndlu ka-Aroni,

mbonge uJehova.

₂₀Wena ndlu kaLevi, mbonge uJehova;

nina enimesabayo uJehova,

mbongeni uJehova.

₂₁UJehova makabongwe eSiyoni,

yena owakhe eJerusalema.

Haleluya!

₁Bongani uJehova, ngokuba muhle,

₂Bongani uNkulunkulu wawonkulunkulu,

₃Bongani iNkosi yamakhosi,

₄yona engoyedwa owenza izimangaliso ezinkulu,

₅owenzile izulu ngokuhlakanipha,

₆owendlala umhlaba phezu kwamanzi,

₇owenza izinkanyiso ezinkulu,

₈ilanga ukuba libuse emini,

₉inyanga nezinkanyezi ukuba zibuse ebusuku,

₁₀owalishaya iGibithe, amazibulo alo,

₁₁owamkhipha u-Israyeli phakathi kwabo,

₁₂ngesandla esinamandla nangengalo eyeluliweyo,

₁₃owahlukanisa kabili uLwandle Olubomvu,

₁₄owawelisa u-Israyeli phakathi kwalo,

₁₅owachitha uFaro nempi yakhe eLwandle Olubomvu,

₁₆owahola abantu bakhe ehlane,

₁₇owashaya amakhosi amakhulu,

₁₈owabulala amakhosi adumileyo,

₁₉uSihoni inkosi yama-Amori,

₂₀no-Ogi inkosi yaseBashani,

₂₁owanika izwe labo laba yifa,

₂₂laba yifa lika-Israyeli inceku yakhe,

₂₃owasikhumbula sisephansi,

₂₄owasikhulula ezitheni zethu,

₂₅onika inyama yonke ukudla,

₂₆Bongani uNkulunkulu wezulu,

₁Ngasemifuleni yaseBabele

sahlala khona, sakhala,

lapho sikhumbula iSiyoni.

₂Amahabhu* ethu sawaphanyeka

eminyezaneni ephakathi kwalo.

₃Ngokuba abasithumbileyo bacela ukuba sihlabelele igama,

nabahluphi bethu bafuna injabulo, bethi:

“Sihlabeleleni elinye lamagama aseSiyoni.”

₄Siyakuhlabelela kanjani ihubo likaJehova

kwelinye izwe na?

₅Uma ngikhohlwa wena Jerusalema,

masizikhohlwe isandla sami sokunene.

₆Ulimi lwami malunamathele olwangeni lwami,

uma ngingakukhumbuli,

uma ngingaphakamisi iJerusalema

phezu kwentokozo yami enkulu.

₇Khumbula, Jehova,

usuku lweJerusalema,

ngenxa yabantwana bakwa-Edomi

abathi: “Dilizani, dilizani,

kuze kube sesisekelweni salo.”

₈Ndodakazi yaseBabele,

wena oyakubhujiswa,

ubusisiwe oyakuphindisela kuwe

izenzo zakho owazenza kithina.

₉Ubusisiwe oyakubamba abancane bakho,

abaphahlaze edwaleni.

₁Ngiyakukubonga ngenhliziyo yami yonke;

phambi kwawonkulunkulu ngiyakukuhubela.

₂Ngiyakukhuleka phambi kwethempeli lakho elingcwele,

ngibonge igama lakho ngenxa yomusa wakho neqiniso lakho,

ngokuba phezu kwakho konke uphakamisile igama lakho nezwi lakho.

₃Ngosuku engakhala ngalo wangiphendula;

wangiqunga isibindi,

wangipha amandla emphefumulweni wami.

₄Onke amakhosi omhlaba ayakukubonga, Jehova,

lapho ezwile amazwi omlomo wakho.

₅Yebo, ayakuhlabelela ngezindlela zikaJehova,

ngokuba inkulu inkazimulo kaJehova.

₆Ngokuba noma uJehova ephakeme,

uyanakekela nokho ophansi;

uyamazi ozidlayo ekude.

₇Noma ngihamba phakathi kwenhlupheko,

uyakungiphilisa;

uyakwelulela isandla sakho olakeni lwezitha zami,

esokunene sakho singisindise.

₈UJehova uyakufeza okwami;

Jehova, umusa wakho umi phakade;

ungashiyi imisebenzi yezandla zakho.

₁Jehova, uyangihlolisisa, uyangazi.

₂Uyakwazi ukuhlala kwami nokuvuka kwami,

uqonda umcabango wami ukude.

