Tshalo
Ḽidimoni ḽi tshi thathwa
1Musi vho no fhedza u ḽa na u nwa, vhabebi vha musidzana vha vhona tshi tshifhinga tsha u yo awela. Vha endedza muṱhannga uyo vha mu fhelekedza rumuni hune Sara a vha hone. 2Ndi hone Thobiasi a tshi humbula zwe Rafaele a mu laya, a bvisa tshivhindi na mbilu ya khovhe mukhwamani we a vha e nawo, a zwi vhea kha masimbe a ita tsemo. 3Ḽidimoni ḽa hambelwa nga munukho wa khovhe, ḽa shavhela Egipita Nṱha. Rafaele a ḽi tevhela henengei, a ḽi vhofha zwanḓa na milenzhe a mbo ḓi ḽi milisa tshivhindi.
4Musi vhabebi vha musidzana vha tshi bva rumuni ya u eḓela vha vala muṋango, Thobiasi a vuwa vhulaloni a vhudza Sara a ri, “Khaladzi anga, vuwani. Nga ri rabele ri humbele Muṋe washu uri a ri itele tshilidzi, a ri tsireledze.” 5Sara a vuwa, vha thoma u rabela, vha humbela u tsireledzwa. Thobiasi a tshi rabela a ri,
“Nga hu rendwe Iwe
Mudzimu wa vhokhotsi ashu,
dzina ḽau nga ḽi rendwe lini na lini.
Ḽiṱaḓulu na tsiko yau yoṱhe
nga zwi u rende lini na lini.
6Ndi iwe wo vhumbaho Adamu,
wa mu ṋea Efa mufumakadzi wawe
uri a mu farise, a mu tikedze.
Kha vhenevho vhavhili
ha tumbuka vhathu.
Ndi Iwe we wa ri, ‘A si zwavhuḓi
munna a tshi dzula e eṱhe;
nga ri mu itele mufarisi
ane a nga ene.’
7Zwino Muṋe washu,
ndi khou vhinga khaladzi anga uyu
zwi sa bvi kha nyemulo,
zwi tshi bva kha u mu funa
nga mbilu nthihi.
Ri itele tshilidzi vhuvhili hashu
u ri tendele ri tshile roṱhe
ri lalame roṱhe.”
8Vhuvhili havho vha ri, “Amen, Amen,” 9vha lala.
Hone Reguele a vuwa a vhidza vhalanda vhawe. Vha bva nae u yo bwa tshalo, 10nge a ambela mbiluni a ri, “Thobiasi na ene arali a vuwa o fa, ri ḓo vha na samba ra nyadziwa.” 11Musi vho no fhedza u bwa tshalo, Reguele a vhuelela nḓuni, a vhidza mufumakadzi wawe, 12a ri, “Rumani muṅwe wa vhasidzana vha vhalanda a dzhene a vhone arali Thobiasi a tshi kha ḓi tshila; arali o fa ri mu swiṱe hu si na ane a zwi ḓivha.” 13Vha ruma musidzana uyo, vha funga luvhone, vha vula vothi, musidzana a dzhena, a wana vho eḓela vhoṱhe hu si na na tshini. 14Musidzana uyo a bvela nnḓa a yo hevhedza vhabebi vha muselwa uri Thobiasi u a tshila, a hu na na tsho tshinyalaho. 15Ndi hone Reguele a tshi renda Mudzimu wa ḽiṱaḓulu a ri,
“Nga hu rendwe Iwe Mudzimu,
nga thendo dzoṱhe dzi sa solisei.
Nga hu khoḓwe Iwe lini na lini.
16Nga hu rendwe Iwe we wa ntakadza;
zwe nda zwi ofha a zwo ngo itea.
Wo ri itela tshilidzi tshihulu, tshi sa gumi.
17Nga hu rendwe Iwe;
muṱhannga uyu,
ṅwana muthihi fhedzi wa vhabebi vhawe,
na uyu musidzana,
ṅwana muthihi fhedzi wa vhabebi vhawe,
wo vha pfela vhuṱungu.
Muṋe wa zwoṱhe, vha khathutshele u vha tsireledze,
u ite uri vha lalame
vhó takala nga vhuthu hau.”
18Ndi hone Reguele a tshi vhudza vhalanda vhawe uri vha fukedze tshalo mapfuvhi a sa athu tswuka.
19Reguele a vhudza mufumakadzi wawe uri a bike mikonde minzhi ya tshinkwa, ene muṋe a bva a ya sambini ḽawe ḽa kholomo na nngu, a nanga phulwana mbili na nngu nṋa, a ri dzi ṱhavhiwe. Zwenezwo vhalanda vha thoma u lugisela vhuṱambo. 20Reguele a vhudza Thobiasi a ana a ri, “A u nga ṱuwi hu sa athu fhela maḓuvha a fumi na maṋa (14), u ḓo dzula fhano u tshi khou ḽa u tshi nwa na nṋe, nahone u ḓo takadza mbilu ya ṅwananyana wanga yo vhaisalaho zwingafhangafha. 21U tshi ṱuwa u dzhie hafu ya zwoṱhe zwine nda vha nazwo, u ṱuwe nazwo na Sara u mu ise ha khotsi au no takala. Hafu iṅwe ndi ifa ḽau ḽa musi nṋe na mufumakadzi wanga ri si tsheeho. Takala ṅwananga! Nṋe ndi khotsi au, Edina ndi mme au. Riṋe ri vhabebi vhau na khaladzi au uyu na misi i ḓaho. Zwenezwo, takala ṅwananga.”
