IMIZEKELISO 27

₁Musa ukuqhayisa ngemini yangomso;

Kuba akukwazi okuya kuzalwa yimini.

₂Mawudunyiswe ngomnye, ingabi ngowakho umlomo;

Mayibe nguwumbi, ingabi yeyakho imilebe yomlomo.

₃Linzima ilitye, ingumthwalo intlabathi;

Ke yona ingqumbo yesimathane inzima kunezo nto zombini.

₄Ubujorha bunobushushu, umsindo sisiphango;

Nekhwele, ngubani na onokuma phambi kwalo?

₅Kulungile ukohlwaywa ekuhléni

Ngaphezu kothando olusitheleyo.

₆Akholekile amanxeba omhlobo;

Kodwa yingxungxu ukwanga kotshaba.

₇Umphefumlo ohluthiyo ugqusha incindi yobusi;

Umphefumlo olambileyo, yonke into ekrakra imnandi kuwo.

₈Njengentaka ephekuziweyo endlwini yayo,

Injalo indoda ephekuziweyo ekhayeni layo.

₉Ioli nesiqhumiso sivuyisa intliziyo,

Kwanobumnandi bomhlobo obuphuma ekucebiseni komphefumlo.

₁₀Musa ukumlahla umhlobo wakho nomhlobo kayihlo;

Ungangeni endlwini yomzalwana wakho ngemini yokusindeka kwakho;

Úlungile ummelwane okufuphi, kunomzalwana okude.

₁₁Yiba nobulumko, nyana wam, uyivuyise intlizyo yam;

Ukuze ndimphendule ngezwi ondingcikivayo.

₁₂Onobuqili uyabubona ububi, azímele;

Ke zona iziyatha zigqitha kubo, zohlwaywe.

₁₃Thabatha ingubo yakhe omele omnye;

Ménze isibambiso ngenxa yezinto zasemzini.

₁₄Osikelela ummelwane wakhe ngezwi elikhulu, evuka kwakusasa,

Kubalelwa ekuthini uyamtshabhisa.

₁₅Uqhoqhozo oluxikileyo mini ngemvula,

Nomfazi onengxabano, kuyafana;

₁₆Omnqandayo, unqanda umoya;

Isandla sakhe sokunene sihlangabezene neoli.

₁₇Isinyithi silola isinyithi,

Indoda ilola ubuso bowayo.

₁₈Olondoloza umkhiwane wodla isiqhamo sawo;

Ogcine inkosi yakhe wozukiswa.

₁₉Emanzini, ubuso buyelelene nobuso;

Injalo intliziyo yomntu kumntu.

₂₀Elabafileyo nenzonzobila azinakuhlútha,

Namehlo omntu akanakuhlútha.

₂₁Ukhamba lolokunyibilikisa isilivere, iziko lelokunyibilikisa igolide,

Nendoda iya ngokokudunyiswa kwayo.

₂₂Nokuba uthe wasingqusha isimathane esingqushweni phakathi komngqusho ngentonga yokungqusha,

Akuyi kusuka kuso ukumatha kwaso.

₂₃Khuthalela ukubazi ubume bempahla yakho emfutshane,

Yibhekise intliziyo yakho emihlambini yakho.

₂₄Ngokuba ayingonaphakade ingqwebo;

Nesithsaba sesezizukulwana ngezizukulwana, yini na?

₂₅Sithe tshabalala nje isikhotha, kuvela uhlaza,

Ihlanganisiwe imifuno yeentaba:

₂₆Amatakane ngawokukwambesa,

Ixabiso lentsimi ziinkunzi zeebhokhwe;

₂₇Amasi eebhokhwe alingene ukudla kwakho, nokudla kwendlu yakho,

Nokuphila komthinjana wakho.