NYENGEDZO E
1Khophi ya luṅwalo lwa Serekesese ngeyi, lu ri:
Nṋe Serekesese khosi khulu ndi ṅwalela vhavhusi vha madzingu a ḓana na mahumi mavhili na maṱanu na mavhili (127), u bva India u swika Ethopia, ndi ṅwalela na vhalanda vha fulufhedzeaho kha muvhuso, ndi ri mulalo!
2Hu na vhathu vhanzhi vhane vha tshi tondiwa zwihulu, vha thoma u ḓihudza. 3Vhone vha ṱoḓa u vhaisa vhalanda vhashu, vha si fushee nga izwo, vha dovha vha itela na vhatondi vhavho tshimbevha nga u furesa. 4A vha fushei nga u dzivhisa vhaṅwe u livhuha, vha dovha vha vhona unga vha ḓo ponyoka khaṱhulo i sa ṱaluli ya Mudzimu Muvhonazwoṱhe, nge vha ḓihudza nga u dzula vha tshi khoḓiwa nga vhathu vha sa ṱalukanyi uri vhuvhuya ndi mini. 5Kanzhi vhanzhi vho vhewaho vhuimoni vhuhulwane muvhusoni vha anzela u longa tshanḓa kha u shulula malofha a vhathu vha si na mulandu, vha wela khomboni khulu i sa tsha lafhea nge vha fhurwa nga haṋwani ha u ḓifha ha khonani dzavho dze dza vhewa uri vha lange mafhungo a shango, 6vha fhura vhavhusi vha funaho u vhusa zwavhuḓi nga zwiambo zwi sa tshidzi. 7Muthu ha vhuyi a ṱoḓa u sedza kha histori ya kale ye ra amba uri a vhone izwo, a nga zwi vhona nga u sedza zwenezwo zwiito zwivhi zwe zwa itwa henefho phanḓa hashu nga magota ayo mavhi ane a vhusa a songo fanela. 8Hone misi i ḓaho ri ḓo ita nga hune ra kona uri muvhuso washu u vhe na vhudziki na mulalo, vhathu vhoṱhe vha tsireledzee, 9nga u vha na mashumele maswa, ra haṱula zwine zwa hwelelwa kha riṋe nga vhusedzi vhuhulu.
10Ndi uri Hamani murwa wa Hamedatha, wa Makedonia, muthu a si na na shotha ḽa malofha a Vhupheresia, a si na na vhuthu na vhuṱukuṱuku vhu no nga hashu, ro mu ṱanganedza nga vhuthu, 11a ḓiphina nga vhuthu vhune ra itela tshakha dzoṱhe, a vhuya a tou pfi “khotsi a khosi”, a pfi a gwadamelwe nga vhathu vhoṱhe, vhunga e ene wa vhuvhili muvhusoni wanga. 12Hone ene a kundwa u fushea nga vhuimo he a vhewa khaho, a vho ita tshimbevha tsha u ri dzhiela muvhuso khathihi na vhutshilo hashu. 13A dovha a luka vhunwa ha vhufhura, a sivhelela uri Maradokai a lozwiwe, ene mutshidzi washu a no endela u ri tonda, hu lozwiwe na Estere, ene mufumakadzi a sa solisei, na lushaka lwa havho lwoṱhe. 14O humbula uri arali a ita izwo, u ḓo ri fara ri si na vhaphalali, a dzhia muvhuso wa Vhapheresia a u ṋekedza Vhamakedonia.
15Huno ra wana uri Majuda, vhane munna uyu wa tshiṱuhu tshihulu a ri vha lozwiwe, a si vhaitazwivhi, vha vhuswa nga milayo mivhuya u fhira miṅwe yoṱhe; 16ndi vhana vha Waṱaḓuluṱaḓulu, Mudzimu a tshilaho, wa maanḓa mahulu, a re Ene we a ita uri muvhuso washu na wa vhomakhulukuku washu u ḓi dzula u tshi tshimbila ngonani.
17Zwenezwo ni songo londa maṅwalo e na ṅwalelwa nga Hamani murwa wa Hamedatha, 18ngauri onoyo we a ita vhutande uvhu o no nembeledzwa khoroni ya muḓi wa Shushani khathihi na vha muṱa wawe vhoṱhe. Ndi ṱhamu yo mu fanelaho ye a rwiwa kathihi nga Mudzimu Muṋe wa zwoṱhe. 19Zwenezwo ni ṱane khophi ya luṅwalo ulu hoṱhe-hoṱhe vhathuni, vhu vhe vhuṱanzi ha uri Majuda vho tendelwa u tevhedza milayo yavho vha sa ofhi tshithu. 20Zwino ni vha tikedze nga ḓuvha ḽo tetshelwaho u lozwiwa havho, ḓuvha ḽa fumi na vhuraru ḽa ṅwedzi wa fumi na vhuvhili, ṅwedzi wa Adara, uri vha ḓipilele kha vhane vha vha levhela. 21Ndi uri Mudzimu Ramaanḓaoṱhe o shandukisa ḓuvha iḽo ḽa u lozwiwa ḽa vha ḓuvha ḽa dakalo ḽa vhathu vhe a vha nanga. 22Zwino inwi Majuda ni fanela u pembelela ḓuvha iḽi ḽihulwane ḽi vhe ḽiṅwe ḽa vhuṱambo haṋu ho vhewaho ḽa dakalo, 23uri u bva zwino na misi i ḓaho ḽi vhe ḓuvha ḽaṋu na ḽa Vhapheresia vhane vha takalela khosi ḽa u pembelela u lamulelwa haṋu, kha maswina aṋu ḽi vhe ḓuvha ḽa u vha humbudza ndozwo yavho.
24Muḓi muṅwe na muṅwe na shango ḽiṅwe na ḽiṅwe ḽi sa tevhedzi nḓivhadzo iyi ḽi ḓo lozwiwa nga pfumo na mulilo ḽi sa khathutshelwi, lune ha si tsha ḓo fhira muthu na muthihi, zwivhanda na zwiṋoni na zwone zwi ḓo hu vhenga lini na lini.
