IINDUMISO 72

₁Thixo, mnike ukumkani imigwebo yakho,

Mnike unyana wokumkani ubulungisa bakho.

₂Makagwebe ebantwini bakho ngobulungisa,

Nakwabaziintsizana zakho ngokwesiko.

₃Iintaba mazibathwalele uxolo abantu,

Kwaneenduli zibathwalele ebulungiseni.

₄Makagwebe ityala labaziintsizana ebantwini,

Asindise oonyana bamahlwempu,

Abatyumze abacudisi.

₅Mabakoyike, ukuhlala elihleliyo ilanga

Kwanenyanga, izizukulwana ngezizukulwana.

₆Makehle njengemvula ehla phezu kotyani obusikwayo,

Njengeziphango, njengemvula emathontsi makhulu, emhlabeni.

₇Malityatyambe ngemihla yakhe ilungisa,

Nobuninzi boxolo, ide ingabi sabakho inyanga.

₈Makaphathe ubukhosi ethabathela elwandle ase elwandle,

Ethabathela kuwo uMlambo• ase eziphelweni zehlabathi.

₉Baya kuguqa phambi kwakhe abemi bomqwebedu,

Zikhothe uthuli iintshaba zakhe.

₁₀Ookumkani baseTarshishe nabeziqithi baya kunika iminikelo;

Ookumkani bakwaShebha nabakwaSebha baya kusondeza isithabathaba;

₁₁Baqubude kuye bonke ookumkani,

Zimkhonze sonke iintlanga.

₁₂Ngokuba úya kulihlangula ihlwempu elizibikayo,

Nabaziintsizana abangenaluncedo;

₁₃Abenzele inceba abasweleyo nabangamahlwempu;

Asindise imiphefumlo yamahlwempu;

₁₄Akhulule imiphefumlo yawo ekuxinezelweni nasekugonyamelweni;

Linqabile emehlweni akhe igazi lawo.

₁₅Úya kuphila anikwe igolide yakwaShebha,

Bahlale bemthandazela,

Bamsikelele imini yonke.

₁₆Makubekho intabalala yengqolowa ezweni, ise encotsheni yeentaba;

Ukuqhama kwayo makurhashaze njengeLebhanon;

Mabatyatyambe emizini yabo njengemifuno yomhlaba.

₁₇Malibe ngunaphakade igama lakhe;

Malivelise amagatya igama lakhe phambi kwelanga,

Bazisikelele ngaye;

Mazithi zonke iintlanga úngonoyolo.

₁₈Makabongwe uYehova uThixo, uThixo kaSirayeli.

Ulomenzi wemisebenzi ebalulekileyo yena yedwa.

₁₉Malisikelelwe igama lakhe elizukileyo ngonaphakade,

Lizale lonke ihlabathi luzuko lwakhe. Amen, amen.

₂₀Iphelile imithandazo kaDavide unyana kaYese.