Bible Reading Plan – Day 101

₁Ubusisiwe umuntu ongahambi ngeziluleko zababi,

ongemi endleleni yezoni,

ongahlali enkundleni yabaklolodayo,

₂kepha okuthokoza kwakhe kusemthethweni kaJehova,

ozindla ngomthetho wakhe imini nobusuku.

₃Unjengomuthi otshaliwe ngasemifuleni yamanzi,

othela isithelo sawo ngesikhathi sawo,

oqabunga lawo lingabuni,

nakho konke akwenzayo uyakuba nenhlanhla kukho.

₄Ababi abanjalo,

kepha banjengamakhoba aphephethwa ngumoya.

₅Ngalokho ababi abayikuma ekwahlulelweni,

nezoni ebandleni labalungileyo.

₆Ngokuba uJehova uyayazi indlela yabalungileyo,

kodwa indlela yababi yobhubha.

₁Kungani ukuba abezizwe baxokozele,

nabantu bazindle ngokuyize na?

₂Amakhosi omhlaba ayazihlanganisa,

nababusi baceba icebo

ngoJehova nangogcotshiweyo wakhe ngokuthi:

₃“Masigqabule izibopho zabo,

silahle izintambo zabo, zisuke kithina.”

₄Yena ohlezi ezulwini uyahleka,

iNkosi iyabadelela.

₅Ibisikhuluma kubo ngentukuthelo yayo,

ibethuse ngolaka lwayo, ithi:

₆“Nokho ngibekile iNkosi yami eSiyoni,

intaba yami engcwele.”

₇Ngizakulanda ngesinqumo:

uJehova wathi kimi:

“Uyindodana yami wena;

namuhla ngikuzele.

₈Cela kimi,

ngikunike abezizwe babe yifa lakho,

nemikhawulo yomhlaba ibe yimfuyo yakho.

₉Uzakubaphula ngentonga yensimbi,

ubaphahlaze njengesitsha sombumbi.”

₁₀Ngakho hlakaniphani nina makhosi;

yalekani nina bahluleli bomhlaba.

₁₁Mkhonzeni uJehova ngokwesaba, nethabe ngokuthuthumela.

₁₂Yangeni indodana,

ingaze ithukuthele,

nibhubhe endleleni,

ngokuba ulaka lwayo luyakuvutha masinyane.

Babusisiwe bonke abaphephela kuyo.

₁Hhawu, Jehova, ziningi izitha zami.

Baningi abangivukelayo.

₂Baningi abathi emphefumulweni wami:

“Akukho ukusinda kwakhe kuNkulunkulu.” Sela*

₃Kepha wena Jehova uyisihlangu kimi,

uludumo lwami nophakamisa ikhanda lami.

₄Ngezwi lami ngiyakhala kuJehova;

yena uyangiphendula esentabeni yakhe engcwele. Sela*

₅Ngalala phansi, ngazunywa ngubuthongo;

ngavuka, ngokuba uJehova ungiphasile.

₆Angesabi amashumi ezinkulungwane zabantu

abangihaqile nxazonke.

₇Vuka, Jehova,

ungisindise, Nkulunkulu wami,

ngokuba zonke izitha zami uzishayile emhlathini,

amazinyo ababi uwaphulile.

₈Insindiso ingekaJehova;

isibusiso sakho masibe kubantu bakho. Sela*

₁Ngiphendule ekukhaleni kwami,

Nkulunkulu wokulunga kwami.

Ekucindezelweni wangenzela indawo;

yiba nomusa kimi, uzwe umkhuleko wami.

₂Madodana abantu,

koze kube nini ubukhosi bami budunyazwa na?

Koze kube nini nithanda okuyize,

nifuna amanga, na? Sela*

₃Yazini ukuthi uJehova uzahlukanisele omesabayo;

uJehova uyezwa lapha ngikhala kuye.

₄Thukuthelani ningoni;

zindlani enhliziyweni yenu okhukhweni lwenu,

nithule. Sela*

₅Nikelani iminikelo yokulunga,

nethembe uJehova.

₆Baningi abathi:

“Ngubani oyakusibonisa okuhle na?”

Jehova, phakamisa ukukhanya kobuso bakho phezu kwethu.

₇Ubeke injabulo enhliziyweni yami

edlula eyamabele abo newayini labo sekuvamile.

₈Ngizakucambalala ngokuthula,

ngilale ubuthongo,

ngokuba wena Jehova wedwa ungihlalisa ngokulondeka.

₁Yizwa amazwi ami, Jehova,

uqaphele ukuzindla kwami.

₂Yizwa izwi lokukhala kwami,

Nkosi yami, Nkulunkulu wami,

ngokuba ngithandaza kuwe.

₃Jehova, ekuseni uyalizwa izwi lami;

ekuseni ngiyakuzibika kuwe, ngilinde.

₄Ngokuba wena awusiye uNkulunkulu othanda okubi;

omubi akanakuhlala kuwe.

₅Abazidlayo abayikuma phambi kwamehlo akho;

uyabazonda bonke abenza okubi.

₆Uyabhubhisa abakhuluma amanga;

uJehova uyamenyanya umuntu wegazi nowenkohliso.

₇Kepha mina ngiyakungena endlini yakho

ngobuningi bomusa wakho,

ngikhothame ngokukuhlonipha,

ngibhekene nendawo yakho engcwele.

