U-Izaya 29

₁Maye, kuwe Ariyeli,

muzi lapho uDavide

ake akanisa khona.

Yengeza unyaka phezu komunye,

imikhosi uqhubeke nokuyigubha njengenjwayelo.

₂Nokho ngizolikhathaza i-Ariyeli,

kuzoba nokukhala nokulila,

lizofana ne-Ariyeli.

₃NjengoDavide ngizokanisa,

ngimelane nawe,

ngikuhaqe nxazonke,

ngikuvimbezele ngezinqaba,

ngimise izindonga.

₄Uzodilizwa,

ukhulume usemhlabathini,

amazwi akho azophuma phansi othulini,

izwi lakho livele emhlabathini njengelomthakathi,

inkulumo yakho iyonyenyeza,

ivela othulini.

₅Kodwa isixuku sezitha zakho

siyofana nebhuqu elicolisekileyo,

noquqaba lwabacindezeli

lube njengamakhoba aphephukayo,

kwenzeke ngokuphazima kweso.

₆USimakade Wamabandla

uyokuhambela ngokushesha nangokuduma,

nangokuzamazama, nangomsindo omkhulu,

nangesivunguvungu, nangesiphepho

nangelangabi lomlilo oqothulayo.

₇Isixuku sezizwe ezazilwa ne-Ariyeli,

zilwa nalo nenqaba yalo, zilicindezela,

ziyokuba njengesiphepho nanjengombono ebusuku.

₈Kuyofana nalapho umuntu olambile

ephupha edla,

kodwa avuke esalokhu elambile,

noma owomileyo ephupha ephuza,

kepha avuke eyethile wukoma.

Siyoba njalo-ke isixuku

sezizwe zonke ezilwa

nentaba iZiyoni.

₉Zimangaliseni, nimangale;

ziphuphuthekiseni nibe yizimpumputhe;

dakwani, kodwa kungengawayini;

bhamazelani, kodwa kungengaluphuzo olunamandla!

₁₀Ngokuba uSimakade uthululele kini

umoya wobuthongo obunzulu,

uvale amehlo abaphrofethi bakini,

wemboza amakhanda ezangoma zakini.

“Ngenxa yokuthi laba bantu

basondela kimi ngemilomo nje,

futhi bangidumise ngezindebe zabo nje,

izinhliziyo zabo zibe zikude nami,

ukungidumisa kwabo kungumyalo wabantu

abawufundisiweyo nje,

₁₄ngakho ngizobuye ngibenzele

izinto ezimangalisayo laba bantu,

ezethusayo nezimangalisayo.

Ukuhlakanipha kwezihlakaniphi zakhona kuzophela,

nokuqonda kwabaqondayo bakhona kusitheke.”

₁₅Manje kwabafihlela uSimakade amasu abo,

abazenzo zabo zisebumnyameni,

abathi:

“Ngubani osibonayo?

Ngubani osaziyo na?”

₁₆Izinto niyazihlanekezela.

Umbumbi angathathwa yini njengebumba na?

Izinto ezenziweyo zingasho yini

kumenzi wazo, zithi:

“Akangenzanga.”

Into ebunjiweyo ingasho yini

kokubumbileyo, ithi:

“Akazi lutho,” na?

₁₇ILebhanoni alizukuphenduka yini maduzane nje

libe yinsimu yezithelo,

kuthi nensimu yezithelo

ibe yihlathi na?

₁₈Ngalolo lusuku izithulu

ziyowezwa amazwi encwadi,

amehlo ezimpumputhe

ayobona ebumnyameni obuyisigayegaye.

₁₉Abathobekileyo bayofumana kabusha

intokozo kuSimakade,

nabantulayo phakathi kwabantu

bayojabulela oNgcwele ka-Israyeli.

₂₀Ngokuba umcindezeli akaseyukuba bikho,

kungabe kusaba khona sedeleli,

bonke abaceba ububi bayoqedwa nya.

₂₁Ababeka umuntu icala ngezwa bethi,

babekele ugibe umthethi

wamacala esigcawini,

bachezukise olungileyo ngento engelutho.

“UJakobe akasayukuba namahloni,

nobuso bakhe abusayukuphaphatheka,

₂₃ngokuba nxa ebona izingane zakhe

umsebenzi wezandla zami, phakathi kwakhe,

ziyongcwelisa iGama lami,

zingcwelise oNgcwele kaJakobe,

zimesabe uNkulunkulu ka-Israyeli.

₂₄Abaduka emoyeni, bayofinyelela ekwazini,

nalabo abakhonondayo, bayokwamukela umyalo.”