Bible Reading Plan – Day 110

₁Imbala nikhuluma ukulunga ngokuthula na?

Madodana abantu,

nahlulela ngobuqotho na?

₂Ingani enhliziyweni niphehla imisebenzi emibi;

ezweni nilinganisa ngesilinganiso ukudluzula kwezandla zenu.

₃Ababi bahlubuka kwasesizalweni,

abaqamba amanga baduka kwasesiswini.

₄Isihlungu sabo sinjengesihlungu senyoka;

banjengebululu eliyisithulu,

elivimba indlebe yalo,

₅lingalaleli izwi lezinyanga

ezilumba amalumbo ngokuhlakanipha.

₆Yaphula amazinyo abo emlonyeni wabo, Nkulunkulu!

Phohloza amazinyo omhlathi ezingonyama ezingamabhongo, Jehova!

₇Mabaphele njengamanzi agobhozayo;

nxa ekhomba ngemicibisholo yakhe,

mayibe sengathi iqundekile.

₈Mababe njengomnenke oncibilika, uphele,

njengokuphuphume kowesifazane okungalibonanga ilanga.

₉Amabhodwe enu engakazizwa izinkuni zameva,

uyakuziphephula, noma ziluhlaza noma zivutha.

₁₀Olungileyo uyakujabula ngokuba ebona impindiselo;

uyakugeza izinyawo zakhe egazini lababi,

₁₁abantu baze bathi: “Impela ukhona umvuzo wolungileyo;

impela ukhona uNkulunkulu owahlulelayo emhlabeni.”

₁Ngikhulule ezitheni zami, Nkulunkulu wami,

ngivikele kwabangivukelayo;

₂ngikhulule kwabenza okubi,

ngisindise kubantu begazi.

₃Ngokuba bheka, baqamekela umphefumulo wami;

iziqhwaga ziyangihlanganyela,

kungekho siphambeko,

kungekho sono kimi, Jehova.

₄Ziyagijima, zizilungisele,

kungekho cala kimi;

vuka, ungihlangabeze, ubone.

₅Wena kambe,

Jehova Nkulunkulu Sebawoti,

Nkulunkulu ka-Israyeli,

vuka uphindisele bonke abezizwe,

ungahawukeli namunye kwabahlubukileyo. Sela*

₆Bayabuya kusihlwa,

bahlaba umkhulungwane njengenja,

bezula emzini.

₇Bheka, bayampompa ngomlomo wabo,

kukhona izinkemba ezindebeni zabo,

ngokuba bathi:

“Ngubani ozwayo na?”

₈Kepha wena Jehova uyabahleka;

uyabaklolodela bonke abezizwe.

₉Mandla ami, ngiyakulindela wena,

ngokuba uNkulunkulu uyinqaba yami.

₁₀UNkulunkulu wami uyakungihlangabeza ngomusa wakhe;

uNkulunkulu uyakungibonisa izitha zami ngokwethaba.

₁₁Ungazibulali, funa abantu bami bakhohlwe;

zizulise ngamandla akho,

uzilahle phansi, Nkosi,

sihlangu sethu.

₁₂Izwi lezindebe zazo liyisono somlomo wazo;

mazibanjwe ekuzidleni kwazo

nangenxa yesiqalekiso namanga eziwakhulumayo.

₁₃Ziqede ngokuthukuthela,

ziqede zingabe zisabakho;

mazazi ukuba nguNkulunkulu obusa kwaJakobe,

kuze kube semikhawulweni yomhlaba. Sela*

₁₄Ziyabuya kusihlwa;

zihlaba umkhulungwane njengenja, zizula emzini.

₁₅Zizulazulela ukudla;

uma zingasuthi, zihlala nasebusuku.

₁₆Kepha mina ngizakuhlabelela ngamandla akho,

ngethabele umusa wakho ekuseni,

ngokuba uyinqaba yami,

nesiphephelo ngosuku lokuhlupheka kwami.

₁₇Mandla ami, ngizakuhubela wena;

ngokuba uNkulunkulu uyinqaba yami,

unguNkulunkulu wami womusa.

₁Nkulunkulu usilahlile, usichithile;

mawubuye usilulamise.

₂Uzamazamisile umhlaba, wawudabula izimfa;

zivale izimfa zawo,

ngokuba uyazamazama.

₃Isizwe sakho usibonisile izinto ezinzima;

usiphuzisile iwayini, sabhuyazela.

