Ihubo 119

₁Babusisiwe abaqotho endleleni,

abahamba ngemithetho kaJehova.

₂Babusisiwe abagcina ubufakazi bakhe,

abamfuna ngenhliziyo yonke,

₃abangenzi ukungalungi,

kepha behamba ezindleleni zakhe;

₄wena usiyalezile

ukuba sizigcine ngokwempela.

₅Sengathi zingaqondiswa izindlela zami

ukuba ngigcine izimiso zakho.

₆Khona angiyikujabha;

ngiyakuhlonipha iziyalezo zonke zakho.

₇Ngiyakukubonga ngobuqotho benhliziyo,

lapho ngifunda izahlulelo zakho ezilungileyo.

₈Izimiso zakho ngiyakuzigcina;

ungangishiyi nakanci.

₉Insizwa iyakuyihlanza kanjani indlela yayo na?

Ngokuqaphela okwezwi lakho.

₁₀Ngikufunile ngenhliziyo yami yonke;

mangingaphambuki emiyalweni yakho.

₁₁Enhliziyweni yami ngiyalonda izwi lakho,

ukuze ngingoni kuwe.

₁₂Mawubongwe wena Jehova,

ungifundise izimiso zakho.

₁₃Ngomlomo wami ngimemezele

zonke izahlulelo zomlomo wakho.

₁₄Ngithokoza ngendlela yobufakazi bakho njengemfuyo.

₁₅Ngiyakuzindla ngeziyalezo zakho,

ngihloniphe izindlela zakho.

₁₆Ngiyakuthokoza ngezimiso zakho;

angiyikukhohlwa izwi lakho.

₁₇Yenzele okuhle inceku yakho

ukuba ngiphile, ngigcine izwi lakho.

₁₈Vula amehlo ami

ukuba ngibone izimangaliso zasemthethweni wakho.

₁₉Ngingumfokazi emhlabeni;

ungangifihleli imiyalo yakho.

₂₀Umphefumulo wami waphukile

ngokulangazelela njalo izahlulelo zakho.

₂₁Uyakhuza abazidlayo, abaqalekisiweyo,

abaduka emiyalweni yakho.

₂₂Susa kimi isihlamba nokudelelwa,

ngokuba ngiyaqaphela ubufakazi bakho.

₂₃Yebo, izikhulu zihlezi zikhuluma ngami;

inceku yakho iyazindla ngezimiso zakho.

₂₄Ubufakazi bakho buyintokozo yami,

bungumluleki wami.

₂₅Umphefumulo wami unamathela othulini;

ngiphilise ngokwezwi lakho.

₂₆Ngimemezele izindlela zami,

wena wangizwa;

ngifundise izimiso zakho.

₂₇Ngiqondise indlela yeziyalezo zakho

ukuba ngikhulume ngezimangaliso zakho.

₂₈Umphefumulo wami uyakhala ngosizi;

ngivuse ngokwezwi lakho.

₂₉Susa kimi indlela yamanga,

ungiphe ngomusa umthetho wakho.

₃₀Ngikhethile indlela yeqiniso;

izahlulelo zakho ngizibekile phambi kwami.

₃₁Ngibambelele ebufakazini bakho;

ungangijabhisi, Jehova.

₃₂Ngiyakugijima ngendlela yemiyalo yakho,

ngokuba uyakwandisa inhliziyo yami.

₃₃Ngitshengise, Jehova,

indlela yezimiso zakho;

ngiyakuyigcina kuze kube sekupheleni.

₃₄Ngiphe ingqondo, ukuze ngiqaphele umthetho wakho,

ngiwugcine ngenhliziyo yami yonke.

₃₅Ngihambise endleleni yemiyalo yakho,

ngokuba ngiyathokoza ngayo.

₃₆Thobisela inhliziyo yami ebufakazini bakho,

kungabi sekuhaheni.

₃₇Phendula amehlo ami,

angaboni okuyize,

ungiphilise endleleni yakho.

₃₈Yigcwalise encekwini yakho inkulumo yakho

eyenza ukuba wesatshwe.

