Bible Reading Plan – Day 140

₁Xa uthe wahlala phantsi ukuba udle nesikhulu,

yaneliswa yiloo nto ibekwe phambi kwakho.

₂Xa ngaba ungumntu otya gqitha

wubambe umqala wakho.

₃Musa ukuzibawela izimuncu-muncu zakhe,

hleze uzibizele ingozi ngazo.

₄Musa ukuziqoba amandla ufunana nobutyebi,

ungaphulukani nengqondo yakho ngenxa yabo.

₅Kaloku ubutyebi busuka buthi shwaka ngephanyazo;

ungáde ucinge ukuba busuke bantshula amaphiko bantinga njengokhozi.

₆Musa ukutya ukudla komntu ovimbayo,

ungazibaweli izimuncu-muncu zakhe.

₇Kaloku yena ngumntu apha osoloko ebala indleko.

Noba angathi: “Yitya, usele,” akathethi loo nto entliziyweni yakhe.

₈Ewe, iya kubuya yonke loo ntwana uyityileyo,

ube uwalahlile naloo mazwi akho okuncoma.

₉Musa ukulahla amazwi akho kumntu osisityhakala;

kaloku uya kubudela ubulumko bamazwi akho.

₁₀Ungaze uwugudlule umlima-ndlela wakudala,

nomhlaba weenkedama musa ukuwohlutha.

₁₁Kaloku uMkhululi wazo unamandla;

nguye oya kubambana nawe ngenxa yazo.

₁₂Zimisele ukuyiphulaphula ingqeqesho,

uyibazele iindlebe yonke into oyifundiswayo.

₁₃Sukuyekelela ukumqeqesha umntwana;

ukuba uyamohlwaya ngoswazi akayi kufa.

₁₄Kaloku ngokumohlwaya umntwana

uhlangula ubomi bakhe ekufeni.

₁₅Mfo wam, ndingonwaba kakhulu

xa ingqondo yakho idlamkile.

₁₆Ewe, ndingatsho ndibe nebhongo

xa ndikuva uthetha izinto ezithe ngqo.

₁₇Sukuziduba intliziyo ngabenzi bobugwenxa;

nto mawuyenze wena kukuhlonela uNdikhoyo maxa onke.

₁₈Xa usenjenjalo ngenene uya kuba nekamva,

nethemba lakho aliyi kunqanyulwa.

₁₉Mfo wam, phulaphula ukuze ube sisilumko;

yigqale indlela oziphatha ngayo.

₂₀Musa ukuvana nabantu abanxilayo;

ngokunjalo nabanyolukileyo bacezele.

₂₁Kaloku wona amanxila nezidla-kudla bayahlwempuzeka,

namathongorha ambatha amadlavu.

₂₂Mntwana wam, mphulaphule uyihlo owakuzalayo,

ungamdeli nonyoko ekwaluphaleni kwakhe.

₂₃Wakuyifumana inyaniso sukuthengisa ngayo;

ewe, sukwahlukana nobulumko, ingqeqesho, kwanokuqonda.

₂₄Unebhongo umzali womntwana olilungisa;

ewe, umntwana osisilumko uligugu kubazali bakhe.

₂₅Ngenene uyihlo nonyoko mabavuye ngawe –

menze abe nemihlali lowo wakuzalayo.

₂₆Yinikezele kum intliziyo yakho, mntwan' am;

indlela endiziphethe ngayo mayibe semehlweni akho.

₂₇Kaloku ihenyukazi ngumhadi onzulu,

nomfazi oziphethe kakubi liqula elimxinwa.

₂₈Ewe, uncathama oku kwesikrelemnqa,

alongeze inani labakrexezi.

₂₉Nguwuphi umntu osezintsizini nonesingqala,

osoloko esezingxwaba-ngxwabeni ekhalaza;

nditsho ofumana enzakale nje ngelize,

umntu ongafik' etyofu-tyofu amehlo?

₃₀Lowo ke ngulo mntu ungafika ejikelezana newayini,

esoloko ezingelana newayini exutyiweyo.

₃₁Inkangeleko ebomvu yewayini mayingakukhangi, noba ingade imenyezele endebeni –

ewe, nditsho seyinambitheka, isihla kamnandi!

₃₂Ekugqibeleni iwayini iluma njengenyoka,

ibinza njengerhamba.

₃₃Ikutsho ubone izinto ezingekhoyo,

ushwaqe ubhude yonk' into.

