Bible Reading Plan – Day 101

₁Hayi inyhweba yomntu ongahambiyo ngecebo labantw' abagwenxa,

ongahambiyo ekhondweni lamatshijolo,

umnt' ongadlelaniyo nabaphoxisayo.

₂Lowo wonwatyiswa yimiyalelo *kaNdikhoyo,

ayetyise emini nasebusuku.

₃Unjengomth' otyalwe ngasemijelweni yamanzi,

umth' ovelisa iziqhamo ngexesha leziqhamo,

umth' omagqabi angasoz' abune.

Ewe, konk' akwenzayo umnt' onjalo kuyaphumelela.

₄Àbanjalo kambe bona abantw' abagwenxa;

bona banjengomquq' ophetshethwa ngumoya.

₅Ngenxa yoko aboni abanako ukujongana nenkundla,

koko bona baya kugxothwa embizweni yamalungisa.

₆Kaloku uNdikhoyo uyalusile indlela yamalungisa;

ke indlela yabakhohlakeleyo iya kudaka.

₁Ngani na izizwe zisenza imbudumbudu nje?

Ngani na abantu besenza amayelenqe azé nje?

₂Ookumkani bemi bume,

neziphathamandla zenza amabhunga

okuvukela *uNdikhoyo nomthanjiswa wakhe, besithi:

₃“Masiziqhawule ezo mbophelelo zabo,

sikhululeke kuloo makhamandela abo.”

₄Lowo ungqendeve esihlalweni sakhe ezulwini uyabahleka;

uNdikhoyo usuka abagxwale.

₅Uya kusuka akhalimele ngomsindo,

abankwantyise ngengqumbo yakhe, athi:

₆“Ndim lo umisele lo kumkani wam phezu kweZiyon,

intaba yam ncakasana.”

₇Ewe, ndivakalisa isibhengezo sikaNdikhoyo esithi:

“Ungunyana wam wena; ndikuzele namhlanje.

₈Cela kum, ndikunike iintlanga zibe lilifa lakho,

namaphethelo ehlabathi abe ngawakho.

₉Wòzilawula ngegqudu lentsimbi,

ùzintlekeze zibe ziingceba oku kwezitya zomdongwe.”

₁₀Ngoko ke, nina bokumkani, lumkani,

nina ziphathamandla zelizwe, yalekani.

₁₁Mkhonzeni ngembeko uNdikhoyo,

nivuye ninokuzoyikela.

₁₂Khahlelani kuye unyana ngentobeko,

hleze aniqumbele nitshabalale endleleni;

kaloku umsindo wakhe uyakhawuleza.

Hayi uyolo lwabo bonke abazimela ngoNdikhoyo!

₁*Ndikhoyo, hay' ukuba ninzi kwazo iintshaba zam!

Ewe, zindivukela zinguMbo nomXesibe.

₂Zide zithi xa zithetha ngam:

“Naloo Thixo wakhe akamhlanguli konke!”

₃Kambe ke, wena Ndikhoyo, ulikhaka lam.

Usisidima sam; undenza ndibe neqhayiya.

₄Ndiyakhala, ndibhenele kuNdikhoyo,

andiphendule esentabeni yakhe eyodwa.

₅Ndiyaphumla, ndilale ubuthongo,

ndibuye ndivuke, kuba uNdikhoyo uyandixhasa.

₆Andiwoyiki amawaka-waka eentshaba,

naxa zindirhawule nje, zindingqonge macal' onke.

₇Khawuphakame ume, Ndikhoyo!

Ndisindise, Thixo wam!

Kaloku nguwe ozoyisayo zonk' iintshaba zam;

ewe, nguwe ozaphul' iimpondo iintshaba zam.

₈Ukuhlangulwa kuvela kuwe, Ndikhoyo;

khawubathamsanqele ke abantu bakho!

₁Ndiphendule ndakukhala kuwe,

Thixo, mlondolozi wamalungelo am!