₃₉Dlulisa isihlamba engisesabayo,

ngokuba izahlulelo zakho zinhle.

₄₀Bheka, ngiyalangazelela iziyalezo zakho;

ngiphilise ngokulunga kwakho.

₄₁Mawuze kimi umusa wakho, Jehova,

insindiso yakho ngokwezwi lakho.

₄₂Khona ngiyakumphendula ongithukayo,

ngokuba ngiyalethemba izwi lakho.

₄₃Ungalisusi emlonyeni wami ngokupheleleyo izwi leqiniso,

ngokuba ngiyethemba izahlulelo zakho.

₄₄Khona ngiyakuwugcina njalo umthetho wakho,

yebo, kuze kube phakade.

₄₅Ngiyakuhamba endaweni ebanzi,

ngokuba iziyalezo zakho ngiyazifuna.

₄₆Ngiyakukhuluma ngobufakazi bakho phambi kwamakhosi,

ngingajabhi.

₄₇Ngiyakuthokoza ngemiyalo yakho engiyithandileyo.

₄₈Ngiyakuphakamisela izandla zami kuyo imiyalo yakho engiyithandileyo,

ngizindle ngezimiso zakho.

₄₉Khumbula izwi encekwini yakho

owangipha ithemba ngalo.

₅₀Lokhu kuyinduduzo ekuhluphekeni kwami,

ngokuba izwi lakho lingiphilisile.

₅₁Abazidlayo bangihleka usulu kakhulu,

kepha emthethweni wakho angichezuki.

₅₂Ngiyakhumbula izahlulelo zakho zasendulo, Jehova;

ngiyaduduzeka.

₅₃Ukuvutha kolaka kungibambile ngenxa yababi

abashiya umthetho wakho.

₅₄Zaba yizihlabelelo kimina izimiso zakho

endlini yokugogobala kwami.

₅₅Ebusuku ngikhumbula igama lakho,

Jehova, ngigcina umthetho wakho.

₅₆Lokhu kwaba ngokwami,

ngokuba ngagcina iziyalezo zakho.

₅₇UJehova uyisabelo sami;

ngithi ngiyakugcina amazwi akho.

₅₈Ngincenga ubuso bakho ngenhliziyo yami yonke;

yiba nomusa kimi ngokwezwi lakho.

₅₉Ngizindla ngezindlela zami,

ngiqondisa izinyawo zami ebufakazini bakho.

₆₀Ngiyashesha,

angilibali ukugcina imiyalo yakho.

₆₁Izintambo zababi ziyangizungeza,

kepha angikhohlwa umthetho wakho.

₆₂Phakathi kobusuku ngiyakuvuka ngikubonge

ngenxa yezahlulelo zakho ezilungileyo.

₆₃Ngingumngane wabo bonke abakwesabayo,

abagcina iziyalezo zakho.

₆₄Umhlaba ugcwele umusa wakho, Jehova;

ngifundise izimiso zakho.

₆₅Uyenzele inceku yakho okuhle, Jehova,

ngokwezwi lakho.

₆₆Ngifundise ukuqonda okuhle nokwazi,

ngokuba ngikholwa yimiyalo yakho.

₆₇Ngingakahlupheki ngaduka,

kepha manje sengiyaligcina izwi lakho.

₆₈Umuhle wena, futhi wenza okuhle;

ngifundise izimiso zakho.

₆₉Abazidlayo baqamba amanga ngami;

ngenhliziyo yonke yami ngiyakugcina iziyalezo zakho.

₇₀Inhliziyo yabo injengamafutha ingezwa lutho;

kepha mina ngithokoza ngomthetho wakho.

₇₁Kwangilungela ukuba ngihlushwe,

ukuze ngifunde izimiso zakho.

₇₂Umthetho womlomo wakho muhle

kunezinkulungwane zegolide nezesiliva.

₇₃Izandla zakho zingenzile, zangibumba;

ngiphe ingqondo,

ukuze ngifunde imiyalo yakho.

₇₄Abakwesabayo bayakujabula lapho bengibona,

ngokuba ngethemba izwi lakho.

