MIRERO 15

₁Phindulo ya vhulenda i dzikisa mbiti;

ipfi ḽa vhuhali ḽone ḽi a sinyusa.

₂Lulimi lwa muṱali lu ita uri nḓivho i tamise;

mulomo wa tsilu u shulula vhutsilu fhedzi.

₃Maṱo a Muṋe washu a hoṱhe-hoṱhe,

a sedza vhavhi na vhavhuya.

₄Lulimi lwa vhulenda ndi muri u ṋeaho vhutshilo;

lwa vhufhura lu pwashekanya mbilu.

₅Tsilu ḽi nyadza ndayo dza khotsi aḽo;

ane a tenda u kaidzwa u na maano.

₆Nḓuni ya a no thetshelesa Mudzimu ho khokhana lupfumo;

zwine vhavhi vha zwi wana zwi vha ḓisela khombo.

₇Mulomo wa muṱali u anḓadza nḓivho;

mbilu dza matsilu a dzi fulufhedzei.

₈Tshiṱhavhelo tsha muvhi tshi nengisa Muṋe washu;

u takalela thabelo ya a si na vhufhura.

₉Muṋe washu u nengwa nḓila ya muvhi;

u funa a no ḓidinela u ita zwi re zwone.

₁₀A pambuwaho nḓilani u ḓo laṱiswa nga ṱhamu;

ane a si fune u kaidzwa u ḓo fa.

₁₁Muṋe washe u vhona na zwa dindini ḽa vhudzulavhafu,

zwino a nga kundwa hani u ḓivha zwi re mbiluni ya muthu?

₁₂Munyefuli ha funi u kaidzwa,

ha ṱoḓi nyeletshedzo kha muṱali.

₁₃Mbilu yo takalaho i tshisa tshifhaṱuwo;

u ḽa mbilu hu kulekanya nungo.

₁₄A na nzhele u ṱoḓisesa nḓivho;

tsilu ḽi fushea nga vhutsilu fhedzi.

₁₅A ḽaho mbilu u vhona misi yoṱhe i mivhi;

o rudzaho mbilu ene u dzula a tshi ḓiphiṋa.

₁₆Ndi khwiṋe u vha na zwi si gathi muthu a tshi ofha Muṋe washu,

u fhira u vha na lupfumo luhulu ú songo rudza mbilu.

₁₇Ndi khwiṋe ni tshi ḓiḽela miroho ni tshi funana,

u fhira u ḽa mapfura ni tshi dzula nga u vhengana.

₁₈Muthu wa mbiti u vusa khani;

a sa fheli mbilu u lamula nndwa.

₁₉Nḓila ya mubva yo shoshelwa mipfa;

ya a si na vhufhura i a tshimbilea.

₂₀Muṱhanngana wa vhuṱali u takadza khotsi awe;

muthu wa tsilu u nyadza mme awe.

₂₁A si na ṱhalukanyo u takadzwa nga vhutsilu;

wa ṱhalukanyo u fara nḓila ye ya tou tswititi.

₂₂Ha sa vha na nyeletshedzo maano a a pfuvha;

ha vha na vhaeletshedzi vhanzhi zwi a pfumba.

₂₃Muthu u a takadzwa nga u fhindula zwo teaho;

zwo naka hani ipfi ḽi tshi bulwa nga tshifhinga tsho teaho!

₂₄Muṱali u gonya nga nḓila i yaho vhutshiloni,

uri a sa ḓo godimela dindini.

₂₅Muṋe washu u thutha nnḓu ya mudzia-u-ḓihudza,

tsimu ya tshilikadzi a i tsireledza.

₂₆Muṋe washu u nengwa mihumbulo ya muvhi,

hone maipfi a vhuthu ha solisei.

₂₇Ane a ṱoḓa u pfuma nga vhufhura u ṱulela muṱa wawe mafhanza,

hone ane a vhenga tshanḓanguvhoni u ḓo lalama.

₂₈A no thetshelesa Mudzimu

u ranga u elekanya, a konou fhindula;

mulomo wa muvhi wone u shulula vhuvhi.

₂₉Muṋe washu u kule na vhavhi;

thabelo ya vhane vha mu thetshelesa u a i pfa.

₃₀Tshifhaṱuwo tsho tshaho tshi takadza mbilu;

mafhungo a takadzaho a ṋea muthu nungo.

₃₁Ane a tshi laiwa a thetshelesa,

u ḓo dzula na vhaṱali.

₃₂U landula ndayo ndi u ḓinyadza;

u tenda u kaidzwa ndi u wana ṱhalukanyo.

₃₃U ofha Muṋe washu zwi funza muthu vhuṱali;

ranga u ḓiṱukufhadza,

u ḓo konou huliswa.