Bible Reading Plan – Day 234

₁“Phulaphula, Yakobi sicaka sam,

wena Sirayeli endimnyulileyo,

₂uthi *uNdikhoyo, umenzi wakho

owakubumba esizalweni,

yena owahlala ekunceda:

Ungabi naxhala, Yakobi sicaka sam;

ungumnyulwa wam endimthandayo.

₃Ndowuphokozel' amanzi umhlaba onxaniweyo,

kuqukuqele imilambo enkangala,

inzala yakho ndiyithululele uMoya wam,

intsikelelo yam ifukame phezu kwayo.

₄Iya kuhluma njengengca eludadeni,

njengemingcunube phezu komlambo.

₅Uthile wothi: ‘NdingokaNdikhoyo;’

omnye azibandakanye nendlu kaYakobi;

wumbi agximfizwe ‘Ndikhoyo’ esandleni,

naye azibize ngokuba ngumSirayeli.”

₆UNdikhoyo uKumkani kaSirayeli noMkhululi wakhe,

nditsho uSomandla-onke, uthi:

“Ndingowokuqala;

ndikwangowokugqibela;

akukho Thixo wumbi ngaphandle kwam.

₇Kakade ngubani onjengam? Makavele!

Makakuvakalise kaloku okwênzekáyo

okoko ndamisela abantu bam mandulo.

Makazixele iziganeko ezizayo;

ewe, makazixele!

₈Sanukuphakuzela, musan' ukuxhalaba;

kaloku ndatsho kwamandulo, unangoku ke.

Kambe nina ningamangqina am.

Ngaba kukho Thixo wumbi na?

Ngaba likho na elinye iXhadi?

Unotshe! Mna andizange ndilibone.”

“Zikhumbule ezi zinto kaloku, Yakobi;

kaloku wena usisicaka sam, Sirayeli.

Ndakudalela ukuba ube sisicaka sam;

ndaye ke andisoze ndikulibale.

₂₂Ukundivukela kwakho ndikuphuthisile;

isono sakho sithe shwaka okwenkungu.

Buyela kum; ndim umkhululi wakho.”

₂₃Memelelani ngemihlali, mazulu;

mazidume kaloku neenzonzobila.

Ngqungqani nisine, nani zintaba,

ningqiyaze nani, mithi yamahlathi.

Kaloku uNdikhoyo uzibonakalisile;

ewe, ukukhulule, wena Yakobi;

utyhile amandla akhe ngawe, Sirayeli.

₂₄UMkhululi wakho uNdikhoyo uyathetha;

yena owakubumbayo kwasesizalweni uthi:

“NdinguNdikhoyo uMenzi weento zonke;

ndim owawatwabululayo amazulu,

ikwandim owawolulayo umhlaba;

ewe, zange ndincedwe bani.

₂₅Mna ndizitsho zibhanxeke izanuse,

ndidlale ngabo ke oosiyazi;

ubuciko bezilumko ndiyabutshitshisa,

butsho budule ubutyhakala bazo.

₂₆Ndiyaluphumelelisa udaba lwezicaka zam,

ndizifezekise izihlabo zabathunywa bam.

IJerusalem ndithi isaza kumiwa,

iidolophu zakwaJuda zibuye zakhiwe,

kuvuke izixeko kuloo mabhodlo.

₂₇Mna ndithetha ngezwi kuphela

neelwandle zitsho zome khonkqo.

₂₈Ke kuKoreshi ndithi:

‘Nguwe oza kundalusela;

nguwe oza kufezekisa icebo lam.

Wena uya kuyalela uthi:

“Mayakhiwe iJerusalem.”

Malunga nendlu kaThixo uya kuthi:

“Mazimiswe iziseko zayo.” ’ ”

₁Wenjenje *uNdikhoyo ukuthetha

nomthanjiswa wakhe uKoreshi,

amthe jize ngegunya namandla oloyiso jikelele,

khon' ukuze avuthulule ookumkani,

avulelwe zonke iingcango,

angathintelwa ngamasango esixeko:

₂“Ndim ngokwam oya kukutshayelela;

iinduli neentaba ndosuka ndizilebele,

amasango enziwe ngobhedu ndiwakroboze,

nemivalo yentsimbi ndiyivuthulule.

₃Ndokunika ubutyebi obunqatyisiweyo;

ewe, obugcinwe kwiindawo ezifihlakeleyo.

Uya kutsho uqonde ukuba ndinguNdikhoyo uThixo kaSirayeli;

ngenene ndim okubize ngegama.

₄Ngenxa yesicaka sam uYakobi,

nditsho uSirayeli endimnyulileyo,

ndikubize ngegama,

ndakuthi jize ngesihomo nesithozela,

nangona wena ungandazi nje.

₅“Ndim uNdikhoyo; akukho Thixo wumbi.

Ndiya kukuxhobisa utsho uqine

nangona wena ungandazi.

