SIRAKHA 34

₁Zwe tsilu ḽa fulufhela

ndi zwa mahandana,

ḽi a ḓifhura.

Miloro i ṋea tsilu phapha.

₂Muthu a no fulufhela miloro

u nga muthu a no fara mirunzi kana a pandamedza muya.

₃Vhukuma bono ḽa miloro ḽi fana na tshifhaṱuwo tshau

tshine wa tshi vhona kha tshivhoni.

₄U nga ṱanzwa tshithu tsho kunaho nga tsha tshika naa?

Mazwifhi a nga khwaṱhisa vhuṱanzi naa?

₅U bvumba na maṱula na miloro ndi mahandana,

zwi nga miloro ya musadzi e kha vhuṱungu ha u beba.

₆Arali ḽi si bono ḽi bvaho kha Waṱaḓuluṱaḓulu,

u songo zwi vhea mbiluni.

₇Miloro yo no xedza vhanzhi, vho i fulufhelaho vho lovha.

₈Mulayo wo khunyeledzwa hu si na vhufhura ho raloho;

vhuṱali ho khunyelelaho ndi u tevhedza ngoho.

₉Muthu a faraho nyendo u wana nḓivho nnzhi;

wa sa tshimbila u ḓo dzea khaladzi;

muthu a re na nḓivho u amba zwi pfalaho.

₁₀Muthu a sa athu vhuya a lingiwa ha na nḓivho;

o endelaho mashango ha kundwi nyeletshedzo.

₁₁Ndo vhona zwinzhi ndí nyendoni dzanga,

Ndi nga si kone u amba zwoṱhe zwe nda guda.

₁₂Ndi lunzhi lwe nda ṱoḓou fa,

hone nda tshidzwa nge nda vha na nḓivho iyi:

₁₃Vha no ofha Muṋe washu vha a tshila,

ngauri vha fulufhela a na maanḓa a u tshidza.

₁₄Muthu a no ofha Muṋe washu ha timatimi;

ha ofhi tshithu;

u fulufhela Muṋe washu.

₁₅Mashudu muthu a ofhaho Muṋe washu!

O fulufhela nnyi? O tikwa nga nnyi?

₁₆Maṱo a Muṋe washu o sedza vhane vha mu funa,

ndi Ene tshiṱangu tshavho tsha maanḓa na thikho yo khwaṱhaho.

Ndi Ene mushasha wavho ḽi tshi fhisa,

murunzi wavho ḓuvhani ḽa masiari tshivhangalala ndi Ene,

u vha tsireledza vha si khukhulwe, a vha tika vha si we.

₁₇U vha rudza mbilu, a vha takadza;

u vha ṋea mutakalo na vhutshilo na mashudu.

₁₈Nduvho ye wa wana nga vhukwila yo kumala;

nduvho dza vhavhi Mudzimu ha dzi ṱanganedzi.

₁₉Waṱaḓuluṱaḓulu ha takaleli nduvho dza vhavhi;

naho vha mu ṋekedza zwiṱhavhelo zwinzhi,

ha vha hangweli.

₂₀U ṋekedza Mudzimu tshiṱhavhelo tsha thundu ya mushai,

zwi nga u shidzha ṅwana khotsi awe vho sedza.

₂₁U ḽa makoko ndi vhutshilo ha vhashai;

u vha dzhiela one ndi vhupondi.

₂₂U dzhiela muthu tsha u tshila ngatsho

ndi u mu vhulaha;

u dzima mushumi malamba awe ndi u shulula malofha.

₂₃Arali muthu muṅwe a fhaṱa, muṅwe a thutha,

vha vhuelwa nga mini arali hu si u tambula?

₂₄Arali muṅwe a rabela, muṅwe a teketela,

Muṋe washu u ḓo pfa ipfi ḽa nnyi?

₂₅Arali muthu a kwama tshitumbu,

a ri u ṱamba a dovha a tshi kwama,

zwenezwo o ḓidinelani nga u ṱamba?

₂₆Zwi ḓi fana na muthu a no ḓidzima zwiḽiwa

a tshi itela u laṱa vhutshinyi hawe.

A mbo ḓi dovha a yo ita vhutshinyi honoyo.

Zwi farisani?

Thabelo yawe i ḓo pfiwa nga nnyi?

U ḓiṱukufhadza hawe ho mu farisani?