UJEREMIYA 32

₁Izwi elafika kuJeremiya livela kuJehova ngomnyaka weshumi kaSedekiya inkosi yakwaJuda, owawungumnyaka weshumi nesishiyagalombili kaNebukadiresari.

₂Ngalesosikhathi impi yenkosi yaseBabele yalivimbezela iJerusalema; uJeremiya umprofethi wayevalelwe egcekeni letilongo elalisendlini yenkosi yakwaJuda,

₃lapho uSedekiya inkosi yakwaJuda ebemvalele khona ngokuthi: Uprofethelani uthi: Usho kanje uJehova, uthi: Bheka, ngiyakuwunikela lomuzi esandleni senkosi yaseBabele, iwuthathe,

₄uSedekiya inkosi yakwaJuda angaphunyuki esandleni samaKaledi, kepha anikelwe nokunikelwa esandleni senkosi yaseBabele, akhulume nayo umlomo nomlomo, amehlo akhe awabone amehlo ayo,

₅yona imyise uSedekiya eBabele, abekhona lapho ngize ngimhambele, usho uJehova; noma nilwa namaKaledi, aniyikuphumelela na?

₆UJeremiya wathi: Izwi likaJehova lafika kimi, lathi:

₇Bheka, uHanameli indodana kaShalumi uyihlokazi uyakufika kuwe, athi: Zithengele insimu yami eseAnathoti, ngokuba ilungelo lokuyihlenga lingelakho ukuba uyithenge.

₈Wayesefika kimi uHanameli indodana kababekazi egcekeni letilongo njengezwi likaJehova, wathi kimi: Ake uyithenge insimu yami eseAnathoti elisezweni lakwaBenjamini, ngokuba ilungelo lefa lingelakho, nokuhlenga kungokwakho; zithengele lona. Ngase ngazi ukuthi lelizwi lavela kuJehova.

₉Ngayithenga insimu eseAnathoti kuHanameli indodana kababekazi, ngamlinganisela imali, amashekeli* ayishumi nesikhombisa esiliva.

₁₀Ngaloba incwadi, ngayinamathelisa, ngazifakazisela, ngamlinganisela imali ngesilinganiso.

₁₁Ngayithatha incwadi yokuthenga, enamathelisiweyo enemithetho nezimiso, nevulekileyo,

₁₂nganikela incwadi yokuthenga kuBaruki indodana kaNeriya kaMahaseya ngaphambi kukaHanameli indodana kababekazi naphambi kwawofakazi ababelobé incwadi yokuthenga naphambi kwabo bonke abaJuda ababehlala egcekeni letilongo.

₁₃Ngamyala uBaruki phambi kwabo, ngathi:

₁₄Usho kanje uJehova-Sebawoti, uNkulunkulu kaIsrayeli, uthi: Thatha lezizincwadi, lencwadi yokuthenga enamathelisiweyo nalencwadi evulekileyo, uzifake ezitsheni zebumba ukuba zihlale izinsuku eziningi.

₁₅Ngokuba usho kanje uJehova-Sebawoti, uNkulunkulu kaIsrayeli, uthi: Kuyakubuye kuthengwe izindlu namasimu nezivini kulelizwe.

₁₆Sengiyiniké uBaruki indodana kaNeriya incwadi yokuthenga ngakhuleka kuJehova, ngathi:

₁₇E Nkosi Jehova, bheka, wena wenzile izulu nomhlaba ngamandla akho amakhulu nangengalo yakho eyeluliweyo; akukho-lutho olukwahlulayo

₁₈wena owenza umusa kubo abayizinkulungwane, ophindisela ububi bawoyise esifubeni sabantwana babo emva kwabo, ogama lakho linguNkulunkulu omkhulu oyiqhawe, uJehova-Sebawoti,

₁₉omkhulu emaswini, onamandla ezenzweni, omehlo akho avulekele zonke izindlela zabantu ukuba unike, kube-yilowo nalowo njengezindlela zakhe nanjengezithelo zemisebenzi yakhe;

₂₀owamisa izibonakaliso nezimangaliso ezweni laseGibithe kuze kube-namuhla nakwaIsrayeli naphakathi kwabanye abantu, wazenzela igama njenganamuhla,

₂₁wabakhipha abantu bakho uIsrayeli ezweni laseGibithe ngezibonakaliso nangezimangaliso, nangesandla esinamandla, nangengalo eyeluliweyo, nangengebhe enkulu,

₂₂wabanika lelizwe, njengalokho afunga koyise ukubanika lona, izwe elichichima ubisi nezinyosi;

₂₃bangena balidla, kepha kabalilalelanga izwi lakho, abahambanga emthethweni wakho, abenzanga-lutho lwakho konke owabayala ngakho ukuba bakwenze; ngalokho ubehlisele konke lokhu okubi.