₃Uyaphenya ukuhamba kwami nokulala kwami,

wazana nezindlela zonke zami.

₄Ngokuba alikho izwi olimini lwami, Jehova,

ongalaziyo ngokupheleleyo.

₅Ungizungezile ngasemuva nangaphambili,

wabeka isandla sakho phezu kwami.

₆Ukwazi okunjalo kuyangimangalisa;

kuphakeme, anginakufinyelela kukho.

₇Ngiyakuyaphi,

ngisuke emoyeni wakho, na?

Ngiyakubalekelaphi,

ngimuke ebusweni bakho, na?

₈Uma ngikhuphukela ezulwini,

wena ulapho;

uma ngendlala icansi lami endaweni yabafileyo, nangu wena.

₉Uma ngithabatha amaphiko okusa,

ngiye ngihlale emikhawulweni yolwandle,

₁₀nalapho isandla sakho siyakungihola,

esokunene sakho singibambe.

₁₁Uma bengithi: “Ubumnyama mabungehlele,

ukukhanya kube ngubusuku kimi,”

₁₂ubumnyama bebungayikuba mnyama kuwe,

ngokuba ubusuku bebuyakukhanya njengemini,

ubumnyama bufane nokukhanya.

₁₃Ngokuba wena uzenzile izinso zami,

wangaluka esiswini sikamame.

₁₄Ngiyakukubonga,

ngokuba ngenziwa ngokwesabekayo nangokumangalisayo;

imisebenzi yakho iyamangalisa;

umphefumulo wami uyakwazi kahle.

₁₅Amathambo ami ayengafihlekile kuwe,

lapho ngenziwa ekusithekeni,

ngibunjwa ezindaweni ezijulileyo zomhlaba.

₁₆Amehlo akho angibona ngiseyihlule;

zonke izinsuku zami zalotshwa encwadini yakho,

zanqunywa, lungakafiki nolulodwa kuzo.

₁₇Imicabango yakho, Nkulunkulu, ingamagugu kimi;

bukhulu kangaka ubuningi bayo.

₁₈Uma bengiyakuyibala,

miningi kunesihlabathi;

lapho ngivuka, bengiyakuba nawe.

₁₉Sengathi ungabulala ababi, Nkulunkulu;

ngalokho sukani kimi nina bantu begazi.

₂₀Bakhuluma ngamacebo ngawe,

baliphatha ngeze igama lakho.

₂₁Jehova, angibazondi abakuzondayo na?

Anginengwa ngabakuvukelayo na?

₂₂Ngiyabazonda ngenzondo epheleleyo;

bayizitha kimi.

₂₃Ngihole, Nkulunkulu,

wazi inhliziyo yami;

ngilinge, wazi imicabango yami,

₂₄ubone, uma kukhona indlela yosizi kimi,

ungiholele endleleni yaphakade.

₁Ngikhulule, Jehova, kumuntu omubi,

ngilondoloze kumuntu oyisidlwangudlwangu.

₂Baceba okubi enhliziyweni yabo;

izinsuku zonke baviva impi.

₃Bayalola ulimi lwabo njengenyoka;

isihlungu samabululu siphansi kwezindebe zabo. Sela*

₄Ngilondoloze ezandleni zomubi,

ngilinde kumuntu oyisidlwangudlwangu,

oceba ukukhuba izinyawo zami.

₅Abazidlayo bangifihlela ugibe;

ngezintambo bendlala inetha;

eceleni kwendlela bangibekela izihibe. Sela*

₆Ngathi kuJehova:

“UnguNkulunkulu wami wena.”

Yizwa, Jehova, izwi lokunxusa kwami.

₇Jehova Nkosi yami, mandla ensindiso yami,

uvikela ikhanda lami ngosuku lokulwa.

₈Ungazivumeli, Jehova, izifiso zababi;

ungaphumelelisi amacebo abo,

funa baziphakamise. Sela*

₉Maqondana nesihlungu sabangizungezayo

mabambozwe ngububi bomlomo wabo.

₁₀Amalahle ashisayo mawawele phezu kwabo;

mabaphonswe emlilweni

nasemigodini ejulileyo,

bangabe besavuka.

₁₁Umuntu wamanga makangamiswa emhlabeni;

ububi mabuzingele umuntu oyisidlwangudlwangu, abhujiswe.

₁₂Ngiyazi ukuthi uJehova uyakumela udaba lohluphekayo

nokufaneleyo kwabampofu.

₁₃Impela abalungileyo bayakubonga igama lakho;

abaqotho bayakuhlala ebusweni bakho.