ESTERE (TSHIGIRIKI) 10

_1/4Zwino Maradokai a ri, “Mushumo uyu ndi wa Mudzimu. Ndi elelwa muloro we nda u lora nga mafhungo aya, a hu na na tshithihi tshe tsha si khunyelele. _3/6Ho vha hu na kusima kwe kwa aluwa kwa vha mulambo, na tshedza na ḓuvha na muḓalo wa maḓi. Mulambo ndi Estere; o vhingwa nga khosi a vha mufumakadzi. _4/7Maḓiragoni mavhili ndi nṋe na Hamani. _5/8Dzitshakha ndi vhe vha kuvhanganela u lozwa dzina ḽa Majuda. _6/9Lushaka luthihi lwa vhavhuya ndi lwashu, ndi Vhaisraele; vho ṱavhela Mudzimu mukosi vha tshidzwa. Vhukuma Muṋe washu o tshidza vhathu vhawe a ri lamukisa khomboni dzoṱhe idzo. Mudzimu o ita zwiga na zwimangadzo zwihulu zwi sa athu vhuya zwa itea kha dzitshakha.

_7/10“Ndi zwe a ita madeṅwa mavhili, ḽiṅwe deṅwa ḽa vha ḽa vhathu vha Mudzimu, ḽiṅwe la vha ḽa tshakha dziṅwe dzoṱhe. _8/11Madeṅwa ayo mavhili o khunyeledzwa nga tshikhathi na tshifhinga na ḓuvha ḽa khaṱhulo ḽo vhewaho nga Mudzimu; a katela tshakha dzoṱhe. _9/12Mudzimu o elelwa vhathu vhawe nga u ralo, a ita uri vhathu vhawe vha wanale vho ṱamba vha si na mulandu tsengoni.

_10/13“Ndi zwine Majuda vha ḓo kuvhangana vha pembela nga dakalo phanḓa ha Mudzimu, vha ita vhuṱambo ha maḓuvha aya nga ḓuvha ḽa fumi na vhuṋa na ḽa fumi na vhuṱanu nga ṅwedzi wa Adara zwi tshi ya nga mirafho yoṱhe i kha ḓi ḓaho ya vhathu vha Israele.”