Bible Reading Plan – Day 109

₁Ngihawukele, Nkulunkulu,

ngokomusa wakho;

yesula iziphambeko zami ngokobubele bakho obukhulu.

₂Ngigezisise ebubini bami,

ungihlanze esonweni sami.

₃Ngokuba ngiyazazi iziphambeko zami;

isono sami siphambi kwami njalo.

₄Ngonile kuwe wena wedwa,

ngakwenza okubi emehlweni akho,

ukuze uthiwe ulungile ekukhulumeni kwakho,

uchache ekwahluleleni kwakho.

₅Bheka, ngazalelwa ebubini,

umame wangithabatha esonweni.

₆Bheka, uthanda iqiniso

ngaphakathi enhliziyweni;

wongifundisa ukuhlakanipha ekujuleni kwenhliziyo.

₇Ngihlanze ngehisopi,* ngihlambuluke;

ngigeze, ngibe mhlophe kuneqhwa.

₈Ngizwise intokozo nenjabulo,

ukuze ethabe amathambo owachobozileyo.

₉Fihla ubuso bakho ezonweni zami,

wesule zonke izenzo zami ezimbi.

₁₀Nkulunkulu, dala kimi inhliziyo ehlanzekileyo,

uvuse umoya oqinileyo phakathi kwami.

₁₁Ungangilahli ebusweni bakho,

ungangemuki uMoya wakho oNgcwele.

₁₂Buyisela kimi ukuthokoza kwensindiso yakho,

ungiphase ngomoya ovumayo.

₁₃Khona ngiyakufundisa abaphambukayo izindlela zakho;

nezoni ziyakuphendukela kuwe.

₁₄Ngikhulule ecaleni legazi, Nkulunkulu,

Nkulunkulu wensindiso yami.

Khona ulimi lwami luyakuhubela ukulunga kwakho.

₁₅Nkosi, vula izindebe zami,

ukuze umlomo wami ulande ngodumo lwakho.

₁₆Ngokuba awuwuthandi umhlatshelo;

noma bengizakukunika uminikelo wokushiswa,

ubungayikuthokoza ngawo.

₁₇Iminikelo kaNkulunkulu ingumoya owaphukileyo;

inhliziyo eyaphukileyo nedabukileyo,

Nkulunkulu, awuyikuyidelela.

₁₈Lenzele iSiyoni okuhle ngokomusa wakho,

uzakhe izingange zaseJerusalema.

₁₉Khona uyakuyijabulela iminikelo yokulunga eshiswayo neshiswa yonke;

khona bayakunikela ngezinkunzi phezu kwe-altare lakho.

₁Uzigabiselani ngokubi wena siqhwaga na?

Umusa kaNkulunkulu umi njalo.

₂Ulimi lwakho lusongoza okubi njengempuco eloliweyo,

wena owenza amacebo.

₃Uthanda okubi kunokuhle,

namanga kunokukhuluma ukulunga. Sela*

₄Uthanda onke amazwi okubhubhisa wena lulimi lwenkohliso.

₅Ngakho-ke uNkulunkulu uyakukubhidliza kuze kube phakade;

uyakukubamba, akukhiphe etendeni lakho,

akusiphule ezweni labaphilayo. Sela*

₆Abalungileyo bayakukubona, besabe;

bayakumhleka, bathi:

₇“Bheka, nasi isiqhwaga esingamenzanga uNkulunkulu abe yinqaba yaso,

kepha sethemba ingcebo yaso enkulu, siziqinisa ebubini baso.”

₈Kepha mina nginjengomnqumo oluhlaza

endlini kaNkulunkulu;

ngithemba umusa kaNkulunkulu njalonjalo

kuze kube phakade naphakade.

₉Ngizakukudumisa kuze kube phakade, ngokuba ukwenzile;

ngizakulindela igama lakho,

ngokuba lihle phambi kwabangcwele bakho.

₁Isiwula sithi enhliziyweni yaso:

“Akakho uNkulunkulu,”

iziphambeko zabo zimbi, ziyanengeka;

akakho owenza okuhle.

₂UNkulunkulu esezulwini uyababheka abantwana babantu

ukubona uma kukhona yini onokuqonda,

ofuna uNkulunkulu.

