Bible Reading Plan – Day 141

₁Ukuncoma isityhakala ngumhlola onjengokuba kusuke kukhithike ehlotyeni,

okanye kune imvula ngexesha lokuvuna.

₂Isishwabulo kungekho sizathu asiphumeleli;

sifana nokundanda kwamahlankomo neenkonjane ezingahlali phantsi.

₃Ihashe liyabethwa, ke yona idonki ilawulwa ngomkhala,

kanti ke sona isinyabi sivuswa ngentonga.

₄Sukuphendulana nesiyatha,

hleze nawe lo uzibhaqe sewufana naso.

₅Xa umntu ebuza umbuzo wobudenge mlinganisele,

hleze azicingele ukuba usisilumko.

₆Ukuthemba isidenge somthunywa kukuzenzakalisa

nqwa nokuzinqumla imilenze.

₇Iqhalo emlonyeni womntu ongaqondiyo

lifana nomlenze ojingayo wesiqhwala.

₈Ukuncoma isityhakala

nqwa nokubophelela ilitye *kwinkwitshi.

₉Iqhalo emlonyeni wesiyatha

nqwa nesebe elinameva esandleni senxila.

₁₀Umntu oqesha isidenge okanye nabani na odlulayo akanankathalo,

ufana nejoni elidubula nje nabani na.

₁₁Umntu ophinda-phinda into yobudenge

nqwa nenja ebuyela emhlanzweni wayo.

₁₂Akunani kwaisityhakala

kunomntu osisilumko kwawakhe amehlo.

₁₃Ivila lithi: “Kukho ingonyama endleleni!

Ewe, ingonyama ihla inyuka ezitalatweni.”

₁₄Oku kocango oluvula luvaleke kwiihenjisi oluxhonywe kuzo

linjalo ivila ukuqika-qikeka emandlalweni walo.

₁₅Ivila liyakha esityeni,

kodwa linqene ukufaka emlonyeni.

₁₆Umntu olivila usisilumko kwawakhe amehlo;

kuye ngathi ungaphezulu nakumadoda asixhenxe akwaziyo ukuphendula ngengqiqo.

₁₇Umntu ogxuphuleka kwiingxabano zabanye

ufana nomfo osuka athi nqaku inja ngeendlebe.

₁₈Ufana negeza elidubula ngeentolo zomlilo

₁₉umntu okhohlisa ummelwane wakhe aze ajike athi: “Hayi, bendiqhula nje.”

₂₀Zakuphela iinkuni uyacima umlilo.

Xa kungekho mntu uphixanisayo kuyaphela ukungevani.

₂₁Ziinkuni ezivuthisa umlilo kwanjengokuba iintlantsi ziwavuthisa amalahle;

ukwanjalo ke nomntu onochuku ukuphembelela ingxabano.

₂₂Amazwi omntu ohlebayo anencasa;

abantu basuka bawathi bimbilili.

₂₃Amazwi alalanisayo efihla inkohlakalo

nqwa nesitya somdongwe esigqunywe ngesiliva ngaphandle.

₂₄Umntu onentiyo usenokuyifihla ngendlela athetha ngayo,

kodwa ngaphakathi abe esabambelele enkohlakalweni.

₂₅Ewe, walumkele loo mazwi akhe amnandi,

kuba intliziyo yakhe iyaphuphuma ngamanyondololo.

₂₆Nokuba angayifihla intiyo yakhe ngenkohliso,

kodwa inkohlakalo yakhe yona iya kudandalaza esidlangalaleni.

₂₇Umntu owomba umngxuma kweyela kwayena kuwo.

Lowo uqengqa ilitye losuka ligubungele kwayena.

₂₈Umntu onolwimi uyabathiya abo abenzakalisayo;

umntu okhohlisayo udala intshabalalo.

₁Musa ukuqhayisa ngengomso,

kuba akuyazi loo mini ukuba iya kukuphathela ntoni na.

₂Yeka ibe ngomnye okuncomayo, ingabi ngowakho umlomo;

ewe, mayibe ngowasemzini, kungaphumi emilebeni yakho.