₇₅Ngiyazi ukuthi izahlulelo zakho zilungile

nokuthi wangilaya ngokuthembeka.

₇₆Umusa wakho mawube yinduduzo encekwini yakho ngokwezwi lakho.

₇₇Ububele bakho mabuze kimi,

ukuze ngiphile,

ngokuba umthetho wakho uyintokozo yami.

₇₈Abazidlayo mabajabhe,

ngokuba bangicindezele,

kungekho sizathu;

kepha mina ngiyakuzindla ngeziyalezo zakho.

₇₉Mabaphendukele kimi abakwesabayo nabaziyo ubufakazi bakho.

₈₀Inhliziyo yami mayiphelele ezimisweni zakho,

ukuze ngingajabhi.

₈₁Umphefumulo wami ulangazelela insindiso yakho;

ngiyalethemba izwi lakho.

₈₂Amehlo ami alangazelela izwi lakho, ngithi:

“Uyakungiduduza nini na?”

₈₃Nginjengemvaba emsini;

izimiso zakho angizikhohlwa.

₈₄Zingaki izinsuku zenceku yakho?

Uzakubahlulela nini abangizingelayo na?

₈₅Abazidlayo bangimbela imigodi,

bona abaphambene nomthetho wakho.

₈₆Yonke imiyalo yakho ithembekile;

bayangizingela ngamanga; ngisize.

₈₇Bacishe bangiqeda emhlabeni,

kepha angishiyanga iziyalezo zakho.

₈₈Ngiphilise ngokomusa wakho,

ukuze ngigcine ubufakazi bomlomo wakho.

₈₉Kuze kube phakade, Jehova,

izwi lakho limi liqinile ezulwini.

₉₀Ezizukulwaneni ngezizukulwane ukuthembeka kwakho kukhona;

wamisa umhlaba; usemi.

₉₁Ngokwezahlulelo zakho kusekhona nanamuhla,

ngokuba konke kuyizinceku zakho.

₉₂Uma umthetho wakho ubungesiyo intokozo yami,

ngabe ngibhubhele ekuhluphekeni kwami.

₉₃Angiyikukhohlwa kuze kube phakade iziyalezo zakho,

ngokuba ungiphilisile ngazo.

₉₄Ngingowakho, ngisindise,

ngokuba ngiyafuna iziyalezo zakho.

₉₅Ababi bahlalele ukungibhubhisa,

kepha ngiyaqaphela ubufakazi bakho.

₉₆Ngibonile ukugcina kokuphelelyo konke,

kepha umthetho wakho ubanzi kakhulu.

₉₇Ngiyawuthanda umthetho wakho kangaka.

Usuku lonke ngizindla ngawo.

₉₈Ngemiyalo yakho ngiyahlakanipha kunezitha zami,

ngokuba inami kuze kube phakade.

₉₉Ngiyaqonda kunabo bonke abangifundisayo,

ngokuba ngizindla ngobufakazi bakho.

₁₀₀Nginokuqonda kunabadala,

ngokuba ngigcina iziyalezo zakho.

₁₀₁Ngiyazinqanda izinyawo zami ezindleleni zonke zokubi,

ukuze ngigcine izwi lakho.

₁₀₂Ezahlulelweni zakho angichezuki,

ngokuba wena uyangifundisa.

₁₀₃Amnandi kangaka amazwi akho ekunambitheni kwami;

adlula izinyosi emlonyeni wami.

₁₀₄Ngeziyalezo zakho ngiyathola ukuqonda;

ngalokho ngiyazonda zonke izindlela zamanga.

₁₀₅Izwi lakho liyisibani ezinyaweni zami

nokukhanya endleleni yami.

₁₀₆Ngifungile;

ukulonda izahlulelo zakho ezilungileyo ngakugcina.

₁₀₇Ngiyahlupheka kakhulu;

Jehova, ngiphilise ngokwezwi lakho.

₁₀₈Jehova, yamukela iminikelo yesihle yomlomo wami,

ungifundise izahlulelo zakho:

₁₀₉Umphefumulo wami usesandleni sami njalo;

nokho umthetho wakho angiwukhohlwa.

