Bible Reading Plan – Day 109

₁Awu, Thixo, ndiyatarhuzisa!

Ngenxa yezibele zothando lwakho,

nobubanzi benceba yakho, nceda uzicime iziphoso zam!

₂Ndihlambe ndahlukane nabo bonke ububi;

ndenze ndibe nyulu, ndingabi nasono!

₃Kaloku ndiyabuvuma ubugwenxa bam;

isono sam sindithukuthezele.

₄Eyona ngcambu yesono sam kukuba ndone wena kanye,

ndenze into ekuhlazisayo.

Ngoko ke undigwebe ngakhona;

isigwebo sakho sifanelekile.

₅Kaloku ndaba gwenxa kwasekuzalweni;

ndaba ngumoni ndisakhawulwanje nguma.

₆Ewe, wena uthanda umntu onyanisekileyo;

ndincede undiphe ingqiqo enzulu.

₇Ndihlambe undicokise ndicoceke;

ndihlambe ndibe mhlophe qhwa,

ndibe ngaphezu kwalo nekhephu.

₈Mandiphuphume luvuyo nemincili;

nakuba undikrobozile nje, mandonwabe.

₉Bufihle ubuso bakho ezonweni zam,

ubususe bonke ubugwenxa bam.

₁₀Ewe, Thixo, intliziyo yam yidale ngokutsha, ibe nyulu;

wuhlaziye umoya wam, ndikhaliphe.

₁₁Musa ukundigxotha, Nkosi yam;

ungamthathi uMoya wakho kum.

₁₂Ndibuyisele uvuyo losindiso lwakho,

undixhase ngoMoya wakho, khon' ukuze ndikuthobele.

₁₃Ke, bona aboni ndiya kubafundisa imiyalelo yakho,

baguquke, beze kuwe.

₁₄Awu, Thixo, ndihlangule ekufeni!

Nguwe, Thixo, ondisindisayo.

Ke mna ndiya kudanduluka,

ndicule ngokulunga kwakho.

₁₅Vula imilebe yam, Nkosi,

khon' ukuze ndikubhengeze ngawo umlomo wam.

₁₆Kaloku wena akunanze mibingelelo.

Ndingafanelana ndisenza amadini atshiswayo;

akangekwanelisi wena.

₁₇Umbingelelo owufunayo, Thixo, yintliziyo ethobekileyo.

Intliziyo ethobekileyo neguqukayo, wena Thixo, akuyideli.

₁₈Khawuncede uyivelele iZiyon, uyilungiselele;

khawuphinde uzakhe iindonga zeJerusalem.

₁₉Uya kwandula ke waneliswe yimibingelelo efanelekileyo;

amadini atshiswayo, nditsho natshiswa ephelele.

Kobingwa neenkunzi eqongeni lakho lamadini.

₁Uqhayisela ntoni ngobubi, gorhandini,

usithi inceba kaThixo iphezu kwakho?

₂Usoloko uzungula ukutshabalalisa.

Ulwimi lwakho alubukhali, yintshengeca!

Uhlala uyila ubutshijolo.

₃Uthanda okubi kunokulungileyo;

uthe phithi bubuxoki endaweni yenyaniso.

₄Hayi ke bethu umntu onolwini!

Uyakuthanda ukuphixanisa.

₅Ke yena uThixo uya kukudiliza kuthi tu;

uya kukuthi xhakamfu, akukhuphe endlwini yakho;

uya kukuncothula umke ezweni labaphilayo.

₆Akuyibona le nto amalungisa omangaliswa ahlekise athi:

₇“Nanko ke umntu ongazange akholose ngoThixo,

owasuka wakholosa ngobutyebi,

waphumelela ngobutshijolo!”

₈Ke mna ndinjengomnquma oyokoyoko;

ndihlala phakathi endlwini kaThixo.

Ndihlala ndikholose ngezibele zothando lukaThixo;

kuya kude kube ngunaphakade.

₉Ngenxa yesi senzo sakho, Thixo, ndiya kukudumisa njalo-njalo.

Ndithembele kuwe kuba ulungile.

Ewe, ndiya kukubhengeza phakathi kwâbo bakuthandayo.

₁Iziyatha zithi akukho Thixo ngandawo.

Zonakele, futhi zenza amasikizi;

akukho ulungisayo kuzo.

