NYENGEDZO B
1Ngeyi khophi ya luṅwalo ulwo, lu ri:
Nṋe khosi khulu Serekesese, ndi ṅwalela vhavhusi vha madzingu a ḓana na mahumi mavhili na maṱanu na mavhili (127), na kha magota avho u bva India u swika Ethopia.
2Vhunga ndo vha muvhusi wa tshakha nnzhi, nda vha muṋe wa mashango oṱhe, ndo ḓiimisela uri ndi songo ḓihudza nga u vhona maanḓa anga, tshanga ndo ḓi vhusa vhathu ndi sa kaluli, ndi na khathutshelo, uri vhalanda vhanga vha tshile ḽo lala tshoṱhe, muvhusoni wanga hu vhe na mulalo, hu vhe na mvelaphanḓa, vhathu vha tshimbile hoṱhe mashangoni oṱhe nga hune vha kona, hu vhe na vhudziki vhu funwaho nga vhathu vhoṱhe.
3Musi ndi tshi eletshedzana na magota anga uri izwo ri nga zwi kona hani, ha amba Hamani, a no fhira roṱhe nga ṱhalukanyo, o no vhonalaho uri u funa khosi, u fulufhedzea tshoṱhe; ndi munna a fhirwaho nga thovhele fhedzi fhano muvhusoni. 4O ri sumbedza uri kha tshakha dzoṱhe dza ḽifhasi, hu na lushaka lwo balanganaho na mashango lu si na vhuluvha, milayo yalwo i fhambana na ya tshakha dziṅwe, vha endela u nyadza ndayo dza mahosi. Vha ḓo ri kundisa u vhumba muvhuso muthihi une wa ḓo ḓisela vhoṱhe zwivhuya.
5Zwino vhunga zwo vhonala uri lushaka holu lu fhambana na vhathu vhoṱhe, lu tshila nga u tevhedza milayo isili yo bvaho nḓilani, lu lwa na zwine zwa ri nakela, lwa ita vhuvemu vhuhulu lune muvhuso washu u si vhe na vhudziki. 6Zwino ri khou ḓivhadza uri vhoṱhe avho vhe na sumbedzwa vhone maṅwaloni o ṅwalwaho nga Hamani, ene mulangi wa mafhungo a shango, a dovha a vha khotsi ashu wa vhuvhili, vhathu avho vhoṱhe, hu tshi katelwa na vhafumakadzi vhavho na vhana vhavho, vha lozwiwe nga pfumo ḽa maswina avho vha sa pfelwi vhuṱungu, vha sa khathutshelwi, nga ḓuvha ḽa fumi na vhuṋa ḽa ṅwedzi wa fumi na vhuvhili, wa Adara, ṋaṅwaha. 7Ndi uri vhathu avho vhe tsha kale vha si vhe na vhuluvha, vha ḓi dzula vha si na vhuluvha, vha fanela u vhulahwa nga ḓuvha ḽithihi, vha godimela vhudzulavhafu, vha sie muvhuso washu wo dzika tshoṱhe, u na mulalo.
