U-Obhadiya 1

₂Uyabonake, ngiyakukwenza ube mncane kwabezizwe;

ubukelwe phansi ngokwedlulele.

₃Ukuqhosha kwenhliziyo yakho kukukhohlisile

wena ohlala emifantwini yamadwala,

ondawo yakho iphezulu,

othi enhliziyweni yakho:

Ngubani nje ongangehlisela phansi emhlabeni na?

₄Noma ungaphakama njengokhozi,

noma ngabe isidleke sakho

singakhiwa phakathi kwezinkanyezi,

ngiyakukwehlisa khona lapho, kusho uSimakade.

₅Uma uthelekelwa ngamasela,

nabaphangi ebusuku,

uyakuphundlwa kangakanani!

Abayukweba yini bazanelise bona na?

Uma abavuna izithelo zomvini begaleleka kuwe,

abayukuwushiya yini umkhothozo na?

₆Maye, ngokuphundlwa kuka-Esawu,

nokuvundululwa komcebo wakhe obufihliwe!

₇Bonke owenze isivumelwano nabo

bayakukuxoshela emingceleni;

abantu obuhleli nabo ngokuthula

bayakukukhohlisa,

bakunqobe;

labo obudla isinkwa sakho nabo

bayakubeka ugibe phansi kwakho;

akekho oluqondayo.

₈Ngalolo lusuku, angiyubaqeda yini nya

abahlakaniphileyo kwa-Edomi,

nokuqonda entabeni yakwa-Esawu na? kusho uSimakade.

₉Amaqhawe akho, Themani, ayakuthuthumela,

ukuze kube yilowo nalowo

abulawe ngokunqunywa entabeni yakwa-Esawu.

₁₀Ngenxa yobudlova obenziwa kumfowenu uJakobe,

uyakuthelwa ngehlazo,

kuqedwe nya ngawe unomphelo.

₁₁Phela ngosuku owamela kude ngalo,

mhla abafokazi bephanga umcebo wakhe,

nabezizwe betheleka emasagweni akhe,

benza unkatho ngeJerusalema,

nawe wawufana nomunye wabo.

₁₂Kodwa kwakungafanele uthokoze ngosuku lomfowenu

mhla evelelwa yishwa.

Kwakungafanele ujabule mayelana nabantu bakwaJuda

ngosuku lokubhujiswa kwabo.

Kwakungafanele ubhuqe ngomlomo wakho

ngosuku losizi.

₁₃Kwakungafanele ungene ngesango labantu bami

mhla bevelelwa yinhlekelele.

Kwakungafanele futhi ubuke nje usizi lwabo

mhla bevelelwa yisigemegeme,

Kwakungafanele welule isandla sakho

uthathe umcebo wakhe

mhla evelelwe yinhlekelele.

₁₄Kwakungafanele ume ezimpambanweni zemigwaqo

ukuba unqume abakubo abaphunyukileyo.

Kwakungafanele ukhaphele abasindileyo bakubo

ngosuku losizi.

₁₅Ngokuba usuku lukaSimakade selusondele

kuzo zonke izizwe;

njengoba wena wenze kanjalo

kuyakwenziwa kanjalo nakuwe.

Izenzo zakho ziyakubuyela ekhanda lakho.

₁₆Impela njengoba niphuzile

entabeni yami engcwele,

zonke izizwe ziyakuphuza zingaphezi,

ziphuze, zigwinye,

kube sengathi azizange zibe khona.

₁₇Kepha entabeni iZiyoni kuyakuba ukuhlengwa,

iyakuba yindawo engcwele,

nabendlu yakwaJakobe

bayakudla ifa lababaphangileyo.

₁₈Abendlu yakwaJakobe bayakuba ngumlilo,

abendlu kaJosefa babe yilangabi,

kuthi abendlu ka-Esawu babe ngamabibi,

bayakuwashisa, aphele nya;

akuyukusinda namunye kwabendlu ka-Esawu,

ngokuba uSimakade usekhulumile.

₁₉Abantu baseNegevu bayakudla intaba ka-Esawu,

kuthi abaseShephela badle elamaFilisti,

elakwa-Efrayimi nelaseSamariya,

abakwaBhenjamini badle iGileyadi.

₂₀Isigejana sabantu bakwa-Israyeli

esisekudingisweni eKhanani

kuze kube seZarefathi,

nabathunjwa baseJerusalema abaseSefaradi

bayakudla imizi eNegevu.

₂₁Abahlengi bayakukhuphukela entabeni iZiyoni,

babuse elezintaba kwa-Esawu.

Umbuso uyakuba ngokaSimakade.