Wandikhulula embandezelweni yam;

yiba nenceba ke ngoko, uwuve umthandazo wam.

₂Bantundini, koda kube nini na nindihlazisa?

koda kube nini nithand' ilize, niphuthaphuth' ubuxoki?

₃Yazini ke ukuba *uNdikhoyo uyabathand' abantu bakhe;

uyandiva xa ndizibika kuye.

₄Xa niqumbileyo, ze ningoni;

loo nto yetyiseni nithe cwaka kwiimandlalo zenu.

₅Menzeleni amadini alungileyo,

nikholose ngaye uNdikhoyo.

₆Baninzi abalangazelela okulungileyo.

Ndikhoyo, sikhangele ngobubele,

₇usiphe ukuchulumacha okudlula okwâbo

bakufumana ngomdliva wengqolowa newayini.

₈Ndiya kuphumla ngenzolo, ndilale;

nguwe kuphela kaloku, Ndikhoyo, ondinqabisayo.

₁Khawuwabekel' iindlebe amazwi am, *Ndikhoyo,

usigqale isingqala sam.

₂Kuve ukukhala kwam, kumkani wam, Thixo wam,

xa ndithandazayo kuwe.

₃Uyawuva umthandazo wam, Ndikhoyo, kwakusasa:

kwakusasa ndizibika kuwe, ndilinde impendulo.

₄Kaloku unguThixo ongadlelaniyo nobugwenxa;

akukunyamezeli ukungcola phambi kwakho.

₅Akubanyamezeli abantw' abazingcayo;

ubuthiye bonk' ubugqwirha.

₆Uyawatshabalalisa amaxoki; ewe, Ndikhoyo,

abaxhaphi-gazi nabakhohlisi banezothe kuwe.

₇Ke mna ndiya kungena endlwini yakho,

ngenxa yobubele bakho obuncamisileyo,

ndikunqule endlwini yakho ekhethiweyo,

ndikunqule ngembeko ndingcangcazela.

₈Ndikhokelel' ekwenzeni intando yakho, Ndikhoyo.

Kaloku baninzi abandichasayo;

yenze icace phambi kwam indlela yakho.

₉Azinanyani iintshaba zam,

iintliziyo zazo zizel' inkohlakalo;

Zizungula ukutshabalalisa ngentetho elalanisayo.

₁₀Zohlwaye, Thixo;

zirhintyele kwangamacebo azo;

zigxothe ngenxa yezono zazo,

kuba ziphikisana nawe.

₁₁Bayavuya bonke abo bathembela ngawe;

bohlala bechulumacha luvuyo.

Kaloku uyabakhusela abo bakuthandayo;

abo ke banemihlali ngenene.

₁₂Ndikhoyo, uyabathamsanqela abakuthobelayo,

ubafukamele ngobubele ngathi bagqunywe ngekhaka.

₁Uze ungandikhalimeli unomsindo, *Ndikhoyo;

ungandohlwayi uqumbile.

₂Yiba nenceba kum, Ndikhoyo, kuba ndityhafile;

ndomeleze, Mhlekazi, ndiphelelwe.

₃Ndihleli ndinexhala elibi;

koda kube nini kodwa kunje, Ndikhoyo?

₄Yiza, Ndikhoyo, undihlangule;

ndikhulule ngenxa yothando lwakho olungajikiyo.

₅Kaloku akusekho kukukhumbula kwabafileyo;

akukho bani unokukudumisa engcwabeni.

₆Sendide ndatyhafa sisingqala;

ubusuku ngobusuku ndiyantywizisa;

umqamelo umanzi tixi ziinyembezi.

₇Atyhumfutyhumfu amehlo am kukulila;

sekude kwanzima nokujonga.

Ndinje nje nje kungenxa yeentshaba zam.

₈Sukani kum, nonke nina mathol' esihulu-hulu!