₆Le nto ndoyenza ukuze baqonde bonke,

bazi emhlabeni wonke jikelele,

baqonde ukuba mna ndinguNdikhoyo,

bazi ukuba akukho Thixo wumbi.

₇Ndikudalile ukukhanya,

kanti ke nobumnyama;

ivela kum impumelelo,

ngokunjalo neshwangusha;

ndim mna Ndikhoyo ozenzayo ezi zinto.

₈Ndokuthobela ulungelelwano lune njengemvula,

ke wona umhlaba uya kulwamkela

kutsho kuthi qhakra inkululeko nobulungisa.

Ndim mna Ndikhoyo unobangela wezi zinto.”

₉Mawoo kulowo uphikisana noMenzi wakhe!

Imbiza nje yomdongwe ingathini ukusuka iphikisane nombumbi wayo?

Ungathini umdongwe ukuthi kumbumbi: “Wenza ntoni kodwa?”

Ingakhalaza na imbiza ithi: “Uliqhithala, mbumbindini”?

₁₀Umntwana angamkhalazela na uyise nonina,

athi: “Nindizalele ntoni?”

₁₁*UNdikhoyo, uThixo oYedwa kaSirayeli,

umdali wakhe, uthi:

“Ningathini na ukundithethisa ngekamva,

nindinkqangise ngabantwana bam,

nide nindixelele ngemfanelo yam?

₁₂Ndim owalenzayo ihlabathi;

ndim owadala uluntu kulo;

ngezam izandla ndawatwabulula amazulu;

ndiyayilawula inyambalala yawo.

₁₃Ngobulungisa bam ndim oxhokonxe uKoreshi;

ndoyityeneneza indlela ayihambayo.

Isixeko sam iJerusalem wobuya asivuse;

uza kubakhulula abantu bam abathinjiweyo.

Loo nto woyenza ngaphandle kwembuyekezo;

kaloku uthethile uNdikhoyo uSomandla-onke.”

₁₄KuSirayeli utsho uNdikhoyo ukuthi:

“Ubutyebi beJiputa neKushe bobákhó,

iingxilimbela zaseSebha ngamakhoboka akho.

Zona ziza kulandela zikhonxiwe;

zokhahlela kuwe zivuma zisithi:

‘Nini kuphela abanoThixo;

akukho wumbi.’ ”

₁₅Thixo kaSirayeli, uyabahlangula abantu bakho;

wena unguThixo ofihlakeleyo.

₁₆Abaqingqi *bemifanekiso basehlazweni;

ngenene ke bona bonyoshoza bephoxekile.

₁₇Ke yena uSirayeli wahlangulwa nguNdikhoyo;

olwakhe usindiso lohlala luhleli;

yena akasoze ahlazeke aphoxeke nanini nanini.

₁₈UNdikhoyo nguye umdali wamazulu;

ngenene nguye oyena-yena Thixo.

Ihlabathi eli labunjwa nguye;

walenza waza walizinzisa.

Akalenzanga laba ngumqwebedu obharhileyo;

walenzela ukuze limiwe luluntu.

Yena ke uthi: “Ndim uNdikhoyo;

akukho Thixo wumbi.

₁₉Ewe, mna andithethanga ekusitheleni,

nenjongo yam andizange ndiyifihle.

Mna andiyixhamlanga indlu kaYakobi,

ndingatshongo nokuba mayindifune enkqantosini.

NdinguNdikhoyo; mna ndiyayithetha inyaniso,

mna ndiyakuvakalisa oko kuqinisekileyo.

₂₀“Qokelelanani, nonke zizwe;

nditsho nina, mingqandanda esindileyo.

Yizani kaloku nizokuxoxa,

bantundini bazizityhakala ezingazi nto,

nina batyethe imifanekiso yomthi,

nina banqula *oothixo abangento yanto.

₂₁Yizani kuxoxa enkundleni;

mabathetha-thethane abamangalelwa.

Ngubani owayixela kwamandulo le nto?

Ngubani owayivakalisa ingekenzeki?

Asindim na Ndikhoyo?

NdinguThixo osindisayo, olilungisa;

ngaphandle kwam akukho Thixo.

₂₂“Khangelani kum nisindiswe,

nina zizwe zehlabathi liphela.

Kaloku ndim uThixo, akukho wumbi.

₂₃Ngenene ndiyafunga,

yaye esam isifungo sinyanisekile;

ewe, sona soze siguquke:

Zonk' iintlanga zokhahlela kum,

zifunge ukuba zondithobela.

₂₄Zovuma zithi: ‘KukuNdikhoyo kuphela ukuzuzwa kosindiso namandla.’ ”

Ke bona abamthiyileyo bohlazeka.

₂₅Kodwa ngenxa kaNdikhoyo yonk' inzala kaSirayeli yogwetyelwa

ize imdumise.