Ihubo 120

₁Ekuhluphekeni kwami ngakhala kuJehova,

wangiphendula.

₂Jehova, hlenga umphefumulo wami emlonyeni wamanga

nasolimini lwenkohliso.

₃Uyakuvuzwa ngani, uyakwenezelelwani

wena lulimi lwenkohliso, na?

₄Imicibisholo ebukhali yeqhawe

namalahle omlilo.

₅Maye kimi!

Ngokuba ngigogobele kwaMesheke,

ngihlezi ematendeni akwaKedari.

₆Umphefumulo wami sekukade wahlala naye

ozonda ukuthula.

₇Ngingowokuthula;

kepha uma ngikhuluma, bangabalwayo.