₂Ke yena uThixo ubabukele abantu;

uhlel' ezulwini efuna ukuqonda

ukuba ngaba sikho na isilumko,

nditsho ofuna ukunqula uThixo.

₃Kambe ke bonke bemkile; xa bebonke bonakele;

kubo akakho olungisayo; nditsho nokuba abe mnye.

₄Abanangqondo na abakhohlakeleyo,

abo baxhaphaza amawethu, ngathi batya isonka,

bengamnquli nokumnqula uThixo?

₅Baya kunkwantya ngendlela engaziwa mntu.

Kaloku uThixo uyawasarhaza amathambo âbo bamchasayo.

Baya kuhlazeka kuba uThixo ubalahlile.

₆Akwaba ingavela eZiyon inkululeko yamaSirayeli!

Akuba uThixo eyibuyisele inkqubela yabantu bakhe,

abakwaYakobi baya kugcoba, achulumache amaSirayeli.

₁Ngegunya lakho ndisindise, Thixo;

ngamandla akho undikhulule.

₂Wuphulaphule umthandazo wam,

sive isikhalo sam, Thixo.

₃Iintlanga ziyandihlasela;

izikhohlakali zizungula ukundibulala.

Zona azimkhathalele nganto uThixo.

₄Kodwa ke umncedi wam nguThixo,

umxhasi wam nguMhlekazi.

₅Ngamana wayibuyisela kwasezintshabeni zam inkohlakalo yazo.

Zibhangise, kuba uthembekile wena.

₆*Ndikhoyo, ndilangazelela ukukwenzela umbingelelo.

Ndiyabulela kuwe, kuba wena ulungile.

₇Kuzo zonke iingxaki zam wena undihlangule;

ukoyiswa kweentshaba zam ndikubone ngamehlo.

₁Ndincede uwubekele iindlebe umthandazo wam, Thixo.

Ndibhenela kuwe; sukundifulathela.

_2-3Sabela, undiphendule.

Kaloku iinkathazo zindongamele.

Ngenxa yezisongelo zeentshaba zam ndididekile;

ingcinezelo yabangendawo indixinile.

Bafumba inkxwaleko phezu kwam;

futhi bandingcikiva ngolunya.

₄Ndiyajijitheka ngaphakathi;

izoyikiso zokufa zindivingcele.

₅Andoyiki ndiyagubha!

Ukunkwantya kuyandirhwaqelisa.

₆Ndide ndithi: “Akwaba bendinamaphiko njengehobe!

Bendiya kuntinga ndiye kuphumla kude lee.

₇Ewe, bendiya kubethwa ngumoya,

ndihlale entlango.

₈Ndandiya kukhawuleza ndizifunele umqolomba,

ndiyizimele kuyo imimoya ebhudlayo.”

₉Nqanda, Mhlekazi!

Waphuthise amacebo abo!

Kubhidanise ukuthetha kwabo, bangevani,

kuba ndibona ugonyamelo nesidube-dube esixekweni.

₁₀Imini nobusuku bajikeleza ezindongeni zesixeko;

siyaphuphuma bububhoja nobutshijolo.

₁₁Ewe, siphuphuma intshabalalo;

ezindaweni zeembutho yingcinezelo nobukrelemnqa.

₁₂Kambe ke andingcikivwa lutshaba.

Ukuba ibilulo bendinganyamezelayo.

Asinguye ondichasayo lo undiqholoselayo,

okanye bendingamphephayo.

₁₃Koko nguwe, ntangam, wena gxa wam,

mhlobo wam osenyongweni.

₁₄Fudula sisidl' imbadu kunye;

endlwini kaThixo sasikunye, singumtya nethunga.

₁₅Ngamana zahlaselwa kukufa iintshaba zam.

Ewe, ngamana zehlela kwelabafileyo zihleli.

Koloku amakhaya azo aqhelene nobubi.

₁₆Kambe ke ndibhenela kuThixo.

Ewe, *uNdikhoyo uya kundihlangula.

₁₇Kusasa emini nangokuhlwa

ndithiwe mbende ngumva-ndedwa;

saye ke isililo sam sinyukela kuye,

futhi ke uza kundiphulaphula.

₁₈Yena uza kundikhulula,

ndingenawo nowempumlo,

kweli dabi ndikulo,

kwezingaka zona iintshaba.