Kaloku uNdikhoyo usivile isingqala sam.

₉Ukuvile ukubongoza kwam,

wawuphulaphula umthandazo wam.

₁₀Ziya kudana, zidideke zonk' iintshaba zam;

ziya kujika ngephanyazo, ziphoxekile.

₁Thixo wam, Ndikhoyo, ndithembele ngawe!

Ndihlangule, undisindise kubo bonk' abandileqayo,

₂hleze bandiqwenga-qwenge njengengonyama,

bandiqangqulule ndibe zizijungqe ndingenamhlanguli.

₃Thixo wam, Ndikhoyo,

ukuba kukho nto ndiyenzileyo kwezi zinto:

ukuba kukho bani ndimonileyo,

₄nokuba ndingcatshe umhlobo wam,

okanye ndifumane ndalwenzakalisa utshaba lwam,

₅malundileqe ke lundifumane utshaba,

lundinqumle, ndife kube kanye,

lundishiye apho ndilutywantsi.

₆Khalima ngomsindo, Ndikhoyo;

undithethelele kule ngqumbo yeentshaba zam.

Thixo wam, vuka undincede;

kaloku wena ufuna kugwetywe ngobulungisa.

₇Mazibizwe zonke izizwe zikungqonge,

ungqendeve esihlalweni sakho phezu kwazo.

₈NguNdikhoyo umgwebi wabo bonk' abantu.

Ligwebe ityala lam ke, Ndikhoyo,

bucace ubulungisa bam, kucace ukuba ndimsulwa.

₉Phelisa inkohlakalo yabantw' abagwenxa,

uwazimase amalungisa, wena Thixo othand' ukulunga,

ogocagoca iintliziyo neengcinga zabantu.

₁₀Likhaka lam uThixo,

uyabakhusela abantw' abathand' ukulunga.

₁₁UThixo ngumgwebi olilungisa;

unguThixo ocatshukisw' imihla nezolo.

₁₂Ukuba abazohlwayi abantu

wolirhola ikrele lakhe elibukhali uThixo.

Selesityedile isaphetha sakhe, wema kuhle;

₁₃uzikhuphile esingxotyeni sazo izikhali,

wajolisa ngeentolo ezinomlilo.

₁₄Khangela, umnt' ogwenxa ukhawula ukungcola,

amith' ubumenemene, azal' ubuxoki.

₁₅Umba umhadi onzulu,

ajike eyele kwakuloo mgibe awenzileyo;

₁₆urhintyelwa kwabubumenemene bakhe,

isikhuni sibuye nomkhwezeli.

₁₇Ndiyambulela uNdikhoyo ngenxa yobulungisa bakhe.

Ndisaya kumbonga uNdikhoyo uPhezukonke.

₁*Ndikhoyo, Nkosi yethu,

hayi ukubaluleka kwegama lakho ehlabathini!

Wena uqaqambisa amazulu ngesithozela sakho,

₂nditsho abantwana kwaneentsana ziyakubonga,

nto leyo ibamisela umqobo abachasi

wokuvalela utshaba kwanomphindezeli.

₃Xa ndiqwalasela amazulu owenzileyo,

inyanga, neenkwenkwezi ezidalwe nguwe,

₄ngubani yena umntu, le nto umkhumbulelayo,

engubani yena unyana womntu, le nto umkhathalelayo?

₅Ngaphezu koko umenze wanganeno kancinane nje kuwe, Thixo;

umthe jize ngesihomo nesithozela.

₆Umnike igunya kuyo yonke indalo yakho,

wazibeka phantsi kwegunya lakhe zonk' izinto:

₇iinkomo neegusha, kwanazo neenyamakazi;

₈iintaka eziphaphazelayo, neentlanzi,

nayo yonke into ephithizela elwandle.

₉Hayi ukubaluleka kwalo igama lakho ehlabathini liphela,

Ndikhoyo, Nkosi yethu!