Bible Reading Plan – Day 118

₁Bulelani *uNdikhoyo, ninqule igama lakhe,

nizibalisel' iintlanga ngezintw' asenzele zona.

₂Mombeleleni, mbongeni,

zixeleni izintw' ezimangalisayo asenzele zona!

₃Qhayisani ngegama lakhe;

mabachwayite abo bamnqulayo uNdikhoyo!

₄Lufuneni kuNdikhoyo uncedo;

mfuneni aph' akhoyo ngawo onke amaxesha.

₅Ze nizikhumbule izinto asenzele zona:

imimangaliso ayenzileyo,

nemithetho ayiwisileyo.

₆Nina niyinzala yesicaka sakhe uAbraham,

nilusapho lukaYakobi umnyulwa wakhe.

₇UThixo wethu nguNdikhoyo;

yeyehlabathi lonke imithetho yakhe.

₈Akasokuwulibala naphakade umnqophiso wakhe,

awawenzela izizukulwana ngezizukulwana.

₉Ndixel' umnqophiso awawenza noAbraham,

kwanesifungo asenze kuIsake.

₁₀Kaloku wamnik' ummiselo uNdikhoyo uYakobi,

wamnik' umnqophis' ongasoz' uphel' uSirayeli,

₁₁esithi: “Wena ndokunik' umhlaba waseKanana,

ube sisabelo selifa lakho.”

₁₂Babengabantw' abambalwa nje, bengazelwe nto;

babengabaphambukeli kuphela nje kuloo mhlaba.

₁₃Babebhadula kumazwe ngamazwe;

besuka kolunye ulawulo baye kolunye.

₁₄Kodwa uThixo akavumanga ukuba batsaliswe nzima;

ude wazohlwaya neekumkani ngenxa yabo.

₁₅Watsho esithi: “Ze ningabachukumisi abathanjiswa bam,

ningakhe nibenzakalise abashumayeli bam.”

₁₆Ekubeni evelise indlala elizweni labo uNdikhoyo,

nokutya kwabo wakuphelisa mpela,

₁₇wabathumela uJosefu wabandulela,

wathengiswa waba likhoboka.

₁₈Amaqatha akhe adliswa ngamatyathanga,

waminxwa nasemqaleni ngamakhamandela,

₁₉lada lazaliseka ilizwi awayelithethile,

ilizwi likaNdikhoyo lamngqinela.

₂₀Ikumkani yamhlangula,

umlawuli wezizwe wamkhulula,

₂₁yamenza intloko yomzi wayo,

yamnika igunya lokulawula konke okwayo,

₂₂yamnika iwonga kunamaphakathi ayo,

kwanegunya lokuqeqesha bonke ooceba bayo.

₂₃Naye uYakobi waya eJiputa,

waba ngummi elizweni lakwaHam.

₂₄UNdikhoyo wabanika inzala eninzi abantu bakhe,

wabanika amandla kunababandezeli babo.

₂₅Wawafaka intiyo amaJiputa,

ukuze azikhohlise izicaka zakhe.

₂₆Emva koko uthumele uMosis isicaka sakhe

kunye noAron umnyulwa wakhe.

₂₇Babonakalisa imiqondiso yamandla kaThixo,

benza nemimangaliso eJiputa.

₂₈UThixo wezisa ubumnyama emhlabeni,

kuba engalivanga amaJiputa ilizwi lakhe.

₂₉Amanzi emilambo ajika aligazi,

zafa zaphela nezo ntlanzi zabo.

₃₀Axhuma-xhuma amaxoxo kwelo lizwe,

angena nkqu nasemagumbini ekumkani.

₃₁Watheth' uThixo, kwavela ibubu leempukane,

nebubu lezibawu zalityhutyha lonke elo.

₃₂Kwawa isichotho endaweni yemvula,

kwamenyezel' imiban' eyoyikekayo apho.

₃₃Yavuthuluk' imithi yemidiliya namakhiwane,

yawa yaphela imithi kweli lizwe.