₃₄Ewe, ikutsho ube ngathi uphakathi elwandle,

ube ngathi ujinga epalini ebamba iseyile yesikhephe.

₃₅Uya kubuza uthi: “Ingathi ndibethiwe nje phofu?

Hayi suka, ndingakhange ndive nje!

Akwaba bendinganako ukuphinda ndiphakame,

khe ndithi nje intwana ndiziqabule!”

₁Musa ukumonela abantu abakhohlakeleyo ngezinto zabo,

ungakunqweneli ukuzibandakanya nabo.

₂Kaloku intliziyo yabo iyila ubundlobongela,

nomlomo wabo uthetha ngokuvusa uqhushululu.

₃Indlu yona yakhiwa ngobulumko,

izinziswe ngengqondo.

₄Lulwazi oluzalisa amagumbi endlu,

itsho ivathiswe ngezinto ezintle nezixabisekileyo.

₅Umfo osisilumko unamandla;

ewe, indoda enolwazi iya isomelela ngokomelela.

₆Phambi kokuba uye emfazweni hlala phantsi ucwangcise kuqala;

uloyiso lungabakho xa unabacebisi abaninzi.

₇Ubulumko yintsokotha kumntu osisiyatha;

yena uyalabalaba xa kuxoxwa kwindibano ngasesangweni.

₈Umntu osoloko eyila ukwenza ububi

uya kwaziwa ngokuba nguSomayelenqe.

₉Amayelenqe esidenge ayafadalala;

ke yena umntu osoloko egxeka abanye uthiyiwe ngabantu.

₁₀Ukuba unamathidala ngamaxesha eenkathazo,

awunawo amandla okujongana nawo.

₁₁Bahlangule abantu abaqweqwediselwa ekufeni;

basindise abo bagxadazelela ekubulaweni.

₁₂Mhlawumbi ungathi wena: “Besingazi nto ngale nto,”

kodwa ke yena uThixo onganqatyelwa nto uyayibona inyaniso –

ukujongile, yaye uyakwazi.

Ke yena uvuza umntu ngokwezenzo zakhe.

₁₃Mfo wam, butye ubusi, kuba bumnandi;

ewe, incindi inencasa emlonyeni wakho.

₁₄Bukwanjalo ukuyola kobulumko:

ukuba uthe wabufumana lotsho liqiniseke ikamva lakho,

nethemba lakho linganqanyulwa.

₁₅Sukufana nesikhohlakali ngokulalela indlu yomntu olilungisa,

nomzi wakhe sukuwonakalisa.

₁₆Noba angawa kangaphi na umntu olilungisa ubuya avuke;

ke zona izikhohlakali zikhubeka zitshabalale.

₁₇Sukuluvuyelela lwakuwa utshaba lwakho,

ungavuyi xa ulubona lukhubeka,

₁₈hleze olo vuyo lwakho lube bububi emehlweni kaNdikhoyo,

awurhoxise umsindo wakhe kulo.

₁₉Sukuvutha ngumsindo ngenxa yabantu abenza ubugwenxa,

ungabamoneli abantu abakhohlakeleyo ngezinto abanazo.

₂₀Kaloku umenzi wobubi akanakamva;

isibane sabantu abakhohlakeleyo siya kucinywa.

₂₁Mntwan' am, mhlonele uNdikhoyo, ngokunjalo nokumkani,

ungadlelani nabavukeli.

₂₂Kaloku bona babhanga ngephanyazo,

ibe ke akukho bani waziyo ukuba botshatyalaliswa nini na nguNdikhoyo okanye ngukumkani.

Yinto embi ukuba umgwebi ajonge ubuso bomntu.

₂₄Xa esuka athi konetyala: “Umsulwa wena,”

abantu bayamthuka, zimgxeke izizwe.

₂₅Kambe ke yena umgwebi omohlwayayo umntu owonileyo

uba nentsikelelo kunye nenkqubela.

₂₆Impendulo ethe gca

nqwa nokuncamisa umhlobo emlonyeni.

₂₇Qala ulungise ishishini lakho, ulime amasimi akho,

emva koko wakhe indlu

yakho.

₂₈Sukuthi kungekho sizathu unike ubungqina obumtshonisayo ummelwane,

okanye ukhohlise ngomlomo wakho.

₂₉Musa ukuthi: “Ndiya kwenza kuye njengoko enzile kum;

ndiya kumenzakalisa ngokwezenzo zakhe.”

