IMIZEKELISO 4

₁Luveni, bonyana, uqeqesho lukayihlo,

Nizibaze iindlebe ukuze nikwazi ukuqonda.

₂Kuba ndininika imfundiso elungileyo;

Musani ukuwushiya umyalelo wam.

₃Kuba ndandingunyana kubawo,

Ndíthambile, ndímnye phambi koma.

₄Wandiyala ke, wathi kum,

Intliziyo yakho mayiwabambe amazwi am;

Gcina imithetho yam, uphile,

₅Rhweba ubulumko, rhweba ingqondo;

Musa ukulibala, ungàthi gu bucala entethweni yomlomo wam.

₆Musa ukubushiya, bókugcina;

Buthande, bókulondoloza.

₇Ingqalo yobulumko ithi, Rhweba ubulumko,

Ngako konke ukurhweba kwakho urhwebe ingqondo.

₈Búnonelele, bokuphakamisa;

Bokuzukisa, xa uthe wabuwola.

₉Boyinika intloko yakho isangqawe esihle,

Bokúpha isithsaba sokuhomba.

₁₀Yiva, nyana wam, uyamkele intetho yam,

Iba mininzi kuwe iminyaka yobomi.

₁₁Ndikuyálele indlela yobulumko,

Ndikunyathelisé emkhondweni wokuthe tye.

₁₂Ekuhambeni kwakho akayi kuxinana amabanga akho;

Nokuba uthe wagidima, akuyi kukhubeka.

₁₃Bambelela eluqeqeshweni, musa ukuluyeka;

Lulondoloze, ngokuba lububomi bakho.

₁₄Musa ukungena emendweni wabangendawo,

Unganyatheli endleleni yabanobubi.

₁₅Yiyeke; musa ukuya kugqitha kuyo;

Yicezele, ugqithe.

₁₆Kuba àbalali, ukuba àbathanga benze ububi;

Bemkelwa bubuthongo ukuba àbathanga bakhubekise abanye.

₁₇Kuba badla isonka sokungendawo,

Basele iwayini yogonyamelo.

₁₈Ke wona umendo wamalungisa unjengokukhanya komso,

Okuya kúbà mhlophe ngokuba mhlophe, kude kube semini enkulu.

₁₉Indlela yabangendawo injengesithokothoko;

Àbayazi into abakhubeka kuyo.

₂₀Nyana wam, wabazele indlebe amazwi am;

Intetho yam yithobele indlebe yakho.

₂₁Mayingemki emehlweni akho;

Yigcine entliziyweni yakho ngaphakathi.

₂₂Kuba ibubomi kwabayifumanayo,

Nempiliso enyameni yabo yonke.

₂₃Nazintweni zonke zigcinwayo, londoloza intliziyo yakho;

Kuba aphuma kuyo amathende obomi.

₂₄Kususe kuwe ukujibiliza komlomo,

Nokuthi gu bucala komlomo kudedise kuwe.

₂₅Amehlo akho makakhangele athi gca,

Neenkophe zakho zithi nzo kokuphambi kwakho.

₂₆Lungelelanisa umkhondo wonyawo lwakho,

Zonke iindlela zakho zizimaseke.

₂₇Musa ukuthi gu bucala ngasekunene nangasekhohlo;

Susa unyawo lwakho entweni embi.