₃₄Watheth' uThixo, kwavel' iinkumbi,

zatsho ngenyambalala yomqikela.

₃₅Zalubhuqa lonk' uhlaza lwalapho,

zayibhuqa yonke imveliso yomhlaba.

₃₆Wawabulala onk' amavela-tanci,

nditheth' onke amazibulo amaJiputa.

₃₇Wawakhupha amaSirayeli,

emka epheth' igolide nesiliva,

kungekho namny' ubikwa hlaba kubantu bakhe.

₃₈Avuya amaJiputa akumka amaSirayeli;

kaloku ayeselewoyika.

₃₉Wabasitha ngelif' emini abantu bakhe,

wabakhanyisela ngesithatha somlil' ebusuku.

₄₀Bakucel' ukutya kwavel' izagwityi,

wabanik' isonka esivel' ezulwini, bahlutha.

₄₁Wavul' iliwa, ampompoza amanzi,

kwavel' imisinga, yacand' enkangala.

₄₂Kaloku wakhumbula isithembiso sakhe,

esingumnqophiso wakhe noAbraham isicaka sakhe.

₄₃Wabandulula bechwayitile abantu bakhe,

abanyulwa bakhe behamba besombela.

₄₄Wabanika amazwe ezinye izizwe,

basixhamla isiqhamo sokubila kwazo,

₄₅khon' ukuze bayithobel' imithetho yakhe,

bagcine nemiyalelo yakhe.

Makabongwe uNdikhoyo!

₁Mbongen' *uNdikhoyo!

Bambani ngazibini kuba ulungile uNdikhoyo.

Kaloku izibele zakhe ziya kuhlala zikho ngonaphakade.

₂Ngubani onokubalisa ngezenzo ezidumileyo zikaNdikhoyo;

ingubani onokumbonga ngokufezekileyo?

₃Hay' uyolo lwabo bathobela imithetho yakhe;

nditheth' abo bahlala besenza okulungileyo.

₄Uzundikhumbule, Ndikhoyo, xa ubonelel' abantu bakho;

ungandishiyi, Ndikhoyo, xa ubahlangulayo.

₅Nam maze ndiyibon' inkqubela yabanyulwa bakho,

ndize ndivuye kunye nabantu bakho,

ndilixhamle ibhongo neqhayiya labantu bakho.

₆Nathi sone njengookhokho,

sikwenzile ukungcola nobubi.

₇Xa babeseJiputa oomawokhulu

zange bazinanze izenzo zakhw' ezidumileyo;

bazilibala izibele zakho,

basuka bamvukel' uPhezukonke kuLwandl' oluBomvu.

₈Kodwa wabahlangula uNdikhoyo ngenxa yegama lakhe,

khon' ukuze bawaqonde amandla akhe.

₉Wawis' izwi, lwaza loma qoko uLwandle oluBomvu;

wabaweza kuloo nzonzobila,

banga bahamb' enkangala.

₁₀Wenjenjal' ukubakhulula esandleni sotshaba;

wabahlangula kubabandezeli babo.

₁₁Zagutyungelwa ngamanzi iintshaba zabo,

akwasinda namnye kuzo.

₁₂Bandul' ukuziqonda ke izithembiso zikaNdikhoyo,

baza badomboza betyibela ngemibongo.

₁₃Kwakamsinya bazilibala izintw' abenzele zona,

benza ukuthanda kwabo bengajonge cebiso kuye.

₁₄Entlango bangenwa kukubawa,

baza bamlinga uThixo kuloo nkangala.

₁₅Wabenzela izicelo zabo,

kodwa wabathumela ngobhubhani wesifo.

₁₆Bammonela uMosis apho entlango,

nditsho naso isicaka sikaNdikhoyo uAron.

₁₇Wavuleka wona umhlaba waginya uDatan,

wagqumelela uAbhiram kunye neqela lakhe.

₁₈Kwagqabhuk' umlilo phakathi kwabo,

awabhuq' onk' amatshijolo amalangatye.