₃₀Ndathi ndihamba ndagqitha entsimini yevila;

ewe, ndadlula kwisidiliya somntu ongenangqondo.

₃₁Sasitshone lé elukhuleni, sifuthwe nayinkunzane;

ke lona udonga olwalubiyele lwaludilikile.

₃₂Ndakha ndee nqumama ndawubukela loo mhlola,

ndacinga nzulu ndaza ndafumanisa ukuba

₃₃xa uthe: “Hayi noko, makhe ndithi qwaka, ndithi ntlithi kancinane,

khe ndisonge izandla,

ndiphumle,”

₃₄ubuhlwempu bosuka bukuchwechwele njengomkhuthuzi.

Ewe, ihambo-nzima iza kukuhlasela oku kwendoda exhobileyo.

₂Isihomo sikaThixo siphuhliswa zizinto eziyimfihlakalo;

kambe ke sona isidima sokumkani kukuphengulula imicimbi.

₃Njengokuphakama kwesibhakabhaka nobunzulu bomhlaba,

zikwanjalo ukungabi nakugocagocwa iingcamango zookumkani.

₄Wakuyicwenga isiliva,

nengcibi itsho ikwazi ukuyisebenzisa;

₅akukhiqwa amaphakathi aphuthileyo,

ulawulo lokumkani lutsho ludume ngokuzinza.

₆Xa ukomkhulu musa ukuzigqatsa;

sukuhlala endaweni yezikhulu.

₇Kaloku kubhetele ukuba yena athi: “Nyukela apha,”

kunokuba akususe kwindawo yezikhulu amatshawe ebukele.

₈Sukungxamela enkundleni ngento oyibonileyo,

hleze kuvele omnye umntu nabungqina bumbi,

utsho uhlazeke ke wena.

₉Xa usematyaleni nommelwane wakho

musa ukudiz' imfihlelo oyixelelweyo,

₁₀hleze uvelwe utsho uphoxeke,

kuze ke ukuba negama elibi kwakho kuthane mbende nawe.

₁₁Amazwi afanelekileyo

nqwa neeapile zegolide ezithiwe nca kwisiliva.

₁₂Isilumkiso esiwa kwindlebe evayo

sifana necici legolide nesidanga segolide ecikizekileyo.

₁₃Umthunywa onyanisekileyo kwabo bamthumayo

uhlaziya inkosi yakhe oku kwekhephu ngexa lokuvuna.

₁₄Umntu ozigwagwisa ngokupha omnye isipho angenaso

ufana namafu anomoya angenamvula.

₁₅Umlawuli uyacengeka ngumntu onomonde,

namazwi athambileyo amenza anikezele.

₁₆Wakufumana ubusi butye uzilinganisela,

hleze bubuye wakubutya gqitha.

₁₇Malungaquqi gqitha unyawo lwakho kwammelwana,

hleze akruquke nguwe, akucaphukele.

₁₈Umntu otshonisa ummelwana wakhe ngobungqina obubuxoki

uyingozi nqwa negqudu, umkhonto, okanye utolo.

₁₉Ukuthembela ngomntu ongathembekanga xa usenkathazweni

kufana nezinyo elonakeleyo nonyawo oluqhwalelayo.

₂₀Ukuculela umntu oneenzingo kufana nokumhambisa ze mhla kubandayo,

okanye kunjengokonakalisa isoda ngokuyixuba neviniga.

₂₁Xa ufumana utshaba lwakho lulambile, luphe ukutya;

lwakunxanwa, luphe amanzi.

₂₂Ngokwenjenjalo ke woba uluqhubela enguqukweni,

*noNdikhoyo wokuvuza.

₂₃Umoya wasentla uzisa imvula,

kodwa ke yona intlebendwane iza nengxabano.

₂₄Akunani kwaukuhlala wedwa noba kuphezu kwendlu,

ndaweni yokuhlala ndlwini-nye nomfazi ongunogqwashu.

₂₅Iindaba ezimnandi ezivela kwelikude

zihlaziya oku kwamanzi abandayo emntwini odiniweyo.

₂₆Akoyiswa sisikhohlakali umntu olungileyo

loo nto ifana nequla eligxobhekileyo okanye nomthombo ongcolisekileyo.

₂₇Ukubutya kakhulu ubusi akulunganga;

kukwanjalo ukuhlala uzifunela imbeko.

₂₈Umntu owoyiswayo kukuzilawula usesichengeni

oku kwesixeko esindonga

ziwileyo.