₃Baphambukile bonke,

bonakele bonke;

akakho owenza okuhle,

akakho noyedwa.

₄Abanakwazi yini abenza okubi,

abadla abantu bami njengalokhu bedla isinkwa,

bengakhuleki kuNkulunkulu.

₅Besaba nokwesaba,

lapho kungekho okwesabisayo;

ngokuba uNkulunkulu wasakaza amathambo akhe owamisa ngakuwe;

wena ubajabhisile,

ngokuba uNkulunkulu ubalahlile.

₆Sengathi kungavela ukusindiswa kuka-Israyeli eSiyoni.

Kuyakuthi lapho uNkulunkulu eguqula ukuthunjwa kwabantu bakhe,

uJakobe ethabe, u-Israyeli ajabule.

₁Nkulunkulu, ngisindise ngegama lakho,

ngahlulele ngamandla akho.

₂Nkulunkulu, yizwa umkhuleko wami,

ubeke indlebe emazwini omlomo wami.

₃Ngokuba abafo bangivukele;

izidlova zifuna umphefumulo wami;

azimbekile uNkulunkulu phambi kwazo. Sela*

₄Bheka, uNkulunkulu ungumsizi wami;

iNkosi ikubo abaphasa umphefumulo wami.

₅Uyabuyisela okubi ezitheni zami;

zibhubhise ngokweqiniso lakho.

₆Ngizakunikela kuwe ngesihle;

ngizakulibonga igama lakho, Jehova,

ngokuba lihle.

₇Ngokuba ungikhululile ekuhluphekeni konke;

neso lami libuka izitha zami, lidele.

₁Lalela, Nkulunkulu,

umkhuleko wami,

ungazifihli ekunxuseni kwami.

₂Ngizwele, ungiphendule;

ngiyayaluza ekukhaleni kwami, ngiyabubula

₃ngenxa yezwi lesitha,

ngenxa yokucindezela komubi;

ngokuba bagingqela okubi phezu kwami;

bangizingela bethukuthele.

₄Inhliziyo yami iyathuthumela phakathi kwami;

amavuso okufa angehlele.

₅Ngifikelwe luvalo nokuqhaqhazela;

ngikhwelwe ngukwesaba okukhulu.

₆Besengithi:

“Sengathi ngingaba namaphiko njengejuba;

ngabe ngindizela ekudeni,

ngihlale khona.”

₇Bheka, bengiyakubaleka, ngiye kude,

ngingenise ehlane. Sela*

₈Ngabe ngiphuthuma indawo yokuphepha

emoyeni ovunguzayo nasesiphephweni.

₉Bachithe, Nkosi,

uphambanise ulimi lwabo,

ngokuba ngibonile ubudlwangudlwangu nokuxabana emzini.

₁₀Imini nobusuku bahamba bezungeza phezu kwezingange zawo;

okubi nokushinga kuphakathi kwawo.

₁₁Ububi buphakathi kwawo;

imbandezelo nenkohliso akusuki esigcawini sawo.

₁₂Ngokuba akusiso isitha esingiklolodelayo;

ngabe ngiyakuthwala;

akusiye ongizondayo oziphakamise phezu kwami;

ngabe ngamcashela;

₁₃kepha nguwe ntanga yami,

mhlobo wami nomngane wami.

₁₄Sasihlalisana kamnandi;

sasiya endlini kaNkulunkulu kanye nebandla elithokozayo.

₁₅Ukufa makubazume,

bashonele endaweni yabafileyo besezwa,

ngokuba ububi busezindlini zabo nasezinhliziyweni zabo.

₁₆Mina ngizakukhala kuNkulunkulu;

uJehova uzakungisindisa.

₁₇Kusihlwa nasekuseni nasemini ngizakuzikhalela, ngibubule,

abeselizwa izwi lami.

₁₈Uyawuhlenga umphefumulo wami ngokuthula, bangasondeli kimi,

ngokuba baningi abamelene nami.

₁₉UNkulunkulu uzakuzwa, abaphendule,

yena okhona kwaphakade. Sela*

Yibona kambe okungekho kubo ukuphenduka,

nabangamesabiyo uNkulunkulu.

₂₀Ubeka isandla ngakuye ohlalisene kahle naye;

udumazile isivumelwano sakhe.

