Bible Reading Plan – Day 122

₁Ekuhluphekeni kwami ngakhala kuJehova,

wangiphendula.

₂Jehova, hlenga umphefumulo wami emlonyeni wamanga

nasolimini lwenkohliso.

₃Uyakuvuzwa ngani, uyakwenezelelwani

wena lulimi lwenkohliso, na?

₄Imicibisholo ebukhali yeqhawe

namalahle omlilo.

₅Maye kimi!

Ngokuba ngigogobele kwaMesheke,

ngihlezi ematendeni akwaKedari.

₆Umphefumulo wami sekukade wahlala naye

ozonda ukuthula.

₇Ngingowokuthula;

kepha uma ngikhuluma, bangabalwayo.

₁Ngiphakamisela amehlo ami ezintabeni;

usizo lwami luvelaphi na?

₂Usizo lwami luvela kuJehova

owenzile izulu nomhlaba.

₃Akayikuvuma ukuba unyawo lwakho lushelele;

okulondolozayo akayikozela.

₄Bheka, olonda u-Israyeli akozeli,

akalali.

₅UJehova ungumlondi wakho;

uJehova ungumthunzi wakho ngasesandleni sakho sokunene.

₆Ilanga aliyikukushaya emini nenyanga ebusuku.

₇UJehova uyakukulondoloza ebubini bonke;

uyakulonda umphefumulo wakho.

₈UJehova uyakulondoloza ukuphuma kwakho nokungena kwakho

kusukela kulesi sikhathi kuze kube phakade.

₁Ngajabula lapho bethi kimi:

“Masiye endlini kaJehova.”

₂Izinyawo zethu sezimi

emasangweni akho, Jerusalema,

₃Jerusalema, wena owakhiwe

njengomuzi ohlanganisiwe ngokuqinileyo,

₄lapho imindeni ikhuphukela khona,

imindeni kaJehova,

ngokomthetho ka-Israyeli

ukuba idumise igama likaJehova.

₅Ngokuba kumisiwe khona izihlalo zokwahlulela,

izihlalo zobukhosi zendlu kaDavide.

₆Khulekelani ukuthula kwaseJerusalema:

“Abakuthandayo bayakuphumelela kahle.

₇Makube khona ukuthula phakathi kwezingange zakho,

nenhlanhla ezindlini zakho zobukhosi.”

₈Ngenxa yabafowethu nabangane bethu ngizakuthi manje:

“Makube khona ukuthula kuwe.”

₉Ngenxa yendlu kaJehova uNkulunkulu wethu

ngiyakukufunela okuhle.

₁Ngiyaphakamisela kuwe amehlo ami,

wena ohlezi ezulwini.

₂Bheka, njengamehlo ezinceku ekuzo izandla zamakhosi azo,

namehlo encekukazi ekuso isandla senkosikazi yayo,

kanjalo amehlo ethu akuye uJehova uNkulunkulu wethu,

aze abe nomusa kithi.

₃Sihawukele, Jehova sihawukele,

ngokuba sesidiniwe kakhulu ngukudelelwa.

₄Umphefumulo wethu udiniwe kakhulu

ngukweyisa kwabaziqhenyayo nokudelela kwabazidlayo.

₁Uma uJehova ebengenathi,

makasho njalo manje u-Israyeli,

₂uma uJehova ebengenathi,

lapho abantu besivukela,

₃ngabe sebesigwinyile

ekuvutheni kolaka lwabo kithina;

₄amanzi ngabe asewele phezu kwethu,

kudlule isikhukhula phezu komphefumulo wethu,

₅kudlule phezu komphefumulo wethu amanzi akhukhumeleyo.

₆Makabongwe uJehova

ongasinikelanga ukuba sibe yimpango

yamazinyo abo.

₇Umphefumulo wethu uphunyukile

njengenyoni ogibeni lwabacuphi;

ugibe lwaphukile, thina saphunyuka.

₈Usizo lwethu lusegameni likaJehova

owenzile izulu nomhlaba.

₁Abamethembayo uJehova bafana nentaba yaseSiyoni

engenakunyakaziswa kepha imi phakade.

₂Njengalokhu izintaba zihaqa iJerusalema,

kanjalo uJehova uhaqa abantu bakhe kalokhu kuze kube phakade.

₃Ngokuba intonga yababi ayinakuhlala phezu kwesabelo sabalungileyo,

funa abalungileyo belulele izandla zabo kokubi.

₄Jehova, yenza okuhle kubo abalungileyo

nabaqotho ezinhliziyweni zabo.

₅Kepha abaphambukela ezindleleni zabo eziyizinsongensonge

uJehova uzakubahambisa kanye nabenza okubi.

Ukuthula makube phezu kuka-Israyeli.

₁Lapho uJehova abuyisa ukuthunjwa kweSiyoni,

sasinjengabaphuphayo.

₂Umlomo wethu wawusugcwala ukuhleka

nolimi lwethu ukuhuba;

bathi phakathi kwabezizwe:

UJehova ubenzele izinto ezinkulu.

₃UJehova usenzele izinto ezinkulu, sajabula.

₄Buyisa, Jehova, ukuthunjwa kwethu

njengemifula yaseningizimu.

₅Abahlwanyela ngezinyembezi

bayakuvuna ngokuthokoza.

₆Ohamba ekhala izinyembezi,

ephethe imbewu yokuhlwanyela,

uyakubuya ngokuthokoza,

ephethe izinyanda zakhe.

₁Uma uJehova engayakhi indlu,

basebenzela ize abayakhayo;

uma uJehova engalondolozi umuzi,

umlindi wawo ulindela ize.