₄Abakwesabayo ubanike ibhanela* ukuba liphakanyiswe ngenxa yeqiniso. Sela*

₅Ukuze abathandekayo bakho bakhululwe,

sindisa ngesandla sakho sokunene, ungizwele.

₆UNkulunkulu ukhulumile ebungcweleni bakhe, wathi:

“Ngiyakwethaba;

ngiyakulidabula iShekemi,

ngisilinganise isiGodi saseSukoti.

₇Ngowami uGileyadi,

ngowami uManase;

u-Efrayimi uyisivikelo sekhanda lami,

uJuda uyintonga yami yokubusa.

₈UMowabi uyisitsha sami sokuhlambela;

phezu kuka-Edomi ngiphonsa isicathulo sami;

yethaba ngami, Filistiya.”

₉Ngubani oyakungiyisa emzini oqinileyo na?

Ngubani oyakungiholela kwa-Edomi na?

₁₀Akusiwena Nkulunkulu osilahlileyo na?

Nkulunkulu, awusaphumi nezimpi zethu.

₁₁Siphe ukuba sisizakale ekuhluphekeni,

ngokuba ukusiza komuntu kuyize.

₁₂NgoNkulunkulu siyakwenza izenzo zamandla;

yena uyakunyathela phansi izitha zethu.

₁Yizwa, Nkulunkulu, ukukhala kwami,

ulalele umkhuleko wami.

₂Ngikhala kuwe ngisemkhawulweni womhlaba,

lapho inhliziyo yami isebuthakathakeni;

ngiholele edwaleni eliphakeme kunami.

₃Ngokuba ubuyisiphephelo sami,

inqaba eqinileyo ngakuso isitha.

₄Ngiyakuhlala etendeni lakho kuze kube phakade;

ngiyakukhosela ekusithekeni kwamaphiko akho. Sela*

₅Ngokuba wena Nkulunkulu uzizwile izithembiso zami,

wabanika ifa abalesaba igama lakho.

₆Uyakweleka izinsuku ezinsukwini zenkosi;

iminyaka yayo iyakuba njengezizukulwane nezizukulwane.

₇Iyakuhlala phambi kukaNkulunkulu kuze kube phakade;

yimisele umusa neqiniso ukuba kuyilondoloze.

₈Khona ngiyakulidumisa igama lakho kuze kube phakade,

ukuze ngigcwalise izithembiso zami imihla ngemihla.

₁Umphefumulo wami uzithulele kuNkulunkulu kuphela;

insindiso yami ivela kuye.

₂Nguye kuphela oyidwala lami nensindiso yami, inqaba yami;

angiyikunyakaziswa kakhulu.

₃Koze kube nini nisukela umuntu

ukuba nimbulale nonke

njengodonga olwengemeyo

nothango oludilikayo na?

₄Yebo, bathunga icebo lokumwisa ekuphakameni kwakhe,

bathanda amanga;

bayabusisa ngomlomo wabo,

kepha ezibilinini zabo bayaqalekisa. Sela*

₅Mphefumulo wami,

zithulisele kuNkulunkulu kuphela,

ngokuba ithemba lami livela kuye.

₆Nguye kuphela oyidwala lami nensindiso yami,

inqaba yami; angiyikunyakaziswa.

₇Insindiso yami nodumo lwami kukuNkulunkulu;

idwala lami eliqinileyo nesiphephelo sami kukuNkulunkulu.

₈Thembani kuye ngezikhathi zonke nina bantu,

nithulule inhliziyo yenu phambi kwakhe;

uNkulunkulu uyisiphephelo sethu. Sela*

₉Abantwana babantu bangumoya nje,

abantwana bezikhulu bangamanga;

esilinganisweni bayakhuphuka,

balula kunomoya bonke.

₁₀Maningakwethembi ukuqhwaga,

ningazigabisi ngokuphangiweyo;

uma imfuyo yanda,

ningayibeki inhliziyo kuyo.

₁₁UNkulunkulu ukhulumile kanye,

ngikuzwe kabili

ukuthi amandla angakaNkulunkulu.

₁₂Nomusa ungowakho, Nkosi;

ngokuba wena umphindisela umuntu

njengokwenza kwakhe.

₁Nkulunkulu, wena unguNkulunkulu wami,

ngiyakufuna ekuseni;

umphefumulo wami womele wena;

inyama yami ilangazelela wena

ezweni elomileyo eligagadekileyo,

lapho amanzi engekho khona.