₁₁₀Ababi bangibekele ugibe,

kepha angiduki eziyalezweni zakho.

₁₁₁Ngidlile ifa lobufakazi bakho kuze kube phakade,

ngokuba kuyintokozo yenhliziyo yami.

₁₁₂Ngithobisile inhliziyo yami ukwenza izimiso zakho njalo,

yebo, kuze kube sekupheleni.

₁₁₃Ngiyabazonda abanhliziyo mbili,

kepha umthetho wakho ngiyawuthanda.

₁₁₄Wena uyisiphephelo sami nesihlangu sami;

ngiyethemba izwi lakho.

₁₁₅Sukani kimi nina enenza okubi,

ngokuba ngiyakugcina imiyalo kaNkulunkulu wami.

₁₁₆Ngiphase ngokwezwi lakho,

ukuze ngiphile,

ngingajabhi ngethemba lami.

₁₁₇Ngisekele, ngize ngisindiswe,

ngibheke njalo izimiso zakho.

₁₁₈Uyabadelela bonke abaduka ezimisweni zakho,

ngokuba ubuqili babo buyize.

₁₁₉Uyabalahla bonke ababi bomhlaba njengendiva;

ngalokho ngiyathanda ubufakazi bakho.

₁₂₀Inyama yami iyathuthumela ngovalo ngawe,

ngiyesaba izahlulelo zakho.

₁₂₁Ngiyenza ukwahlulela nokulunga;

unganginikeli kubo abahluphi bami.

₁₂₂Mela inceku yakho kube kuhle;

abazidlayo mabangangicindezeli.

₁₂₃Amehlo ami ayalangazelela insindiso yakho

nezwi lokulunga kwakho.

₁₂₄Yenza encekwini yakho ngokomusa wakho,

ungifundise izimiso zakho.

₁₂₅Ngiyinceku yakho; ngiphe ingqondo

ukuba ngazi ubufakazi bakho.

₁₂₆Kuyisikhathi sikaJehova sokusebenza,

ngokuba bawenz' ize umthetho wakho.

₁₂₇Ngalokho ngiyathanda imiyalo yakho kunegolide,

yebo, kunegolide elicwengekileyo.

₁₂₈Ngalokho ngiyavuma ukuthi imiyalo

yakho yonke ilungile;

ngiyazonda zonke izindlela zamanga.

₁₂₉Ubufakazi bakho buyisimangaliso;

ngalokho umphefumulo wami uyabugcina.

₁₃₀Ukwambulwa kwamazwi akho kuyakhanyisa,

yebo, kuyabaqondisa abangenalwazi.

₁₃₁Ngivula umlomo wami, ngikhefuzela,

ngokuba ngiyalangazelela imiyalo yakho.

₁₃₂Bheka kimi, ube nomusa kimi

njengokufanele abathanda igama lakho.

₁₃₃Qinisa izinyathelo zami ezwini lakho;

makungangibusi nobubodwa ububi.

₁₃₄Ngihlenge ekuhlupheni kwabantu,

ukuze ngigcine iziyalezo zakho.

₁₃₅Yikhanyisele inceku yakho ubuso bakho,

ngifundise izimiso zakho.

₁₃₆Imifula yamanzi iyehlela emehlweni ami,

ngokuba abagcini umthetho wakho.

₁₃₇Wena Jehova ulungile;

izahlulelo zakho ziqotho.

₁₃₈Uyalezile ubufakazi bakho ngokulunga

ngokuthembeka okukhulu.

₁₃₉Ukushisekela kwami kungidlile,

ngokuba izitha zami zikhohliwe amazwi akho.

₁₄₀Izwi lakho licwebile kakhulu;

ngalokho inceku yakho iyalithanda.

₁₄₁Ngimncane, ngidelelekile;

iziyalezo zakho angizikhohlwa.

₁₄₂Ukulunga kwakho kungukulunga okuphakade;

umthetho wakho uyiqiniso.