₂Kuyize kini ukuba nivuke ekuseni,

nephuze ukuphumula,

nidle isinkwa sezinhlupheko,

ngokuba uyamupha othandiweyo wakhe esalele.

₃Bheka, abantwana bayifa elivela kuJehova,

isithelo sesisu singumvuzo.

₄Njengemicibisholo esandleni seqhawe

banjalo abantwana bobusha.

₅Ibusisiwe indoda emgodla wayo ugcwele bona;

abayikujabha lapho bekhuluma nezitha zabo esangweni.

₁Babusisiwe bonke abamesabayo uJehova,

abahamba ngezindlela zakhe.

₂Ngokuba uyakudla umsebenzi wezandla zakho;

uyakuba nenhlanhla nempumelelo.

₃Umkakho uyakuba njengomnqumo othelayo phakathi kwendlu yakho,

abantwana bakho babe njengezithombo zomnqumo,

bezungeza itafula lakho.

₄Ngokuba bheka,

kanjalo iyakubusiswa indoda

emesabayo uJehova.

₅UJehova makakubusise eseSiyoni;

uyakubona inhlanhla yaseJerusalema

zonke izinsuku zokuphila kwakho.

₆Uyakubona abantwana babantwana bakho.

Ukuthula makube phezu kuka-Israyeli.

₁Bangihluphile kaningi kwasebusheni bami,

makasho njalo u-Israyeli.

₂Bangihluphile kakhulu,

nokho abangahlulanga.

₃Abalimi balima emhlane wami,

benza ibe mide imisele yabo.

₄UJehova ulungile;

unqumile izintambo zababi.

₅Mabajabhiswe, babuyiselwe emuva

bonke abazonda iSiyoni.

₆Mababe njengotshani ophahleni,

obubuna bungakakhuli.

₇Ovunayo akagcwalisi ngabo isandla sakhe,

nobopha izinyanda izingalo zakhe.

₈Abadlulayo abasho ukuthi:

“Isibusiso sikaJehova masibe phezu kwenu;

siyanibusisa egameni likaJehova.”

₁Ngikhala kuwe Jehova

ngisotweni phansi.

₂Nkosi, yizwa izwi lami;

izindlebe zakho mazilalele izwi lokuncenga kwami.

₃Uma wena Jehova uqaphela iziphambeko,

Nkosi, ngubani ongema na?

₄Kepha ukuthethelela kukuwe,

ukuze wesatshwe.

₅Ngiyalindela uJehova,

umphefumulo wami uyalinda;

ngiyalethemba izwi lakhe.

₆Umphefumulo wami uyalindela iNkosi

kunabalindi belindela ukusa.

₇U-Israyeli makamethembe uJehova,

ngokuba umusa ukuJehova,

nokukhulula okuningi kukuye.

₈Uyakumhlenga u-Israyeli

eziphambekweni zakhe zonke.

₁Jehova, inhliziyo yami ayikhukhumali,

amehlo ami awaziphakamisi;

angingeni ezindabeni ezinkulu

nasezintweni ezingahlulayo.

₂Ngiduduzile, ngawuthulisa umphefumulo wami;

njengomntwana olunyuliweyo kunina,

njengolumulekileyo,

unjalo umphefumulo wami phakathi kwami.

₃Israyeli, yethemba uJehova

kusukela kulesi sikhathi kuze kube phakade.

₁Jehova,

mkhumbulele uDavide zonke izinhlupheko zakhe

₂ukuthi wafunga kuJehova,

wenza isithembiso kuye onguMninimandla kaJakobe, ethi:

₃“Angiyikungena etendeni lendlu yami;

angiyikwenyukela embhedeni wami;

₄angiyikunika amehlo ami ubuthongo,

nezinkophe zami ukozela

₅ngingakatholeli uJehova indawo,

indlu yonguMninimandla kaJakobe.”

₆Bheka, sizwile ngakho e-Efratha,

sakufumana ezweni laseJari.

₇“Masingene endlini yakhe,

sikhuleke ngasesenabelweni sezinyawo zakhe.

₈Vuka, Jehova, uye ekuphumuleni kwakho,

wena nomphongolo wamandla akho.

₉Abapristi bakho mabembeswe ukulunga,

abangcwele bakho bethabe.”

₁₀Ngenxa yenceku yakho uDavide

mawungaphenduli ubuso bogcotshiweyo wakho.

₁₁UJehova ufungile kuDavide ngeqiniso,

akabuyi kukho, ethi:

“Owenzalo yomzimba wakho

ngiyakumbeka esihlalweni sakho sobukhosi.

₁₂Uma abantwana bakho begcina isivumelwano sami

nobufakazi bami engiyakubafundisa bona,

khona abantwana babo bayakuhlala

esihlalweni sakho kuze kube phakade.”

₁₃Ngokuba uJehova ukhethile iSiyoni;

ulithandile libe yindawo yakhe yokuhlala:

₁₄“Yona ingeyokuphumula kwami kuze kube phakade;

lapha ngiyakuhlala khona,

ngokuba ngiyifunile.

₁₅Ngiyakubusisa kakhulu ukudla kwalo;

abampofu balo ngiyakubasuthisa ngesinkwa.

₁₆Abapristi balo ngiyakubembesa insindiso;

abangcwele balo bayakumemeza nokumemeza ngenjabulo.

₁₇“Ngiyakuhlumisa uphondo lukaDavide,

ogcotshiweyo wami ngimlungisele isibani.

₁₈Izitha zalo ngiyakuzembesa ihlazo,

kepha kuyena uqobo umqhele wakhe uyakukhazimula.”