INGOMA YAZO IINGOMA 1

₁Ingoma yazo iingoma, eyekaSolomon.

₂Makandange ngokwanga komlomo wakhe;

Ngokuba izincokoliso zakho zimnandi ngaphezu kwewayini.

₃Amafutha akho anevumba elimnandi;

Liyioli ethululwayo igama lakho;

Ngenxa yoko iintombi ziyakuthanda.

₄Nditsale, sogidima emva kwakho;

Ukuba ukumkani undingenise ezingontsini zakhe,

Sogcoba, sivuye ngawe.

Sozikhankanya izincokoliso zakho ngaphezu kwewayini;

Zikuthanda zinyanisile.

₅Ndimnyama, ndinomkhitha noko,

Zintombi zaseYerusalem,

Njengeentente zakwaKedare,

Njengamalengalenga kaSolomon.

₆Musani ukundikhangela ngakuba ndife mnyama,

Ngakuba nditshe lilanga.

Oonyana bakama bandivuthela ngomsindo,

Bandenza umlindi wezidiliya;

Ke esisesam isidiliya andisilindanga.

₇Khawundixilele, wena uthandwa ngumphefumlo wam,

Walúsela phi na? Ùyibuthisa phi na imihlambi emini enkulu?

Ngokuba kungani na ukuba ndibe njengogqubutheleyo

Ngasemihlambini yamakholwane akho?

₈Ukuba àkwazi, nzwakazindini phakathi kweentokazi,

Phuma, uhambe ngemikhondo yomhlambi,

Uwaluse amatakane akho ngaseminqubeni yabalusi.

₉Ndikufanekisé, wethu,

Nehashe kwaweenqwelo zikaFaro!

₁₀Zinomkhitha izidlele zakho ziingcaca,

Umqala wakho zizidanga.

₁₁Sòkwenzela iingcaca zegolide

Ezinamaqhula esilivere.

₁₂Xa ukumkani asesetafileni yakhe,

Inadusi• yam isuka ilikhuphe ivumba layo.

₁₃Sisiqhuma semore• intánda yam kum,

Esihleli phakathi kwamabele am.

₁₄Sisihloko sekofere• intánda yam kum

Ezidiliyeni zase-Engedi.

₁₅Yabona, ùyinzwakazi, wethu! Yabona, ùyinzwakazi!

Amehlo akho anjengawamavukuthu.

₁₆Yabona, ùyinzwakazi, ntánda yam; ewe, umnandi;

Umandlalo wethu uluhlaza.

₁₇Imiqadi yendlu yethu yimisedare,•

Iipanele• zethu yimisipres.•