THOBITHI 9

₁Ndi hone Thobiasi a tshi vhidza Rafaele a mu vhudza a ri,

₂“Wa hashu Azaria, ṱuwani na vhalanda vhaṋa na gamela mbili ni ye muḓini wa Ragese nḓuni ya Gabaele ni mu ṋee luṅwalo ulu lwa vhuṱanzi, u ḓo ni ṋea mali iḽa. Ni vhuye nae a ḓe vhuṱamboni. ₃Inwi ni ṱhanzi ya muano wa Reguele wa uri ndi songo vhuya nda ṱuwa, zwino a thi koni u bva khawo. ₄Ni ḓivhe uri khotsi anga vha khou vhala maḓuvha. Arali nda tou lenga nga ḓuvha ḽithihi u humela hayani, vha ḓo ḽa mbilu nga nṋe.” ₅Ndi hone Rafaele na vhalanda vhaṋa na gamela mbili vha tshi dzhena nḓilani vha livha muḓini wa Ragese kha ḽa Media, vha swika vha dzula nḓuni ya Gabaele. Rafaele a ṋea Gabaele luṅwalo luḽa lwa vhuṱanzi a mu vhudza uri Thobiasi murwa wa Thobithi o vhinga na uri u khou mu vhidza vhuṱamboni. Gabaele a mbo ḓi sedza mikhwama ya mali, vha wana i tshee yo shatelwa, vha i hwesa dzigamela.

₆Ḽi tshi tsha vha fhinduwa, vha fara lwendo lwa u ya vhuṱamboni. Musi vha tshi dzhena nḓuni ya Reguele vha wana Thobiasi o tshingamela tshiswiṱulo. Thobiasi a takuwa a resha Gabaele. Gabaele a tsengisa miṱodzi, a mu khoḓa a ri, “Muḓivhalea ndi iwe, murwa wa khotsi a sa solisei, murwa wa ndele, mapakulile, ngavhe Muṋe washu a tshi u ṋea mashudu a bvaho ḽiṱaḓulu na mufumakadzi wau, na khotsi a mufumakadzi wau na mme awe. Nga hu rendwe Mudzimu ngauri ndo vhona murwa wa shaka ḽanga Thobithi, a no tou fana nae vhukuma.”