U‐Mika 5

₁Kaloku zihlanganise ngamabandla, ntombi yamabandla! sibekiwe ekuvingcelekeni: ngoswazi bambetile esidleleni umgwebi wo‐Sirayeli!

₂Nawe, Beteleheme Eferata! umncinane ukuba pakati kwamawaka akwa‐Sirayeli; kodwa kuwe kwopumela kum ukuba ngumpati kwa‐Sirayeli, ozipumo zake zibe zikudala, emihleni yonapakade. ₃Noko wobayekelela kude kube lixesha azeleyo lowo oya kuzala; bandule abazalwana bake abaseleyo babuyele elusatsheni luka‐Sirayeli. ₄Waeya kuma ke, aluse ngamandla kayehova, ngobukulu begama likayehova, utixo wake: babeya kuhlala; ngokuba kaloku eya kuba mkulu kude kube sezincameni zomhlaba. ₅Woba luxolo kwa lowo.

Xeshekweni um‐Asiriya aya kungena ezweni letu, naxeshekweni aya kunyatela kuzo izindlukazi zetu, siya kwandula sivuse ngakuye abalusi abasixe̔nxe, namadoda atanjisiweyo asibozo. ₆Baya kugqiba ilizwe le‐Asiriya ngesiṙele, nelizwe lika‐Nimrode ezingenweni zalo: waeya kusisindisa kum‐Asiriya, okuya aya kungena elizweni letu, nokuya aya kunyatela emideni yetu. ₇Isisalela sika‐Yakobi sobako pakati kwezizwe ezininzi, njengombete uvela kuyehova, njengemvula pezu kwemifuno, engalindeli umntu, engalibaleli onyana babantu kanjako. ₈Ewe, isisalela sika‐Yakobi sobako pakati kwabaheyideni, pakati kwezizwe ezininzi, njengengonyama pakati kwezilo zehlati, njengengonyama entsha pakati kwemihlambi yezimvu, eti, nxa icandayo, inyatele pantsi ke, iqwenge nokuqwenga, kungeko osindisayo. ₉Isandla sako sopakanyiswa pezu kwabayimpi kuwe, nazo zonke intshaba zako ziya kunqanyulwa.

₁₀Kwakuya kuti ngomhla lowo, utsho uyehova, ukuba ndiya kunqamla amahashe ako kwa pakati kwako; nenqwelo zako ndiya kuzitshabalalisa. ₁₁Ndandiya kuzinqamla izixeko zelizwe lako, nazo zonke inqaba zako ndozici̔ta. ₁₂Ndiya kubunqamla nobugqi esandleni sako, uze ungabi nabo abalauli. ₁₃Ndandiya kuyinqamla imifanekiso yako eqingqiweyo nezifanekiso ezimiyo zako kwa pakati kwako; akusayi kupinda ubedeshe umsebenzi wezako izandla. ₁₄Nemifanekiso yako ka‐Ashera ndoyidonyula kwa pakati kwako, nezixeko zako ndozici̔takalisa. ₁₅Ndandiya kuyenza impindezelo ngengqumbo nangomsindo pezu kwabaheyideni, abo abangapulapulanga.