U-Amose 9

“Shaya izihloko zezinsika,

ukuze kuzamazame umnyango phansi,

uziphihlize phezu kwamakhanda abo bonke.

Abayakusala kubo ngiyakubabulala ngenkemba.

Obalekayo kubo akayukuphunyuka

nophunyukayo kubo akayukusinda.

₂Noma bangagubha endaweni yabafileyo,

isandla sami siyakubakhipha khona lapho,

noma bangakhuphukela ezulwini,

ngiyakubehlisa khona lapho.

₃Noma bangacasha esiqongweni seKharmeli,

ngiyakubathungatha, ngibabambe.

Noma bangazifihla ekujuleni kolwandle

ngingababoni ngawami amehlo,

kodwa nakhona lapho

ngiyakujuba inyoka ibalume.

₄Noma bangathunjwa yizitha zabo,

nakhona lapho ngiyakujuba inkemba

ukuba ibabhuqabhuqe,

iso lami liyakuthi njo kubo,

kube kubi, kungabi kuhle.”

₅INkosi uSimakade Wamabandla

nguye othinta umhlaba, uncibilike,

balile bonke abahlala kuyo;

uyakukhukhumala wonke njengomfula,

ubuye ubohle njengomfula eGibhithe;

₆owakhe isigodlo sakhe

esinamakamelo aphezulu ezulwini,

ukwendlaleka kwaso kusekelwe emhlabeni,

obiza amanzi olwandle,

awathululele phezu komhlaba,

nguSimakade igama lakhe.

₇“Anifani yini kimi bantu bakaKhushe,

nina bantu bakwa-Israyeli na?” kusho uSimakade.

“Angimkhuphulanga yini u-Israyeli eGibhithe,

namaFilisti eKhafithori,

nama-Aramu eKhiri na?

₈Bhekani-ke, amehlo eNkosi uSimakade

awubhekile umbuso owonayo;

ngiyakuwuqenda nya ebusweni bomhlaba,

nakuba ngingeke ngiyishabalalise

ngokupheleleyo indlu kaJakobe,” kusho uSimakade.

₉“Ngokuba bheka, ngiyakukhipha umyalo,

nginyakazise indlu yakwa-Israyeli

phakwathi kwezizwe zonke,

njengokunyakaziswa kwesihlungo kuhlungwa,

kodwa kungabi bikho okusanhlamvu

okuwela emhlabathini.

₁₀Zonke izoni eziphakathi kwabantu bami

ziyakufa ngenkemba,

ezithi: ‘Inhlekelele ayiyukusondela kithi,

ayiyukusehlela thina,

futhi ngeke isikhathaze.’ ”

₁₁“Ngalolo lusuku

ngiyakuvusa idokodo eliwile likaDavide,

ngivale imifantu yalo,

ngivuselele kabusha okuwileyo,

ngilakhe kabusha njengasezinsukwini zasemandulo,

₁₂ukuze badle ifa lensali yakwa-Edomi,

nakho konke okwezizwe

ezazibizwa ngeGama lami,”

kusho uSimakade ozakukwenza lokhu.

₁₃“Bhekani-ke, ziyeza izinsuku,

lapho olimayo eyakuficwa ovunayo,

onyathela amagilebhisi aficwe

ngohlwanyela imbewu;

izintaba ziyakuconsa iwayini elimnandi,

ligeleze emagqumeni wonke.

₁₄Ngiyakuguqula ukuthunjwa kwabantu bami u-Israyeli,

bakhe kabusha imizi ebiyincithakalo,

bahlale kuyo;

bayakutshala izivini,

baphuze iwayini lazo,

balime izivande,

badle izithelo zazo.

₁₅Ngiyakubatshala ezweni labo,

bangabe besasishulwa futhi

kwelabo izwe engibanike lona,”

kusho uSimakade uNkulunkulu wakho.