IMIZEKELISO 26

₁Njengekhephu ehlotyeni, njengemvula ngexa lokuvuna,

Lunjalo ukungasifaneli isinyabi uzuko.

₂Njengondlunkulu ekuphapha-phaphazeleni kwakhe, njengenkonjane ekubalekeni kwayo,

Kunjalo ukutshabhisa ngaphandle kwesizathu; akuyi kuphumelela ntweni.

₃Iziniya yeyehashe, umkhala ngowe-esile,

Intonga yeyomhlana wesinyabi.

₄Musa ukusiphendula isinyabi ngokokumatha kwaso,

Hleze usifuze.

₅Siphendule isinyabi ngokokumatha kwaso,

Hleze sibe sisilumko kwawaso amehlo.

₆Únqumla iinyawo, usela ugonyamelo,

Osithuma imicimbi yakhe isinyabi.

₇Nqwa nokulengalenga kwemilenze yesiqhwala,

Umzekeliso emlonyeni wesinyabi.

₈Njengokubopha ilitye esisawulweni,

Unjalo osinika uzuko isinyabi.

₉Ngameva angene esandleni senxila

Umzekeliso ongene emlonyeni wesinyabi.

₁₀Okuninzi kuzala into yonke;

Ke wona umvuzo wesinyabi, kwanomvuzi waso, bayadlula.

₁₁Njengenja ibuyela emhlanzweni wayo,

Sinjalo isinyabi ukuphinda ukumatha kwaso.

₁₂Ùyayibona indoda ilumkile kwawayo amehlo,

Kukho ithemba ngesinyabi kunayo.

₁₃Ivila lithi, Kukho ingonyama endleleni,

Kukho ingonyama ezitratweni.

₁₄Ucango lujinga ezihinjizini• zalo,

Linjalo ivila elukhukweni lwalo.

₁₅Ivila lifaka isandla salo esityeni,

Yindiniso ukusibuyisela kwasemlonyeni walo.

₁₆Ivila lilumkile kwawalo amehlo

Kunabasixhenxe abaphendula ngemvo.

₁₇Úbamba ngendlebe inja igqitha,

Ophuphuma umsindo ngembambano angephambi kwayo.

₁₈Njengedwadwasi elijula izikhuni

Neentolo zokufa,

₁₉Injalo indoda ekhohlisa ummelwane wayo,

Ibe isithi, Andidlali na?

₂₀Zakuphela iinkuni, uyacima umlilo;

Kwakuba kungekho ntlebi, iyadamba ingxabano.

₂₁Nqwa namalahle amnyama kumalahle avuthayo,

Nqwa neenkuni kumlilo, indoda enengxabano ukuphemba imbambano.

₂₂Amazwi entlebi anjengemithamo imnandi;

Yona ihla iye ezingontsini zombilini.

₂₃Ligwebu lesilivere, lalekwé empahleni yodongwe,

Umlomo ovuthayo unentliziyo enobubi.

₂₄Ngemilebe yomlomo wakhe úyanyhwalaza umthiyi;

Embilinini yakhe umisa inkohliso.

₂₅Xa athe walimnandisa ilizwi lakhe, musa ukukholwa nguye;

Kuba ngamasikizi asixhenxe entliziyweni yakhe.

₂₆Intiyo izifihla ngenkohliso;

Ububi bayo bozityhila esikhungwini.

₂₇Omba isihogo weyela kuso;

Oqengqa ilitye, libuyela kuye.

₂₈Ulwimi oluxokayo luyabathiya abatyunyuzwa lulo;

Nomlomo ocengacengayo usebenza ububi.