IINDUMISO 73

₁Ulungile kwaphela uThixo kuSirayeli,

Kwabantliziyo zinyulu.

₂Ke mna, beziphantse ukumka iinyawo zam;

Gcwizi ukutyibilika ukunyathela kwam;

₃Ngokuba bendibamonela abaqhayisayo,

Ndakukubona ukuphumelela kwabangendawo.

₄Ngokuba àbanazintlungu ekufeni kwabo;

Baphilile, batyebile umzimba wabo;

₅Ebubini babantu àbakho bona;

Àbakhathazwa njengabanye abantu.

₆Ngako oko intamo yabo inxitywe ikratshi;

Ukugonyamela kubathe wambu ngokwengubo.

₇Amehlo abo avelile kukutyeba;

Amabhongo eentliziyo zabo aphumela phandle.

₈Bahlalela ngentlamba, bathetha ngokubandezela, benobubi;

Bathetha iindumbisa zamazwi.

₉Bawubeka ezulwini umlomo wabo,

Ulwimi lwabo luhamba emhlabeni wonke.

₁₀Ngako oko abantu babo babuyela apha;

Bafinca amanzi amaninzi.

₁₁Bathi, Únokuthini na ukwazi uThixo?

Kukho ukwazi na kOsenyangweni?

₁₂Yabona abangendawo abayá

Banokuchulumacha ngonaphakade, bandile ngokutyeba.

₁₃Sìfumane sayiqaqambisa intliziyo yethu kanti,

Sazihlamba izandla zethu ngokuba msulwa;

₁₄Ndakhathazeka imini yonke,

Ukohlwaywa kwethu kwaba kokwemiso yonke.

₁₅Ukuba bendithe, Ndiya kwenjenjalo ukuthetha,

Yabona, ngendinginizile kwisizukulwana soonyana bakho.

₁₆Ndathi ke ndakùcinga ukuba ndikwázi oko,

Kwayinkohla emehlweni am;

₁₇Ndada ndaya kungena ezingcweleni zikaThixo,

Ndakúgqala ke ukuphela kwabo.

₁₈Inene, ùbamise ezindaweni ezibuthelezi,

Wabawisa baba yintshabalala.

₁₉Hayi, ukuphanziswa kwabo ngephanyazo;

Baphelile, bagqityiwe kukukhwankqa.

₂₀Njengephupha ekuqabukeni komntu,

Ekuvukeni kwakho, Nkosi, wòwudela umfanekiso wabo.

₂₁Ukuba ndithe ndabindeka intliziyo,

Ndahlabeka ezintsweni,

₂₂Ndoba ke ndisisityhakala, ndingenakwazi;

Ndoba ke ndisisilo kuwe.

₂₃Mna ke ndihlala ndinawe;

Ùndibambile ngesandla sam sokunene;

₂₄Ùya kundikhapha ngecebo lakho.

Undithabathe emveni koku, ndibe nozuko.

₂₅Ndinabani na emazulwini?

Ukuba wena ungowam, andilinanze nganto ihlabathi.

₂₆Ingáphela inyama yam nentliziyo yam:

Iliwa lentliziyo yam, nesabelo sam, nguThixo ngonaphakade.

₂₇Ngokuba, yabona, abanyawukileyo kuwe baya kudaka;

Uyababhangisa bonke abahenyuzayo, bemke kuwe.

₂₈Mna ke, ukusondela kuThixo kulungile kum,

Ndiyenza ihlathi lam iNkosi uYehova,

Ukuze ndiyibalise yonke imisebenzi yakhe.