₃Amatye nesanti ngumthwalo onzima;

kodwa kona ukucatshukiswa sisityhakala luxanduva olungaphezulu.

₄Umsindo unenkohlakalo, ingqumbo sisiphango;

kodwa ke akakho onokumelana nobukhwele.

₅Akunani kwaisiluleko esisekuhleni

kunothando olufihlwayo.

₆Isihlobo sinyanisekile noba singade sikwenzakalise;

siyakugqitha ukwangiwa kaninzi lutshaba.

₇Umntu ohluthayo akabukhathalele nobusi,

kanti ke olambayo ukufumana kunencasa nokutya okukrakrayo.

₈Umntu okude nekhaya

unjengentaka elahlekene nendlu yayo.

₉Amafutha neziqholo zonwabisa intliziyo;

ke lona ulonwabo oluzuzwa kumhlobo ziingcebiso ezinyanisekileyo.

₁₀Ungaze wahlukane nezihlobo zakho, ungazilibali nezakowenu.

Xa usengxakini sukubalekela kumntakwenu –

isenokuba ngummelwane osondeleyo onokukunceda ngaphezulu komntakwenu okude.

₁₁Yoba luvuyo kum, mfo wam, ukuba uthe waba sisilumko;

ndotsho ndibe nako ukubaphendula abo bandigxekayo.

₁₂Umntu ondwebileyo uthi akuyibona ayicezele ingozi,

kanti ke yena ongaqiqiyo uphoseka kuyo enzakale.

₁₃Zithathe izambatho zomntu omele ityala londwendwe;

ewe, bambisa ngazo kuba umele umntu wasemzini.

₁₄Umntu okhahlela ummelwana wakhe ngemibuliso kwasekuseni

kusenokuba ngathi

uyamshwabulela.

₁₅Umfazi osoloko eqhwaya ingxabano

ufana namathontsi emvula engumvimbi.

₁₆Unjengomoya wona ungenakunqandwa,

nqwa namafutha wona angenako ukufunjathwa.

₁₇Iintsimbi ziyalolana;

ngokunjalo ke nezihlobo ziyakhuthazana.

₁₈Umntu owukhathaleleyo umthi womkhiwane uyawafumana amakhiwane,

nomntu oyibusayo inkosi yakhe uya kuwongwa.

₁₉Umfanekiso womntu emanzini ubonakalisa inkangeleko yakhe;

ngokunjalo nentliziyo yomntu ibonakalisa into ayiyo.

₂₀Ingcwaba nelabafileyo alize lihlúthe;

akwanjalo namehlo omntu.

₂₁Isiliva ivavanywa ngokuyinyibilikisa embizeni;

igolide ivavanywa ngokuyinyibilikisa kwiziko lomlilo;

ke yena umntu uvavanywa ludumo alufumana ebantwini.

₂₂Nokuba ungade usingqushe kunye nombona isityhakala,

soze ubukhuphe ubutyhakala baso.

₂₃Qinisekisa ukuba uyayazi imo yemfuyo yakho,

uyaluse ngononophelo imihlambi yakho.

₂₄Kaloku ubutyebi obu yinto edlulayo,

nesithsaba sobukhosi asihlali sihleli kwizizukulwana ngezizukulwana.

₂₅Xa uyisikile ingca, wayenza ifulu,

lo gama enye isaqala ukuntshula,

nditsho xa utyani lwasezintabeni luhlanganisiwe,

₂₆impahla yokunxiba ungayenza ngoboya beegusha,

futhi uthengise iibhokhwe, ufumane ixabiso lentsimi.

₂₇Kwezi ziseleyo unganako ukusenga uyondle intsapho yakho,

ude uzibonelele nezicakazana zakho.

₁Umntu okhohlakeleyo ubaleka kungekho mntu umsukelayo;

ke wona amalungisa anobuganga njengeengonyama.

₂Xa ilizwe linovukelo baba baninzi abafuna ukuphatha,

kodwa xa kukho ophatha ngengqiqo nolwazi uyazinza.

