U-Izaya 28

₁Maye, kuwo umqhele wokuzikhukhumeza

kwezidakwa zakwa-Efrayimi,

nasembalini ebunayo

yobuhle obukhazimulayo bawo,

osenhloko yesigodi esivundile,

salabo abanqotshwe yiwayini!

₂INkosi inalowo oqinileyo nonamandla,

ngesandla sakhe uyogumbuqela umhlaba

njengesivunguvungu esinesichotho,

nesiphepho esichithayo,

namanzi anamandla akhukhulayo.

₃Uyakufihliza ngezinyawo umqhele wokuzikhukhumeza,

wezidakwa zakwa-Efrayimi.

₄Imbali ebunayo yobuhle bawo obukhazimulayo,

osenhloko yesigodi esivundile,

iyofana nekhiwane elivuthwe kuqala

lingakangeni ihlobo,

noma ngubani olibonayo

ulikha alisobozele lisesesandleni.

₅Ngalolo lusuku uSimakade Wamabandla

uyoba ngumqhele wobukhosi,

nesicoco esihle ensalini yabantu bakhe.

₆Uyoba ngumoya wobulungiswa kumehluleli,

namandla kwabavimba impi esangweni.

₇Abaphristi nabaphrofethi bacwile shi ezinkambeni,

babona imibono eyize,

bakhubeke ekwehluleleni.

Labo ababhukuda ewayinini,

babhamazeliswa wuphuzo olunamandla.

₈Wonke amatafula agcwele ubuhlanzo nokungcola,

akusekho ndawo ehlanzekileyo.

₉“Ngubani ayomfundisa ukwazi,

umbiko uyowuchazela bani na?

Laba abalunyulwe ebeleni,

bayekiswa ukuncela ubisi na?

₁₀Ngokuba kuyisiyalezelo phezu kwesiyalezelo,

isiyalezelo phezu kwesiyalezelo,

umthetho phezu komthetho,

umthetho phezu komthetho,

ingcosana lapha, ingcosana laphaya.”

₁₁Impela uyokhuluma kulaba bantu

ngezindebe ezingingizayo

nangolimi olungaziwayo.

₁₂Athi kubo:

“Lokhu ngukuphumula,

phumuzani abantekenteke;

lokhu kungukuhlunyelelwa;”

nokho abezwanga.

₁₃Ngakho-ke izwi likaSimakade yileli:

isiyalezelo phezu kwesiyalezelo,

isiyalezo phezu kwesiyalezo,

umthetho phezu komthetho,

umthetho phezu komthetho,

ingcosana lapha, ingcosana laphaya,

ukuze bahambe, bawe nyovane,

bephuke, bacushwe, babanjwe.

₁₄Nina bantu abedelelayo,

ababusa abantu baseJerusalema,

yizwani izwi likaSimakade,

₁₅ngokuba nithe:

“Senze isivumelwano nokufa,

sivumelene nendawo yabafileyo;

lapho isiswebhu esiyishoba sedlula,

asiyukuza kithi,

ngoba amanga siwenze ayisiphephelo sethu,

sacasha phansi kwenkohlakalo.”

₁₆Ngakho-ke, ithi iNkosi uSimakade:

“EZiyoni ngibeka itshe lesisekelo elivivinyekileyo,

itshe legumbi eliyigugu

elinqabileyo lesisekelo soqobo,

owethembayo akayukuxhamazela.

₁₇Ubulungiswa ngizobenza umucu wokukala,

ukulunga kube ngumthofu wokuqondisa,

isichotho siyophephetha inqaba yamanga,

amanzi akhukhule umpheme.

₁₈Isivumelwano senu nokufa siyochithwa,

ukuvumelana kwenu nendawo yabafileyo akuseyukuma;

lapho isiswebhu esikhukhulayo sedlula, siyonifihliza.

₁₉Njalo lapho sedlula siyonibamba.

Siyodabula njalo ekuseni,

nasemini nasebusuku.”

Kuyokwesabeka kakhulu ukuqondwa kombiko.

₂₀Ngokuba umbhede uyokuba mfishane

ukuba umuntu azelule kuwo,

nengubo ibe ncane

ukuba ayembathe.

₂₁USimakade uyophakama njengentaba iPharazimi,

athukuthele njengesigodi iGibheyoni,

ukuze enze umsebenzi wakhe,

umsebenzi wakhe awejwayelekile,

afeze umsebenzi wakhe,

izenzo zakhe ezimangalisayo!

₂₂Manje maningedeleli

funa izibopho zenu ziqiniswe,

ngokuba ngisizwile isimemezelo sokubhubhisa

wonke umhlaba,

siqhamuka eNkosini uSimakade Wamabandla.

₂₃Lalelani, nizwe izwi,

bekani indlebe,

nilalele inkulumo yami.

₂₄Ngabe abalimi

balima njalo bangayeki na?

Badubuza amagabade,

bambe imigodi na?

₂₅Lapho sebehlelembe umhlabathi

abatshali yini imbewu

eyehlukene ngemigqa

ibhali nokolo endaweni yakho na?

₂₆UNkulunkulu wakhe uyamkhaliphisa,

amfundise indlela eyiyo.

₂₇Uphoko alubhulwa ngesibhulo esibukhali,

nesondo lenqola aliphendulwa phezu kwekhumini.

Kodwa uphoko lushaywa ngenduku,

nekhumini ngogongolo.

₂₈Okusanhlamvu kokwenza isinkwa kuyagaywa,

kodwa umuntu akakubhuli njalo,

ngisho engakufihliza ngenqola

edonswa ngamahhashi,

akusoze kwacoliseka.

₂₉Nalokho kuvela kuSimakade Wamabandla

omangalisayo ekwalulekeni,

nohlakaniphe ngokwedlulele.