IMIZEKELISO 24

₁Musa ukubamonela abantu abanobubi;

Ungakunqweneli ukuba uhlale nabo.

₂Kuba intliziyo yabo icamanga ukubhuqa,

Nomlomo wabo uthetha ngokwaphula.

₃Indlu yona yakhiwa ngobulumko;

Izinziswe ngengqondo;

₄Ngokwazi kuzaliswa amaqonga

Bubuncwane bonke obunqabileyo nobumnandi.

₅Umfo osisilumko unamandla,

Nendoda enokwazi ibonakalisa amandla amakhulu;

₆Ngokuba, úkhokelwé bubulumko, woba nako ukuzilwa iimfazwe zakho;

Nosindiso lusebuninzini bamaphakathi.

₇Ubulumko bunqabile kwisimathane;

Asiwuvuli umlomo waso ensangweni.

₈Ocinga ngokwenza ububi,

Lowo báthi ukumbiza nguMayelenqe.

₉Iyelenqe lesimathane sisono;

Ulisikizi ebantwini umgxeki.

₁₀Ùthe waphelelwa ngemini yembandezelo,

Oba ebandezelwe amandla akho.

₁₁Hlangula abasiwa ekufeni;

Nabajingxela baye ekubulaweni, khawubanqande.

₁₂Nokuba ùthi, Yabona besingakwazi oko:

Umlinganiseli weentliziyo yena akakuqondi na?

Umgcini womphefumlo akakwazi na?

Akayi kumbuyisela umntu ngokomsebenzi wakhe, yini na?

₁₃Yidla ubusi, nyana wam, kuba bulungile;

Nencindi imnandi ekhuhlangubeni lakho.

₁₄Bázi ke ubulumko emphefumlweni wakho;

Ukuba uthe wabufumana, kobakho ikamva,

Lingànqunyulwa ithemba lakho.

₁₅Wena ungendawo, musa ukulilalela ikhaya lelungisa,

Ungasibhuqi isikhundla salo;

₁₆Kuba ilungisa liwa kasixhenxe, livuke;

Ke abangendawo bakhubeka phantsi kwenkxwaleko.

₁₇Musa ukuvuya ekuweni kotshaba lwakho,

Ingagcobi intliziyo yakho ekukhubekeni kwalo;

₁₈Hleze akubone uYehova, kube kubi emehlweni akhe,

Awubuyise umsindo wakhe kulo.

₁₉Musa ukuvutha ngumsindo ngabenzi bobubi,

Ungabamoneli abangendawo;

₂₀Kuba umenzi wobubi akayi kuba naka-mva;

Isibane sabangendawo siya kucinywa.

₂₁Nyana wam, moyike uYehova nokumkani,

Ungazibandakanyi nabanokumbi;

₂₂Kuba kofika ngesiquphe ukusindeka kwabo;

Ilishwa leminyaka yabo, ngubani na olaziyo?

₂₃Nala mazwi ngawezilumko:

Ukukhetha ubuso ekugwebeni akulungile.

₂₄Othi kongendawo, Ùlilungisa wena,

Ziya kumqalekisa izizwe; ziya kumbhavumela iintlanga.

₂₅Kuya kuba mnandi kwabamohlwayayo;

Kubo koza intsikelelo enokulungileyo.

₂₆Wanga imilebe yomlomo

Ophendula ngamazwi athe gca.

₂₇Lílungise ishishini lakho phandle,

Uzisebenzele entsimini yakho;

Emveni koko wakhe indlu yakho.

₂₈Musa ukuba lingqina ngommelwane wakho ngaphandle kwesizathu;

Ùngásuka uthomalalise na nangomlomo wakho?

₂₉Musa ukuthi, Njengoko enzé ngako kum, ndiya kwenjenjalo nam kuye,

Ndiya kubuyisela indoda ngokomsebenzi wayo.

₃₀Ndagqitha entsimini yendoda elivila,

Nasesidiliyeni somntu oswele ingqondo,

₃₁Ndafika simile imithuma sonke siphela;

Ngaphezulu senile ngamarhawu,

Nodonga lwaso lwamatye ludilikile.

₃₂Ndakhangela, ndasigqala ngentliziyo,

Ndabona, ndamkela uqeqesho.

₃₃Ithi, Intwana yobuthongo, intwana yokozela,

Intwana yokukhwabusha izandla ukuba ndilale:

₃₄Boza ubuhlwempu bakho njengomphangi;

Nokuswela kwakho njengendoda enengweletshetshe.