₃Umfo osweleyo otshutshisa amahlwempu

uyafana nesikhukula esizitshabalalisayo izilimo.

₄Izaphula-mthetho ziyazincoma izikhohlakali,

kambe ke bona abawuthobelayo umthetho bayazichasa izikhohlakali.

₅Abantu abagwenxa ababuqondi ubulungisa;

kanti ke abo bazondelela uNdikhoyo baqonda zonke izinto.

₆Lilungile ihlwempu elihambo ingenabala

ngaphezu komkhohlisi ondlela zimbaxa nokuba usisityebi.

₇Umntwana onengqondo uyawuthobela umyalelo;

ke yena otshomana noongantweni ubaphathela ihlazo abazali bakhe.

₈Umntu ozuza ubutyebi kuba ebolekisa aze axhaphaze abantu ngenzala ayibizayo,

obo butyebi abuqokelelayo busuka bufunyanwe ngumntu wumbi owazelelelayo amahlwempu.

₉Umntu ozivalayo iindlebe zakhe kuwo umthetho kaThixo

kwaumthandazo wakhe uyanyanyeka kuThixo.

₁₀Umntu owexulela amalungisa ekwenzeni ububi uya kweyela kwakuloo mgibe wakhe,

kanti ke bona abamsulwa baya kukudla ilifa okulungileyo.

₁₁Isinhanha silumkile kwawaso amehlo,

kanti ke lona ihlwempu eliqiqayo liyasibona into esiyiyo.

₁₂Xa amalungisa athe aphumelela kuba yimivuyo nemincili,

kodwa ke xa kuthe kwaphakama izikhohlakali abantu bayabaleka bazimele.

₁₃Umntu osifihlayo isono sakhe akabi nampumelelo;

kambe ke yena osivumayo, ahlukane naso, wenzelwa inceba.

₁₄Unoyolo umntu ohlala ezoyikela;

ke yena oqaqadekileyo uhlelwa ziinkathazo.

₁₅Isiphathamandla esikhohlakeleyo, esilawula abantu abangenakuzilwela,

sinjengengonyama egragramayo, okanye ibhere ehlaselayo.

₁₆Umlawuli ongenangqondo uba ngumcinezeli;

ke yena umlawuli oyithiyileyo inzuzo yobuqhetseba uba nexesha elide.

₁₇Umntu ongcungcuthekiswa lityala lokubulala woba ngumsabi ade afe;

makungabikho bani umxhasayo.

₁₈Umntu ohamba ngengqibelelo uyakhuseleka ebomini;

ke yena ondlela zimbaxa uyenzakala ngephanyazo.

₁₉Umntu owalimayo amasimi akhe akasweli kutya,

kanti ke yena osukelana namampunge uvuna ubuhlwempu.

₂₀Umntu othembekileyo uyathamsanqeleka;

kanti ke yena ongxamele ubutyebi akaze abe msulwa.

₂₁Ukujonga ubuso akulunganga;

kodwa ke abanye abantu bangade bone nangenxa yeqhekeza eli lesonka.

₂₂Umntu oligqolo usukelana nobutyebi;

akaqondi ukuba usenokufikelwa bubuhlwempu.

₂₃Omkhalimelayo umntu wothi kamva afumane ukuhlonitshwa

kunalowo untetho ilalanisayo.

₂₄Umntu oxhaphaza uyise nokuba ngunina, kodwa abe esithi: “Akukho nto imbi kuloo nto,”

akahluke nganto kwisikrelemnqa.

₂₅Umntu onyolukileyo uphemba uqhushululu;

kambe ke yena okholosa ngoNdikhoyo uya kuphumelela.

₂₆Umntu ozithembileyo akanangqondo;

kodwa yena ohamba ngendlela yobulumko ukhuselekile.

₂₇Umntu onezinwe kumahlwempu akasweli nto;

ovala amehlo akhe kwiintswelo zawo wohlala eqalekiswa.

₂₈Xa kulawula izikhohlakali abantu bayabaleka bazimele,

kodwa zakutshabalala amalungisa aba nempumelelo.