INGOMA YAZO IINGOMA 2

₁Ndingumfiyo waseSharon,

Ndiyinyibiba yasezintlangeni.

₂Njengenyibiba phakathi kweminga,

Únjalo uwethu phakathi kweentombi.

₃Njengomapile phakathi kwemithi yehlathi,

Injalo intánda yam phakathi koonyana.

Ndanqwena, ndahlala phantsi emthunzini wawo,

Nesiqhamo sawo sanencasa ekhuhlangubeni lam.

₄Indingenisé endlwini yewayini,

Nebhanile• yayo phezu kwam luthando.

₅Ndixhaseni ngezicumba zeerasintyisi,

Ndisekeleni ngeeapile; ngokuba ndisifa luthando.

₆Isandla sayo sokhohlo siphantsi kwentloko yam;

Esokunene siyandiwola.

₇Zintombi zaseYerusalem, ndinifungisa

Amabhadikazi namaxhamakazi asendle,

Ukuba ningàluvusi, ukuba ningaluvuseleli uthando,

Lude luthande.

₈Phulaphulani! Intánda yam, nantso isiza,

Itsiba ezintabeni, isuka imitsi ezindulini.

₉Intánda yam ifana nebhadi, nenkonyana yexhama.

Nantso imi emva kodonga lwakokwethu,

Ithe nzo ngeefestile,

Inyondla ngekroba.

₁₀Intánda yam yasusela, yathi kum,

Suk' ume, wethu, nzwakazi yam, uze;

₁₁Ngokuba uyabona, ubusika budlule,

Imvula igqithile yemka;

₁₂Iintyantyambo zibonakele ezweni;

Ixesha lokuntyiloza kweentaka lifikile;

Izwi lehobe livakele ezweni lethu;

₁₃Umkhiwane ukrwala amakhiwane awo,

Imidiliya ityatyambile,

Itsho ngevumba elimnandi.

Suk' ume, wethu, nzwakazi yam, uze.

₁₄Vukuthu lam elisemxawukeni wengxondorha, entsithelweni yemiba,

Ndíbonise ubuso bakho, ndívise ilizwi lakho;

Ngokuba izwi lakho limnandi, ubuso bakho bunomkhitha.

₁₅Sibambeleni iimpungutye, iimpungutye ezincinane ezonakalisa izidiliya;

Izidiliya zethu zityatyambile.

₁₆Intánda yam yeyam, mna ke ndingowayo;

Yalusela ezinyibibeni.

₁₇Ide iphole imini, oluke amathunzi,

Jika, ntánda yam, uxelise ibhadi, uxelise inkonyana yexhama,

Ezintabeni ezibugqagala.