₂Kanjalo ngikubheka endlini engcwele,

ngibone amandla akho nenkazimulo yakho.

₃Ngokuba umusa wakho umnandi kunokuphila;

izindebe zami ziyakukudumisa.

₄Ngiyakukubonga ngisaphila;

ngiyakuphakamisa izandla zami egameni lakho.

₅Umphefumulo wami uyakusutha kungathi ngamanoni namafutha;

umlomo wami uyakudumisa ngezindebe ezethabayo.

₆Nxa ngikukhumbula ecansini lami,

ngizindla ngawe emilindweni yasebusuku.

₇Ngokuba ungisizile;

ngiyakwethaba ethunzini lamaphiko akho.

₈Umphefumulo wami ubambelele kuwe;

esokunene sakho siyangiphasa.

₉Kepha abafuna umphefumulo wami ukuwubulala

bayakwehlela ezindaweni zomhlaba eziphansi.

₁₀Bayakunikelwa esandleni senkemba,

babe yisabelo sezimpungushe.

₁₁Kepha inkosi iyakuthokoza ngoNkulunkulu;

bonke abafunga yena bayakuzibonga;

ngokuba umlomo wabakhuluma amanga uyakuvalwa.

₁Yizwa, Nkulunkulu,

izwi lami ekukhaleni kwami,

ulondoloze ukuphila kwami evusweni lesitha.

₂Ngisithe esigungwini sababi nasesixukwini sabenza okubi,

₃abalola ulimi lwabo njengenkemba,

bakhombe imicibisholo yabo engamazwi ababayo

₄ukuba bamdubule ongenacala ngasesitha,

bamdubule ngokuzuma bengesabi.

₅Baqinela icebo elibi;

bakhuluma ngokufihla izingibe;

bathi: “Ngubani oyakusibona na?”

₆Basongoza izenzo ezimbi,

bathi: “Siliqedile icebo elisongoziweyo,”

izibilini nenhliziyo yomuntu kujulile.

₇Kepha uNkulunkulu uyakubadubula ngomcibisholo;

bagwazwe ngokuzunywa.

₈Bayakuwiswa, baficwe lulimi lwabo;

bonke abababonayo bayonikina ikhanda.

₉Bonke abantu bayashaywa luvalo;

bayakushumayela izenzo zikaNkulunkulu,

baqonde akwenzileyo.

₁₀Olungileyo uyakujabula kuJehova, aphephele kuye;

bonke abaqotho ngenhliziyo bayakuzibonga.

₁Udumiso luhlalela wena Nkulunkulu eSiyoni,

nesithembiso siyakugcwaliswa kuwe.

₂Wena ozwayo imikhuleko,

beza kuwe bonke abantu.

₃Izenzo ezimbi zangahlula;

iziphambeko zethu uyaziyekela.

₄Ubusisiwe omkhethayo wena, omsondezayo

ukuba ahlale emagcekeni akho;

siyakusutha ngokuhle kwendlu yakho,

ithempeli lakho elingcwele.

₅Uyakusiphendula ngezenzo ezesabekayo ekulungeni,

Nkulunkulu wensindiso yethu,

wena oyithemba lemikhawulo yonke yomhlaba

nelolwandle olukude;

₆yena omisa izintaba ngamandla akhe,

obhince amandla;

₇othulisa ukuduma kwezilwandle,

inhlokomo yamaza azo nomsindo wabantu.

₈Abakhile emikhawulweni yomhlaba

bayesaba ngezibonakaliso zakho;

uyethabisa impumalanga nentshonalanga.

₉Uhambela umhlaba, unisa imvula,

uwuvundisa kakhulu;

umfula kaNkulunkulu ugcwele amanzi;

ubalungisela abantu ukudla,

ngokuba uwulungisa kanjalo umhlaba.

₁₀Umatisa imisele yawo,

ulalisa amasoyi awo;

uwuthambisa ngezihlambi,

ubusise okumila kuwo.

₁₁Umnyaka uyawuhlobisa ngobumnene bakho,

nemikhondo yakho iconsa amafutha.

₁₂Amadlelo asehlane ayaconsa;

amagquma abhinca injabulo.

₁₃Amadlelo embethe izimvu,

nezigodi zisibekelwe ngamabele;

konke kuyajabula, kuhlabelele.