₂₄Bheka, amaduli asefiké emzini ukuba umuzi uthathwe; ngenxa yenkemba nendlala nesifo umuzi unikelwe esandleni samaKaledi alwa nawo; kwenzekile owakukhulumayo; bheka, usuyakubona.

₂₅Wena-Nkosi Jehova, noma umuzi unikelwe esandleni samaKaledi, washo kimi, wathi: Zithengele insimu ngemali, uzifakazisele.

₂₆Lase lifika izwi likaJehova kuJeremiya, lithi:

₂₇Bheka, nginguJehova uNkulunkulu wenyama yonke, kukhona okungahlulayo na?

₂₈Ngalokho usho kanje uJehova, uthi: Bheka, ngiyakuwunikela lomuzi esandleni samaKaledi nasesandleni sikaNebukadiresari inkosi yaseBabele, awuthathe.

₂₉AmaKaledi alwa nalomuzi ayakufika, awuthungele lomuzi ngomlilo, awushise kanye nalezozindlu abashisele uBali impepho phezu kwezimpahla zazo, bathululela abanye onkulunkulu iminikelo yokuphuzwa ukuba bangicunule.

₃₀Ngokuba abantwana bakwaIsrayeli nabantwana bakwaJuda benzile okubi kuphela emehlweni ami kwasebuntwaneni babo, ngokuba abantwana bakwaIsrayeli bangicunulile kuphela ngemisebenzi yezandla zabo, usho uJehova.

₃₁Ngokuba lomuzi uvusé intukuthelo yami nokufutheka kwami, kusukela osukwini abawakha ngalo kuze kube-namuhla, ukuba ngiwususe ebusweni bami,

₃₂ngenxa yakho konke okubi kwabantwana bakwaIsrayeli nabantwana bakwaJuda abakwenzileyo ukuba bangicunule, bona namakhosi abo, nezikhulu zabo, nabapristi babo, nabaprofethi babo, namadoda akwaJuda, nabakhileyo eJerusalema.

₃₃Bangifulathele, abangibhekanga; noma ngabafundisa ngibaxwayisa njalo-njalo, abalalelanga ukuba bamukele ukulaywa.

₃₄Kepha bazibeka izinengiso zabo endlini ebizwa ngegama lami ukuba bayingcolise.

₃₅Bazakha izindawo eziphakemeyo zikaBali ezisesigodini sendodana kaHinomu ukuba badabulise amadodana abo namadodakazi abo emlilweni kuMoloki, engingabayalanga ngakho, nokungangenanga enhliziyweni ukuthi bayakusenza lesisinengiso ukuze bamonise uJuda.

₃₆Ngalokho manje usho kanje uJehova uNkulunkulu kaIsrayeli ngalomuzi enithi ngawo: Unikelwe esandleni senkosi yaseBabele ngenkemba, nangendlala, nangesifo, uthi:

₃₇Bheka, ngiyakubabutha emazweni onke lapho ngibaxoshele khona ngentukuthelo yami, nangokufutheka kwami, nangolaka olukhulu, ngibabuyisele kulendawo, ngibenze ukuba bahlale belondekile,

₃₈babe-ngabantu bami, mina ngibenguNkulunkulu wabo,

₃₉ngibanike inhliziyonye nendlelanye ukuba bangesabe zonke izinsuku, kube-kuhle kubo nakubantwana babo emva kwabo.

₄₀Ngiyakwenza nabo isivumelwano esiphakade, ukuze ngingabuyi ekubalandeleni, ngibenzele okuhle, ngibeke ezinhliziyweni zabo ukungesaba, ukuze bangasuki kimi.

₄₁Ngiyakuthokoza ngabo, ngibenzele okuhle, ngibatshale ngeqiniso kulelizwe ngayo yonke inhliziyo yami nangawo wonke umphefumulo wami.

₄₂Ngokuba usho kanje uJehova, uthi: Njengalokhu ngehlisele phezu kwalababantu konke lokhu okubi, kanjalo ngiyakubehlisela konke okuhle engikukhulumé kubo.

₄₃Amasimu ayakuthengwa kulelizwe enisho ngalo ukuthi liyincithakalo, lapho kungekho-muntu nazilwane khona, nokuthi linikelwe esandleni samaKaledi.

₄₄Amasimu ayakuthengwa ngemali, kulotshwe encwadini, kunamatheliswe, kufakazelwe ngofakazi ezweni lakwaBenjamini, nasemaphethelweni aseJerusalema, nasemizini yakwaJuda, nasemizini yasezintabeni, nasemizini yasehlanzeni, nasemizini yaseningizimu, ngokuba ngiyakukubuyisa ukuthunjwa kwabo, usho uJehova.