₁₄₃Ukuhlupheka nosizi kungehlele;

imiyalo yakho iyintokozo yami.

₁₄₄Ukulunga kobufakazi bakho kumi phakade;

ngiphe ukuqonda ukuba ngiphile.

₁₄₅Ngikhala ngenhliziyo yami yonke;

ngizwe, Jehova;

izimiso zakho ngiyakuzigcina.

₁₄₆Ngikhala kuwe, ngisindise;

ngiyakugcina ubufakazi bakho.

₁₄₇Ngiyandulela uvivi lokusa ngikhala;

ngiyethemba amazwi akho.

₁₄₈Amehlo ami ayandulela imilindo yobusuku

ukuba ngizindle ngezwi lakho.

₁₄₉Yizwa izwi lami ngokomusa wakho, Jehova,

ungiphilise ngokwezahlulelo zakho.

₁₅₀Bayasondela abalandela ukonakala;

bakude nomthetho wakho.

₁₅₁Wena Jehova useduze;

imiyalo yakho yonke iyiqiniso.

₁₅₂Kudala ngazile ngobufakazi bakho

ukuthi ubusekele kuze kube phakade.

₁₅₃Bheka ukuhlupheka kwami, ungikhulule,

ngokuba angikhohlwa umthetho wakho.

₁₅₄Mela indaba yami, ungihlenge,

ungiphilise ngokwezwi lakho.

₁₅₅Ukusindiswa kukude nababi,

ngokuba abafuni izimiso zakho.

₁₅₆Ububele bakho, Jehova, bukhulu;

ngiphilise ngokwezahlulelo zakho.

₁₅₇Abangizingelayo nabayizitha kimi baningi;

kepha ebufakazini bakho angichezuki.

₁₅₈Lapho ngibona amambuka, ngiyadikibala,

ngokuba awagcini izwi lakho.

₁₅₉Bheka ukuthi ngithanda kangaka iziyalezo zakho, Jehova;

ngiphilise ngokomusa wakho.

₁₆₀Amazwi akho onke ayiqiniso;

zonke izahlulelo zakho ezilungileyo

zimi kuze kube phakade.

₁₆₁Izikhulu ziyangizingela,

kungekho sizathu,

kepha inhliziyo yami iyesaba izwi lakho.

₁₆₂Ngithokoza ngezwi lakho

njengozuza impango enkulu.

₁₆₃Amanga ngiyawazonda, ngiyawenyanya;

umthetho wakho ngiyawuthanda.

₁₆₄Kasikhombisa ngosuku ngiyakudumisa

ngezahlulelo zokulunga kwakho.

₁₆₅Abathanda umthetho wakho banokuthula okukhulu;

akukho sikhubekiso kubo.

₁₆₆Ngiyethemba insindiso yakho, Jehova;

imiyalo yakho ngiyayenza.

₁₆₇Umphefumulo wami uyagcina ubufakazi bakho;

ngiyabuthanda kakhulu.

₁₆₈Ngiyagcina iziyalezo zakho nobufakazi bakho,

ngokuba izindlela zami zonke ziphambi kwakho.

₁₆₉Ukukhala kwami makusondele ebusweni bakho, Jehova;

ngiqondise ngokwezwi lakho.

₁₇₀Ukuncenga kwami makuze ebusweni bakho;

ngihlenge ngokwezwi lakho.

₁₇₁Umlomo wami mawuchichime indumiso,

ngokuba uyangifundisa izimiso zakho.

₁₇₂Ulimi lwami malukhulume izwi lakho,

ngokuba imiyalo yakho yonke ilungile.

₁₇₃Isandla sakho masibe lusizo kimi,

ngokuba ngikhethile iziyalezo zakho.

₁₇₄Ngiyalangazelela insindiso yakho, Jehova;

umthetho wakho uyintokozo yami.

₁₇₅Umphefumulo wami mawuphile, ukudumise;

izahlulelo zakho mazingisize.

₁₇₆Ngiyaduka njengemvu elahlekileyo;

funa inceku yakho,

ngokuba angikhohlwa imiyalo yakho.