IMIZEKELISO 23

₁Xa uthe wahlala phantsi, ukuba udle nomlawuli,

Qonda uqonde lowo uphambi kwakho;

₂Ubeke isitshetshe emqaleni wakho,

Ukuba ùngumntu onombilini.

₃Musa ukuzinqwenela izidlo zakhe ezinencasa;

Kukudla kwenkohliso.

₄Musa ukuzidinisa ngokufuna ubutyebi;

Yeka okwakho ukuqonda.

₅Amehlo akho ùya kuwasukelisa ubutyebi na, bungekho nje?

Kuba bona buzenzela amaphiko,

Buphaphazela njengexhalanga elisinge ezulwini.

₆Musa ukudla ukudla koliso libi,

Ungazinqweneli izidlo zakhe ezinencasa;

₇Kuba njengoko anjalo ocinga yedwa, únjalo yena;

Úthi kuwe, Yidla usele,

Ukanti intliziyo yakhe ayinawe;

₈Umthamo wakho owudlileyo ùya kuwuhlanza,

Ulahlekwe ngamazwi akho amnandi.

₉Musa ukuthetha ezindlebeni zesinyabi;

Ngokuba siya kuyidela ingqiqo yokukhuluma kwakho.

₁₀Musa ukuwushenxisa umlimandlela wakudala;

Ungangeni emasimini eenkedama;

₁₁Kuba umkhululi wazo womelele;

Wobambana nawe yena ngobambano lwazo.

₁₂Yinikele intliziyo yakho eluqeqeshweni,

Neendlebe zakho entethweni yokwazi.

₁₃Musa ukuluyeka uqeqesho emntwaneni;

Ukuba ùthe wambetha ngentonga akayi kufa.

₁₄Wombetha ngentonga,

Uhlangule umphefumlo wakhe kwelabafileyo.

₁₅Nyana wam, ukuba ithe yalumka intliziyo yakho.

Yovuya intliziyo yam, kwaeyam lo,

₁₆Zidlamke izintso zam

Ekuthetheni komlomo wakho okuthe tye.

₁₇Intliziyo yakho mayingabamoneli aboni;

Ke mayizonde ukoyika uYehova imini yonke;

₁₈Inene, kukho ikamva,

Nethemba lakho aliyi kunqunyulwa.

₁₉Yiva, wena nyana wam, ulumke,

Uyinyathelise intliziyo yakho ithi gca endleleni.

₂₀Musa ukuba phakathi kwamasela-wayini,

Naphakathi kwamadla-kudla;

₂₁Kuba isela-wayini nedla-kudla liyahlwempuzeka;

Kona ukozela kwambesa amajacu.

₂₂Mphulaphule uyihlo, lowo wakuzalayo,

Ungamdeli unyoko akuba mkhulu.

₂₃Thenga inyaniso, ungathengisi ngayo;

Nobulumko, noqeqesho, nengqondo.

₂₄Úgcoba kakhulu uyise welungisa;

Ozele isilumko uyavuya ngaso.

₂₅Makavuye uyihlo nonyoko,

Agcobe umfazi owakuzalayo.

₂₆Ndínike intliziyo yakho, nyana wam,

Amehlo akho akholiswe ziindlela zam.

₂₇Kuba sisihogo esinzulu ihenyukazi,

Liqula elimxinwa umfazi wolunye uhlanga.

₂₈Úde alale njengesihange,

Awandise amanginingini eluntwini.

₂₉Ungokabani na uYeha? Ungokabani na uYoo? Zinabani na iingxabano?

Inabani na inkalazo? Anabani na amanxeba angenasizathu?

Anabani na amehlo anozizi?

₃₀Anâbo balibala ewayinini,

Abangena bayiminyele iwayini ephithikeziweyo.

₃₁Musa ukuyikhangela iwayini, xa izenza ingqombela,

Xa ibengezelayo endebeni,

Xa ihla kamnandi;

₃₂Ukuphela kwayo iluma njengenyoka,

Iluma njengerhamba.

₃₃Amehlo akho aya kubona izinto zasemzini,

Intliziyo yakho ithethe impenduka;

₃₄Ube njengolele esazulwini solwandle,

Nanjengolele encotsheni yemasti;•

₃₅Uthi, Bándibetha, ándeva ntlungu;

Bándintlitha, àndaba nanto ndiyaziyo;

Ndiya kuvuka nini na? Ndiya kuphinda ke, ndiya kubuya ndiyifune.