IMIZEKELISO 5

₁Nyana wam, bubazele indlebe ubulumko bam,

Ingqondo yam uyithobele indlebe yakho;

₂Ukuze ugcine iminkqangiyelo,

Ulondoloze ukwazi umlomo wakho.

₃Ngokuba ivuza incindi yobusi imilebe yomlomo womkamntu,

Libuthelezi ngaphezu kweoli ikhuhlangubo lakhe;

₄Ke ukuphela kwakhe kukrakra njengomhlonyane,

Kubukhali njengekrele elintlangothi mbini.

₅Iinyawo zakhe zihla ziye ekufeni,

Amabanga akhe abambelele kwelabafileyo.

₆Akangéze wahamba ngomendo wobomi;

Imikhondo yakhe iyajikajika, engazi.

₇Ke ngoku, bonyana, ndiveni,

Ningemki entethweni yomlomo wam.

₈Mayibe kude kuye indlela yakho,

Ungasondeli emnyango wendlu yakhe;

₉Hleze uyinike abanye intlahla yakho,

Uyinike isijorha iminyaka yakho;

₁₀Hleze kuhluthe abasemzini ngamandla akho,

Kungene endlwini yowolunye uhlanga ukubulaleka kwakho;

₁₁Ugcume ekupheleni kwakho,

Ekudlekeni kwenyama yakho nezihlunu zakho;

₁₂Uthi, Bendiluthiyeleni na uqeqesho,

Yasigiba isohlwayo intliziyo yam?

₁₃Àndaliphulaphula izwi labayali bam;

Àndayithobela indlebe yam kubafundisi bam!

₁₄Ndaphantsa ukuba sebubini bonke

Esazulwini sesikhungu nebandla.

₁₅Sela amanzi kwelakho iqula,

Nemiqukuqela yamanzi ephuma emthonjeni wakho.

₁₆Mayiphalale phandle imithombo yakho,

Ibe yimijelo yamanzi ezitratweni.

₁₇Mayibe yeyakho, yeyakho wedwa,

Ingabi yeyabangéngabo abakowenu kunye nawe.

₁₈Malisikelelwe ithende lakho,

Uvuye ngumfazi wobutsha bakho;

₁₉Makabe yimazi yexhama elithandekayo, neyegogo elihle;

Amabele akhe akukholise ngamaxesha onke,

Uyotywe luthando lwakhe kuphele.

₂₀Yini na, nyana wam, ukuba uyotywe ngumkamntu,

Uwole isifuba sowolunye uhlanga?

₂₁Kuba iindlela zomntu ziphambi kwamehlo kaYehova,

Áyilungelelanise imikhondo yakhe.

₂₂Ubugwenxa bakhe bumthi hlasi ongendawo,

Abanjwe ziimbophelelo zesono sakhe.

₂₃Yena ufa kukuswela uqeqesho,

Ayobe ebuninzini bokumatha kwakhe.