₂₁Umlomo wakhe ubushelezi kunephehlwa,

kepha inhliziyo yakhe iyimpi;

amazwi akhe athambile kunamafutha;

nokho ayizinkemba ezikhokhiweyo.

₂₂Phonsa phezu kukaJehova umthwalo wakho, uzakukuphasa;

akayikuvuma naphakade ukuba olungileyo azanyazanyiswe.

₂₃Wena Nkulunkulu uyakubaphonsa egodini lokubhubhisa;

abantu begazi nenkohliso abayikufinyelela nasenxenyeni yezinsuku zabo;

kepha mina ngizakwethemba wena.

₁Yiba nomusa kimi, Nkulunkulu,

ngokuba abantu bafuna ukungigwinya;

usuku lonke bayangicindezela belwa.

₂Izitha zami zifuna ukungigwinya usuku lonke;

ngokuba baningi abalwa nami ngokuzidla.

₃Mhla ngesabayo

ngiyakwethemba wena.

₄KuNkulunkulu ngiyakudumisa izwi lakhe;

ngithemba uNkulunkulu, angiyikwesaba;

inyama ingangenzani na?

₅Amazwi ami bawahlanekezela usuku lonke;

yonke imicabango yabo iqonde ukungona.

₆Bayabuthana, baqamekele,

baqaphele izinyathelo zami,

njengokuba beqamekela umphefumulo wami.

₇Bayakuphunyuka yini ebubini babo na?

Diliza izizwe ngentukuthelo, Nkulunkulu.

₈Ukuzula kwami ukubalile wena;

yetha izinyembezi zami egabheni lakho;

azikho encwadini yakho na?

₉Khona izitha zami ziyakubuyela emuva mhla ngikhalayo;

ngiyakwazi lokhu ukuthi uNkulunkulu unami.

₁₀KuNkulunkulu ngiyakulidumisa izwi;

kuJehova ngiyakulidumisa izwi.

₁₁Ngiyethemba kuNkulunkulu, angiyikwesaba;

umuntu angangenzani na?

₁₂Nkulunkulu, izithembiso zami kuwe ziphezu kwami;

ngiyakunikela kuwe iminikelo yokubonga.

₁₃Ngokuba uwukhululile umphefumulo wami ekufeni

nezinyawo zami ekuweni,

ukuze ngihambe ebusweni bukaNkulunkulu

ekukhanyeni kwabaphilayo.

₁Yiba nomusa kimi, Nkulunkulu;

yiba nomusa kimi.

Ngokuba umphefumulo wami uphephela kuwe;

ngifuna ukukhosela ethunzini lamaphiko akho,

zize zidlule izinhlupheko.

₂Ngizakukhala kuNkulunkulu oPhezukonke,

kuNkulunkulu ongifezelayo.

₃Uyakuthumela esezulwini, angisindise

mhla ofuna ukungigwinya ekloloda. Sela*

UNkulunkulu uyakuthuma umusa wakhe neqiniso lakhe.

₄Umphefumulo wami uphakathi kwezingonyama;

ngilala kwabavutha umlilo,

abantwana babantu abamazinyo abo ayimikhonto nemicibisholo,

abalulimi lwabo luyinkemba ebukhali.

₅Phakama, Nkulunkulu,

phezu kwezulu,

inkazimulo ibe phezu komhlaba wonke.

₆Izinyathelo zami bazibekele ugibe;

umphefumulo wami ugobile;

bembile igebe phambi kwami,

kwakhalakathela bona kulo. Sela*

₇Inhliziyo yami iduduzekile, Nkulunkulu;

inhliziyo yami iduduzekile;

ngizakuhlabelela, ngihube.

₈Vuka, mphefumulo wami;

vukani, lugubhu nehabhu!*

Ngizakuvusa ukusa.

₉Ngizakukubonga, Nkosi,

phakathi kwabantu,

ngikudumise phakathi kwezizwe.

₁₀Ngokuba umusa wakho mkhulu kuze kube sezulwini,

nokuthembeka kwakho kuze kube semafwini.

₁₁Phakama, Nkulunkulu,

phezu kwezulu,

inkazimulo yakho ibe phezu komhlaba wonke.