₁₉Babumba ithole eHorebhe,

baza banqula kwaloo mfanekiso bawenzileyo.

₂₀Ngale ndlela isihomo sikaThixo

basinika umfanekiso wenkomo, into edla utyani.

₂₁Bamfulathela uMsindisi wabo,

kanye lo wabenzela izinto ezintle eJiputa.

₂₂Hay' ubukhulu bezinto abenzela zona kwelakwaHam;

hay' ukukhwankqisa kwemimangaliso kuLwandl' oluBomvu!

₂₃Yiyo ke loo nto athe nge-ebabhangisile uThixo

ukuba uMosis isicaka sakhe wayengabamelanga,

athibaz' ingqumbo kaThixo bangatshabalali.

₂₄Balicekisa ilizwe elihle kakhulu,

kuba babengazikholelwa izithembiso zikaThixo.

₂₅Babehlala ezintenteni bekrokra,

bengawuthobeli umyalelo kaNdikhoyo.

₂₆Wamis' isibhozo efung' esithi

wobayeka bafel' aph' enkangala,

₂₇ize inzala yab' ayichitha-chithe phakathi kweentlanga,

ibe ziintsalu apho kumazw' asemzini.

₂₈Basuka bazibandakanya nabanquli bakaBhali wasePehore,

batya nokutya kwamadini *ezithixo.

₂₉Bamcaphukisa uNdikhoyo ngezenzo zabo,

kwabakho ubhubhani wesifo phakathi kwabo.

₃₀Waphakama wabangxengxezela uPineyasi,

saza sathomalala isibetho eso.

₃₁Ngale nto ke wabalelwa kumalungisa,

wahlala ekhunjulwa izizukulwana ngezizukulwana.

₃₂Nangasemithonjeni yeMeribha bamqumbisa uNdikhoyo,

waba sengxakini uMosis ngenxa yabo.

₃₃Bamcaphukisa uMosis

ngangokuba wada wathetha amazwi angemahle konke.

₃₄Abazange bazitshabalalise iintlanga

njengoko babeyalelwe nguNdikhoyo.

₃₅Basuka bendiselana nazo,

bafunda namasiko azo.

₃₆Banqula izithixo abantu bakaThixo,

nto leyo ke yaba ngumgibe wabo.

₃₇Babinga oonyana neentombi zabo,

besenzela iindimoni amadini.

₃₈Baliphalaz' igaz' elingenatyala,

nditheth' eloonyana neentombi zabo

ababebanikela kwizithixo zaseKanana;

labubutyadidi ke elo zwe lelo gazi.

₃₉Benjenjalo ke ukuzixabhela;

benjenjalo ukuzenyelisa bamfulathela uThixo.

₄₀UNdikhoyo wavutha ngumsindo,

waza wabacaphukela abantu bakhe.

₄₁Wabayekela ezandleni zeentlanga,

baba phantsi kolawulo lweentshaba zabo.

₄₂Zababandezel' iintshaba,

bahlala kabuhlungu phantsi kwazo.

₄₃Kwaba kaninzi-ninzi ebahlangula uNdikhoyo,

kodwa bakhetha ukungamva,

beyela zwabha esonweni;

₄₄Kambe ke wabuya wayigqala uNdikhoyo imbandezelo yabo,

wabeva bakuzibika kuye;

₄₅wazikhumbula nezithembiso zakhe kubo,

waba nenceba ngenxa yothando lwakhe olukhulu,

₄₆wabatsho basizelwa ngababandezeli babo.

₄₇Sisindise, Ndikhoyo, Thixo wethu,

siqokelele phakathi kweentlanga, ukuze sikubulele,

silibonge igama lakho elingcwele.

₄₈Makabongwe uNdikhoyo uThixo kaSirayeli

kususela ngoku kude kube nini-nini!

Bonk' abantu mabathi: “Huntshu!”

Mawubongwe wena, Ndikhoyo.