₈Jehova, ngihole ngokulunga kwakho

ngenxa yezitha zami,

ulungise indlela yakho phambi kobuso bami.

₉Ngokuba alikho iqiniso emlonyeni wabo;

izibilini zabo zingukonakala:

umphimbo wabo uyithuna elivulekileyo;

bayathopha ngolimi lwabo.

₁₀Balahle ngecala, Nkulunkulu.

Mabawe ngenxa yamacebo abo,

ubawise ngobuningi beziphambeko zabo,

ngokuba bahlubukile kuwe.

₁₁Kepha mabajabule bonke abathemba kuwe,

bahalalise kuze kube phakade,

abathanda igama lakho bethabela kuwe.

₁₂Ngokuba wena Jehova uyambusisa olungileyo;

umphahla ngomusa njengesihlangu.

₁Jehova, ungangijezisi ngentukuthelo yakho,

ungangishayi ngolaka lwakho.

₂Yiba nomusa kimi, Jehova,

ngokuba ngidangele;

ngiphilise, Jehova, ngokuba amathambo ami ayathuthumela,

₃nomphefumulo wami uyathuthumela,

kepha wena Jehova,

koze kube nini na?

₄Buya, Jehova, ukhulule umphefumulo wami,

ungisindise ngenxa yesihawu sakho.

₅Ngokuba akukho ukukhumbula wena ekufeni;

ngubani oyakukubonga endaweni yabafileyo na?

₆Ngikhathele ukububula kwami;

ngimanzisa icansi lami njalo ebusuku,

ngimanzisa ukhukho lwami ngezinyembezi zami.

₇Iso lami liyafiphala ngokudabuka;

liyaguga ngenxa yezitha zami zonke.

₈Dedani kimi nina nonke enenza okubi,

ngokuba uJehova ulizwile izwi lokukhala kwami;

₉uJehova uzwile ukunxusa kwami,

uJehova uyamukela umkhuleko wami.

₁₀Zonke izitha zami ziyakujabha,

zishaywe luvalo;

ziyakuhlehla, zijabhe ngokuphazima kweso.

₁Jehova, Nkulunkulu wami,

ngiyaphephela kuwe;

₂ngisindise kubo bonke abangizingelayo,

ungikhulule,

bangaze bawudwengule umphefumulo wami njengengonyama

eklebhula, kungekho okhululayo.

₃Jehova Nkulunkulu wami,

uma ngikwenzile lokho,

uma kukhona okubi ezandleni zami,

₄uma ngiphindise okubi kohlalisene nami ngokuthula,

ngaphanga isitha sami kungekho sici,

₅isitha masiwuzingele umphefumulo wami, siwufice,

sikunyathele phansi ukuphila kwami,

nesithunzi sami sisilahle phansi othulini. Sela*

₆Sukuma, Jehova, ngentukuthelo yakho,

uvuke ngenxa yolaka lwezitha zami, ungimele;

ngokuba uyalezile ukwahlulela.

₇Umhlangano wezizwe mawukuphahle,

ubuyele phezulu ngaphezu kwawo.

₈UJehova uyahlulela izizwe;

ngahlulele, Jehova,

ngokulunga kwami nangobuqotho bami obukimi.

₉Makuphele ukonakala kwababi,

kepha olungileyo mawumqinise.

Nguwe phela ohlola izinhliziyo nezinso,

Nkulunkulu olungileyo.

₁₀Isihlangu sami sikuNkulunkulu

osindisa abaqotho ngenhliziyo.

₁₁UNkulunkulu ungumahluleli olungileyo;

unguNkulunkulu othukuthela imihla yonke.

₁₂Uma umuntu engaphenduki,

uyakulola inkemba yakhe,

ansale umnsalo wakhe, awulungisele,

₁₃izikhali zokubulala azibhekisele kuye;

imicibisholo uyenza ishise.

₁₄Unemihelo ngobubi;

ukhulelwe ngukona, uzala amanga.

₁₅Umgodi uwumba, uwugubha,

kepha ukhalakathela egebeni alenzileyo.

₁₆Ukwelelesa kwakhe kubuyela ekhanda lakhe;

ubudlwangudlwangu bakhe behlela okhakhayini lwakhe.

₁₇Ngizakumbonga uJehova ngokokulunga kwakhe,

ngihubele igama likaJehova oPhezukonke.

₁Jehova Nkosi yethu,

igama lakho liyababazeka kangaka emhlabeni wonke!

wena owabeka inkazimulo yakho ezulwini.

₂Ngomlomo wezingane nowabancelayo

wagxilisa amandla ngenxa yabamelene nawe

ukuba uthulise isitha nophindisayo.

₃Lapha ngibuka izulu lakho,

umsebenzi weminwe yakho,

inyanga nezinkanyezi ozimisileyo,

₄umuntu uyini ukuba umkhumbule,

nendodana yomuntu ukuba uyinake na?

₅Wamenza waba ngaphansana kukaNkulunkulu,

wamqhelisa ngenkazimulo nangobukhosi.

₆Wamenza abe ngumbusi phezu kwemisebenzi yezandla zakho;

konke wakubeka phansi kwezinyawo zakhe:

₇izimvu, nezinkomo zonke,

yebo, nezilwane zasendle,

₈nezinyoni zezulu,

nezinhlanzi zolwandle,

nakho konke okuhamba ezindleleni zolwandle.

₉Jehova Nkosi yethu,

igama lakho liyababazeka kangaka emhlabeni wonke!