₁₉Ewe, uThixo owaba sesihlalweni kwamandulo uza kusabela;

waye ke eya kuzibhukuqa.

Kaloku zona aziguquki, zingamkhathalele noThixo.

₂₀Ewe, obefudula engugxa wam

suka wavukela izihlobo zakhe,

wasaphula isithembiso sakhe.

₂₁Yena wayethetha kamnandi,

kodwa intliziyo yona ifukam' inkohlakalo.

Amazwi akhe ayelalanisa,

kodwa engebukhali, eyintshengeca!

₂₂Iingxaki zakho ziphose kuNdikhoyo;

yena uya kukuxhasa, akayi kuze aliyekele ilungisa.

₂₃Kambe ke, Thixo,

uya kubeyelisela enzonzobileni abangendawo,

ababulali namatshijolo,

bengekagqibi nesiqingatha sobomi.

Ukanti ke mna ndiya kukholosa ngawe.

₁Awu, Thixo, velana nam, kuba iintshaba ziyandihlasela;

maxa onke ziyanditshutshisa.

₂Ewe, ndixinekile yintshutshiso yotshaba;

yinyambalala abahlaseli abaqholosayo.

₃Ndakuxineka ndikholosa ngawe.

₄UThixo olizwi ndilidumisayo

ndikholosa ngaye ndingenadyudyu.

Soze andenze nto umntu.

₅Iintshaba zam ziyaphixanisa;

zasoloko ziyila amacebo okundilimaza.

₆Ziphum' izithuba, ziyandilalela;

zithene mbende nam.

Kaloku ziyandizungula.

₇Babuyekeze ngenxa yezenzo zabo, Thixo;

ngamana wabakhahlela phantsi ungenalusizi.

₈Uyakubona ukubhadula kwam,

neenyembezi zam uyazibona.

Kaloku uyazibhala ezi zinto.

₉Mhla ndabhenela kuwe iintshaba ziya kuphethuka.

Ndotsho ndiqonde ukuba uThixo ungakum.

₁₀UThixo olizwi ndilidumisayo,

*uNdikhoyo olizwi ndilidumisayo,

₁₁ndokholosa ngaye ndingenadyudyu.

Soze andenze nto umntu.

₁₂Ewe, Thixo, ndozifezekisa izithembiso zam,

ndenze umbingelelo wokukubulela;

₁₃kuba undihlangule ekufeni,

undisindise ekoyisweni,

ukuze ndibe phambi koThixo,

ndidle ubomi njalo-njalo.

₁Khawube nenceba uvelane nam, Thixo;

kaloku igwiba lam nguwe.

Ndizimela kuloo maphiko akho zide zidlule iinkqwithela.

₂Ndibhenela kuThixo uPhezukonke,

kuThixo ongenakundiyekela,

₃eve esezulwini andihlangule,

abahlazise abo bandixobongayo.

Ngokuthembeka kwakhe uThixo,

ngokunjalo nangezibele zothando lwakhe,

yena uya kuphendula.

₄Ndiphahlwe ziingonyama ezibaqwengayo oonyana babantu.

Zisineke ngeengxavula ezingathi yimikhonto neentolo;

zitsho ngeelwimi ezilencayo.

₅Awu, Thixo, zimaseka phezulu esibhakabhakeni;

isidima nesihomo sakho masibe phezu kwehlabathi jikelele.

₆Bandithiyela ngezabatha; ndatsho ke ndaminxeka.

Bandimbela umwonyo; suka kweyela kwabona.

₇Awu, Thixo, ndizimisele ngokupheleleyo;

ewe, ngenene, andithandabuzi;

ndiza kumemelela nditsholoze!

₈Awuhoyi na, mphefumlo wam?

Ndosuka ndiqubul' ihapu nekatala;

ewe, ndovuka xa kumpondo zankomo.

₉Ndiya kukuncoma phakathi kweentlanga, Nkosi;

ewe, ndokudumisa naphakathi kwezizwe.

₁₀Izibele zakho zibalasele ezulwini;

ukuthembeka kwakho kurhec' amafu.

₁₁Awu, Thixo, zimaseka esibhakabhakeni;

isidima nesihomo sakho masibe phezu kwehlabathi jikelele!