SIRAKHA 33

₁Muthu a no ofha Muṋe washu

ha nga welwi nga khombo;

u ḓo mu tshidza milingoni yoṱhe.

₂A hu na muṱali a vhengaho mulayo,

huno wa muhoyo u fana na gungwa ḽi no hwalwa nga ḓumbu.

₃Muthu wa ṱhalukanyo u fulufhela Mulayo;

u vhona u tshi nga vhuporofita, a u dzinginyei.

₄Dzudzanya zwine wa yo amba, ndi hone u tshi ḓo thetsheleswa;

ivha na ngoho u sa athu fhindula.

₅Mbilu ya tsilu i nga ḽilinga ḽa goloi; i sokou mona ya ita danga.

₆Khonani ya tshiambela i fana na bere;

i ḓi lila yo namelwa nga nnyi na nnyi.

₇Ndi mini ḓuvha ḽiṅwe ḽi tshi fhira ḽiṅwe?

Hufha misi yoṱhe i tshi vhonetshelwa nga ḓuvha ḽeneḽo ḽithihi!

₈Zwi fhambanyiswa nga vhuṱali ha Muṋe washu;

ndi Ene o vheaho zwifhinga zwo fhambanaho

zwa ṅwaha na vhuṱambo.

₉Misi miṅwe u a i hulisa a i ita mikhethwa,

miṅwe a i ita misi zwayo.

₁₀Ndi zwone,

vhathu vhoṱhe vho vhumbwa nga vumba;

na Adamu o vhumbwa nga mavu.

₁₁Naho zwo ralo Muṋe washu nga nḓivho yawe khulu

u vhumba vhathu vha sa fani,

a vha tshimbidza nḓilani dzo fhambanaho.

₁₂Vhaṅwe u a vha shudufhadza a vha hulisa,

vhaṅwe u vha ita vhakhethwa

a vha sendedza tsini na Ene muṋe;

vhaṅwe u a vha teketela

a vha nyadzisa,

a vha sudzulusa vhudzuloni havho.

₁₃Zwi ḓi nga vumba ḽi zwanḓani zwa muvhumbi;

u ḽi vhumba nga hune a funa,

na vhathu vho tou ralo

vhe zwanḓani zwa Muvhumbi wavho;

u vha pfufha nga hune a vhona zwo fanela.

₁₄Vhavhi vha fhambana na vhavhuya

u ḓi nga vhuvhi vhu tshi fhambana na vhuvhuya,

lufu lwa fhambana na vhutshilo.

₁₅Zwino elekanyani mishumo yoṱhe ya Waṱaḓuluṱaḓulu;

i tshimbila nga mivhili,

muṅwe u fhambana na muṅwe.

₁₆Zwino ndi wa u fhedzisela u ṅwala,

ndi nga a no ṱala ṱhalane vhakaṋi vho no fhira,

hone ho ri u tsha gole nda vhona.

₁₇Muṋe washu o ntshudufhadza nda fhira vhoṱhe;

ndo vhuya nda ḓadza bonḓelo ḽanga

u ḓi nga mukaṋi vhukuma wa nḓirivhe.

₁₈Ndi ni ḓivhadza uri ndo vha mushumi wa biko,

ndi sa shumeli nṋe ndi ndoṱhe,

ndi tshi shumela muṱoḓi wa vhuṱali muṅwe na muṅwe.

₁₉Inwi vhavhusi vha shango, nthetsheleseni!

Inwi vhahulwane vha tshivhidzo, ipfani:

₂₀Vhutshilo hau hoṱhe,

u songo tenda u vhuswa nga ṅwana wau

kana mufumakadzi kana murathu kana khonani.

Musi u tshi kha ḓi fema,

u songo tenda muthu a tshi ḽa ifa ḽau,

u sa ḓo ḓisola wa sala u tshi ḽi vhila.

₂₁U songo ṋea muṅwe thundu yau;

₂₂ndi khwiṋe vhana vha tshi luvhelela iwe,

u fhira iwe u tshi luvhelela vhone.

₂₃Langa zwoṱhe zwine wa ita, u songo sia phungo mmbi.

Ivha wa phanḓa kha zwoṱhe,

khuliso yau u songo i shata tshika.

₂₄Musi maḓuvha a vhutshilo hau a tshi vho fhela,

lufu lwó no swika,

ndi tshone tshifhinga tsha u kovha ifa ḽau.

₂₅Tsha donngi ndi hatsi na ṱhamu na mihwalo;

tsha phuli ndi vhuswa na ndayo na u shuma.

₂₆Shumisa phuli yau,

ndi hone u tshi ḓo rudza mbilu,

wa sa mu shumisa u ḓo ṱoḓa u vhofhololwa.

₂₇Dzhogo na tshimebi

zwi ḓo swotola mutsinga wa donngi;

tsha phuli i sa pfi ndi u tambudzwa na u patwa nga khotho.

₂₈I shumise uri i vhe na tshine ya ita;

u shaya mushumo hu mu funza u silinga.

₂₉Shumisa phuli yau,

henefho hune ya vha hone,

ya sa thetshelesa,

i vhofhe milenzhe nga khotho dza tsimbi.

₃₀Hone u songo itela muthu tshiṱuhu wa kalula,

u songo mu ita zwi songo mu fanelaho.

₃₁Arali u na phuli nthihi fhedzi,

i fare unga iwe muṋe;

wo mu renga nga mutengo muhulu.

₃₂Arali u na phuli nthihi fhedzi,

i fare unga murathu wau; u i lila

unga u tshi lila vhutshilo hau.

₃₃Arali wa mu tambudza,

a shavha a ṱuwa,

u ḓo mu ṱoḓela ngafhi?